1 ଅବ୍ରାହାମ ଏମ୍ବାଟିଏ ୱେ଼ଡ଼ା ହ଼ନି ଟିଃନି ୱାକିତି ନେଗେବ୍‌ ଦେ଼ସାତା ହାଜାହାଁ କାଦେସ ଅ଼ଡ଼େ ସୁରତି ମାଦି ଟା଼ୟୁତା ମାଞ୍ଜାହାଁ ଗରାରତା ବାସା କିତେସି। 2 ଇଞ୍ଜାଁ ଅବ୍ରାହାମ ତାନି ଡକ୍ରି ସାରା କାତା ଏଲେଇଚେସି, ଏ଼ଦି ନା଼ ତାଙ୍ଗି; ଏ଼ଦାଆଁତାକି ଗରାରତି ରାଜା ଅବିମେଲକ ଲ଼କୁ ପାଣ୍ତାହାଁ ସାରାନି ଅ଼ତେସି। 3 ଏଚେଟିଏ ଲା଼ଆଁୟାଁ ମାହାପୂରୁ ହାପାନାତା ଅବିମେଲକ ତା଼ଣା ୱା଼ହାଁ ଏଲେଇଚେସି, "ମେହ୍‌ମୁ ନୀନୁ ହା଼ଦି, ଇଚିହିଁ ନୀନୁ ଏମିନି ଇୟାନି ଅ଼ହାମାଞ୍ଜି; ଏ଼ଦାଣି ଡକ୍ରା ମାନେସି।"

4 ସାମା ଅବିମେଲକ ତାନି ତଲେ ଡୂରାହିଲାଆକି ଏଲେଇଚେସି, "ହେ଼ ପ୍ରବୁ, ଏମିନି ଦେ଼ସାତି ଲ଼କୁ ଦ଼ହ ହୀଲାଆଗାଟାରି, ଏ଼ୱାରାଇଁ ଜିକେଏ କି ନୀନୁ ପା଼ୟିଦି ? 5 ଏ଼ ମାଣ୍‌ସି ତା଼ନୁଏ ଏଲେଇଞ୍ଜା ହିଲାଆତେସି, ‘ଏ଼ଦି ତାନି ତାଙ୍ଗି ?’ ଅ଼ଡ଼େ ଏ଼ ଇୟା ତା଼ନୁଏ ଏଲେଇଞ୍ଜାତେ, ‘ଏ଼ୱାସି ନା଼ ତାୟି;’ ଏ଼ଦାଆଁତାକି ମ଼ନତି ସୁଦୁ ଅ଼ଡ଼େ କେୟୁତି ଦ଼ହ ହିଲାଆତା଼ଣା ନା଼ନୁ ଈ କାମା କିହାମାଇଁ।"

6 ଏଚେଟିଏ ମାହାପୂରୁ ହାପାନାତା ଏ଼ୱାଣାଇଁ ଏଲେଇଚେସି, "ନୀନୁ ମ଼ନତି ନେହିଁ ଅଣ୍‌ପୁ ତଲେ ଈ କାମା କିହାମାଞ୍ଜି; ଈଦାଆଁ ନା଼ନୁ ପୁଞ୍ଜାମାଇଁ; ଅ଼ଡ଼େ ନା଼ନୁ ଜିକେଏ ନା଼ କ଼ପାଟି ପା଼ପୁ କିହାଲି ନିଙ୍ଗେ ହିୟାଆତେଏଁ; ଈଦାଆଁତାକି ଏ଼ଦାନି ଡୀଗାଲି ନିଙ୍ଗେ ହିୟାଆତେଏଁ। 7 ଏ଼ଦାଆଁତାକି ନୀଏଁ ଏ଼ ମାଣ୍‌ସିତି ଡକ୍ରିନି ୱେଟ୍‌ହାତୁହ୍‌ମୁ; ଇଚିହିଁ ଏ଼ୱାସି ନ଼କିତା ଆ଼ନି କାତା ୱେ଼କ୍‌ନାସି, ଏ଼ୱାସି ନୀ ତାକି ପ୍ରା଼ତାନା କିନେସି, ଆତିହିଁ ନୀନୁ ନୀଡିଦି; ସାମା ଏ଼ୱାଣାକି ଏ଼ଦାନି ୱେଟ୍‌ଆସାରେ, ସାତେଏ ନୀନୁ ଅ଼ଡ଼େ ନୀ ଇଲୁକୁଟମି ହା଼ଦେରି, ଈଦାଆଁ ପୁଞ୍ଜାମାନାମୁ।"

8 ଏଚେଟିଏ ଅବିମେଲକ ଲା଼ଇସିଏ ନିଙ୍ଗାହାଁ ତାନି ହ଼ଲିୟାଙ୍ଗାଣି ହା଼ଟାହାଁ ଈ ବାରେ କାତା ଏ଼ୱାରାଇଁ ୱେସ୍ତେସି, ଅ଼ଡ଼େ ଏ଼ୱାରି ହା଼ରେକା ଆଜିତେରି। 9 ଏଚେଟିଏ ଅବିମେଲକ ଅବ୍ରାହାମଇଁ ହା଼ଟାହାଁ ଏଲେଇଚେସି, "ମାଙ୍ଗେ ନୀନୁ ଏ଼ନାଆଁକି ଇଲେ କିୟାତି ? ନୀନୁ ମାଙ୍ଗେ ଅ଼ଡ଼େ ମା଼ ରା଼ଜିତି ହା଼ରେକା ପା଼ପୁଗାଟାୟି କିୟାତି, ମା଼ମ୍ବୁ ନୀ କ଼ପାଟି ଏ଼ନି ଦ଼ହ କିହାମାନମି ? ନୀନୁ ମା଼ ତାକି ପା଼ଡ଼ା ଆ଼ଆତି କାମା କିତି।" 10 ଅବିମେଲକ ଅବ୍ରାହାମଇଁ ଅ଼ଡ଼େ ଏଲେଇଚେସି, "ନୀନୁ ଏ଼ନାଆଁ ମେସାହାଁ ଇଲେତି କାମା କିତି ?"

11 ଏଚିବେ଼ଲା ଅବ୍ରାହାମ ଏଲେଇଚେସି, "ଈ ଦେ଼ସାତି ଲ଼କୁକି ମାହାପୂରୁତି ଆଜି ହିଲେଏ; ଏ଼ଦାଆଁତାକି ନା଼ନୁ ଅଣ୍‌ପିତେଏଁ, ଈୱାରି ନା଼ ଡକ୍ରିନି ଜୂପ୍‌କା ତାକି ନାଙ୍ଗେ ପା଼ୟାନେରି। 12 ଏ଼ଦି ନା଼ ତାଙ୍ଗି, ଏ଼ଦି ସାତା। ଇଚିହିଁ ଏ଼ଦି ନା଼ ଆ଼ବାତି ମା଼ଙ୍ଗା, ସାମା ନା଼ ଇୟାନି ମା଼ଙ୍ଗା ଆ଼ଏ, ଅ଼ଡ଼େ ନା଼ ଡକ୍ରି ଆ଼ତେ। 13 ଏଚିବେ଼ଲା ମାହାପୂରୁ ନାଙ୍ଗେ ତାଞ୍ଜି ଇଲୁଟିଏ ଏଟ୍‌କା ଦେ଼ସାତା ପାଣ୍ତାତେସି, ଏଚିବେ଼ଲା ନା଼ନୁ ଏ଼ଦାନି ୱେସାମାଚେଏଁ, ‘ନୀନୁ ନାଙ୍ଗେ କାର୍ମା ମେସ୍ତାମୁ, ମା଼ର ଏମି ଏମିନି ଟା଼ୟୁତା ହାନାୟି, ଏ଼ ଟା଼ୟୁତା ନୀନୁ ନାଙ୍ଗେ ତାୟି ଇଞ୍ଜିଁ ୱେହ୍‌ମୁ।’"

14 ଏଚିବେ଼ଲା ଅବିମେଲକ ସାରାଇଁ ଅବ୍ରାହାମକି ୱେଟ୍‌ହେସି ଅ଼ଡ଼େ ମେ଼ଣ୍ତାୟାଁ, କ଼ଡିୟାଁ, ହ଼ଲିୟାଙ୍ଗା ଅ଼ଡ଼େ ହ଼ଲେଣିସିକା ଜିକେଏ ହୀତେସି। 15 ଏଚେଟିଏ ଅବିମେଲକ ଅବ୍ରାହାମଇଁ ଏଲେଇଚେସି, "ମେହ୍‌ମୁ ମା଼ ଈ ବାରେ ଦେ଼ସା ନୀ ନ଼କିତା ମାନେ, ଏମ୍ବିୟା ନୀ ମ଼ନ, ଏମ୍ବାଆଁ ବାସାକିମୁ।" 16 ଇଞ୍ଜାଁ ଅବିମେଲକ ସାରାଇଁ ଏଲେଇଚେସି, "ମେହ୍‌ମୁ ନା଼ନୁ ନୀ ତାୟିକି ର଼ ମା଼ଣା ୱେଣ୍ତି ଟାକାୟାଁ ହୀହିମାଇଁ; ମେହ୍‌ମୁ ଏ଼ଦି ନୀ ତଲେ ଆ଼ହାମାନି ବାରେ କାମା ତାକି ବାରେତି ନ଼କିତା ଦ଼ହ ହୀଲାଆଗାଟାରି ଇଞ୍ଜିହିଁ ପାର୍‌ମାଣା ତ଼ସାଲି, ଅ଼ଡ଼େ ବାରେ କାତା ତାକି ଅ଼ଡ଼େ ନିଙ୍ଗେ ତାକି ବିଚାରା କିୱିଆ଼ତେ।"

17 ଏଚେଟିଏ ଅବ୍ରାହାମ ମାହାପୂରୁ ତା଼ଣା ପ୍ରା଼ତାନା କିହାଲିଏ, ମାହାପୂରୁ ଅବିମେଲକ, ତାନି ଡକ୍ରି ଅ଼ଡ଼େ ତାନି ହ଼ଲେଣିସିକାଣି ନେହିଁ କିତେସି; ଏଚେଟିଏ ଏ଼ୱାସିକାକି କକାରି ପ଼ଦାୟାଁ ଜାର୍ନା ଆ଼ତୁ। 18 ଇଚିହିଁ ଅବ୍ରାହାମତି ଡକ୍ରି ସାରା ତାକି ପ୍ରବୁ ଅବିମେଲକ ଇଲୁତା ମାନି ଆୟାସିକାକି କକାରି ପ଼ଦାୟାଁ ଆ଼ନାଣି ଡୂକ୍‌ହା ମାଚେସି।