Êxodo 22

ବାଦୁଲି ହୀନି ମେ଼ରା

1 ଆମ୍ବାଆସି କ଼ଡି କି ମେ଼ଣ୍ତା ଡଂଗା ଆ଼ହାଁ ପା଼ୟିନେସି କି ପା଼ର୍‌ନେସି, ଆତିହିଁ ଏ଼ୱାସି ର଼ କ଼ଡିତି ବାଦୁଲି ପା଼ସାଗଟା କ଼ଡିୟାଁ ଅ଼ଡ଼େ ର଼ ମେ଼ଣ୍ତା ବାଦୁଲି ସା଼ରିଗଟା ମେ଼ଣ୍ଡାୟାଁ ହୀନେସି। 2 ଅ଼ଡ଼େ ଡଂଗେଏସି ଇଲୁତା କୂଡୁ ତୁତ୍‌ହାଁ ହ଼ଡାମାନାଟି ଆସ୍‌ପି ଆ଼ତିହିଁ, ଆମ୍ବାଆସି ଏ଼ୱାଣାଇଁ ୱେ଼ଚି ୱେ଼ଚିହିଁ ହାୟେ ୱେ଼ନେସି, ଆତିହିଁ ଏ଼ୱାସି ଏ଼ୱାଣି ନେତେରିତି ଦ଼ହ ଆ଼ଅସି। 3 ସାମା ୱେ଼ଡ଼ା ହ଼ତି ଡା଼ୟୁ ଏ଼ୱାଣାଇଁ ପା଼ୟିନେସି, ଆତିହିଁ ଏ଼ୱାସି ଏ଼ୱାଣି ନେତେରିତି ଦ଼ହଗାଟାସି ଆ଼ନେସି; ଅ଼ଡ଼େ ସ଼ରୁ ଆ଼ହାମାନି ଆ଼ସ୍ତି ବାରେ ୱେଟ୍‌ନାୟି ଏ଼ୱାଣି କାମା; ଏ଼ ସ଼ରୁକି ଏ଼ନାୟି ହିଲେଏ, ଆତିହିଁ ସ଼ରୁ ତାକି ଏ଼ୱାସି ପା଼ର୍‌ପି ଆ଼ନେସି। 4 କ଼ଡି, କି ଗା଼ଡ଼୍‌ଦେ କି ମେ଼ଣ୍ତା ସ଼ରୁ କିତି ଆ଼ସ୍ତି ଡଂଗେଏଣି କେୟୁଟି ଜୀୱୁ ତଲେ ମେ଼ଡ଼ା ଆ଼ତିହିଁ, ଏ଼ୱାସି ଏ଼ଦାଆଁତି ରୀ ଗୂଣୁ ହୀନେସି।

5 ଆମ୍ବାଆସି ରଅଣି ଗୁଡିୟାତା କି ଅଙ୍ଗୁରି ବା଼ଡ଼ାତା କ଼ଡିୟାଁ ମେନେସି, କି ତାନି କ଼ଡି କି ମେ଼ଣ୍ତା ପିସ୍ତିହିଁ ଏ଼ କ଼ଡି କି ମେ଼ଣ୍ତା ଏଟ୍‌କାତା଼ଣା ଗୁଡିୟାତା ମେୟିଁନେ, ଆତିହିଁ ଏ଼ୱାସି ଏ଼ ଆର୍ନାତି ବାଦୁଲି ତାନି ଗୁଡିୟାତି ନେହିଁ ଆର୍ନା ଆ଼ଆତିଁ ତାନି ଅଙ୍ଗୁରି ବା଼ଡ଼ାତି ନେହିଁ ପା଼ଡ଼େୟି ଏ଼ୱାଣାକି ହୀନେସି।

6 ଅ଼ଡ଼େ ଇମିନି ହା଼ପ୍‌କା ଜା଼ଡ଼ାତା ହିଚୁ ଡାସ୍ତିହିଁ ଏ଼ ହିଚୁ ୱେହିଁ ୱେହିଁ ଆମ୍ବାଆରି କା଼ଡ଼୍‌ନୁତି କୁପା ଆ଼ଆତିଁ ପାଡା ଆ଼ହିମାନି ଆର୍ନା କି ଗୁଡିୟା ୱେହାହାନେ, ଆତିହିଁ ଏ଼ ହିଚୁ ଡାସ୍ତି ମାଣ୍‌ସି ଏମ୍ବାତି ମୂଲୁ ହୀନେସି।

7 ଅ଼ଡ଼େ ଆମ୍ବାଆସି ତାନି ପା଼ଡ଼ିତି ଲ଼କୁ ତା଼ଣା ଟାକାୟାଁ କି ଏ଼ନି ଆ଼ସ୍ତି ଇଟାଲି ହୀନେସି, ଏ଼ଦାଆଁ ଆମ୍ବାଆସି ଏ଼ ମାଣ୍‌ସି ଇଲୁଟି ସ଼ରୁ କିନେସି, ଅ଼ଡ଼େ ଏ଼ ଡଂଗେଏସି ହେର୍‌ୱି ଆ଼ନେସି, ଆତିହିଁ ଏ଼ୱାସି ଏମ୍ବାତି ରୀ ଗୂଣୁ ହୀନେସି। 8 ସାମା ଡଂଗେଏସି ଆସ୍‌ପି ଆ଼ଅସି, ଆତିହିଁ ଇଲୁତି ସା଼ୱୁକାରି ପା଼ଡ଼ିତାଣା ଆ଼ସ୍ତିତା କେୟୁ କିହାମାନେସି କି ଆ଼ଏ, ଈଦାଆଁ ପୁଞ୍ଜାଲିତାକି ଏ଼ୱାସି ମାହାପୂରୁ*22:8 ମାହାପୂରୁ/ନୀହାଁୟି କିନାଣି ତା଼ଣା ନ଼କିତା ୱା଼ନେସି।

9 ଇଞ୍ଜାଁ ବାରେ ଲାଗେଏତାଣି ଇଚିହିଁ କ଼ଡି, ଗା଼ଡ଼୍‌ଦେ, ମେ଼ଣ୍ତା କି ହିମ୍ବରିଦୂକି, ଏ଼ନି ଜା଼ଙ୍ଗିତି ଆ଼ସ୍ତି ତାକି ଆମ୍ବାଆସି ଏଲେଇନେସି, ଈଦି ଏ଼ ଆ଼ସ୍ତି, ଆତିହିଁ ରିକୱାକିତି କାତା ମାହାପୂରୁ*22:9 ମାହାପୂରୁ/ନୀହାଁୟି କିନାଣି ତା଼ଣା ନ଼କିତା ୱା଼ନେ; ଏଚେଟିଏ ମାହାପୂରୁ ଆମ୍ବାଆରାଇଁ ଦ଼ହ କିନେସି ଏ଼ୱାସି ତାନି ପା଼ଡ଼ିତାଣାକି ରୀ ବା଼ଗା ହୀନେସି।

10 ଆମ୍ବାଆସି ତାନି ପା଼ଡ଼ିତି ଲ଼କୁ ତା଼ଣା ଗା଼ଡ଼୍‌ଦେ, କି କ଼ଡି, କି ମେ଼ଣ୍ତା କି ଏ଼ନି ଜ଼ନ୍ତ ପ଼ହିକିୟାଲି ଇଟିନେସି, ଇଞ୍ଜାଁ, ଆମ୍ବାଆରି ମେହ୍‌ଆରେ଼ଟୁ ଏ଼ ଜ଼ନ୍ତ ହା଼ନେ, କି କାଣ୍ତିୟା କା଼ବ୍ରା ଆ଼ନେ କି ଏ଼ର୍‌ସିକିୱି ଆ଼ହାଁ ଅ଼ୱିଆ଼ନେ; 11 ଆତିହିଁ ଏ଼ୱାସି ପା଼ଡ଼ିତି ଲ଼କୁ ଆ଼ସ୍ତିତା ଏ଼ୱାଣି କେୟୁ ମାନେ କି ଆ଼ଏ, ଈ କାତାତାକି ରିଆରି ବିତ୍ରା ମାହାପୂରୁ ନ଼କିତା ପାର୍‌ମାଣା କିୱିଆ଼ନେ; ଏ଼ ଜ଼ନ୍ତ ଗାଟାସି ଏ଼ ପାର୍‌ମାଣା ନାମିନେସି, ଇଞ୍ଜାଁ, ଏ଼ୱାସି ଏ଼ଦାଣିତି ୱେଟ୍‌ଅସି। 12 ସାମା ଏ଼ଦି, ଏ଼ୱାଣି ତା଼ଣାଟି ସ଼ରୁ ଆ଼ହାମାନେ, ଆତିହିଁ ଏ଼ ଜ଼ନ୍ତ ସା଼ୱୁକାରିକି ଏମ୍ବାତି ମୂଲୁ ହୀନେସି। 13 ଏ଼ ଜ଼ନ୍ତ ଜା଼ଡ଼ା ଜ଼ନ୍ତ ତା଼ଣାଟି କାଣ୍ତିୟା କା଼ବ୍ରା ଆ଼ହାମାନେ, ଆତିହିଁ ଏ଼ୱାସି ପାର୍‌ମାଣା ତାକି ଏ଼ଦାଆଁ ତାପେସି; ଏ଼ୱାସି ଏ଼ କାଣ୍ତିୟା କା଼ବ୍ରା ଆ଼ହାମାନି ଜ଼ନ୍ତତି ମୂଲୁ ହୀଅସି।

14 ଅ଼ଡ଼େ ଆମ୍ବାଆସି ତାନି ପା଼ଡ଼ି ଲ଼କୁତି ଜ଼ନ୍ତ ରୀସା ଅ଼ନେସି ଅ଼ଡ଼େ ଏ଼ ଜ଼ନ୍ତ ଗାଟାସି ହିଲାଆ ବେ଼ଲାତା ଏ଼ ଜ଼ନ୍ତ ନସ୍ତ ଆ଼ନେ କି ହା଼ହାହାନେ, ଆତିହିଁ ଏ଼ୱାସି ଏ଼ଦାନି ମୂଲୁ ହୀନେସି। 15 ସାମା ଏ଼ ଜ଼ନ୍ତ ଗାଟାସି ଏ଼ ଜ଼ନ୍ତ ତଲେ ମାନେସି, ଆତିହିଁ ଏ଼ଦାଣିତି ମୂଲୁ ହୀଅସି; ସାମା ଏ଼ଦି ବା଼ଡ଼ା ତାପି ଆ଼ହାମାନେ, ଆତିହିଁ ଏ଼ଦି ବା଼ଡ଼ାଗାଟି ଜ଼ନ୍ତ ଲେହେଁ ଆ଼ନେ।

କୁଲମିତା ଦାର୍ମୁତି ମେ଼ରା

16 ଅ଼ଡ଼େ ଆମ୍ବାଆସି ରୀସ୍‌ପି ଆ଼ଆତି ମା଼ଙ୍ଗାନି ଜୂପ୍‌କା ତ଼ସାହାଁ ଏ଼ଦାନି ତଲେ ଡୂରିନେସି, ଆତିହିଁ ଏ଼ୱାସି ଏ଼ ମା଼ଙ୍ଗାନି ତାପୁ ହୀହାଁ ଏ଼ଦାନି ବୀହା ଆ଼ନେସି। 17 ମା଼ଙ୍ଗାନି ତାଞ୍ଜି ଏ଼ୱାଣି ତଲେ ତାନି ମା଼ଙ୍ଗାନି ବୀହା କିୟାଲି ରା଼ଜି ଆ଼ଅସି, ଆତିହିଁ ମା଼ଙ୍ଗାନି ଏଚେକା ମଲା ହୀନି ମେ଼ରା ମାନେ ଏଚେକା ୱେଣ୍ଡି ଟାକାୟାଁ ହୀନେସି।

18 ମୀରୁ ପାଂଗଣେଣିନି ଜୀୱୁ ତଲେ ଇଟାଆଦୁ।

19 ଆମ୍ବାଆସି ଜ଼ନ୍ତ ତଲେ ଆଣ୍ତିନେସି ଏ଼ୱାସି ସାତେଏ ହା଼ନି ଡଣ୍ତ ବେଟାଆ଼ନେସି।

20 ଆମ୍ବାଆସି ପ୍ରବୁତି ପିସ୍‌ପେ ଏଟ୍‌କାତି ପେ଼ଣ୍‌କାଣି ପୂଜା କିନେସି ଏ଼ୱାସି ପୂରା ନା଼ସା ଆ଼ନେସି।

21 ମୀରୁ ଏଟ୍‌କା ଦେ଼ସାତାରାଇଁ ଲାଗେଏ କିଅତେରି କି ଏ଼ୱାରି ଆ଼ସ୍ତି ଦୂହଅତେରି; ଏ଼ନିଇଚିହିଁ ମୀରୁ ମିସର ଦେ଼ସାତା ଏଟ୍‌କା ଦେ଼ସାତାତେରି ଆ଼ହାମାଚେରି। 22 ମୀରୁ ଏ଼ନି ରା଼ଣ୍ତେଣି କି ତାଲି ତାଞ୍ଜି ହିଲାଆଗାଟି କକାରି ପ଼ଦାୟାଁଣି କସ୍ତ ହୀଆଦୁ। 23 ମୀରୁ ଏଟ୍‌କା ଦେ଼ସାତାରାଇଁ ଏ଼ନି କସ୍ତ ହୀତିହିଁ, ଏ଼ୱାରି ୱାର୍‌ଇ ନାଙ୍ଗେ ହା଼ଟାନେରି, ଆତିହିଁ ନା଼ନୁ ସାତେଏ ଏ଼ୱାରି ହା଼ଡା ୱେଇଁ। 24 ଇଞ୍ଜାଁ ନା଼ କାର୍‌ବି ଗାଡି ଆ଼ତିହିଁ, ନା଼ନୁ ମିଙ୍ଗେ କାଣ୍ତା ତଲେ ପା଼ୟାଇଁ; ଏଚେଟିଏ ମୀ ଡକ୍ରିସିକା ରା଼ଣ୍ତେଣି ଆ଼ନୁ ଅ଼ଡ଼େ ତାଞ୍ଜି ହିଲାଆ ମୀର୍‌କା ମା଼ସ୍‌କା ଆ଼ନେରି।

25 ମୀରୁ ନା଼ ଲ଼କୁ ବିତ୍ରା ମୀ ପା଼ଡ଼ିତି ଏମିନି କା଼କୁଲି ଗାଟାଣାକି ୱାଡି ହୀଦେରି, ଆତିହିଁ ଏ଼ୱାଣି କ଼ସମି ର଼ ସା଼ୱୁକାରି ଲେହେଁ ଆ଼ଅତେରି ଅ଼ଡ଼େ ଏ଼ୱାଣି ତା଼ଣାଟି ଅଡି ଅ଼ଅତେରି। 26 ମୀରୁ ମୀ ପା଼ଡ଼ିତାଣା ହିମ୍ବରି ବାନ୍ଦା ଇଟିଦେରି, ଆତିହିଁ ମୀରୁ ୱେ଼ଡ଼ା କୂଡ଼୍‌ନି ନ଼କେଏ ଏ଼ଦାଆଁ ଏ଼ୱାଣାକି ୱେଟ୍‌ଦୁ। 27 ଇଚିହିଁ ଏ଼ଦି ଏ଼ୱାଣାକି ରଣ୍ଡିଏ ପର୍‌ନି ହିମ୍ବରି, ତାନି ଆଙ୍ଗାତା ପ୍ଡିକ୍‌ହା କଡିନି ହିମ୍ବରି; ଏ଼ୱାସି ଏମ୍ବିୟା ଡୂରିନେସି ? ଇଞ୍ଜାଁ ଏ଼ୱାସି ନାଙ୍ଗେ ହା଼ଟାନେସି, ଏଚେଟିଏ ନା଼ନୁ ଏ଼ଦାଆଁ ୱେଇଁ, ଏ଼ନିଇଚିହିଁ ନା଼ନୁ କାର୍ମା ମେହ୍‌ନାତେଏଁ।

28 ମୀରୁ ମୀ ମାହାପୂରୁଇଁ ଊରାଆଦୁ, ମୀ ଲ଼କୁତି କାଜାରାଇଁ ବା଼କା ଇଟାଆଦୁ।

29 ମୀରୁ ମୀ ଆର୍ନା କାମ୍ବିତିହିଁ ଅ଼ଡ଼େ ଅଙ୍ଗୁରି ରାସା ଇଞ୍ଜାଁ ଜୀତ ନିୟୁଁ ହେର୍‌ପାଲି ୱେ଼ଡ଼ା କିଆଦୁ। ଅ଼ଡ଼େ ମୀରୁ ମୀ ପା଼ଣ୍‌ୱା ମୀର୍‌କାଇଁ ନାଙ୍ଗେ ହିୟାଦୁ। 30 ଇଞ୍ଜାଁ ମୀ କ଼ଡିୟାଁ ଅ଼ଡ଼େ ମେ଼ଣ୍ତାୟାଁ ଜିକେଏ ଏଲେକିହିଁ କିଦେରି; ଏ଼ଦି ସା଼ତା ଦିନା ତାନି ତାଲି ତଲେ ଡ଼ୟିନେ, ଆ଼ଟା ଦିନାତା ମୀରୁ ଏ଼ଦାଆଁ ନାଙ୍ଗେ ହିୟାଦେରି। ଇଞ୍ଜାଁ ମୀରୁ ନା଼ କ଼ସମି ସୁଦୁ ଲ଼କୁ ଆ଼ଦେରି; ଏ଼ଦାଆଁତାକି ଜା଼ଡ଼ାତି ଜ଼ନ୍ତ କାଚିତି ଊଙ୍ଗା ତିନଅତେରି; ମୀରୁ ଏ଼ୱାଆଁ ନେସ୍‌କା ନ଼କିତା ମେତ୍‌ଦେରି।