1 ସାମା ଜାକୁବ ତା଼ଣାଟି ରାହେଲକି କକାରି ପ଼ଦାଁ ଜାର୍ନା ଆ଼ଆତେରି, ଏ଼ଦାଆଁ ମେସାହାଁ ଏ଼ଦି ତାନି ତାଙ୍ଗିନି ଡା଼ହାରା ଆ଼ହାଁ ଜାକୁବଇଁ ଏଲେଇଚେ, "ନାଙ୍ଗେ କକାରି ପ଼ଦାଁ ହିୟାମୁ, ଆ଼ଆତିଁ ନା଼ନୁ ହା଼ହାହାଇଁ।"
2 ଏଚେଟିଏ ଜାକୁବ ରାହେଲନି କାର୍ବି ଆ଼ତେସି; ଇଞ୍ଜାଁ ଏ଼ୱାସି ଏଲେଇଚେସି, "ନା଼ନୁ କି ମାହାପୂରୁତେଏଁ ? ଏ଼ୱାସି ନିଙ୍ଗେ କକାରି ପ଼ଦାୟାଁ ହୀହାମାଞ୍ଜଅସି।"
3 ଏଚେଟିଏ ରାହେଲ ଏଲେଇଚେ, "ମେହ୍ମୁ ଈଦି ନା଼ ହ଼ଲେଣି ବିଲ୍ହା ମାନେ; ତାନି ତଲେ ଡୂରାମୁ, ଏ଼ଦି କକାଣାଇଁ ଜାର୍ନି କିହାଁ ନାଙ୍ଗେ ହିୟାନେ, ଏ଼ଦାଣି ୱାକିଟି ନା଼ନୁ ତାଲି ଆ଼ଇଁ।" 4 ଇଞ୍ଜାଁ ଏ଼ଦି ତାନି ହ଼ଲେଣି ବିଲ୍ହାନି ତାନି ଡକ୍ରା ଜାକୁବକି ହୀତେ, ଅ଼ଡ଼େ ଏ଼ୱାସି ଏ଼ଦାଣି ତଲେ ଡୂରିତେସି। 5 ବିଲ୍ହା ପୂରାମା଼ସା ଆ଼ହାଁ ଜାକୁବକି ର଼ ମୀର୍ଏଣାଇଁ ଜାର୍ନି କିତେ। 6 ଏଚିବେ଼ଲା ରାହେଲ ଏଲେଇଚେ, "ମାହାପୂରୁ ନା଼ ବିଚାରା କିୟାତେସି, ନା଼ ପ୍ରା଼ତାନା ୱେଞ୍ଜାହାଁ ନାଙ୍ଗେ ମୀର୍ଏଣାଇଁ ହିୟାତେସି।" ଏ଼ଦାଆଁତାକି ଏ଼ୱାଣି ଦ଼ରୁ ଦାନ୍30:6 ଦାନ୍/ନୀହାଁୟି ଇଟିତେ। 7 ଏଚେଟିଏ ରାହେଲତି ହ଼ଲେଣି ବିଲ୍ହା ଅ଼ଡ଼େ ୱେଣ୍ତେ ପୂରାମା଼ସା ଆ଼ହାଁ ଜାକୁବକି ଅ଼ଡ଼େ ର଼ ମୀର୍ଏଣାଇଁ ଜାର୍ନି କିତେ। 8 ଏଚିବେ଼ଲା ରାହେଲ ଏଲେଇଚେ, "ନା଼ନୁ ନା଼ ତାଙ୍ଗି ତଲେ ମାହାପୂରୁ ଲେହେଁ ଜୁଜୁ କିହାଁ ଜୀଣା ଆ଼ତେଏଁ।" ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ନପ୍ତାଲି30:8 ଜୁଜୁ ଇଟିତେ।
9 ଏଚେଟିଏ ଲେୟା ତା଼ନୁ କକାରି ପ଼ଦାଁ ଆ଼ହାଲି ମୁଟ୍ହେ ଇଞ୍ଜିଁ ପୁଞ୍ଜାହାଁ ତାନି ସିଲ୍ପା ଇନି ହ଼ଲେଣିନି ଅ଼ହାଁ ଜାକୁବ ତଲେ ବୀହା କିତେ। 10 ଏଚେଟିଏ ଲେୟାତି ହ଼ଲେଣି ସିଲ୍ପା ତା଼ଣାଟି ଜାକୁବକି ର଼ ମୀର୍ଏସି ଜାର୍ନା ଆ଼ତେସି। 11 ଏଚେଟିଏ ଲେୟା ଏଲେଇଚେ, "ନାଙ୍ଗେ ଏଚେକା କାର୍ମା ମାନେ!" ଏ଼ଦାଆଁତାକି ଏ଼ୱାଣି ଦ଼ରୁ ଗାଦ୍30:11 ଏଚେକା କାର୍ମା ଇଟିତେ। 12 ଏଚେଟିଏ ଲେୟାତି ହ଼ଲେଣି ସିଲ୍ପା ଜାକୁବକି ଅ଼ଡ଼େ ର଼ କକାଣାଇଁ ଜାର୍ନି କିତେ। 13 ଏଚେଟିଏ ଲେୟା ଏଲେଇଚେ, "ନାଙ୍ଗେ ଏଚେକା ରା଼ହାଁ!" ଡ଼ାଆସିକା ନାଙ୍ଗେ ରା଼ହାଁଗାଟାୟି ଇଞ୍ଜାନୁ, ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ଆସେର30:13 ରା଼ହାଁ ଇଟିତେ।
14 ଏଚେଟିଏ ଗ଼ହଁ ଦା଼ଃନି ବେ଼ଲାତା ରୁବେନ୍ ପାଙ୍ଗାତା ହାଜାହାଁ ଗୁଡିୟାଟି ଦୂଦ୍ରା ପା଼ଡ଼େୟି ବେଟାଆ଼ହାଁ ତାଚାହାଁ ତାମି ଇୟା ଲେୟାକି ହୀତେସି। ଏଚେଟିଏ ରାହେଲ ଲେୟାନି ଏଲେଇଚେ, "ନୀ ମୀର୍ଏସି ତାଚାମାନି ଦୂଦ୍ରା ପା଼ଡ଼େୟି ଇଚାଣି ନାଙ୍ଗେ ହିୟାମୁ।"
15 ଏଚେଟିଏ ଲେୟା ଏଲେଇଚେ, "ନୀନୁ ନା଼ ଡକ୍ରାଇଁ ଅ଼ହାମାଞ୍ଜି, ଈଦି କି ଊଣାତି କାତା ? ନୀନୁ ନା଼ ମୀର୍ଏଣା ଦୂଦ୍ରା ପା଼ଡ଼େୟି ଜିକେଏ ମୀଞ୍ଜାଦି ?" ରାହେଲ ଏଲେଇଚେ, "ନୀ ମୀର୍ଏଣା ଦୂଦ୍ରା ପା଼ଡ଼େୟି ବାଦୁଲି ନୀଞ୍ଜୁ ଲା଼ଆଁୟାଁ ଜାକୁବ ନୀ ତଲେ ଡୂରିନେସି।"
16 ଏଚେଟିଏ ମିଡ଼୍ଅଲା ଆୟାଲିଏ ଜାକୁବ ଗୁଡିୟାଟି ୱା଼ହିମାଚାଟି, ଲେୟା ଏ଼ୱାଣି ତଲେ କାତା ଆ଼ହାଲି ପାଙ୍ଗାତା ହାଜାହାଁ ଏ଼ୱାଣାଇଁ ଏଲେଇଚେ, "ନୀଞ୍ଜୁ ଲା଼ଆଁୟାଁ ନା଼ ତଲେ ଡୂରାଲି ୱା଼ନାୟି ମାନେ, ଇଚିହିଁ ନା଼ ମୀର୍ଏଣା ଦୂଦ୍ରା ପା଼ଡ଼େୟି ହୀହାଁ କଡାମାଞ୍ଜାଇଁ।" ଏ଼ଦାଆଁତାକି ଏ଼ ଲା଼ଆଁୟାଁ ଏ଼ୱାସି ଏ଼ଦାନି ତଲେ ଡୂରିତେସି।
17 ଏଚେଟିଏ ମାହାପୂରୁ ଲେୟାନି ପ୍ରା଼ତାନା ୱେଞ୍ଜାଲିଏ, ଏ଼ଦି ପୂରାମା଼ସା ଆ଼ହାଁ ଜାକୁବକି ପା଼ସା ଲମ୍ବର ମୀର୍ଏଣାଇଁ ଜାର୍ନି କିତେ। 18 ଏ଼ଦାଆଁତାକି ଲେୟା ଏଲେଇଚେ, "ନା଼ନୁ ନା଼ ଡକ୍ରାକି ନା଼ ହ଼ଲେଣିନି ହୀହାମାଚେଏଁ, ମାହାପୂରୁ ତାନି ଦା଼ନା ନାଙ୍ଗେ ହୀହାମାଞ୍ଜାନେସି," ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ଇସାକର30:18 ଦା଼ନା ଇଟିତେ। 19 ଏଚେଟିଏ ଲେୟା ଅ଼ଡ଼େ ୱେଣ୍ତେ ପୂରାମା଼ସା ଆ଼ହାଁ ଜାକୁବକି ସ଼ଲମ୍ବର ମୀର୍ଏଣାଇଁ ଜାର୍ନି କିତେ। 20 ଏଚେଟିଏ ଲେୟା ଏଲେଇଚେ, "ମାହାପୂରୁ ନେହିଁ ଦା଼ନା ହିୟାତେସି। ନୀଏଟି ନା଼ ଡକ୍ରା ନା଼ ତଲେ ଡ଼ୟିନେସି, ଇଚିହିଁ ନା଼ନୁ ତାନି ସ଼ଜା଼ଣା ମୀର୍କା ଜାର୍ନି କିହାମାଇଁ।" ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ସବୁଲୁନ30:20 ମା଼ନି ଇଟିତେ। 21 ଏଚେଟିଏ ଏ଼ଦି ର଼ ପ଼ଦାନି ଜାର୍ନି କିହାଁ, ଏ଼ଦାନି ଦ଼ରୁ ଦୀଣା ଇଟିତେ।
22 ଏଚେଟିଏ ମାହାପୂରୁ ରାହେଲନି ଅଣ୍ପିତେସି, ମାହାପୂରୁ ତାନି ପ୍ରା଼ତାନା ୱେଞ୍ଜାହାଁ ଏ଼ଦାନାକି କକାରି ପ଼ଦାୟାଁ ଆ଼ନି ବା଼ଡ଼୍ୟୁ ହୀତେସି। 23 ଏଚେଟିଏ ଏ଼ଦି ପୂରାମା଼ସା ଆ଼ହାଁ କକାଣାଇଁ ଜାର୍ନି କିହାଁ ଏଲେଇଚେ, "ମାହାପୂରୁ ନୀଏଁ ନା଼ ଲାଜା ହେକ କିୟାତେସି।" 24 ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ଜସେପ30:24 ପାଡାଆ଼ନାୟି ହୀହାଁ ଏଲେଇଚେ, "ପ୍ରବୁ ନାଙ୍ଗେ ଅ଼ଡ଼େ ର଼ ମୀର୍ଏଣାଇଁ ହିୟାପେସି।"
ଜାକୁବତି ବାତ୍କୁ
25 ଅ଼ଡ଼େ ରାହେଲ ତା଼ଣାଟି ଜସେପ ଜାର୍ନା ଆ଼ତି ଡା଼ୟୁ, ଜାକୁବ ଲାବନଇଁ ଏଲେଇଚେସି, "ନାଙ୍ଗେ ହାଜାଲି ହେଲ ହିୟାମୁ ନା଼ନୁ ନା଼ ଦେ଼ସାତି ଟା଼ୟୁତା ହାଇଁ। 26 ନା଼ନୁ ଆମ୍ବାଆରି ତାକି ନୀ ହ଼ଲେଏଣା କାମା କିହାମାଇଁ, ନା଼ ଈ ଡକ୍ରିସିକାଣି ଅ଼ଡ଼େ କକାରି ପ଼ଦାଁଣି ଅ଼ହିଁ ହାଜାଲି ହିୟାମୁ; ଇଚିହିଁ ଏ଼ନିକିଁ ନୀ ହ଼ଲେଏଣା କାମା କିହାମାଇଁ, ଏ଼ଦାଣି ନୀନୁ ପୁଞ୍ଜାମାଞ୍ଜି।"
27 ଏଚିବେ଼ଲା ଲାବନ ଏ଼ୱାଣାଇଁ ଏଲେଇଚେସି, "ନାଙ୍ଗେ କାର୍ମା ମେସ୍ତାମୁ, ଇଚିହିଁ ନୀ ତାକି ମାହାପୂରୁ ନାଙ୍ଗେ ବ଼ର ହୀହାମାଞ୍ଜାନେସି ଈଦାଆଁ ନା଼ ଅଣ୍ପୁଟି ପୁଚେଏଁ। 28 ଏ଼ଦାଆଁତାକି ନୀନୁ ନିଙ୍ଗେ କୂଲି ତୀରି କିମୁ, ଏ଼ଦାଆଁ ନା଼ନୁ ନିଙ୍ଗ ହିୟାଇଁ।"
29 ଜାକୁବ ଏଲେଇଚେସି, "ନା଼ନୁ ଏ଼ନିକିହିଁ ନୀ ହ଼ଲେଏଣା କାମା କିହାମାଇଁ ଅ଼ଡ଼େ ନା଼ ତା଼ଣା ନୀ କ଼ଡି ଗରି ଏ଼ନିକିଁ ମାନୁ, ଏ଼ୱାଆଁ ବାରେ ନୀନୁ ପୁଞ୍ଜାମାଞ୍ଜି। 30 ଇଚିହିଁ, ନା଼ନୁ ୱା଼ନି ନ଼କେଏ ନୀ ବାତ୍କୁ ଊଣା ମାଚେ, ସାମା ନୀଏଁ ପାଡା ଆ଼ହାଁ ଗାଡି ଏ଼ପା ଆ଼ହାମାନେ; ଇଞ୍ଜାଁ, ନା଼ନୁ ଏମିନି ଟା଼ୟୁତା ନୀ କ଼ଡି ଗରି ମେଚାଲି ଅ଼ତେଏଁ, ପ୍ରବୁ ନୀ ନେହିଁ କିହାମାଞ୍ଜାନେସି; ସାମା ନା଼ନୁ ନା଼ କୁଟମି ତାକି ଏଚେଲା କୂଡ଼ିକିଇଁ ?"
31 ଏଚେଟିଏ ଲାବନ ଏଲେଇଚେସି, "ନା଼ନୁ ନିଙ୍ଗେ ଏ଼ନାଆଁ ହିୟାଇଁ ?" ଜାକୁବ ଏଲେଇଚେସି, "ନିଙ୍ଗେ ଏ଼ନାଆଁ ହୀହାଲି ଲ଼ଡ଼ାଆ଼ଏ; ନୀନୁ ର଼ କାମା କିଦି, ଆତିହିଁ ନା଼ନୁ ନୀ କ଼ଡି ଗରି ୱେଣ୍ତେ ମେଚାହାଁ ସେ଼ବା କିଇଁ। 32 ନୀଞ୍ଜୁ ନା଼ନୁ ନୀ ମାନ୍ଦା ବିତ୍ରା ହାଜାହାଁ ମେ଼ଣ୍ତାୟାଁ ବିତ୍ରାଟି କା଼ବ୍ରା ସିତ୍ରା ଟିକା ଗାଟାଆଁ ଅ଼ଡ଼େ କା଼ଡ଼ିନି ମେ଼ଣ୍ତାୟାଁ ଇଞ୍ଜାଁ ଗରିୟାଁ ବିତ୍ରାଟି ଟିକା ଗାଟାଆଁ କା଼ବ୍ରା ସିତ୍ରା ଗରିୟାଁ ଏଟ୍କା କିଇଁ; ଏ଼ ବାରେ ନା଼ କୂଲି ଆ଼ନୁ। 33 ଏଚେଟିଏ ଏଚିବେ଼ଲା ନୀ ନ଼କିତା ନା଼ କୂଲିତି କାତା ହ଼ନେ ଏଚିବେ଼ଲା ନା଼ ଦାର୍ମୁ ନା଼ କାତା ସା଼କି ହୀନେ, ଇଚିହିଁ ଗରିୟାଁ ବିତ୍ରାଟି କା଼ବ୍ରା ସିତ୍ରା ଅ଼ଡ଼େ ଟିକାଗାଟି ଗରିୟାଁ ଏଟ୍କା ଅ଼ଡ଼େ ମେ଼ଣ୍ତାୟାଁ ବିତ୍ରାଟି କା଼ଡ଼ିନି ୱା଼ଣାତି ମେ଼ଣ୍ତାୟାଁ ଏଚେକା ଡ଼ୟିନୁ ଏ଼ ବାରେ ନା଼ୱି ଇଞ୍ଜିଁ ଏଜିକିୱି ଆ଼ନୁ।"
34 ଏଚେଟିଏ ଲାବନ ଏଲେଇଚେସି, "ଏ଼ଦି ନେହେଁ, ନୀ କାତା ଲେହେଁ ଆ଼ପେ।" 35 ଏଚେଟିଏ ଏ଼ୱାସି ଏ଼ ଦିନା ଈର୍ୱା ଗାଟାଆଁ ଅ଼ଡ଼େ ଟିକାଗାଟି ବକ୍ଡ଼ା ଗରିୟାଁ ଅ଼ଡ଼େ କା଼ବ୍ରା ସିତ୍ରା ଅ଼ଡ଼େ ଟିକାଗାଟି ଊଣା ଦବ୍ଲା ୱା଼ଣା ପେଟା ଗରିୟାଁ, ଇଞ୍ଜାଁ କା଼ଡ଼ିନି ୱା଼ଣା ମେ଼ଣ୍ତାୟାଁ ବାରେ ଏଟ୍କା କିହାଁ ତାନି ମୀର୍କା କେୟୁତା ହେର୍ପିତେସି; 36 ଅ଼ଡ଼େ ଏ଼ୱାସି ଜାକୁବ ଅ଼ଡ଼େ ତାନି ବିତ୍ରା ତୀନି ଦିନାତି ଜିରୁତି ହେକ ଇଟିତେସି; ଅ଼ଡ଼େ, ଜାକୁବ ଲାବନତି ଡ଼ୟାମାଚି କ଼ଡି ଗରି ମେଚାଲି ମା଼ଟ୍ହେସି।
37 ଅ଼ଡ଼େ ଜାକୁବ ଲିବ୍ନି, ଲୂସ୍ ଅ଼ଡ଼େ ଅର୍ମନ୍ ମା଼ର୍ନୁତି ପୁଃନି କମା ଟୂଣ୍ହାଁ ଏମ୍ବାତି ସା଼ଲି ପ୍ଡପ୍ହାଁ ଦବ୍ଲା ମା଼ର୍ନୁ ହ଼ପ୍ହେସି। 38 ଏଚେଟିଏ ଏମିନି ଟା଼ୟୁତା କ଼ଡି ଗରି ଏ଼ୟୁ ଗସାଲି ୱା଼ନୁ, ଏ଼ ଟା଼ୟୁତା ଏ଼ୱାସିକା ନ଼କିତି ଏ଼ୟୁ କୁଣ୍ତିତା ଏ଼ ସା଼ଲି ହିଲାଆ କମାୟାଁ କଟୁ କିହାଁ ଇଟିତେସି; ଏଚେଟିଏ ଏ଼ୟୁ ଗହ୍ନି ବେ଼ଲାତା ଏ଼ୱି ଗାର୍ବାଣା ଆ଼ତୁ। 39 ଏ଼ କମାୟାଁ ତଲେ ଗାର୍ବାଣା ଆ଼ହାଲିଏ କ଼ଡି ଗରି ଈର୍ୱା ଅ଼ଡ଼େ କା଼ବ୍ରା ସିତ୍ରା ଇଞ୍ଜାଁ ଟିକାୟାଁଗାଟି ଡା଼ଲ୍କା ଜାର୍ନି କିତୁ।
40 ଏଚେଟିଏ ଜାକୁବ ଏ଼ ଡା଼ଲ୍କାଣି ଏଟ୍କା ଏଟ୍କା କିତେସି, ଇଞ୍ଜାଁ, ଲାବନତି ଈର୍ୱା ଅ଼ଡ଼େ କା଼ଡ଼ିୟା ୱା଼ଣା ବାରେ ମେ଼ଣ୍ତାୟାଁ ଲାକ ତାଲିୟାଁଣି ସିନିକିୱି ଆ଼ତେ; ଇଲେକିହିଁ ଏ଼ୱାସି ଲାବନତି ମାନ୍ଦା ତଲେ ତାନି ମାନ୍ଦା ଇଟାଆନା ଏଟ୍କା କିତେସି।
41 ଇଞ୍ଜାଁ, ବା଼ଡ଼୍ୟୁଗାଟି କ଼ଡି ଗରି ଏ଼ନିକିଁ କମାୟାଁ ତା଼ଣାଟି ଗାର୍ବାଣା ଆ଼ନୁ, ଏ଼ଦାଆଁତାକି ଜାକୁବ ଏ଼ୟୁ କୁଣ୍ତି ମାଦି କ଼ଡି ଗରି ନ଼କିତା ଏ଼ କମାୟାଁ ଇଟିତେସି; ସାମା ବା଼ଡ଼୍ୟୁ ହିଲାଆ କ଼ଡି ଗରି ନ଼କିତା ଇଟାଆତେସି; 42 ଏଚେଟିଏ ବା଼ଡ଼୍ୟୁ ହିଲାଆଗାଟି କ଼ଡି ଗରି ଲାବନକି ଆ଼ତୁ, ଅ଼ଡ଼େ ବା଼ଡ଼୍ୟୁଗାଟି କ଼ଡି ଗରି ଜାକୁବକି ଆ଼ତୁ। 43 ଏ଼ଦାଆଁତାକି ଜାକୁବ ହା଼ରେକା ବାତ୍କିତେସି, ଇଞ୍ଜାଁ ଏ଼ୱାଣାକି ହା଼ରେକା କ଼ଡି ଗରି, ହ଼ଲିୟାଙ୍ଗା ହ଼ଲେଣିସିକା, ଊଟୁୟାଁ, ଅ଼ଡ଼େ ଗା଼ଡ଼୍ଦେୟାଁ ହା଼ରେକା ଆ଼ତୁ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)