ମୂଲୁ 34

ଦୀଣା ତଲେ ଲାଗେଏତି କାମା

1 ର଼ ଦିନା ଲେୟାନି ତା଼ଣାଟି ଜାର୍ନା ଆ଼ହାମାନି ଜାକୁବ ମା଼ଙ୍ଗା ଦୀଣା, କିଣାନ ଦେ଼ସାତି ପ଼ଦାୟାଁ ତଲେ କାତା ଆ଼ହାଲି ପାଙ୍ଗାତା ହାଚେ। 2 ଏଚେଟିଏ ହିବ୍‌ବିୟ ହମର ଦ଼ରୁତି ଦେ଼ସାତି କାଜାଣି ମୀର୍‌ଏସି ସିକିମ ଏ଼ଦାନି ମେସ୍ତେସି; ଇଞ୍ଜାଁ, ଏ଼ଦାନି ଅ଼ହାଁ ଏ଼ଦାନି ତଲେ ଡୂରାହାଁ ଏ଼ଦାନି ଲାଗେଏ କିତେସି। 3 ଅ଼ଡ଼େ ଜାକୁବ ମା଼ଙ୍ଗା ଦୀଣା ତା଼ଣା ତାନି ମ଼ନ ଆ଼ତାକି ଏ଼ୱାସି ଏ଼ ଡ଼ାଆନି ଜୀୱୁ ନ଼ହାଁ ଏ଼ଦାଣି ସୁଦୁ ସୁୱାଲା ତଲେ କାତା ଆ଼ତେସି। 4 ଏଚେଟିଏ ସିକିମ ତାମି ଆ଼ବା ହମରଇଁ ଏଲେଇଚେସି, "ନୀନୁ ଈ ଡ଼ାଆ ପ଼ଦାନି ତଲେ ନାଙ୍ଗେ ବୀହା କିୟାମୁ।"

5 ଏଚେଟିଏ ଜାକୁବ ତାନି ମା଼ଙ୍ଗା ଦୀଣାନି ସିକିମ ଲାଗେଏ କିହାମାନି କାତା ୱେଚେସି; ଏଚିବେ଼ଲା ତାନି ମୀର୍‌କା ଜା଼ଡ଼ାତା କ଼ଡି ଗରି ତଲେ ମାଚାକି ଜାକୁବ ଏ଼ୱାରି ୱା଼ନି ପାତେକା ପାଲେଏ ଡ଼ୟିତେସି। 6 ଏଚେଟିଏ ସିକିମତି ଆ଼ବା ହମର ଜାକୁବ ତଲେ ହା଼ଡାକାତା ଆ଼ହାଲି ହାଚେସି। 7 ଅ଼ଡ଼େ ଜାକୁବ ମୀର୍‌କା ଏ଼ କାବ୍ରୁ ୱେଞ୍ଜାହାଁ ଜା଼ଡ଼ାଟି ୱା଼ହାମାଚେରି; ଅ଼ଡ଼େ, ସିକିମ ଜାକୁବତି ମା଼ଙ୍ଗା ତଲେ ଡୂରାହାଁ ଇସ୍ରାୟେଲ କ଼ପାଟି ଏମିନି କିଆଗାଟି ଲାଗେଏତି କାମା କିହାମାଚେସି, ଏ଼ଦାଆଁତାକି ଏ଼ୱାରି ନୀରାସା ଅ଼ଡ଼େ କାର୍‌ବି ତଲେ ମାଚେରି। 8 ଏଚିବେ଼ଲା ହମର ଏ଼ୱାରି ତଲେ ହା଼ଡାକାତା ଆ଼ହାଁ ଏଲେଇଚେସି, "ମୀ ଈ ମା଼ଙ୍ଗା ତା଼ଣା ନା଼ ମୀର୍‌ଏସି ସିକିମତି ମ଼ନ ମାନେ; ଏ଼ଦାଆଁତାକି ନା଼ ମୀର୍‌ଏଣା ତଲେ ବୀହା କିଦୁ, ଇଞ୍ଜିଁ ବାତିମା଼ଲିତେସି। 9 ଅ଼ଡ଼େ, ମା଼ ତଲେ ବୀହା ତାକି ସାମ୍‌ନ୍ଦି ଆ଼ଦୁ, ମୀ ମା଼ସ୍‌କାଣି ମାଙ୍ଗେ ହିୟାଦୁ, ମା଼ ମା଼ସ୍‌କାଣି ମୀରୁ ଅ଼ଦୁ। 10 ଆ଼ତିହିଁ, ମୀରୁ ମା଼ ତଲେ ବାସା କିଦେରି; ବାରେ ଦେ଼ସା ମୀ ନ଼କିତା ମାନେ, ଏମ୍ବାଆଁ ବାସାକିଦୁ ଅ଼ଡ଼େ ବେ଼ବାରା କିହାଁ ଅଦିକାରା କିଦୁ।"

11 ଅ଼ଡ଼େ ସିକିମ ଦୀଣାତି ଆ଼ବାଇଁ ଅ଼ଡ଼େ ତାୟିୟାଁଣି ଏଲେଇଚେସି, "ମୀମ୍ବୁ ନାଙ୍ଗେ କାର୍ମା ମେସ୍ତାଦୁ, ଏଚେ଼ଟିଏ ଏ଼ନାଆଁ ୱେସ୍ତାଦେରି, ଏ଼ଦାଆଁ ନା଼ନୁ ହିୟାଇଁ। 12 ମଲା ଅ଼ଡ଼େ ଦା଼ନା ଏଚେକା ରୀସ୍ତାଦେରି, ମୀ କାତା ଲେହେଁ ହିୟାଇଁ; ସାମା ଏ଼ନିଜିକେଏ ନା଼ ତଲେ ଈ ଡ଼ାଆନି ବୀହା କିୟାଦୁ।"

13 ଏ଼ଦାଆଁତାକି ସିକିମ ଜାକୁବ ମୀର୍‌କାତି ତାଙ୍ଗି ଦୀଣାନି ଲାଗେଏ କିହାମାନାକି ଏ଼ୱାରି ସିକିମ ଅ଼ଡ଼େ ତାମି ଆ଼ବା ହମର ତଲେ ସୁତରି ତଲେ ହା଼ଡାକାତା ଆ଼ତେରି, 14 ଏ଼ୱାରି ଏ଼ୱାଣାଇଁ ଏଲେଇଚେରି, "ମା଼ମ୍ବୁ ତ଼ଲୁ ଦା଼ପିଆ଼ଆତି ଲ଼କୁକି ମା଼ ତାଙ୍ଗିନି ହୀହାଲି ଆ଼ଡଅମି, ଏଲେକିତିହିଁ, ଏ଼ଦି ମା଼ ମା଼ନି ହାନେ। 15 ଇଚିହିଁ ମୀରୁ ର଼ କାମା କିଦେରି, ମା଼ ଲେହେଁକି ମୀରୁ ବାରେ ଆ଼ବାୟାଁ ତ଼ଲୁ ଦା଼ପିଆ଼ଦେରି, ଆ଼ତିହିଁ ମା଼ମ୍ବୁ ମୀ କାତା ମା଼ନୱି ଆ଼ନମି। 16 ମା଼ମ୍ବୁ ମିଙ୍ଗେ ମା଼ ମା଼ସ୍‌କାଣି ହିୟାନମି ଅ଼ଡ଼େ ମା଼ମ୍ବୁ ମୀ ମା଼ସ୍‌କାଣି ଅ଼ନମି, ଅ଼ଡ଼େ ମୀ ତଲେ ବାସା କିହାଁ ରଣ୍ତିଏ ଲ଼କୁ ଆ଼ନମି। 17 ସାମା ମୀରୁ ମା଼ ତ଼ଲୁ ଦା଼ପିଆ଼ନି କାତା ୱେନଅତେରି, ଆତିହିଁ ମା଼ମ୍ବୁ ଏ଼ ମା଼ଙ୍ଗାନି ଅ଼ହିଁ ହାନମି।"

18 ଏଚିବେ଼ଲା ଏ଼ୱାରି ଈ କାତାତା ହମର ଅ଼ଡ଼େ ତାନି ମୀର୍‌ଏସି ସିକିମ ରା଼ହାଁ ଆ଼ତେରି। 19 ଇଞ୍ଜାଁ ଏ଼ ଦାଂଗ୍‌ଣେଏସି ଦାପେ ଏ଼ କାମା କିତେସି, ଇଚିହିଁ ଏ଼ୱାସି ଜାକୁବତି ମା଼ଙ୍ଗାନି ହା଼ରେକା ମ଼ନ କିହାମାଚେସି। ଏ଼ ସିକିମ ତାମି ତାଞ୍ଜି କୁଟମିତା ବାରେ କିହାଁ ମା଼ନିଗାଟାସି ମାଚେସି।

20 ଏଚେ଼ଟିଏ ହମର ଅ଼ଡ଼େ ତାନି ମୀର୍‌ଏସି ସିକିମ ତାମି ଗା଼ଡ଼ା ଦୁୱେରିତା ୱା଼ହାଁ ଗା଼ଡ଼ାତି ଲ଼କୁତଲେ ହା଼ଡାକାତା ଆ଼ହାଁ ଏଲେଇଚେସି; 21 "ଈ ଲ଼କୁ ମା଼ ତଲେ ତ଼ଣେ ଆ଼ହାମାନେରି; ଏ଼ଦାଆଁତାକି ଈୱାରାଇଁ ଈ ଦେ଼ସାତା ଡ଼ୟାଲି ଅ଼ଡ଼େ ବେ଼ବାରା କିହାଲି ତାକି ହୀପ୍‌କି ଆ଼ପେ; ଇଚିହିଁ ମେହ୍‌ଦୁ, ଈ ଦେ଼ସା ଏ଼ୱାରାକି ହା଼ରେକା ଆ଼ନେ; ଅ଼ଡ଼େ, ମା଼ର ଏ଼ୱାରି ମା଼ସ୍‌କା ଅ଼ହାଲି ଆ଼ଡିନାୟି ଅ଼ଡ଼େ ମା଼ ମା଼ସ୍‌କା ଏ଼ୱାରାକି ହୀନାୟି। 22 ସାମା ଏ଼ୱାରାକି ଈ ର଼ ମା଼ନି ମାନେ, ମା଼ର ବାରେ ଆ଼ବାୟାଁ ଏ଼ୱାରି ଲେହେଁ ତ଼ଲୁ ଦା଼ପିଆ଼ନାୟି ମାନେ, ଆତିହିଁ ଏ଼ୱାରି ମା଼ ତଲେ ଡ଼ୟାହାଁ ରଣ୍ତିଏ ଲ଼କୁ ଆ଼ହାଲି ଆ଼ଡିନେରି। 23 ଏ଼ୱାରି ଦ଼ନ, ବାତ୍‌କୁ ଅ଼ଡ଼େ ଜ଼ନ୍ତଜିୱେଡ଼ି ମା଼ୱି ଆ଼ଉ କି ? ୱାର୍‌ଇ ମା଼ର ଏ଼ୱାରି କାତା ଆହ୍‌ନ, ଏଲେକିତିହିଁ, ଏ଼ୱାରି ମା଼ ତଲେ ଡ଼ୟିନେରି।" 24 ଏଚିବେ଼ଲା ହମର ଅ଼ଡ଼େ ସିକିମତି ଈ କାତାତଲେ ତାମି ଗା଼ଡ଼ା ଦୁୱେରିଟି ପାଙ୍ଗାତା ହାନି ବାରେ ଲ଼କୁ ରା଼ଜି ଆ଼ତେରି; ଏଚେଟିଏ ତାମି ଗା଼ଡ଼ା ଦୁୱେରିଟି ପାଙ୍ଗାତା ହାନି ବାରେ ଆ଼ବାୟାଁ ତ଼ଲୁ ଦା଼ପି କିତେରି।

25 ତୀନିଦିନା ଡା଼ୟୁ, ବାରେ ଆ଼ବାୟାଁ ତ଼ଲୁ ଦା଼ପି ଆ଼ତାକି ଗା଼ହାଁ ଆ଼ତେରି ଏଚିବେ଼ଲା ଦୀଣାତି ତାୟିୟାଁ ସିମିୟନ ଅ଼ଡ଼େ ଲେ଼ବି ଜାକୁବତି ରୀ ମୀର୍‌କା ତାମି କାଣ୍ତା ଅ଼ହାଁ ଆଜାଆନା ଗା଼ଡ଼ାତା ହାଜାହାଁ ବାରେ ଆ଼ବାଣି ପା଼ୟିତେରି। 26 ଇଞ୍ଜାଁ, ହମର ଅ଼ଡ଼େ ତାନି ମୀର୍‌ଏସି ସିକିମଇଁ କାଣ୍ତା ତଲେ ପା଼ୟାହାଁ ସିକିମ ଇଲୁଟି ଦୀଣାନି ଅ଼ତେରି। 27 ଜାକୁବତି ମୀର୍‌କା ହା଼ତି ଲ଼କୁ ତା଼ଣା ୱା଼ହାଁ ଗା଼ଡ଼ାତି ସ଼ରୁ କିତେରି, ଇଚିହିଁ ଏ଼ୱାରି ତାଙ୍ଗିନି ଏ଼ ଲ଼କୁ ଲାଗେଏ କିହାମାଚେରି। 28 ଇଞ୍ଜାଁ ଏ଼ୱାରି କ଼ଡିୟାଁ, ମେ଼ଣ୍ତାୟାଁ, ଗା଼ଡ଼୍‌ଦେ, ଅ଼ଡ଼େ ଗା଼ଡ଼ାତି ବୂମିତି ବାରେ ଆ଼ସ୍ତି ସ଼ରୁ କିତେରି। 29 ଅ଼ଡ଼େ ଏ଼ୱାରି କକାରି ପ଼ଦାଁଣି ଅ଼ଡ଼େ ଆୟାସିକାଣି ଦସ୍‌ପାହାଁ ବାରେ ଦ଼ନ ଅ଼ଡ଼େ ଇଲୁତି ବାରେ ଆ଼ସ୍ତି ସ଼ରୁ କିତେରି।

30 ଏଚେ଼ଟିଏ ଜାକୁବ ସିମିୟନ ଅ଼ଡ଼େ ଲେ଼ବିଇଁ ଏଲେଇଚେସି, "ମୀରୁ ଈ ଦେ଼ସାତା, ଇଚିହିଁ, କିଣାନ ଅ଼ଡ଼େ ପରିସିୟ ଲ଼କୁ ତା଼ଣା ନାଙ୍ଗେ ଗାନ୍ଦା ଲେହେଁ କିହାଁ କିଲିବିଲି କିୟାତେରି; ନା଼ ଲ଼କୁ ଇଚର ଜା଼ଣା, ଏ଼ଦାଆଁତାକି ଏ଼ୱାରି ନା଼ କ଼ପାଟି ରୁଣ୍ତା ଆ଼ହାଁ ନାଙ୍ଗେ ପା଼ୟାନେରି; ଏଚେ଼ଟିଏ ବାରେ ଇଲୁ କୁଟମି ତଲେ ନା଼ସା ଆ଼ଇଁ।"

31 ସାମା ଏ଼ୱାରି ଏଲେଇଚେରି, "ଦା଼ରେଣି ଲେହେଁ ମା଼ ତାଙ୍ଗି ତଲେ ଲେ଼ମ୍ବିନାୟି ମାଚେକି ?"