ମୂଲୁ 43

ଜସେପତି ତାୟିୟାଁ ବିନ୍ୟାମିନ୍‌ ତଲେ ମିସରତା

1 ଏଚିବେ଼ଲାତା ଜିକେଏ କିଣାନ ଦେ଼ସାତା ହା଼ରେକା କାର୍‌ୱୁ ମାଚେ। 2 ଏ଼ଦାଆଁତାକି ଏ଼ୱାରି ମିସର ଦେ଼ସାଟି ଆମିନି ଆର୍ନା ତାଚାମାଚେରି, ଏ଼ ବାରେ ରା଼ହାଲିଏ ତାମି ଆ଼ବା ଏ଼ୱାରାଇଁ ଏଲେଇଚେସି, "ମୀରୁ ଅ଼ଡ଼େ ୱେଣ୍ତେ ହାଜାହାଁ ମାଙ୍ଗେ ତାକି ଆର୍ନା କଡା ତାଦୁ।"

3 ଏଚେଟିଏ ଜୀହୁଦା ଏ଼ୱାଣାଇଁ ଏଲେଇଚେସି, "ଏ଼ ମାଣ୍‌ସି ଆ଼ଟ୍‌ୱା ତଲେ ପାର୍‌ମାଣା କିହାଁ ଏଲେଇଞ୍ଜା ମାଞ୍ଜାନେସି, ‘ମୀ ତାୟି ମୀ ତଲେ ହିଲାଆସାରେ, ମୀରୁ ନା଼ ମୂମ୍ବୁ ମେସାଲି ଆ଼ଡଅତେରି।’ 4 ଏ଼ଦାଆଁତାକି ନୀନୁ ମା଼ ତାୟିଇଁ ମା଼ ତଲେ ପାଣ୍ତାଦି, ଆ଼ତିହିଁ ମା଼ମ୍ବୁ ମିଙ୍ଗେ ତାକି ଆର୍ନା କଡାଲି ହାନମି। 5 ସାମା ପାଣ୍ତଅତି, ଆତିହିଁ ମା଼ମ୍ବୁ ହାଲଅମି; ଇଚିହିଁ ଏ଼ ମାଣ୍‌ସି ଏଲେଇଞ୍ଜା ମାଞ୍ଜାନେସି, ମୀ ତାୟି ମୀ ତଲେ ହିଲାଆସାରେ, ମୀରୁ ନା଼ ମୂମ୍ବୁ ମେସାଲି ଆ଼ଡଅତେରି।"

6 ଏଚେଟିଏ ଜାକୁବ ଏଲେଇଚେସି, "ମୀ ଅ଼ର ତାୟି ମାନେସି, ଈଦାଆଁ ୱେସାହାଁ ନାଙ୍ଗେ ଇଲେକିହିଁ ଏ଼ନାଆଁତାକି ଲାଗେଏ କିୟାତେରି।"

7 ଏ଼ୱାରି ଏଲେଇଚେରି, "ଏ଼ୱାସି ମାଙ୍ଗେ ଅ଼ଡ଼େ ମା଼ ଇଲୁ କୁଟମିତି ତୀରେ ତଲେ ୱେଞ୍ଜାତେସି, ମୀ ଆ଼ବା କି ନୀଏଁ ପାତେକା ନୀଡାମାନେସି ? ମିଙ୍ଗେ ଅ଼ଡ଼େ ତାୟି ମାନେସି କି ? ଏ଼ଦାଆଁତାକି ମା଼ମ୍ବୁ ତାନି କାତା ଲେହେଁ ୱେସ୍ତମି; ଏ଼ୱାସି ମୀ ତାୟିଇଁ ତାଦୁ ଇଞ୍ଜାନେସି ଇଞ୍ଜିଁ ମା଼ମ୍ବୁ ଏ଼ନିକିଁ ପୁନମି ?"

8 ଜୀହୁଦା ତାନି ଆ଼ବା ଜାକୁବଇଁ ଅ଼ଡ଼େ ଏଲେଇଚେସି, "ନୀନୁ ଏ଼ କକାଣାଇଁ ନା଼ ତଲେ ପାଣ୍ତାମୁ; ଅ଼ଡ଼େ ମା଼ମ୍ବୁ ନିଙ୍ଗା ହାନମି, ଏଚେଟିଏ ମା଼ମ୍ବୁ ଅ଼ଡ଼େ ମୀରୁ ଇଞ୍ଜାଁ କକାରି ପ଼ଦାଁ ହା଼ଆନା ନୀଡିନାୟି। 9 ନା଼ନୁ ଏ଼ୱାଣି ତାକି ଦା଼ୟି ଆ଼ତେଏଁ, ନା଼ କେୟୁଟି ବାରେ ପୁଞ୍ଜି; ନା଼ନୁ ଏ଼ୱାଣାଇଁ ନୀ ନ଼କିତା ତାଅ, ଆତିହିଁ ଏ଼ ଦ଼ହ କା଼ଲେଏ ନା଼ ଲାକ ୱା଼ପେ। 10 ସାମା ମା଼ଦି ଇଚେକା ୱେ଼ଡ଼ା ଆ଼ଆତେମା ମା଼ମ୍ବୁ ଅ଼ଡ଼େ ୱେଣ୍ତେ ୱା଼ତମିଏମା।"

11 ଏଚେଟିଏ ତାମି ଆ଼ବା ଇସ୍ରାୟେଲ ଏ଼ୱାରାଇଁ ଏଲେଇଚେସି, "ଆତିହିଁ, ଏଲେ ଆ଼ତିସାରେ ର଼ କାମା କିଦୁ; ମୀରୁ ଜାହା ଜାହାରା ମ଼ଣାତା ଈ ଦେ଼ସାତି ନେହିଁ ଆ଼ସ୍ତି ଇଚିହିଁ, ଦୁପ୍‌ଣି, କିର୍‌ୟାଁ, ନେହିଁ ଗାନ୍ଦା ଆ଼ସ୍ତି, ଗାନ୍ଦା ନିୟୁଁ, (ପେସ୍ତା) ଅ଼ଡ଼େ ବୂମିସା଼ଣା ଇଚ ଇଚରା ଅ଼ହାଁ ଏ଼ୱାଣାକି ବେଟୁ ହୀଦୁ। 12 ଇଞ୍ଜାଁ ଜାହା ଜାହାରା କେୟୁତା ରୀ ଗୂଣୁ ଟାକାୟାଁ ଅ଼ଦୁ, ମୀ ଗ଼ଣି ପାରୁତା ଏମିନି ଟାକାୟାଁ ୱେଣ୍ତା ୱା଼ହାମାଚୁ, ଏ଼ୱାଆଁ ଜିକେଏ ମୀ କେୟୁତା ଅ଼ଦୁ; ଏଚେ଼ତା ଏ଼ୱାରି ବା଼ଣା ଆ଼ହାମାନେରି। 13 ଇଞ୍ଜାଁ ମୀ ତାୟି ବିନ୍ୟାମିନ୍‌ଇଁ ଅ଼ହାଁ ଅ଼ଡ଼େ ୱେଣ୍ତେ ଏ଼ ମାଣ୍‌ସି ତା଼ଣା ହାଜୁ। 14 ବାରେ ବା଼ଡ଼୍‌ୟୁଗାଟି ମାହାପୂରୁ ମିଙ୍ଗେ ଏ଼ ମାଣ୍‌ସି ତା଼ଣାଟି ଇଲେକିଁ କାର୍ମା ମେସ୍‌ପି କିୟାପେସି, ଏ଼ନିକିଁ ଏ଼ୱାସି ଅ଼ର ତାୟି ଅ଼ଡ଼େ ବିନ୍ୟାମିନ୍‌ଇଁ ପିସା ହିୟାନେସି। ନା଼ନୁ ମୀର୍‌କା ହିଲାଆ ଗାଟାତେଏଁ ଆ଼ତିହିଁ ଆ଼ଇଁ।"

15 ଏଚେଟିଏ ଏ଼ୱାରି ଏ଼ ଦା଼ନା ଅ଼ଡ଼େ ରୀ ଗୂଣୁ ଟାକାୟାଁ, ଅ଼ଡ଼େ ବିନ୍ୟାମିନ୍‌ଇଁ ତାମି ତଲେ ଅ଼ହାଁ ମିସର ଦେ଼ସା ହାଜାହାଁ ଜସେପ ନ଼କିତା ନିତେରି। 16 ଏଚିବେ଼ଲା ଜସେପ ଏ଼ୱାରି ତଲେ ବିନ୍ୟାମିନ୍‌ଇଁ ମେସାହାଁ ତାନି ଗୁମୁସ୍ତାଇଁ ଏଲେଇଚେସି, "ଈ ଲ଼କୁଣି ନା଼ ଇଜ ଅ଼ମୁ ଅ଼ଡ଼େ ର଼ ଜ଼ନ୍ତ ପା଼ୟାହାଁ ରା଼ନ୍ଦା ୱାଜାଦୁ; ଈୱାରି ମାଦେନା ବେ଼ଲା ନା଼ ତଲେ ତିନେରି।" 17 ଏଚେଟିଏ ଏ଼ ମାଣ୍‌ସି ଜସେପ ୱେସ୍ତିଲେହେଁ କାମା କିହାଁ ଏ଼ୱାରାଇଁ ଜସେପ ଇଜ ଅ଼ତେସି।

18 ଜସେପ ଇଜ ଅ଼ୱି ଆ଼ହାଲିଏ, ଏ଼ୱାରି ଆଜିତାକି ତା଼ମ୍ବୁ ତା଼ମ୍ବୁ ଏଲେଇଚେରି, "ତଲି ମା଼ ଗ଼ଣିତା ଏମିନି ଟାକାୟାଁ ୱେଟ୍‌ପି ଆ଼ହାମାଚୁ, ଏ଼ଦାଆଁତାକି ମାଙ୍ଗେ ଇମ୍ବାଆଁ ତାଚା ମାଞ୍ଜାନେରି; ନୀଏଁ ଏ଼ୱାରି ମାଙ୍ଗେ ୱେ଼ଚାନା ମା଼ ଗା଼ଡ଼୍‌ଦେୟାଁ ବାରେ ଅ଼ନେରି, ଅ଼ଡ଼େ ମାଙ୍ଗେ ତାନି ହ଼ଲିୟାଙ୍ଗା କିୟାନେରି।" 19 ଏ଼ଦାଆଁତାକି ଏ଼ୱାରି ଜସେପ ଇଲୁତି ଗୁମୁସ୍ତା ତା଼ଣା ହାଜାହାଁ ଇଜ ହ଼ଡ଼୍‌ନି ଟା଼ୟୁତା ଏ଼ୱାଣି ତଲେ ହା଼ଡାକାତା ଆ଼ହିଁ ଏଲେଇଚେରି, 20 "ସା଼ୱୁକାରି, ମା଼ମ୍ବୁ ତଲି ଆର୍ନା କଡାଲି ୱା଼ହାମାଚମି; 21 ଇଞ୍ଜାଁ ମା଼ମ୍ବୁ ଜ଼ମିନି ଟା଼ୟୁତା ମା଼ ଗ଼ଣିୟାଁ ଦେତମି, ଅ଼ଡ଼େ ଜାହା ଜାହାରା ଗ଼ଣିୟାଁ ବିତ୍ରା ଟାକାୟାଁ ବେଟାଆ଼ତମି। ମା଼ମ୍ବୁ ଏ଼ୱାଆଁ ୱେଣ୍ତେ ତାଚାମାନମି। 22 ଇଞ୍ଜାଁ ଆର୍ନା କଡାଲି ତାକି ମା଼ମ୍ବୁ ଅ଼ଡ଼େ ଟାକାୟାଁ ତାଚାମାନମି; ସାମା ଏ଼ ଟାକାୟାଁ ମା଼ ଗ଼ଣିୟାଁ ବିତ୍ରା ଆମ୍ବାଆସି ଇଟାମାଚେସି, ମା଼ମ୍ବୁ ପୁଞ୍ଜାହିଲଅମି।"

23 ଏଚେଟିଏ ଗୁମୁସ୍ତା ଏଲେଇଚେସି, "ମୀ ନେହେଁ ଆ଼ପେ, ଆଜାଆଦୁ; ମୀ ମାହାପୂରୁ, ମୀ ତାଞ୍ଜିତି ମାହାପୂରୁ, ମୀ ତାକି ଗ଼ଣିତା ମୀ ଡ଼ୁଗାମାଚି ଦ଼ନ ହୀହାମାଞ୍ଜାନେସି; ମୀ ଟାକାୟାଁ ନା଼ ତା଼ଣା ମାଚୁ।" ଏଚେଟିଏ ଏ଼ୱାସି ସିମିୟନଇଁ ପାଙ୍ଗାତା ତାଚାହାଁ ଏ଼ୱାରି ତା଼ଣା ତାତେସି।

24 ଏଚେଟିଏ ଏ଼ୱାସି ଏ଼ୱାରାଇଁ ଜସେପ ଇଜ ବିତ୍ରା ଅ଼ହାଁ ଏ଼ୟୁ ହୀତେସି, ଏ଼ୱାରି କଡାୟାଁ ନର୍‌ହେରି; ଅ଼ଡ଼େ, ଏ଼ୱାସି ଏ଼ୱାରି ଗା଼ଡ଼୍‌ଦେୟାଁକି କା଼ଦି ହୀତେସି। 25 ଜସେପ ମାଦେନା ବେ଼ଲାତା ୱା଼ତିସାରେ ହୀହାଲି ଏ଼ୱାରି ଦା଼ନାତି ତିୟାରା କିତେରି; ଇଚିହିଁ ଏ଼ୱାରି ଏମ୍ବାଆଁ ତିନେରି ଇଞ୍ଜିହିଁ ୱେଞ୍ଜାମାଚେରି। 26 ଏଚେଟିଏ ଜସେପ ଇଜ ୱା଼ହାଲିଏ, ଏ଼ୱାରି ତାମି କେୟୁତି ଦା଼ନା ଦିଣ୍‌ସୁ ତାନି ଇଲୁ ମାଦି ତାଚାହାଁ ଏ଼ୱାଣାଇଁ ମେଣ୍ତା କୁତାହାଁ ଜହରା କିତେରି। 27 ଏଚେଟିଏ ଜସେପ ତାମି ନେହିଁ କାତା ୱେଚେସି, "ମୀ ଆ଼ବା ନେହେଁ ତଲେ ମାନେସି କି ? ମୀରୁ ଏମିନି ବୁଡ଼୍‌ହା କାତା ୱେସିମାଚେରି ଏ଼ୱାସି ନୀଞ୍ଜୁ ପାତେକା ନୀଡାମାନେସି କି ?"

28 ଏ଼ୱାରି ଏଲେଇଚେରି, "ନୀ ହ଼ଲେଏସି, ମା଼ ଆ଼ବା, ରା଼ହାଁତଲେ ମାନେସି, ଏ଼ୱାସି ନୀଞ୍ଜୁ ପାତେକା ନୀଡାମାନେସି।" ଏଚେଟିଏ ଏ଼ୱାରି ମୁନୁ କୁତାହାଁ ଜହରା କିତେରି।

29 ଏଚିବେ଼ଲା ଜସେପ ତାନି ତାୟି ବିନ୍ୟାମିନ୍‌ଇଁ ମେସାହାଁ ଏଲେଇଚେସି, "ମୀରୁ ଏମିନି ଊଣା ତାୟି କାତା ୱେସିମାଚେରି, ଏ଼ୱାସି କି ଈୱାସି ?" ଅ଼ଡ଼େ ଏ଼ୱାସି ଏଲେଇଚେସି, "ଏ଼ ନା଼ ମୀର୍‌ଏଣା, ମାହାପୂରୁ ନିଙ୍ଗେ କାର୍ମା ମେସ୍ତାପେସି।" 30 ଏଚେଟିଏ ତାୟିୟାଁ ତାକି ଜସେପତି ହିୟାଁ ଜୀୱୁ ନ଼ୱୁ ଗାଡି ଆୟାଲିଏ ଏ଼ୱାସି ତବେ ଡ଼ୀହାଲି ଟା଼ୟୁ ପାରିତେସି; ଅ଼ଡ଼େ, ଏ଼ୱାସି ତାନି ବାକ୍ରାତା ହାଜାହାଁ ଏମ୍ବାଆଁ ଡ଼ୀତେସି। 31 ଏଚେଟିଏ ଡା଼ୟୁ ଏ଼ୱାସି ମୂମ୍ବୁ ନର୍‌ହାଁ ପାଙ୍ଗାତା ୱା଼ତେସି ଅ଼ଡ଼େ ଜାହାରା ହିୟାଁ ସାପି କିହାଁ ରା଼ନ୍ଦା ବା଼ଟି କିହାଲି ଏଲେଇଚେସି। 32 ଏଚେଟିଏ କାମା କିନାରି ଜସେପକି ଅ଼ଡ଼େ ତାମି ତାୟିୟାଁକି ଇଞ୍ଜାଁ ତାମି ତଲେ ତିଞ୍ଜାଲି କୁଗିନି ମିସରତି ଲ଼କୁ ତାକି ଏଟ୍‌କା ଏଟ୍‌କା ବା଼ଟି କିତେରି, ଇଚିହିଁ ଏବ୍ରିୟ ଲ଼କୁ ତଲେ ମିସରତି ଲ଼କୁ ତିନାୟି ମେ଼ରା ହିଲାଆତେ ଏ଼ଦି ମିସରତି ଲ଼କୁକି ଅ଼ପାଆଗାଟାୟି ମାଚେ। 33 ଏଚେଟିଏ ଜସେପ ନ଼କିତା ତାମି କାଜା ତାୟି ଟା଼ୟୁତା କାଜା ତାୟି ଊଣା ତାୟି ଟା଼ୟୁତା ଊଣା ତାୟି କୁଗିକିତେରି, ଏଚେଟିଏ ଏ଼ୱାରି ତା଼ମ୍ବୁ ତା଼ମ୍ବୁଏ ଆଡାଜାକା ଆ଼ତେରି। 34 ଇଞ୍ଜାଁ ଏ଼ୱାସି ତାନି ନ଼କିତା କା଼ଦି ପେର୍‌ହାଁ ଏ଼ୱାରାଇଁ ବା଼ଟି କିୱିକିତେସି; ସାମା ବାରେ କିହାଁ ବିନ୍ୟାମିନ୍‌ତି ବା଼ଗା ପା଼ସା ବା଼ଗା ଗାଡୁ ମାଚେ। ଏଚେଟିଏ ଏ଼ୱାରି ତିଞ୍ଜା ଉଣ୍ତାହାଁ ତାନି ତଲେ ରା଼ହାଁ କିତେରି।