ମୂଲୁ 47

ଗସନତା ଜାକୁବତି କୁଟମି

1 ଏଚେଟିଏ ଜସେପ ହାଜାହାଁ ପା଼ରଇଁ କାବ୍ରୁ ହୀହାଁ ଏଲେଇଚେସି, "ନା଼ ଆ଼ବା ଅ଼ଡ଼େ ତାୟିୟାଁ କିଣାନ ଦେ଼ସାଟି ତାମି କ଼ଡି, ଗରି, ବାରେ ବିତି ଆସାହାଁ ୱା଼ହାମାନେରି; ମେହ୍‌ମୁ ଏ଼ୱାରି ଗ଼ସନ୍‌ ରା଼ଜିତା ମାନେରି।" 2 ଇଞ୍ଜାଁ ଜସେପ ତାମି ତାୟିୟାଁ ବିତ୍ରାଟି ପା଼ସା ଜା଼ଣାତି ଅ଼ହାଁ ପା଼ର ତଲେ କାତା କିୱିକିତେସି। 3 ଏଚେଟିଏ ରାଜା ଜସେପତି ତାୟିୟାଁଇଁ ୱେଚେସି, "ମୀରୁ ଏ଼ନି କାମା କିହିମାଞ୍ଜେରି ?" ଏ଼ୱାରି ଏଲେଇଚେରି, "ନୀ ଈ ହ଼ଲିୟାଙ୍ଗା ମା଼ ଆକୁ ଆ଼ବାୟାଁ ବେ଼ଲାଟିଏ କ଼ଡି ଗରି ମେନାତମି।"

4 ଏ଼ୱାରି ପା଼ରଇଁ ଅ଼ଡ଼େ ଏଲେଇଚେରି, "ମା଼ମ୍ବୁ ଈ ଦେ଼ସାତା ଡ଼ୟାଲି ୱା଼ହାମାନମି; ଇଚିହିଁ ଈ ନୀ ହ଼ଲିୟାଙ୍ଗାତି କ଼ଡି ଗରି ତାକି ହାରା ହିଲେଏ; କିଣାନ ଦେ଼ସାତା ହା଼ରେକା କାର୍‌ୱୁ ଆ଼ହାମାନେ; ଏ଼ଦାଆଁତାକି ବାତିମା଼ଲି ମାଞ୍ଜାନମି ନୀନୁ ଈ ହ଼ଲିୟାଙ୍ଗାଣି ଗ଼ସନ୍‌ ରା଼ଜିତା ଡ଼ୟାଲି ହେଲ ହିୟାମୁ।" 5 ଏଚେଟିଏ ରାଜା ଜସେପଇଁ ହୁକୁମି ହୀତେସି, "ନୀ ତାଞ୍ଜି ଅ଼ଡ଼େ ନୀ ତାୟିୟାଁ ନୀ ତା଼ଣା ୱା଼ହାମାନେରି, 6 ମିସର ଦେ଼ସା ନୀ ତା଼ଣା ମାନେ; ଦେ଼ସାତି ନେହିଁ ଟା଼ୟୁତା ମୀ ଆ଼ବା ଅ଼ଡ଼େ ତାୟିୟାଁଇଁ ବାସା କିୱିକିମୁ; ଗ଼ସନ୍‌ ରା଼ଜିତା ଏ଼ୱାରି ବାସା କିପେରି; ଇଞ୍ଜାଁ ଏ଼ୱାରି ବିତ୍ରାଟି ଆମ୍ବା ଆମ୍ବାଆରି ବା଼ଡ଼୍‌ୟୁ ଗାଟାରି ଇଞ୍ଜିଁ ପୁଞ୍ଜାମାଞ୍ଜି, ଏ଼ୱାରାଇଁ, ନା଼ କ଼ଡି ଗରିତି କାଜାରି ପା଼ଣାତା ହେର୍‌ପାମୁ।"

7 ଏଚେ଼ଟିଏ ଜସେପ ତାନି ଆ଼ବା ଜାକୁବଇଁ ତାଚାହାଁ ପା଼ର ରାଜା ନ଼କିତା ନିପ୍‌ହେସି; ଏଚେଟିଏ ଜାକୁବ ପା଼ର ରାଜାଇଁ ବ଼ର ହୀତେସି, 8 ଏଚିବେ଼ଲା ରାଜା ଜାକୁବଇଁ ୱେଚେସି, "ନିଙ୍ଗେ ଏଚର ବାର୍ସା ଆୟାତେ ?"

9 ଜାକୁବ ପା଼ରଇଁ ଏଲେଇଚେସି, "ନା଼ ନୀଡାମାନି ବାର୍ସା ସ଼କ଼ଡ଼ି ଦସ ବାର୍ସା ଆୟାତେ; ନା଼ନୁ ନୀଡିତି ବାର୍ସା ଗାଡି ଆ଼ଏ ଅ଼ଡ଼େ କସ୍ତତାୟି, ନା଼ ଆକୁ ଆ଼ବାୟାଁ ଲେହେଁ ହା଼ରେକା ଦିନା ଆ଼ଏ।" 10 ଏଚେଟିଏ ଜାକୁବ ପା଼ର ରାଜାଇଁ ବ଼ର ହୀହାଁ ଏ଼ୱାଣି ତା଼ଣାଟି ହାଚେସି। 11 ଏଚେ଼ଟିଏ ଜସେପ ପା଼ରତି ହୁକୁମି ଲେହେଁ ମିସର ଦେ଼ସାତି ହା଼ରେକା ନେହିଁ ଟା଼ୟୁତା, ଇଚିହିଁ, ଗସନତି ରାମିସେସ୍‌ ରା଼ଜିତା ଅଦିକାରା ହୀହାଁ ତାନି ଆ଼ବା ଅ଼ଡ଼େ ତାୟିୟାଁଣି ଡ଼ୟିକିତେସି। 12 ଇଞ୍ଜାଁ ଜସେପ ତାନି ତାଞ୍ଜି ଅ଼ଡ଼େ ତାୟିୟାଁଣି ଅ଼ଡ଼େ ବାରେ ତାଞ୍ଜି କୁଟମିତି ଲେକା ତଲେ ତିନି କା଼ଦି ହୀହାଁ ପ଼ହିକିତେସି।

କାର୍‌ୱୁ

13 ଏଚିବେ଼ଲାତା ହା଼ରେକା କାର୍‌ୱୁ ଆ଼ତାକି ବାରେ ଦେ଼ସାତା କା଼ଦିକଣ୍ତା ହିଲାଆତେ, ଏଚେଟିଏ ମିସର ଦେ଼ସା ଅ଼ଡ଼େ କିଣାନ ଦେ଼ସାତି ଲ଼କୁ କାର୍‌ୱୁ ତାକି କାଟିୱେ଼ତି ଲେହେଁ ଆ଼ତେରି। 14 ଅ଼ଡ଼େ ମିସର ଦେ଼ସାତା ଅ଼ଡ଼େ କିଣାନ ଦେ଼ସାତା ଏଚେକା ୱେଣ୍ତି ମାଚେ, ଲ଼କୁ ଏ଼ଦାଆଁ ହୀହାଁ ଆର୍ନା କଡାଲିଏ ଜସେପ ଏ଼ ବାରେ ୱେଣ୍ତି କୂଡ଼ିକିହାଁ ପା଼ରତି ଇଜ ତାତେସି। 15 ଏଚେଟିଏ ମିସର ଅ଼ଡ଼େ କିଣାନ ଦେ଼ସାତା ୱେଣ୍ତି ରା଼ହାଲିଏ, ମିସରତି ଲ଼କୁ ବାରେ ଜସେପ ତା଼ଣା ୱା଼ହାଁ ଏଲେଇଚେରି, "ମାଙ୍ଗେ କା଼ଦିକଣ୍ତା ହିୟାମୁ, ମା଼ ୱେଣ୍ତି ରା଼ହାହାଚେ ଇଞ୍ଜିଁ, ଏ଼ନାଆଁତାକି ମା଼ମ୍ବୁ ନୀ ନ଼କିତା ହା଼ନମି ?"

16 ଏଚେଟିଏ ଜସେପ ଏଲେଇଚେସି, "ମୀ ଜ଼ନ୍ତ ହିୟାଦୁ; ମୀ ୱେଣ୍ତି ରା଼ହାମାଚିହିଁ ଜ଼ନ୍ତତି ବାଦୁଲି ନା଼ନୁ ମିଙ୍ଗେ କା଼ଦିକଣ୍ତା ହିୟାଇଁ।" 17 ଏଚେଟିଏ ଏ଼ୱାରି ଜସେପ ତା଼ଣା ଜାହା ଜାହାରା ଜ଼ନ୍ତ ତାତେରି, ଏଚେଟିଏ ଜସେପ ଗ଼ଡ଼ାୟାଁ, ମେ଼ଣ୍ତାୟାଁ, ଗରିୟାଁ, କ଼ଡିୟାଁ ଅ଼ଡ଼େ ଗା଼ଡ଼୍‌ଦେୟାଁ ବାଦୁଲି ତଲେ ଏ଼ୱାରାକି କା଼ଦିକଣ୍ତା ହୀତେସି; ଇଲେକିହିଁ ଜସେପ ଜ଼ନ୍ତ ବାଦୁଲି ଏ଼ୱାରାକି ରା଼ନ୍ଦା ହୀହାଁ ଏ଼ ବାର୍ସା ସା଼ଲୱି କିତେସି।

18 ଇଞ୍ଜାଁ ଏ଼ ବାର୍ସା ରା଼ହାଲିଏ, ଅ଼ର ବାର୍ସା ୱା଼ହାଁ ଏ଼ୱାରି ଜସେପଇଁ ଏଲେଇଚେରି, "ମା଼ ବାରେ ୱେଣ୍ତି ରା଼ହାହାଚେ; ଏ଼ଦାଆଁ ସା଼ୱୁକାରି ତା଼ଣା ଡ଼ୁକ୍‌ଅମି; ଅ଼ଡ଼େ, ମା଼ ବାରେ ଜ଼ନ୍ତଜିୱେଡ଼ି ଜିକେଏ ସା଼ୱୁକାରି ୱାୟି ଆ଼ହାମାନେ; ନୀଏଁ ମା଼ ସା଼ୱୁକାରି ନ଼କିତା ମା଼ ଆଙ୍ଗା ଅ଼ଡ଼େ ବୂମି ପିସ୍‌ପେ ଏ଼ନାୟି ହିଲେଏ। 19 ଏ଼ଦାଆଁତାକି ମା଼ମ୍ବୁ ଅ଼ଡ଼େ ମା଼ ବୂମି ଏ଼ନିକିଁ ନୀ ନ଼କିତା ହା଼ନମି ? ନୀନୁ କା଼ଦିକଣ୍ତା ହୀହାଁ ମାଙ୍ଗେ ଅ଼ଡ଼େ ମା଼ ବୂମି ଅ଼ମୁ, ଏଚେଟିଏ ମା଼ମ୍ବୁ ଅ଼ଡ଼େ ମା଼ ବୂମି ପା଼ରତି ହ଼ଲିୟା ଆ଼ନମି; ଅ଼ଡ଼େ ମାଙ୍ଗେ ବିଚା ହିୟାମୁ, ଏଚେଟିଏ ନୀଡିନମି; ଆ଼ଆତିଁ ମା଼ମ୍ବୁ ହା଼ହାହାନମି, ଇଞ୍ଜାଁ ବୂମି ଜିକେଏ ନସ୍ତ ଆ଼ନେ।"

20 ଇଲେକିହିଁ କାର୍‌ୱୁ ଏ଼ୱାରି ତାକି ହା଼ରେକା ଅ଼ର୍‌ହାଲି ଆ଼ଡାଆଗାଟାୟି ଆ଼ହାଲିଏ, ମିସରତି ଲ଼କୁ ବାରେ ଜାହା ଜାହାରା ବୂମି ପା଼ର୍‌ତେରି; ଏଚେଟିଏ ଜସେପ ପା଼ରକି ମିସର ଦେ଼ସାତି ବାରେ ବୂମି କଡିତେସି; ଏଚେଟିଏ ବାରେ ବୂମି ପା଼ରୱାୟି ଆ଼ତେ। 21 ଏଚେଟିଏ ଜସେପ ମିସର ଦେ଼ସାତି ର଼ ହାନ୍ଦିଟିଏ ଅ଼ର ହାନ୍ଦି ପାତେକା ଗା଼ଡ଼ା ତାକି ଗା଼ଡ଼ା ଲ଼କୁଣି ବାସା କିୱିକିତେସି। 22 ଏ଼ୱାସି ୱାର୍‌ଇ ପୂଜେରାଙ୍ଗା ବୂମି କଡାଆତେସି; ଏ଼ନାଆଁତାକି ଇଚିହିଁ ପୂଜେରାଙ୍ଗା ପା଼ର ତା଼ଣାଟି ବୁତି ବେଟାଆ଼ତେରି; ଏ଼ଦାଆଁତାକି ପା଼ର ହୀତି ବୁତି ତଲେ ଏ଼ୱାରି ନୀଡିତେରି ଇଞ୍ଜାଁ ଏ଼ୱାରି ତାମି ବୂମି ପା଼ର୍‌ଆତେରି। 23 ଏଚେଟିଏ ଜସେପ ଲ଼କୁଣି ଏଲେଇଚେସି, "ମେହ୍‌ଦୁ, ନା଼ନୁ ପା଼ର ରାଜାକି ମିଙ୍ଗେ ଅ଼ଡ଼େ ମୀ ବୂମି ବାରେ କଡିତେଏଁ; ନୀଏଁ ଈ ବିଚା ଅ଼ହାଁ ବୂମିତା ମାଟାଦୁ। 24 ଏମ୍ବାଟି ଏଚେକା କାମ୍ବିନେ ତାନି ପା଼ସା ବା଼ଗାଟି ର଼ ବା଼ଗା ପା଼ରକି ହୀଦେରି, ଅ଼ଡ଼େ, ଏଟ୍‌କା ସା଼ରି ବା଼ଗା ବୂମିତି ବିଚା ତାକି ଅ଼ଡ଼େ ଜାହା ଜାହାରା ଲ଼କୁ ଅ଼ଡ଼େ କକାରି ପ଼ଦାୟାଁକି ଇଟିଦେରି।"

25 ଏଚେଟିଏ ଏ଼ୱାରି ଏଲେଇଚେରି, "ନୀନୁ ମା଼ ଜୀୱୁ ଗେଲ୍‌ପାତି; ନୀ କାର୍ମାମେହ୍‌ନାୟି ଆ଼ତିସାରେ, ମା଼ମ୍ବୁ ପା଼ରତି ହ଼ଲିୟାଙ୍ଗା ଆ଼ନମି।" 26 ପା଼ସା ବା଼ଗାଟି ର଼ ବା଼ଗା ପା଼ର ବେଟାଆ଼ନେସି, ମିସରତି ବାରେ ବୂମିତି କାତା ଜସେପ କିତି ଈ ମେ଼ରା ନୀଏଁ ପାତେକା ମାନେ; ୱାର୍‌ଇ ପୂଜେରାଙ୍ଗା ବୂମି ପା଼ରୱାୟି ଆ଼ଆତେ।

ଜାକୁବତି ବାତିମା଼ଲିନାୟି

27 ଏଚିବେ଼ଲା ଇସ୍ରାୟେଲ ଲ଼କୁ ମିସରତି ଗ଼ସନ୍‌ ରା଼ଜିତା ବାସା କିତେରି, ଇଞ୍ଜାଁ ଏମ୍ବାଆଁ ଏ଼ୱାରି ଅଦିକାରା ବେଟାଆ଼ହାଁ ବେ଼ଲି ଏ଼ପା ଆ଼ହାଁ ହା଼ରେକା କୂଡ଼ା ଆ଼ତେରି। 28 ଜାକୁବ ମିସର ଦେ଼ସାତା ସତର ବାର୍ସା ପାତେକା ଡ଼ୟିତେସି, ଏ଼ୱାସି ସା଼ତା କ଼ଡ଼ି ସା଼ତା ବାର୍ସା ନୀଡାମାଚେସି। 29 ଜାକୁବତି ହା଼ନି କାଟୁ ଆୟାଲିଏ, ଏ଼ୱାସି ତାନି ମୀର୍‌ଏସି ଜସେପଇଁ ହା଼ଟାହାଁ ଏଲେଇଚେସି, "ନା଼ନୁ ନୀ ନ଼କିତା କାର୍ମା ବେଟାଆ଼ତେଏଁ ଏ଼ଦାଆଁତାକି ନୀ କେୟୁ ନା଼ କୁଦ୍‌ଗୁତା ଇଟାମୁ; ଇଞ୍ଜାଁ ନାଙ୍ଗେ ତାକି କାର୍ମା ଅ଼ଡ଼େ ସାତାତଲେ ଲେ଼ମ୍ବାହାଁ ନାଙ୍ଗେ ଈ ମିସର ଦେ଼ସାତା ଦ଼ନ କିୟାଆଦୁ। 30 ନା଼ନୁ ନା଼ ଆକୁ ଆ଼ବାୟାଁ ତଲେ ଡୂରିସାରେ, ମୀରୁ ନାଙ୍ଗେ ଈ ମିସର ଦେ଼ସାଟି ଅ଼ହାଁ ଏ଼ୱାରି ମାହ୍‌ଣି ମାଣ୍ତାତା ନାଙ୍ଗେ ଦ଼ନ କିୟାଦୁ।" ଏଚେଟିଏ ଜସେପ ଏଲେଇଚେସି, "ନୀ ହୁକୁମି ତଲେ କିଇଁ।"

31 ଏଚେଟିଏ ଜାକୁବ ଜସେପଇଁ ପାର୍‌ମାଣା କିହାଲି ଏଲେଇଞ୍ଜାଲିଏ, ଏ଼ୱାସି ଏ଼ୱାଣି ନ଼କିତା ପାର୍‌ମାଣା କିତେସି, ଏଚିବେ଼ଲା ଜାକୁବ ତାନି ପା଼ସ୍‌ପନିତି ତା଼ର୍ୟୁଁ ୱାକି ଜହରା କିତେସି।