1 ର଼ ଦିନା କାରା ବେ଼ଲା ଅବ୍ରାହାମ ମମ୍ରିତି ଅଲନ୍‌ ମା଼ର୍‌ନୁ ଡାକି ଡ଼଼ଇକା ତାନି ତୂମୁ ଦୁୱେରିତା କୁଗାମାଚେସି; ଏଚିବେ଼ଲାତା ମାହାପୂରୁ ଏ଼ୱାଣାଇଁ ତ଼ଞ୍ଜାଆ଼ତେସି। 2 ଏଚେଟିଏ ଏ଼ୱାସି ମେସ୍ତେସି, ତୀନି ଜା଼ଣା ମାଣ୍‌ସିୟାଁ ଏ଼ୱାଣି ନ଼କିତା ନିଚାମାନେରି; ଇଞ୍ଜାଁ ମେସ୍‌ପନିଏ ଏ଼ୱାରାଇଁ କାତା ଆ଼ହାଲି ତୂମୁ ଦୁୱେରିଟି ଦାପେ ହାଜାହାଁ ମୁନୁ କୁତାହାଁ ଜହରା କିତେସି। 3 ଏ଼ୱାସି ଏଲେଇଚେସି, "ହେ଼ ବା଼ବୁୟାଁ, ବାତିମା଼ଲି ମାଞ୍ଜାଇଁ, ଈ ନୀ ହ଼ଲେଏଣା ତା଼ଣାଟି ହାଲାଆନା ଇମ୍ବାଆଁ ଗା଼ଡ଼େକା ଡ଼ୟାଦୁ। 4 ବାତିମା଼ଲି ମାଞ୍ଜାଇଁ, ଇଚରା ଏ଼ୟୁ ତାଚାଲି ହିୟାଦୁ, ଇଞ୍ଜାଁ ମୀରୁ କଡାୟାଁ ନର୍‌ହାଁ ଈ ମା଼ର୍‌ନୁ ଡ଼଼ଇକା ଜ଼ମାଦୁ। 5 ଏ଼ନାଆଁତାକି ଇଚିହିଁ ମୀରୁ ନୀ ହ଼ଲେଏଣା ତା଼ଣା ୱା଼ହାମାଞ୍ଜେରି, ଏ଼ଦାଆଁତାକି ଇଚାଣି କା଼ଦି ତାଚା ହିୟାଇଁ, ଇଞ୍ଜାଁ ତିଞ୍ଜାହାଁ ହାଜେରିୱା।" ଏଚିବେ଼ଲା ଏ଼ୱାରି ଏଲେଇଚେରି। "ଏ଼ନାଆଁ କିହାଲି ଅଣ୍‌ପିମାଞ୍ଜି ଏ଼ଦାଆଁ କିମୁ।"

6 ଏଚେଟିଏ ଅବ୍ରାହାମ ତୂମୁ ବିତ୍ରା ତବେ ହାଜାହାଁ ସାରାନି ଏଲେଇଚେସି, "ତୀନି ସେର* ଗ଼ହଁୟାଁ ଗୁଣ୍ତା ଅ଼ହାଁ ତବେ ରୂଟି କେ଼ପାମୁ।" 7 ଏଚେଟିଏ ଅବ୍ରାହାମ ମାନ୍ଦାତା ତବେ ହାଜାହାଁ ନେହିଁ ଆଙ୍ଗା ଆ଼ତି କ଼ଡି ଡା଼ଲୁ ତାଚାହାଁ ହ଼ଲେଏଣାକି ହୀତେସି, ଏଚେଟିଏ ଏ଼ୱାସି ତବେ ଏ଼ଦାଆଁ ୱାଜିତେସି। 8 ଏଚିବେ଼ଲା ଏ଼ୱାସି ଦ଼ୟି, ପା଼ଲୁ, ଅ଼ଡ଼େ ୱାଜିତି ଊଙ୍ଗା ତାଚାହାଁ ଏ଼ୱାରି ନ଼କିତା ଇଟିତେସି, ଇଞ୍ଜାଁ ଏ଼ୱାରି ତିନି ବେ଼ଲାତା ଏ଼ ମା଼ର୍‌ନୁ ଡ଼଼ଇ ଏ଼ୱାରି ଡାଗେ ନିତେସି।

9 ଏଚେଟିଏ ଏ଼ୱାରି ଏ଼ୱାଣାଇଁ ୱେଚେରି, "ନୀ ଡକ୍ରି ସାରା ଆମ୍ବିୟା ?" ଏ଼ୱାସି ଏଲେଇଚେସି, "ଏ଼ଦି ତୂମୁ ବିତ୍ରା ମାନେ।"

10 ଏଚେଟିଏ ଏ଼ୱାରି ବିତ୍ରାଟି ରଅସି ଏଲେଇଚେସି, "ଈ କା଼ଲମି ୱା଼ନି ବେ଼ଲାତା ମା଼ମ୍ବୁ ଅ଼ଡ଼େ ୱେଣ୍ତେ ୱା଼ନମି; ମେହ୍‌ମୁ ଏ଼ ବେ଼ଲାତା ନୀ ଡକ୍ରି କଡାୟାଁଣା ର଼ କକାସି ଡ଼ୟିନେସି।" ଈ କାତା ସାରା ତୂମୁ ଦୁୱେରିତା ଏ଼ୱାରି ଡା଼ୟୁ ୱାକି ମାଞ୍ଜାହାଁ ୱେଞ୍ଜିମାଚେ। 11 ଏଚିବେ଼ଲା ଅବ୍ରାହାମ ଅ଼ଡ଼େ ସାରା ବୁଡ଼୍‌ହି ବୁଡ଼୍‌ହା ଆ଼ହାମାଚୁ, ଅ଼ଡ଼େ ସାରାକି କକାରି ପ଼ଦାୟାଁ ଆ଼ନି କା଼ଲମି ରା଼ହାମାଚେ। 12 ଏ଼ଦାଆଁତାକି ସାରା ମ଼ନ ମ଼ନତା କାକ୍‌ହାଁ ଏଲେଇଚେ, "ନୀଏଁ ନା଼ନୁ ଈ ବୁଡ଼୍‌ହି ବେ଼ଲାତା କି, ରା଼ହାଁ ଆ଼ଇଁ ? ନା଼ ଡକ୍ରା ଜିକେଏ ବୁଡ଼୍‌ହା।"

13 ଏଚିବେ଼ଲା ପ୍ରବୁ ଅବ୍ରାହାମଇଁ ଏଲେଇଚେସି, "ନା଼ ବୁଡ଼୍‌ହି ବେ଼ଲାତା କି ମୀର୍‌ଏସି ଜାର୍ନା ଆ଼ନେସି, ଈ କାତା ଅଣ୍‌ପାହାଁ ସାରା ଏ଼ନାଆଁତାକି କାକ୍‌ହେ ? 14 ପ୍ରବୁକି ଏ଼ନି କାମା ଆ଼ଡାଆଗାଟାୟି ମାନେ କି ? ଈ କା଼ଲମି ୱେଣ୍ତେ ୱା଼ତିସାରେ ତୀରି କିହାମାନି ବେ଼ଲାତା ମା଼ମ୍ବୁ ୱେଣ୍ତା ୱା଼ନମି, ଏଚିବେ଼ଲାତା ସାରା କଡାଣା ର଼ ମୀର୍‌ଏସି ଡ଼ୟିନେସି।"

15 ଏଚେଟିଏ ସାରା ଆଜି ତାକି ମିଚି ଜ଼ଲିତେ, "ନା଼ନୁ କାକ୍‌ହାହିଲଅଁ।" ସାମା ଏ଼ୱାସି ଏଲେଇଚେସି, "ନୀନୁ ସାତେଏ କାକ୍‌ହି।"

16 ଏଚେଟିଏ ଏ଼ୱାରି ଏମ୍ବାଟି ନିଙ୍ଗାହାଁ ସଦମ ୱାକି ହାଜାଲିଏ, ଅବ୍ରାହାମ ଜିରୁ ତ଼ସାଲି ଏ଼ୱାରି ତଲେ ହାଚେସି। 17 ଏଚେଟିଏ ପ୍ରବୁ ଏଲେଇଚେସି, "ନା଼ନୁ ଏ଼ନାଆଁ କିହାଲି ଅଣ୍‌ପିମାଇଁ ଏ଼ଦାଆଁ କି ଅବ୍ରାହାମ ତା଼ଣାଟି ଡ଼ୁକ୍‌ଇଁ ? 18 ଅବ୍ରାହାମ ତା଼ଣାଟି ର଼ ବା଼ଡ଼୍‌ୟୁ ଗାଟି କାଜା କୂଡ଼ା ହ଼ନେ, ଅ଼ଡ଼େ ଦାର୍‌ତିତି ବାରେ କୂଡ଼ା ଏ଼ୱାଣି ତା଼ଣାଟି ବ଼ର ବେଟାଆ଼ନେରି। 19 ଏ଼ନିଇଚିହିଁ ତାନି ଡା଼ୟୁତି ମୀର୍‌କା ଅ଼ଡ଼େ କୁଟମି ଏ଼ନିକିଁ ନେହିଁ ଦାର୍ମୁତା ତା଼କାଲି ପ୍ରବୁତି ଜିରୁତା ତା଼କିନେରି, ଏ଼ଦାଆଁତାକି ଏ଼ୱାରାକି ଏ଼ୱାସି ଏ଼ନିକିଁ ହୁକୁମି ହୀନେସି, ଈଦାଆଁତାକି ନା଼ନୁ ଏ଼ୱାଣାଇଁ ଆ଼ଚାମାଇଁ; ଏଚେଟିଏ ପ୍ରବୁ ଅବ୍ରାହାମକି ତା଼ନୁ ୱେସାମାନି କାତା ପୂରା କିନେସି।"

20 ପ୍ରବୁ ଅବ୍ରାହାମଇଁ ଏଲେଇଚେସି, "ସଦମ ଅ଼ଡ଼େ ଗମରା କ଼ପାଟି ହା଼ରେକା କା଼ଲୱି ହ଼ଚିମାନେ, ଏ଼ୱାରି ପା଼ପୁ ହା଼ରେକା ଗାଡି ଆ଼ହାମାନେ। 21 ଏ଼ଦାଆଁତାକି ନା଼ନୁ ରେ଼ଚା ହାଜାହାଁ ସିନିକିଇଁ, ଏ଼ୱାରି ଡ଼ୀକି ହା଼ଡା ନା଼ ତା଼ଣା ଏ଼ନିକିଁ ୱେ଼ଙ୍ଗିମାନେ, ଏଲେକିଁ ଏ଼ୱାରି କିହିମାନେରି କି ଆ଼ଏ; ଏ଼ ବାରେ ନା଼ନୁ ପୁଇଁ।"

22 ଏଚେଟିଏ ରିଆରି ଏମ୍ବାଟି ୱେଣ୍ତାହାଁ ସଦମ ୱାକି ହାଚେରି; ସାମା ଅବ୍ରାହାମ ଏଚିବେ଼ଲା ପାତେକା ମାହାପୂରୁ ନ଼କିତା ନିଚାହାଁ ଡ଼ୟିତେସି। 23 ଏଚେଟିଏ ଅବ୍ରାହାମ ଡାଗେ ହାଜାହାଁ ଏଲେଇଚେସି, "ପ୍ରବୁ ନୀନୁ ସାତେଏ ଲାଗେଏତି ଲ଼କୁ ତଲେ ଦାର୍ମୁ ଲ଼କୁଣି ନା଼ସା କିଦି ? 24 ଗା଼ଡ଼ାତା ଦୁଇ କ଼ଡ଼ି ଦସ ଜା଼ଣା ଦାର୍ମୁଗାଟାରି ମାଚିସାରେ, ଏ଼ ମାଦି ମାନି ଦୁଇ କ଼ଡ଼ି ଦସ ଜା଼ଣା ଦାର୍ମୁ ଗାଟାରି ତାକି ଗେଲ୍‌ପାଆନା ଏ଼ ଟା଼ୟୁତି ନା଼ସା କିଦି ? 25 ଲାଗେଏତି ଲ଼କୁ ତଲେ ଦାର୍ମୁଗାଟାରାଇଁ ନା଼ସା କିନି କାମା ମୀ ତା଼ଣାଟି ହେକ ଆ଼ପେ। ଦାର୍ମୁ ଗାଟାରାଇଁ ଲାଗେଏତି ଲ଼କୁ ସମାନା କିନାୟି ନୀ ତା଼ଣାଟି ହେକ ଆ଼ପେ। ବାରେ ଦାର୍‌ତିତି ନୀହାଁୟି କିନାରି ବିଚାରା କିଅରି କି ?"

26 ଏଚେଟିଏ ପ୍ରବୁ ଏଲେଇଚେସି, "ମା଼ମ୍ବୁ ସଦମ ଗା଼ଡ଼ାତା ଦୁଇ କ଼ଡ଼ି ଦସ ଜା଼ଣା ଦାର୍ମୁଗାଟାରି ମାଚିହିଁ, ଏ଼ୱାରି ତାକି ବାରେ ଗା଼ଡ଼ା ଗେଲ୍‌ପିନମି।"

27 ଏଚେଟିଏ ଅବ୍ରାହାମ ୱେଣ୍ତେ ଏଲେଇଚେସି, "ମେହ୍‌ଦୁ ନା଼ନୁ ଦୂଡ଼ି ଅ଼ଡ଼େ ଦାର୍‌ମ୍ବୁ ଆ଼ତି ଜିକେଏ ନା଼ ପ୍ରବୁତି ନ଼କିତା କାତା ଜ଼ଲାଲି ଗାଡି ଆ଼ହିମାଇଁ। 28 ଦୁଇ କ଼ଡ଼ି ଦସ ଜା଼ଣା ଦାର୍ମୁଗାଟାରି ବିତ୍ରା ପା଼ସା ଜା଼ଣା ଊଣା ଡ଼ୟିନେରି; ଏ଼ ପା଼ସା ଜା଼ଣା ଊଣା ଆ଼ତି ଜିକେଏ ବାରେ ଗା଼ଡ଼ାତି ନା଼ସା କିଦି କି ?" ପ୍ରବୁ ଏଲେଇଚେସି, "ଦୁଇ କ଼ଡ଼ି ପା଼ସା ଜା଼ଣା ଦାର୍ମୁଗାଟାରି ମାଚିସାରେ ନା଼ନୁ ଗା଼ଡ଼ାତି ନା଼ସା କିଅଁ।"

29 ଅବ୍ରାହାମ ଅ଼ଡ଼େ ୱେଣ୍ତେ ଏଲେଇଚେସି, "ଦୁଇ କ଼ଡ଼ି ଜା଼ଣା ହାବୁ ଏମ୍ବାଆଁ ଡ଼ୟିନେରି।" ପ୍ରବୁ ଏଲେଇଚେସି, "ନା଼ନୁ ଦୁଇ କ଼ଡ଼ି ଜା଼ଣା ମାଚିସାରେ ନା଼ସା କିଅଁ।"

30 ଅ଼ଡ଼େ ୱେଣ୍ତେ ଅବ୍ରାହାମ ଏଲେଇଚେସି, "ପ୍ରବୁ, କାର୍‌ବି ଆ଼ଆତିହିଁ ଅ଼ଡ଼େ ର଼ କାତା ୱେସ୍ତାଇଁ; ଏମ୍ବାଆଁ କଡ଼େ ଦସ ଡ଼ୟିନେରି।" ପ୍ରବୁ ଏଲେଇଚେସି, "କଡ଼େ ଦସ ଜା଼ଣା ମାଚିସାରେ ନା଼ନୁ ନା଼ସା କିଅଁ।"

31 ଅବ୍ରାହାମ ଏଲେଇଚେସି, "ମେହ୍‌ମୁ, ପ୍ରବୁ ନ଼କିତା ନା଼ନୁ ୱେଣ୍ତେ କାତା ଜ଼ଲାଲି ଗାଡି ଆ଼ହିମାଇଁ; ଏମ୍ବାଆଁ କଡ଼େ ଜା଼ଣା ଡ଼ୟିନେରି।" ପ୍ରବୁ ଏଲେଇଚେସି, "କଡ଼େ ଜା଼ଣା ଡ଼ୟିସାରେ ନା଼ନୁ ଏ଼ ଗା଼ଡ଼ା ନା଼ସା କିଅଁ।"

32 ଅବ୍ରାହାମ ଏଲେଇଚେସି, "ପ୍ରବୁ କାର୍‌ବି ଆ଼ଆସାରେ ର଼ ଦେବା ଜ଼ଲିଇଁ; ଏମ୍ବାଆଁ ଦସ ଜା଼ଣା ଡ଼ୟିନେରି।" ପ୍ରବୁ ଏଲେଇଚେସି, "ଦସ ଜା଼ଣା ମାଚିସାରେ ନା଼ନୁ ଏ଼ ଗା଼ଡ଼ା ନା଼ସା କିଅଁ।"

33 ଏଚିବେ଼ଲା ପ୍ରବୁ ଅବ୍ରାହାମ ତଲେ ହା଼ଡା କାତା ରା଼ପ୍‌ହାଁ ହାଚେସି, ଅ଼ଡ଼େ ଅବ୍ରହାମ ଜିକେଏ ଜାହାରା ଟା଼ୟୁତା ୱେଣ୍ତା ହାଚେସି।