ମୂଲୁ 35

ବେତେଲ୍‌ତା ଜାକୁବଇଁ ମାହାପୂରୁତି ବ଼ର

1 ଏଚେଟିଏ ମାହାପୂରୁ ଜାକୁବଇଁ ଏଲେଇଚେସି, "ନୀନୁ ନିଙ୍ଗା ହାଜାହାଁ ବେତେଲ୍‌ତା ବାସା କିମୁ; ଇଞ୍ଜାଁ ନୀ ତାୟି ଏସୱୁ ତା଼ଣାଟି ହଟିମାଚି ବେ଼ଲାତା ଏମିନି ମାହାପୂରୁ ତ଼ଞ୍ଜା ଆ଼ହାମାଞ୍ଜାତେସି ଏ଼ୱାଣି ତାକି ପୂଜାପିଣ୍ତା କିମୁ।"

2 ଏଚେଟିଏ ଜାକୁବ ତାନି ଇଲୁ କୁଟମିତି ଅ଼ଡ଼େ ତାନି ତଲେ ଡ଼ୟାମାଚି ଲ଼କୁଇଁ ଏଲେଇଚେସି, "ମୀ ତା଼ଣା ଏମିନି ଏଟ୍‌କାତି ପେ଼ଣ୍‌କା ମାନୁ, ଏ଼ୱାସିକାଣି ହେକ କିଦୁ; ଜାହାରାଇଁ ସୁଦୁ କିଦୁ ଇଞ୍ଜାଁ ଜାହାରା ବାସ୍ତେରି ବାଦ୍‌ଲି କିଦୁ। 3 ଇଞ୍ଜାଁ ୱା଼ଦୁ ମା଼ର ଈ ଟା଼ୟୁ ପିସାହାଁ ବେତେଲ୍‌ତା ହାନ, ଏମିନି ମାହାପୂରୁ ନା଼ ଦୁକୁତି ବେ଼ଲାତା ନାଙ୍ଗେ ସା଼ୟେମି କିୟାତେସି ଏ଼ୱାଣି କ଼ସମି ନା଼ନୁ ଏମ୍ବାଆଁ ର଼ ପୂଜାପିଣ୍ତା କିଇଁ।" 4 ଏଚେଟିଏ ଏ଼ୱାରି ତାମି ତା଼ଣାତି ଏଟ୍‌କା ଦେ଼ସାତି ବାରେ ପେ଼ଣ୍‌କାଣି ଅ଼ଡ଼େ କୀର୍କାତି ଆ଼ସ୍ତି ବାରେ ଅ଼ହାଁ ଜାକୁବକି ହୀତେରି, ଇଞ୍ଜାଁ ଏ଼ୱାସି ଏ଼ ବାରେ ଅ଼ହାଁ ସିକିମ ଡାଗେ ଅଲନ୍‌ ମା଼ର୍‌ନୁ ଡ଼଼ଇ ମୁସ୍ତେସି।

5 ଏଚେଟିଏ ଏ଼ୱାରି ହାଚେରି; ଏଚିବେ଼ଲା ସା଼ରିୱାକିତି ଗା଼ଡ଼ାତା ମାହାପୂରୁ ତା଼ଣାଟି ଆଜି ୱା଼ତେ, ଇଞ୍ଜାଁ ଏ଼ୱାରି ଜାକୁବତି ମୀର୍‌କାଣି ପେ଼ର୍‌ଆତେରି। 6 ଏଚେଟିଏ ଜାକୁବ ଅ଼ଡ଼େ ତାନି ତ଼ଡ଼ୁ ଲ଼କୁ କିଣାନ ଦେ଼ସାତି ଲୂସ୍‌ତା, ଇଚିହିଁ, ବେତେଲ୍‌ତା ୱା଼ତେରି। 7 ଏ଼ୱାସି ଏମ୍ବାଆଁ ର଼ ପୂଜାପିଣ୍ତା କିହାଁ ଏ଼ ଟା଼ୟୁତି ଦ଼ରୁ ଏଲ୍‌-ବେତେଲ୍‌ ଇଟିତେସି, ଇଚିହିଁ ଜାକୁବ ତାୟି ଆଜିତାକି ହଟିମାଚାଟି ମାହାପୂରୁ ଏମ୍ବାଆଁ ଏ଼ୱାଣାଇଁ ତ଼ଞ୍ଜା ଆ଼ହାମାଚେସି। 8 ଅ଼ଡ଼େ ଏ଼ ଟା଼ୟୁତା ରିବିକାନି ସେ଼ବା କିନାୟି ଦବରା ଦ଼ରୁତି ହ଼ଲେଣି ହା଼ହାଲିଏ, ବେତେଲ୍‌ ମାଦିତି ଅଲନ୍‌ ମା଼ର୍‌ନୁ ଡ଼଼ଇ ଏ଼ଦାଣି ଦ଼ନ କିତେରି, ଇଞ୍ଜାଁ ଏ଼ ଟା଼ୟୁତି ଦ଼ରୁ ଅଲନ୍‌-ବାକୁତ୍‌*35:8 ଅଲନ୍‌-ବାକୁତ୍‌/ଦୁକୁତି ମା଼ର୍‌ନୁ ଆ଼ତେ।

9 ଏଚେଟିଏ ଜାକୁବ ପଦନ୍‌ ଅରାମଟିଏ*35:9 ପଦନ୍‌ ଅରାମ/ମେସପଟାମିୟାଁ ୱେଣ୍ତାଲିଏ, ଅ଼ଡ଼େ ୱେଣ୍ତେ ମାହାପୂରୁ ତ଼ଞ୍ଜାଆ଼ହାଁ ଏ଼ୱାଣାଇଁ ବ଼ର ହୀତେସି। 10 ଇଞ୍ଜାଁ ମାହାପୂରୁ ଏ଼ୱାଣାଇଁ ଏଲେଇଚେସି, "ନୀ ଦ଼ରୁ ଜାକୁବ, ସାମା ନୀ ଦ଼ରୁ ଜାକୁବ ଡ଼ୟେଏ, ନୀ ଦ଼ରୁ ଇସ୍ରାୟେଲ ଆ଼ନେ; ଇଞ୍ଜାଁ ଏ଼ୱାଣି ଦ଼ରୁ ଇସ୍ରାୟେଲ ଇଟିତେସି।" 11 ଇଞ୍ଜାଁ ମାହାପୂରୁ ଏ଼ୱାଣାଇଁ ଅ଼ଡ଼େ ଏଲେଇଚେସି, "ନା଼ନୁ ବାରେ ବା଼ଡ଼୍‌ୟୁଗାଟି ମାହାପୂରୁତେଏଁ; ମୀରୁ ବେ଼ଲି ଏ଼ପା କିହାଁ ହା଼ରେକା କୂଡ଼ା ଆ଼ଦୁ। ନୀ ତା଼ଣାଟି ର଼ କୂଲୁ ହ଼ନେ, ଇଚିହିଁ କୂଲୁ କୁଟମି ଇଞ୍ଜାଁ ନୀ ତା଼ଣାଟି ରାଜାୟାଁ ଜାର୍ନା ଆ଼ନେରି। 12 ଇଞ୍ଜାଁ ନା଼ନୁ ଅବ୍ରାହାମ ଅ଼ଡ଼େ ଇସାହାକଇଁ ଏମିନି ଦେ଼ସା ହୀହାମାଇଁ, ଏ଼ ଦେ଼ସା ନିଙ୍ଗେ ଅ଼ଡ଼େ ନୀ ୱା଼ହିମାନି କୂଡ଼ା ତାକି ହୀଇଁ।" 13 ଏ଼ ଟା଼ୟୁତା ଏ଼ୱାଣି ତଲେ ଇଲେକିଁ କାତା ଆ଼ହାଁ ମାହାପୂରୁ ଏ଼ୱାଣି ତା଼ଣାଟି ଲାକପୂରୁ ହାଚେସି 14 ଏଚେ଼ଟିଏ ଜାକୁବ ଏ଼ କାତାଆ଼ତି ଟା଼ୟୁତା ର଼ ମୁଣ୍ତା, ଇଚିହିଁ, ୱାଲିତି ମୁଣ୍ତା କିହାଁ ତାନି ଲାକ ଗହ୍‌ନି ଅଙ୍ଗୁରି ରାସା ହେର୍‌ପାହାଁ ନିୟୁଁ ୱା଼କ୍‌ହେସି। 15 ଇଞ୍ଜାଁ ଜାକୁବ ମାହାପୂରୁ ତଲେ କାତାଆ଼ତି ଟା଼ୟୁତି ଦ଼ରୁ ବେତେଲ୍‌*35:15 ବେତେଲ୍‌/ମାହାପୂରୁ ଇଲୁ ଇଟିତେସି।

ରାହେଲତି ହା଼କି

16 ଏଚେଟିଏ ଏ଼ୱାରି ବେତେଲ୍‌ଟିଏ ହାଚେରି, ସାମା ଇପ୍ରାତାତା ଏଜାଲି ତାକି ହିରେ ହେକ ମାଚାଟିଏ ରାହେଲତି ଜାର୍ନି କିନି ବୀସା ଆ଼ତେ; ଅ଼ଡ଼େ, ଏ଼ଦି ଜାର୍ନି କିହାଲି ହା଼ରେକା କସ୍ତ ଆ଼ତେ। 17 ଅ଼ଡ଼େ ଜାର୍ନି କିନି ବୀସା ଗାଡି ଆୟାଲିଏ, ସେ଼ବା କିନାୟି ଏ଼ଦାଣି ଏଲେଇଚେ, "ଆଜାଆନି, ନୀନୁ ନୀଏଟି ଜିକେଏ କକାଣାଇଁ ଜାର୍ନା କିଦି।" 18 ଆ଼ତିଜିକେଏ ଏ଼ଦି ହା଼ତେ, ଇଞ୍ଜାଁ ଏ଼ଦାନି ପୂଣ୍ତା ହାଚି ବେ଼ଲାତା ମୀର୍‌ଏଣା ଦ଼ରୁ ବିନନି*35:18 ବିନନି/ନା଼ କସ୍ତତି ମୀର୍‌ଏସି ଇଞ୍ଜିଁ ଇଟିତେ, ସାମା ତାମି ଆ଼ବା ଏ଼ୱାଣି ଦ଼ରୁ ବିନ୍ୟାମିନ୍‌ ଟିଃନି କେୟୁତି ମୀର୍‌ଏସି ଇଟିତେସି।

19 ଇଲେକିଁ ରାହେଲତି ହା଼କି ଆ଼ହାଲିଏ, ଇପ୍ରାତା ଇଚିହିଁ, ବେତଲିହିମ ହାନି ଜିରୁ ଟଟତା ଦ଼ନ କିୱିଆ଼ତେ। 20 ଏଚେଟିଏ ଜାକୁବ ଏ଼ ମାହ୍‌ଣିମାଣ୍ତା ଲାକ ର଼ ୱାଲିତି ମୁଣ୍ତା କିତେସି; ରାହେଲତି ଏ଼ ମାହ୍‌ଣି ମାଣ୍ତାତି ମୁଣ୍ତା ନୀଏଁ ପାତେକା ମାନେ। 21 ଏଚେଟିଏ ଇସ୍ରାୟେଲ ଏମ୍ବାଟି ହାଜାହାଁ ଏଦର କ଼ଟା ଗା଼ଣ୍‌ଚାହାଁ ଏ଼ ଟଟତା ତୂମୁ କେ଼ପିତେସି।

ଜାକୁବତି ମୀର୍‌କା

22 ଏ଼ ଦେ଼ସାତା ଇସ୍ରାୟେଲ ବାସା କିତି ବେ଼ଲାତା ରୁବେନ୍‌ ହାଜାହାଁ ତାମି ଆ଼ବାତି ବିଲ୍‌ହା ଇନି ଅ଼ର ଡକ୍ରି ତଲେ ଡୂରିତେସି, ଇଞ୍ଜାଁ, ଜାକୁବ ଏ଼ଦାଆଁ ୱେଞ୍ଜାହାଁ କାର୍‌ବି ଆ଼ତେସି।

23 ଜାକୁବତି ବା଼ର ଜା଼ଣା ମୀର୍‌କା ମାଚେରି; ଏ଼ୱାରି ବିତ୍ରା ରୁବେନ୍‌ ଜାକୁବତି ପା଼ଣ୍‌ୱା ମୀର୍‌ଏସି, ଅ଼ଡ଼େ ସିମିୟନ, ଲେ଼ବି, ଜୀହୁଦା, ଇସାକର, ଅ଼ଡ଼େ ସବୁଲୁନ, ଈୱାରି ଲେୟାତି ମୀର୍‌କା; 24 ଜସେପ ଅ଼ଡ଼େ ବିନ୍ୟାମିନ୍‌ ରାହେଲତି ମୀର୍‌କା। 25 ଦାନ୍‌ ଅ଼ଡ଼େ ନପ୍ତାଲି ରାହେଲନି ହ଼ଲେଣି ବିଲ୍‌ହା ମୀର୍‌କା। 26 ଅ଼ଡ଼େ ଗାଦ୍‌ ଅ଼ଡ଼େ ଆସେର ଲେୟାତି ହ଼ଲେଣି ସିଲ୍‌ପା ମୀର୍‌କା। ଜାକୁବତି ଈ ବାରେ ମୀର୍‌କା ପଦନ୍‌ ଅରାମତା ଜାର୍ନା ଆ଼ହାମାଚେରି।

ଇସାହାକତି ହା଼କି

27 ଏଚେଟିଏ କିରିୟତ୍‌-ଅର୍ବ ଇଚିହିଁ, ହିବ୍ରଣ ଗା଼ଡ଼ା ଡାଗେତି ମମ୍ରି ଦ଼ରୁତି ଏମିନି ଟା଼ୟୁତା ଅବ୍ରାହାମ ଅ଼ଡ଼େ ଇସାହାକ ଡ଼ୟିମାଚେରି, ଏ଼ ଟା଼ୟୁତା ଜାକୁବ ତାମି ଆ଼ବା ଇସାହାକ ତା଼ଣା ହାଚେସି। 28 ଇସାହାକ ନ଼ କ଼ଡ଼ି ବାର୍ସା ନୀଡାମାଚେସି। 29 ଏଚେଟିଏ ଇସାହାକ ଦୂତି ବୁଡ଼୍‌ହା ବେ଼ଲାତା ହା଼ତେସି; ଅ଼ଡ଼େ ତାନି ଲ଼କୁ ତଲେ ଆଣ୍ତିତେସି; ଇଞ୍ଜାଁ ତାନି ମୀର୍‌କା ଏସୱୁ ଅ଼ଡ଼େ ଜାକୁବ ଏ଼ୱାଣାଇଁ ଦ଼ନ କିତେରି।