ମୂଲୁ 49

ମୀର୍‌କାଣି ଜାକୁବତି ବ଼ର

1 ଏଚେଟିଏ ଜାକୁବ ତାନି ମୀର୍‌କାଣି ହା଼ଟାହାଁ ଏଲେଇଚେସି, "ମୀରୁ ରୁଣ୍ତା ଆ଼ଦୁ; ଡା଼ୟୁ କା଼ଲାତା ଏ଼ନାଆଁ ଆ଼ନେ ଏ଼ଦାଆଁ ମିଙ୍ଗେ ୱେସିମାଞ୍ଜାଇଁ। 2 ହେ଼ ଜାକୁବତି ମୀର୍‌କା ରୁଣ୍ତା ଆ଼ହାଁ ୱେଞ୍ଜୁ, ମୀ ଆ଼ବା ଇସ୍ରାୟେଲତି କାତା ୱେଞ୍ଜୁ। 3 ହେ଼ ରୁବେନ୍‌, ନୀନୁ ନା଼ ପା଼ଣ୍‌ୱା ମୀର୍‌ଏଣା, ନା଼ ବା଼ଡ଼୍‌ୟୁ ଅ଼ଡ଼େ ନା଼ ବପୁତି ମୂଲୁ ପା଼ଡ଼େୟି; ଅ଼ଡ଼େ, ଗା଼ୱୁରମିତା କାଜାତି ଅ଼ଡ଼େ ବା଼ଡ଼୍‌ୟୁତା କାଜାତି। 4 ନୀନୁ ତେ଼ଲିମାନି ଏ଼ୟୁ ଲେହେଁ, ନୀ କାଜା ପା଼ଣା ଡ଼ୟେଏ; ଇଚିହିଁ ନୀନୁ ନୀ ତାଞ୍ଜି ପା଼ସ୍‌ପନିତା ହାଚି; ଇଞ୍ଜାଁ ଏ଼ଦାଆଁ ଲାଗେଏ କିତି। 5 ସିମିୟନ ଅ଼ଡ଼େ ଲେ଼ବି ତାୟି ରିଆରି; ଏ଼ୱାରି କାଣ୍ତା ହା଼ରେକା କାର୍‌ବି ତାକି ଲେ଼ମ୍ବିନି କାଣ୍ତା। 6 ହେ଼ ନା଼ ଜୀୱୁ ଏ଼ୱାରି ଡ଼ୁଗାହାଁ କାତାଆ଼ନି ତା଼ଣା ହାଲାଆନି; ହେ଼ ନା଼ ଗା଼ୱୁରମି ନୀନୁ ଏ଼ୱାରି କାତାତା ଆଣ୍ତାଆନି; ଇଚିହିଁ ଏ଼ୱାରି କାର୍‌ବି ତଲେ ନ଼ରତି ପା଼ୟିତେରି ଜାହାରା ମ଼ନ ତଲେ ଡ଼ୁକି କ଼ଡିୟାଁ ଲେଂଗୁଣିକା ଦା଼ଃତେରି। 7 ଏ଼ୱାରି କାର୍‌ବି ବା଼କା ଆ଼ପେ, ଏ଼ନିଇଚିହିଁ ଏ଼ଦି ହା଼ରେକାତାୟି ମାଚେ;

ଏ଼ୱାରି କ଼ପା ବା଼କା ଆ଼ପେ, ଏ଼ନିଇଚିହିଁ ଏ଼ଦି କାତା ମା଼ନୱି ଆ଼ଆଗାଟାୟି ମାଚେ। ନା଼ନୁ ଜାକୁବ କୂଡ଼ାତା ଏ଼ୱାରାଇଁ ବା଼ଗା କିଇଁ; ଅ଼ଡ଼େ ଇସ୍ରାୟେଲ ଦେ଼ସା ବିତ୍ରା ଏ଼ୱାରାଇଁ ସିନାସାତ୍ରା କିଇଁ।"

8 "ହେ଼ ଜୀହୁଦା, ନୀ ତାୟିୟାଁ ନିଙ୍ଗେ ଗା଼ୱୁରମି କିୟାନେରି; ନୀ କେୟୁ ନୀ ସାତ୍ରୁୟାଁ ହେର୍‌କିତା ଡ଼ୟିନେ; ନୀ ତାଞ୍ଜିତି ମୀର୍‌କା ନିଙ୍ଗେ ଜହରା କିୟାନେରି। 9 ଜୀହୁଦା ପ଼ତୁ ସିହଁ; ହେ଼ ନା଼ ମୀର୍‌ଏଣା, ନୀନୁ ବେ଼ଟା କିହାଁ ପା଼ୱୁତା ୱା଼ହାମାଞ୍ଜି; ନୀନୁ ତାଲି ସିହଁ ଅ଼ଡ଼େ ପ଼ତୁ ସିହଁ ଲେହେଁ ଡୂରାମାଞ୍ଜି, ସାମା ଆମ୍ବାଆସି ଏ଼ୱାଣାଇଁ ନିକ୍‌ନେସି ? 10 ସିଲହତା ୱା଼ନି ପାତେକା ଜୀହୁଦାଟି ରାଜା ବାଡ଼୍‌ଗା ଅ଼ଡ଼େ ଏ଼ୱାଣି ରୀ ପା଼ୱୁଲି ବିତ୍ରାଟି ନୀହାଁୟି କିନେରି ବାଡ଼୍‌ଗା ଗୁଚାଆ଼ଏ; ଏ଼ୱାଣି ନ଼କିତା ଲ଼କୁ ମା଼ନି କିହାଁ ତାନି ଡ଼଼ଇକା ଡ଼ୟିନେରି। 11 ଏ଼ୱାସି ଅଙ୍ଗୁରିମା଼ଡ଼ା ଦାରିତା ତାନି ପ଼ତୁ ଗା଼ଡ଼୍‌ଦେ ଅ଼ଡ଼େ ନେହିଁ ଅଙ୍ଗୁରିମା଼ଡ଼ା ଦାରିତା ଗା଼ଡ଼୍‌ଦେ ଡା଼ଲୁତି ଦହ୍‌ନେସି; ଏ଼ୱାସି ଅଙ୍ଗୁରି ରାସାତା ତାନି ବାସ୍ତେରି ଅ଼ଡ଼େ ଅଙ୍ଗୁରି ରାସାତା ପର୍‌ହାମାନି ବାସ୍ତେରି ରା଼ଚିନେସି। 12 ତାନି କାନୁ ଅଙ୍ଗୁରି ରାସା ତଲେ ନେତେରି ୱା଼ଣା ଆ଼ନେ, ପା଼ଲୁ ତଲେ ତାନି ପାଲ୍‌କା ଦବ୍‌ଲା ଆ଼ନୁ।" 13 "ସବୁଲୁନ ସାମ୍‌ଦୁରି ଗିଚୁତା ବାସା କିନେସି, ସାମ୍‌ଦୁରି ଗିଚୁ ଏ଼ୟୁ ଜା଼ଜା ଡ଼ୟିନି ଟା଼ୟୁ ଆ଼ନେ; ସିଦନ ପାତେକା ତାନି ଅଦିକାରାତି ହାନ୍ଦି ଆ଼ନେ।" 14 "ଇସାକର ବା଼ଡ଼୍‌ୟୁଗାଟି ଗା଼ଡ଼୍‌ଦେ ସମାନା, ଏ଼ୱାସି ମେ଼ଣ୍ତା ହାଃଲାତା ଡୂରିନେସି; 15 ଏ଼ୱାସି ଜ଼ମିନି ଟା଼ୟୁତି ନେହେଁ ଅ଼ଡ଼େ ଦେ଼ସାତି ରା଼ହାଁ ଟା଼ୟୁ ମେସ୍ତେସି; ଏ଼ଦାଆଁତାକି ଏ଼ୱାସି ବ଼ଜୁ ଡେ଼କାଲି ତାକି ବମି ଡ଼଼ଇ କିତେସି, ଏ଼ୱାସି ୱେଟି କାମା କିହାଲି ହ଼ଲେଏସି ଆ଼ତେସି।" 16 "ଦାନ୍‌ ଇସ୍ରାୟେଲତି ଏଟ୍‌କା କୂଡ଼ାତାରି ଲେହେଁ ଆ଼ହାଁ ତାନି ଲ଼କୁତି ନୀହାଁୟି କିନେସି। 17 ଦାନ୍‌ ଜିରୁତି ରା଼ଚୁ ଲେହେଁ ଅ଼ଡ଼େ ଜିରୁତି ବୀସା ରା଼ଚୁ ଲେହେଁ; ଏ଼ଦି ଗ଼ଡ଼ାତି ପାଃଆନା କତ୍‌ନେ, ଏ଼ନିକିଁ ସା଼ଲୱି କିନାସି ଡା଼ୟୁୱାକିଟି ରିନେସି।" 18 "ହେ଼ ପ୍ରବୁ, ନା଼ନୁ ନୀ ଗେଲ୍‌ପିନାଣି କା଼ଚିମାଇଁ। 19 ସ଼ର୍‌କା ଗାଦ୍‌ଇଁ ରିନେରି; ସାମା ୱେଣ୍ତେ ଏ଼ୱାସି ଏ଼ୱାରାଇଁ ରିନେସି। 20 ଆସେର ତା଼ଣାଟି ହା଼ରେକା ନେହିଁ ଆର୍ନା କାମ୍ବିନେ; ଏ଼ୱାସି ରାଜା ତାକି କା଼ଦି ହୀନେସି। 21 ନପ୍ତାଲି କାଜା ଆଙ୍ଗା କ଼ଟି କୂର୍‌ହୁ ଲେହେଁ, ଏ଼ୱାସି ସୁଦୁ ସୁୱାଲା ରା଼ହାଁତି କାତା ଜ଼ଲିନେସି।" 22 "ଜସେପ ପା଼ଡ଼େୟି ଆ଼ୟିନି ମା଼ର୍‌ନୁତି ଗୱେଡ଼ି, ଏ଼ୱାସି ଜାର୍‌ଣା ଦାରିତି ପା଼ଡ଼େୟି ଆ଼ୟିନି ମା଼ର୍‌ନୁତି ଗୱେଡ଼ି ଲେହେଁତାସି, ତାନି କମାୟାଁ କ଼ଟାତି ଗା଼ଣ୍‌ନୁ। 23 ଆପ୍‌କା ୱେଲ୍‌କା ଆସ୍ତାରି ଏ଼ୱାଣାଇଁ ହା଼ରେକା ସା଼ସ୍ତି ହୀହାମାନେରି ଅ଼ଡ଼େ ତାମି ୱେଲୁ ଜୀହାଁ ସା଼ସ୍ତି ହୀହାମାନେରି। 24 ସାମା ତାନି ଆମ୍ବୁ ଆ଼ଟ୍‌ୱା ଆ଼ହାଁ ଡ଼ୟିତେ, ଇଞ୍ଜାଁ ଆମ୍ବାଆସି ଜାକୁବତି ବା଼ଡ଼୍‌ୟୁ ହୀନାସି, ଏ଼ଦାଆଁତାକି ଇସ୍ରାୟେଲତି ପ଼ହିକିନାସି ଅ଼ଡ଼େ ପା଼କା ଇଞ୍ଜିଁ ୱେ଼ଙ୍ଗିନେସି। 25 ଇଚିହିଁ ମୀ ତାଞ୍ଜିତି ମାହାପୂରୁ ଆମ୍ବାଆସି ନିଙ୍ଗେ ସା଼ୟେମି କିୟାନେସି, ଅ଼ଡ଼େ ବାରେ ବା଼ଡ଼୍‌ୟୁ ଗାଟାସି, ଆମ୍ବାଆସି ହା଼ଗୁ ଲାକଟି ନେହେଁ କିୟାନେସି, ବୂମି ଡ଼଼ଇତି ଏ଼ୟୁଟି ନେହେଁ କିୟାନେସି, ପା଼ଲୁ ଅ଼ଡ଼େ କକାରି ପ଼ଦାୟାଁ ନେହେଁ କିହାଁ ମିଙ୍ଗେ ବ଼ର ହିୟାନେସି, ଏ଼ୱାଣି ତା଼ଣାଟି ଏ଼ୱାଣି କେୟୁତି ବାହା ବା଼ଡ଼୍‌ୟୁ ଆ଼ନେ। 26 ନା଼ ଆକୁ ଆ଼ବାୟାଁତି ବ଼ର କିହାଁ ନୀ ତାଞ୍ଜିତି ବ଼ର ଗାଡି; ଏ଼ଦି କା଼ଲେଏ ଡ଼ୟାମାନି ହ଼ରୁତି ହାନ୍ଦି ପାତେକା ଏ଼ପା ଆ଼ନେ; ଏ଼ଦି ଜସେପତି ତା଼ର୍ୟୁଁତା, ଇଚିହିଁ, ଜାହାରା ତାୟିୟାଁ ତା଼ଣାଟି ଏଟ୍‌କା ଆ଼ତି ମାଣ୍‌ସି ତା଼ର୍ୟୁଁତା ରିନେ।" 27 "ବିନ୍ୟାମିନ୍‌ ଗଦ କ୍ଡାଃନି ଲେହେଁତାସି, ଲା଼ଇଅଲି ଅ଼ଡ଼େ ମିଡ଼୍‌ଅଲା ବେ଼ଲାତା ବେ଼ଟା ପା଼ୟାହାଁ ତିନେସି।" 28 ଈୱାରି ଇସ୍ରାୟେଲତି ବା଼ର କୂଡ଼ା; ଈୱାରି ତାଞ୍ଜି ବ଼ର ହୀତାଟି ଈ କାତା ୱେସାନା ଈୱାରାଇଁ ଜା଼ଣ୍‌କେ ତାକି ଜା଼ଣ୍‌କେ ବ଼ର ହୀତେସି।

ଜାକୁବତି ହା଼କି

29 ଏଚେଟିଏ ଜାକୁବ ତାନି ମୀର୍‌କାଣି ହୁକୁମି ହୀହାଁ ଏଲେଇଚେସି, "ନା଼ନୁ ନା଼ ଲ଼କୁ ତଲେ ରୁଣ୍ତା ଆ଼ହାଲି ହାଜିମାଇଁ, ନା଼ନୁ ଏଚିବେ଼ଲା ହା଼ଇଁ ନା଼ ଆକୁ ଆ଼ବାୟାଁ ତଲେ ଇପ୍ରଣତି ହୀତିୟ ଟା଼ୟୁତି ପା଼ୱୁତା ଇଟାଦୁ। 30 ଏ଼ଦାଆଁତାକି ଅବ୍ରାହାମ ମାହ୍‌ଣିମାଣ୍ତା ଅଦିକାରା ତାକି କିଣାନ ଦେ଼ସାତା ମମ୍ରିତି ଡାଗେତି ଏମିନି ମକ୍‌ପେଲାତି ବୂମି ହୀତିୟ ଇପ୍ରଣ ତା଼ଣାଟି କଡାମାଚେସି, ଏ଼ ହୀତିୟ ଇପ୍ରଣତି ପା଼ୱୁତା ନା଼ ଆକୁ ଆ଼ବାୟାଁ ତଲେ ନାଙ୍ଗେ ଦ଼ନ କିୟାଦୁ। 31 ଏ଼ ଟା଼ୟୁତା ଅବ୍ରାହାମ ଅ଼ଡ଼େ ତାନି ଡକ୍ରି ସାରାନି ଦ଼ନ କିୱିଆ଼ହାମାନେ, ଇଞ୍ଜାଁ ଏ଼ ଟା଼ୟୁତା ଇସାହାକ ଅ଼ଡ଼େ ତାନି ଡକ୍ରି ରିବିକା ଦ଼ନ କିୱି ଆ଼ହାମାନୁ; ଅ଼ଡ଼େ ଏ଼ ଟା଼ୟୁତା ନା଼ନୁ ଲେୟାନି ଦ଼ନ କିହାମାଇଁ। 32 ଏ଼ ବୂମି ଅ଼ଡ଼େ ଏମ୍ବାତି ପା଼ୱୁ ହୀତିୟ ମୀର୍‌କା ତା଼ଣାଟି କଡ୍‌ୱି ଆ଼ହାମାନେ, ଏମ୍ବାଆଁ ନାଙ୍ଗେ ମୁସ୍ତାଦୁ।" 33 ଇଲେକିହିଁ ଜାକୁବ ତାନି ମୀର୍‌କାଣି ହୁକୁମି ହୀହାଲି ରା଼ତି ଡା଼ୟୁ ପା଼ସ୍‌ପନିତା ରୀ କଡାୟାଁ ଜ଼ଡ଼ି କିହାଁ ହା଼ତେସି ଅ଼ଡ଼େ ତାମି ଲ଼କୁ ତା଼ଣା ରୁଣ୍ତା ଆ଼ତେସି।