ମୂଲୁ 19

ସଦମ ଗମରାତି ପା଼ପୁ

1 ଏଚେଟିଏ ମିଡ଼୍‌ଅଲା ବେ଼ଲା ରିଆରି ମାହାପୂରୁତି ଦୂତୁୟାଁ ସଦମ ଗା଼ଡ଼ାତା ୱା଼ତେରି, ଏଚିବେ଼ଲାତା ଲ଼ତ ଗା଼ଡ଼ା ଦୁୱେରିତା କୁଗାମାଚାକି ଏ଼ୱାରାଇଁ ମେସାହାଁ ଏ଼ୱାରି ତଲେ କାତା ଆ଼ହାଲି ନିଙ୍ଗିତେସି, ଇଞ୍ଜାଁ ଏ଼ୱାରି ନ଼କିତା ମୁନୁ କୁତାହାଁ ଜହରା କିହାଁ ଏଲେଇଚେସି। 2 "ହେ଼ ନା଼ ବା଼ବୁୟାଁ, ନା଼ନୁ ବାତିମା଼ଲି ମାଞ୍ଜାଇଁ, ନୀଞ୍ଜୁ ଲା଼ଆଁୟାଁ ମୀ ଈ ହ଼ଲେଏଣା ଇଜ ୱା଼ହାଁ କଡାୟାଁ ନର୍‌ଦୁ ଇଞ୍ଜାଁ ବାସାକିଦୁ; ଏଚେଟିଏ ଲା଼ଇ ନିଙ୍ଗାହାଁ ହାଜେରିୱା।" ଏଚେଟିଏ ଏ଼ୱାରି ଏଲେଇଚେରି, "ଆ଼ଏ; ମା଼ମ୍ବୁ ଆଂଗେଣିତା ଲା଼ଆଁୟାଁ ଡ଼ୟିନମି।"

3 ସାମା ଲ଼ତ ହା଼ରେକା ବାତିମା଼ଲାଲିଏ ଏ଼ୱାରି ତାନି ତଲେ ତାମି ଇଜ ହାଚେରି; ଏଚେଟିଏ ଏ଼ୱାସି ଏ଼ୱାରାକି ପୁଲା ଆଣ୍ତାଆତି ରୂଟି ଇଞ୍ଜାଁ କା଼ଦି ୱାଜାଲିଏ ଏ଼ୱାରି ତିଚେରି।

4 ସାମା ଏ଼ୱାରି ଡୂରିନି ନ଼କେଏ, ଏ଼ ଗା଼ଡ଼ାତି ଲ଼କୁ ଇଚିହିଁ ସଦମ ଗା଼ଡ଼ାତି ଦାଂଗ୍‌ଣାୟାଁ, ବୁଡ଼୍‌ହା ଲ଼କୁ ବାରେ ଇଲୁତା ୱା଼ହାଁ ସା଼ରିସୁଟୁ ଗୂର୍‌ତେରି। 5 ଏ଼ୱାରି ଲ଼ତଇଁ ହା଼ଟିହିଁ ଏଲେଇଚେରି, "ନୀଞ୍ଜୁ ଲା଼ଆଁୟାଁ ଏମିନି ମାଣ୍‌ସିୟାଁ ନୀ ଇଜ ୱା଼ତେରି ଏ଼ୱାରି ଆମ୍ବିୟା ? ଏ଼ୱାରାଇଁ ପାଙ୍ଗାତା ତାଚାହାଁ ମାଙ୍ଗେ ହିୟାମୁ। ମା଼ମ୍ବୁ ଏ଼ୱାରି ତଲେ ଲାଗେଏତି କାମା କିନମି।"

6 ଏଚେଟିଏ ଲ଼ତ ପାଙ୍ଗାତା ୱା଼ହାଁ ଦା଼ରା ସୁଣ୍ତାହାଁ ଏଲେଇଚେସି। 7 "ହେ଼ ତାୟିୟାଁ, ନା଼ନୁ ବାତିମା଼ଲି ମାଞ୍ଜାଇଁ, ଇଲେତି ଲାଗେଏତି କାମା କିଆଦୁ। 8 ସିନିକିଦୁ, ବୀହା ଆ଼ଆତି ନା଼ ମା଼ସ୍‌କା ରିଣ୍ତି ମାନୁ। ଏ଼ୱାସିକାଣି ମୀ ତା଼ଣା ତାଚା ହିୟାଇଁ, ମିଙ୍ଗେ ଏ଼ନାୟି ନେହେଁ ଏ଼ଦାଆଁ ଏ଼ୱାସିକାଣି କିଦୁ, ସାମା ଏ଼ ମାଣ୍‌ସିୟାଁଇଁ ଏ଼ନାଆଁ କିଆଦୁ; ଇଚିହିଁ ଏ଼ୱାରି ନା଼ ଇଲୁତା ଗତା ୱା଼ହାଁ ବାସା କିହାମାନେରି।"

9 ଏଚିବେ଼ଲା ଏ଼ୱାରି ଏଲେଇଚେରି, "ଗୁଚାଆ଼ମୁ।" ଅ଼ଡ଼େ ଏଲେଇଚେରି, "ଈ ମାଣ୍‌ସି ମା଼ ତା଼ଣା ବାସାକିହାଁ ମା଼ ନୀହାଁୟି କିହାଲି ଅଣ୍‌ପିମାନେସି; ନୀଏଁ ଏ଼ୱାରି କିହାଁ ନିଙ୍ଗେ ହା଼ରେକା ଲାଗେଏ କିୟାନମି।" ଏଚେଟିଏ ଏ଼ ମାଣ୍‌ସିୟାଁ ଲ଼ତଇଁ ନାବ୍‌ଗାହାଁ ଦା଼ରା ଡିକ୍‌ହାଲି ହାଚେରି। 10 ସାମା ଏ଼ ରିଆରି ଲ଼ତଇଁ କେୟୁ ଆସାହାଁ ବିତ୍ରା ରେଜା କଡିତେରି ଇଞ୍ଜାଁ ଦା଼ରା ସୁଣ୍ତିତେରି। 11 ଇଞ୍ଜାଁ ଦୁୱେରି ଦାରିତି ବାରେ ଊଣାୟାଁ କାଜାରି ବାରେ ଲ଼କୁଣି କା଼ଣାୟାଁ କିତେରି, ଏଚେଟିଏ ଏ଼ୱାରି ଦା଼ରା ପାରି ପାରିହିଁ ୱା଼ହା ହାଚେରି।

ଲ଼ତ ସଦମଟି ହାନାୟି

12 ଏଚେଟିଏ ଏ଼ ରିଆରି ଲ଼ତଇଁ ଏଲେଇଚେରି, "ଇମ୍ବାଆଁ ମୀ ଆମ୍ବା ଆମ୍ବାଆରି ମାନେରି ? ମୀ ମୀର୍‌କା, ମା଼ସ୍‌କା ଅ଼ଡ଼େ ହନେସିଙ୍ଗା ଏଚେକା ଈ ଗା଼ଡ଼ାତା ମାନେରି, ଏ଼ ବାରେତି ଈ ଟା଼ୟୁଟି ଅ଼ଦୁ। 13 ଇଚିହିଁ ମା଼ମ୍ବୁ ଈ ଗା଼ଡ଼ାଇଁ ନା଼ସା କିନମି। ପ୍ରବୁ ନ଼କିତା ଈ ଗା଼ଡ଼ା କ଼ପାଟି କାର୍‌ବି ଗାଡି ଆ଼ହାମାନେ, ଏ଼ଦାଆଁତାକି ଈ ଗା଼ଡ଼ାତି ନା଼ସା କିହାଲି ପ୍ରବୁ ମାଙ୍ଗେ ପାଣ୍ତାମାଞ୍ଜାନେସି।"

14 ଏଚେଟିଏ ଲ଼ତ ପାଙ୍ଗାତା ହାଜାହାଁ ତାନି ମା଼ସ୍‌କାଣି ବୀହା ଆ଼ନି ହନେସିଙ୍ଗାଣି ଏଲେଇଚେସି, "ୱା଼ଦୁ, ଇମ୍ବାଟି ହ଼ଦୁ, ପ୍ରବୁ ଈ ଗା଼ଡ଼ାତି ନା଼ସା କିନେସି।" ସାମା ହନେସିଙ୍ଗା କିଜୱି ଇଞ୍ଜିହିଁ ଅଣ୍‌ପିତେରି।

15 ଅ଼ର ଦିନା ଲା଼ଇ ୱେ଼ୟାଲିଏ, ଦୂତୁୟାଁ ଲ଼ତଇଁ ଦାଗା କିହାଁ ଏଲେଇଚେରି, "ନିଙ୍ଗାମୁ, ନୀ ଡକ୍ରି ଅ଼ଡ଼େ ଈ ରୀ ମା଼ସ୍‌କା ଇମ୍ବାଆଁ ମାନୁ, ଏ଼ୱାସିକାଣି ଅ଼ମୁ; ଆ଼ଆତିହିଁ ଗା଼ଡ଼ାତି ଡଣ୍ତତା ନା଼ସା ଆ଼ଦେରି।" 16 ଆ଼ତିଜିକେଏ ଲ଼ତ ୱେ଼ଡ଼ା କିତେସି; ଏଚେଟିଏ ଏ଼ୱାଣି ତାକି ପ୍ରବୁତି କାର୍ମା ଆ଼ତାକି ଏ଼ୱାରି ତାନି କେୟୁ ଅ଼ଡ଼େ ତାନି ଡକ୍ରିନି କେୟୁ ଅ଼ଡ଼େ ରୀ ମା଼ସ୍‌କାତି କେସ୍କା ଆସାହାଁ ଏ଼ୱାସିକାଣି ଗା଼ଡ଼ା ପାଙ୍ଗାତା ଅ଼ତେରି। 17 ଇଲେକିଁ ଏ଼ୱାରାଇଁ ତାତି ଡା଼ୟୁ, ଏ଼ୱାରି ବିତ୍ରାଟି ରଅସି ଲ଼ତଇଁ ଏଲେଇଚେସି, "ଜୀୱୁ ନୀଟ୍‌ହାଲି ତାକି ହଣ୍‌ଦୁ; ଡା଼ୟୁୱାକି ସିନିକିଆଦୁ ଇଞ୍ଜାଁ ଈ ବାଟାତା ଡ଼ୟାଆଦୁ; ହ଼ରୁତା ହଣ୍‌ଦୁ; ଆ଼ଆତିଁ ନା଼ସା ଆ଼ଦେରି।"

18 ଏଚେଟିଏ ଲ଼ତ ଏଲେଇଚେସି, "ଏ଼ ନା଼ ପ୍ରବୁ ଏଲେକିଁ ଆ଼ଆପେ। 19 ନୀଏଁ ଈ ହ଼ଲେଏଣାଇଁ କାର୍ମା ଆ଼ହାଁ ଜୀୱୁ ଗେଲ୍‌ପାସାରେ; ନା଼ନୁ ହ଼ରୁତା ହଟାଲି ଆ଼ଡଅଁ; ଏଚେ଼ତା କସ୍ତ ୱା଼ତିହିଁ ହା଼ହାହାଇଁ। 20 ସିନିକିଦୁ, ଡାଗେ ର଼ ଊଣା ନା଼ୟୁଁ ମାନେ; ଏ଼ ଟା଼ୟୁତା ହଟାଲି ହୁକୁମି ହିୟାଦୁ, ଏଚେଟିଏ ନା଼ ଜୀୱୁ ନୀଡିନେ; ଏ଼ଦି ଊଣା ଆ଼ଏ କି ?"

21 ଏଚେଟିଏ ଦୂତୁ ଏଲେଇଚେସି, "ନେହିଁ, ନା଼ନୁ ଈ କାତା ତାକି ନିଙ୍ଗେ କାର୍ମା ଆ଼ହାଁ, ଏ଼ ଏମିନି ଗା଼ଡ଼ାତି କାତା ୱେସ୍ତାତି ଏ଼ଦାଆଁ ନା଼ସା କିଅଁ। 22 ମୀରୁ ତବେ ଏ଼ ଟା଼ୟୁତା ହଣ୍‌ଦୁ, ଇଚିହିଁ ମୀରୁ ଏମ୍ବାଆଁ ଏଆ ପାତେକା ମା଼ମ୍ବୁ ଏ଼ନାଆଁ କିହାଲି ଆ଼ଡଅମି।" ଏ଼ଦାଆଁତାକି ଏ଼ ଗା଼ଡ଼ାତି ଦ଼ରୁ ସୟର*19:22 ଊଣା ଆ଼ତେ।

ସଦମ ଅ଼ଡ଼େ ଗମରା ନା଼ସା

23 ଏଚେଟିଏ ଦାର୍‌ତିତା ୱେ଼ଡ଼ା ଆ଼ଡାଲିଏ ଲ଼ତ ସୟରତା ଏତେସି 24 ଏଚେଟିଏ ପ୍ରବୁ ହା଼ଗୁ ଲାକଟି ପ୍ରବୁ ତା଼ଣାଟି ସଦମ ଅ଼ଡ଼େ ଗମରା ଲାକ ଗାନ୍ଦା ଅ଼ଡ଼େ ହିଚୁ ରିୱିକିତେସି। 25 ଅ଼ଡ଼େ ବାରେ ଗା଼ଡ଼ା, ଜା଼ଡ଼ା ଜା଼ଣ୍ତୁ, ଅ଼ଡ଼େ ଏମ୍ବାଆଁ ମାଚି ଲ଼କୁ ଇଞ୍ଜାଁ ଏ଼ ବୂମିତା ନେୟିଁତି ବାରେ ଦିଣ୍‌ସୁ ନା଼ସା କିତେସି। 26 ଏଚିବେ଼ଲାତା ଲ଼ତ ଡକ୍ରି ଡା଼ୟୁୱାକି ସିନିକିହାଲିଏ ଏ଼ଦି ହା଼ରୁ ମୁଣ୍ତା ଆ଼ତେ।

27 ଅ଼ଡ଼େ ଅବ୍ରାହାମ ଲା଼ଇ ନିଙ୍ଗାହାଁ ତଲି ଏମିନି ଟା଼ୟୁତା ପ୍ରବୁ ତା଼ଣା ନିଚାମାଚେସି, ଏ଼ ଟା଼ୟୁତା ନିତେସି, 28 ଏ଼ୱାସି ସଦମ ଅ଼ଡ଼େ ଗମରା ବାଟାତି ବାରେ ନା଼ସ୍‌କା ସିନିକିହାଲିଏ, ଏ଼ ଦେ଼ସାଟି ହିଚୁ ମାଣ୍ଡାତି ବ଼ୟିଁ ଲେହେଁ ହ଼ଚି ମାନାଣି ମେସ୍ତେସି। 29 ଇଲେକିହିଁ ଏ଼ ବାଟାତି ବାରେ ଗା଼ଡ଼ାୟାଁ ନା଼ସାକିତି ବେ଼ଲାତା ମାହାପୂରୁ ଅବ୍ରାହାମଇଁ ଅଣ୍‌ପିତେସି, ଇଞ୍ଜାଁ, ଲ଼ତ ଏମି ଏମିନି ଗା଼ଡ଼ାତା ବାସା କିହିମାଚେସି, ଏ଼ ଗା଼ଡ଼ା ନା଼ସା ଆ଼ତି ବେ଼ଲାତା ଲ଼ତଇଁ ଗେଲ୍‌ପିତେସି।

ମୟାବ ଅ଼ଡ଼େ ଅମନିୟ ଲ଼କୁ ଜାର୍ନା

30 ଏଚେଟିଏ ଲ଼ତ ସୟରତା ବାସା କିହାଲି ଆଜି ତାକି ଏମ୍ବାଟି ହାଜାହାଁ ତାନି ରୀ ମା଼ସ୍‌କାଣି ଅ଼ହାଁ ହ଼ରୁତା ବାସା କିତେସି; ଏମ୍ୱାଆଁ ଏ଼ୱାସି ଅ଼ଡ଼େ ତାନି ମା଼ସ୍‌କା ପା଼ୱୁତା ବାସା କିତେରି। 31 ଏଚେଟିଏ ତାନି ପା଼ଣ୍‌ୱା ମା଼ଙ୍ଗା ତାନି ତାଙ୍ଗିନି ଏଲେଇଚେ, "ମା଼ ଆ଼ବା ବୁଡ଼୍‌ହା, ଅ଼ଡ଼େ ଦାର୍‌ତିତି ମେ଼ରା ଲେହେଁ ବୀହାଆ଼ହାଁ କକାରି ପ଼ଦାୟାଁ ଆୟାଲି ସା଼ରିୱାକି ଆ଼ବାୟାଁ ହିଲଅରି। 32 ୱା଼ମୁ ମା଼ର ଆ଼ବାଇଁ ଅଙ୍ଗୁରି ରାସା ଊଟ୍‌ହାଁ ଆ଼ବାତି କୂଡ଼ା ଗେଲ୍‌ପାଲି ତାକି ତାନି ତଲେ ଡୂରିନ।" 33 ଏଚେଟିଏ ଏ଼ ଲା଼ଆଁୟାଁ ଏ଼ୱି ତାମି ଆ଼ବାଇଁ ଅଙ୍ଗୁରି ରାସା ଊଟ୍‌ହୁ, ଅ଼ଡ଼େ ପା଼ଣ୍‌ୱା ମା଼ଙ୍ଗା ହାଜାହାଁ ଆ଼ବା ତଲେ ଡୂରିତେ; ସାମା ଏ଼ଦି ଡୂରାହାଁ ନିଙ୍ଗା ହାଚାଣି ଲ଼ତ ପୁନାଆତେସି।

34 ତାନି ଅ଼ର ଦିନା ପା଼ଣ୍‌ୱା ମା଼ଙ୍ଗା ତାନି ବ଼ପିନି ଏଲେଇଚେ, "ମେହ୍‌ମୁ ରେଃଏନି ଲା଼ଆଁୟାଁ ନା଼ନୁ ଆ଼ବା ତଲେ ଡୂରିତେଏଁ; ନୀଞ୍ଜୁ ଲା଼ଆଁୟାଁ ଜିକେଏ ଅଙ୍ଗୁରି ରାସା ଊଟ୍‌ନ, ଅ଼ଡ଼େ ନୀନୁ ହାଜାହାଁ ଆ଼ବାତି କୂଲୁ ଗେଲ୍‌ପାଲି ଏ଼ୱାଣି ତଲେ ଡୂରାମୁ।" 35 ଏଚେଟିଏ ଏ଼ୱି ଏ଼ ଲା଼ଆଁୟାଁ ଜିକେଏ ତାମି ଆ଼ବାଇଁ ଅଙ୍ଗୁରି ରାସା ଊଟ୍‌ହୁ, ଅ଼ଡ଼େ ଊଣା ମା଼ଙ୍ଗା ତାନି ତଲେ ଡୂରିତେ; ସାମା ତାନି ଡୂରିତାଣି ଅ଼ଡ଼େ ନିଙ୍ଗା ହାଚାଣି ଲ଼ତ ପୁନାଆତେସି। 36 ଇଲେକିଁ ଲ଼ତତି ରୀ ମା଼ସ୍‌କା ତାମି ତାଞ୍ଜି ତଲେ ପୂରାମା଼ସା ଆ଼ତୁ। 37 ଏଚେଟିଏ ପା଼ଣ୍‌ୱା ମା଼ଙ୍ଗା ମୀର୍‌ଏଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ମୟାବ*19:37 ଆ଼ବା ତା଼ଣାଟି ଇଟିତେ। ଏ଼ୱାସି ନୀଏଁ କା଼ଲାତି ମୟାବିୟ ଲ଼କୁତି ମୂଲୁ ତାଞ୍ଜି ଆ଼ତେସି। 38 ଊଣା ମା଼ଙ୍ଗା ଜିକେଏ କକାଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ବିନ-ଅମି*19:38 ନା଼ ତାଞ୍ଜି ମୀର୍‌ଏସି ଇଟିତେ, ଏ଼ୱାସି ନୀଏଁ କା଼ଲାତି ଅମନିୟ ଲ଼କୁତି ମୂଲୁ ତାଞ୍ଜି ଆ଼ତେସି।