1 ଏଚେଟିଏ ଜାକୁବ ହାଜାଲିଏ, ମାହାପୂରୁତି ଦୂତୁୟାଁ ତାନି ତଲେ ବେଟାଆ଼ତେରି। 2 ଏ଼ଦାଆଁତାକି ଜାକୁବ ଏ଼ୱାରାଇଁ ମେସାହାଁ ଏଲେଇଚେସି, "ଈୱାରି ମାହାପୂରୁତି ଗଚି; ଏ଼ଦାଆଁତାକି ଏ଼ ଟା଼ୟୁତି ଦ଼ରୁ ମହନୟିମ* ଇଟିତେସି।"

3 ଏଚେଟିଏ ଜାକୁବ ତାନି ନ଼କେଏ କାବ୍ରୁ ୱେହ୍‌ନାରାଇଁ ସେୟିର ଦେ଼ସାତି ଇଦମ ଗା଼ଡ଼ାତା ତାୟି ଏସୱୁ ତା଼ଣା ପାଣ୍ତିତେସି। 4 ଇଞ୍ଜାଁ ଏ଼ୱାସି ଏ଼ୱାରାଇଁ ଈ ହୁକୁମି ହୀହାଁ ଏଲେଇଚେସି, "ମୀରୁ ନା଼ ପ୍ରବୁ ଏସୱୁଇଁ ଏଲେଇଞ୍ଜେରି, ନୀ ହ଼ଲେଏସି ଜାକୁବ ନିଙ୍ଗେ ଏଲେଇଞ୍ଜାତେସି, ନା଼ନୁ ଲାବନ ତା଼ଣା ଡ଼ୟାମାଚେଏଁ, ଏ଼ଦାଆଁତାକି ନୀଞ୍ଜୁ ପାତେକା ୱେ଼ଡ଼ା କିତେଏଁ। 5 ନାଙ୍ଗେ କ଼ଡିୟାଁ, ଗା଼ଡ଼୍‌ଦେୟାଁ, ମେ଼ଣ୍ତାୟାଁ ମାନ୍ଦା ଅ଼ଡ଼େ ହ଼ଲିୟାଙ୍ଗା ହ଼ଲେଣିସିକା ମାନୁ, ଇଞ୍ଜାଁ, ନା଼ନୁ ନା଼ ପ୍ରବୁ ନ଼କିତା କାର୍ମା ବେଟାଆ଼ହାଲି ତାକି ନୀ ତା଼ଣା କାବ୍ରୁ ପାଣ୍ତାତେଏଁ।"

6 ଏଚେ଼ଟିଏ କାବ୍ରୁ ୱେହ୍‌ନାରି ୱେଣ୍ତା ୱା଼ହାଁ ଜାକୁବଇଁ ଏଲେଇଚେରି, "ମା଼ମ୍ବୁ ନୀ ତାୟି ଏସୱୁ ତା଼ଣା ହାଜାମାଚମି, ଏ଼ୱାସି ସା଼ରି ୱାଞ୍ଜା ଲ଼କୁଣି ଆସାହାଁ ନିଙ୍ଗେ ମେସାଲି ୱା଼ହିମାନେସି।" 7 ଏଚେଟିଏ ଜାକୁବ ହା଼ରେକା ଆଜି ଅ଼ଡ଼େ ବିଲ୍‌କି ଆ଼ତେସି, ଇଞ୍ଜାଁ ତାନି ତଲେ ମାଚି ଲ଼କୁଣି ଅ଼ଡ଼େ କ଼ଡି ଗରି ବାରେ ମାନ୍ଦା ଅ଼ଡ଼େ ଊଟୁୟାଁଣି ଏଟ୍‌କା ଏଟ୍‌କା ରୀ ବା଼ଗା କିହାଁ ଏଲେଇଚେସି, 8 "ଏସୱୁ ୱା଼ହାଁ ର଼ ଗଚିତି ପା଼ୟିନେସି, ଆ଼ତି ଜିକେଏ ଏଟ୍‌କାତି ଗଚି ହଟାହାଁ ନୀଡାଲି ଆ଼ଡିନୁ।"

9 ଏଚିବେ଼ଲା ଜାକୁବ ପ୍ରା଼ତାନା କିତେସି, "ଏ଼ ନା଼ ଆ଼ବା ଅବ୍ରାହାମତି ମାହାପୂରୁ, ଏ଼ ନା଼ ଆ଼ବା ଇସାହାକତି ମାହାପୂରୁ, ହେ଼ ପ୍ରବୁ, ନୀନୁ ନାଙ୍ଗେ ୱେସାମାଞ୍ଜାତି, ନୀନୁ ନୀ ଦେ଼ସା ଅ଼ଡ଼େ ଲ଼କୁ ତା଼ଣା ହାଲାମୁ, ଆତିହିଁ ନା଼ନୁ ନିଙ୍ଗେ ନେହିଁ କିୟାଇଁ। 10 ନୀନୁ ଈ ହ଼ଲେଏଣା ତା଼ଣା ଏମିନି କାର୍ମା ଅ଼ଡ଼େ ଏମିନି ବାରେ ମା଼ନି ତ଼ସାମାଞ୍ଜି, ନା଼ନୁ ଏମ୍ବାତି ରଚାଣି ଜିକେଏ ବେଟାଆ଼ହାଲି ପା଼ଡ଼ା ଆ଼ଆତାତେଏଁ; ଇଚିହିଁ ନା଼ନୁ ନା଼ ୱାର୍‌ଇ ବାଡ଼୍‌ଗା ଆସାହାଁ ଈ ଜର୍ଦନ ଗା଼ଣ୍‌ଚା ମାଚେଏଁ, ସାମା ନୀଏଁ ନା଼ନୁ ରୀ ଗଚି ଆ଼ହାଁ ୱା଼ହାମାଇଁ। 11 ବାତିମା଼ଲି ମାଞ୍ଜାଇଁ, ନା଼ ତାୟି ଏସୱୁ କେୟୁଟି ନାଙ୍ଗେ ଗେଲ୍‌ପାମୁ; ଇଚିହିଁ ନା଼ନୁ ଏ଼ୱାଣାଇଁ ଆଜିମାଇଁ, ଏଚେ଼ତା ଏ଼ୱାସି ୱା଼ହାଁ ନାଙ୍ଗେ ଅ଼ଡ଼େ ତାଲିସିକା ଅ଼ଡ଼େ କକାରି ପ଼ଦାଁଣି ପା଼ୟିନେସି। 12 ନୀନୁତ ୱେସାମାଞ୍ଜାଦି, ନା଼ନୁ ନିଙ୍ଗେ ନେହିଁ କିୟାଇଁ, ଇଞ୍ଜାଁ ସାମ୍‌ଦୁରିତି ଏମିନି ବାଃଲି ହା଼ରେକା ତାକି ଏଜିକିହାଲି ଆ଼ଡାଆଗାଟାୟି, ଏଲେକିହିଁ ନୀ କୂଲୁ ଏ଼ପାକିଇଁ।"

13 ଅ଼ଡ଼େ ଜାକୁବ ଏ଼ ଟା଼ୟୁତା ଏ଼ ଲା଼ଆଁୟାଁ ଡ଼ୟିତେସି; ଅ଼ଡ଼େ ଏ଼ୱାଣି ତା଼ଣା ଏ଼ନାୟି ମାଚେ, ଏମ୍ବାଟି ତାନି ତାୟି ଏସୱୁ ତାକି ଦା଼ନା ତିୟାରା କିତେସି। 14 ଇଚିହିଁ, ରୀ ୱାଞ୍ଜା ତାଲି ଗରିୟାଁ ଅ଼ଡ଼େ କଡ଼େଗଟା ବକ୍‌ଡ଼ା ଗରିୟାଁ, ରୀ ୱାଞ୍ଜା ତାଲି ମେ଼ଣ୍ତାୟାଁ ଅ଼ଡ଼େ କଡ଼େଗଟା ବକ୍‌ଡ଼ା ମେ଼ଣ୍ତାୟାଁ, 15 କଡ଼େ ଦସଗଟା ଡା଼ଲ୍‌କା ତଲେତି ଊଟୁୟାଁ ଅ଼ଡ଼େ, ଦୁଇ କ଼ଡ଼ି ତାଲି କ଼ଡିୟାଁ ଅ଼ଡ଼େ ଦସଗଟା ଡ଼ୁକିୟାଁ ଅ଼ଡ଼େ କଡ଼େଗଟା ତାଲି ଗା଼ଡ଼୍‌ଦେୟାଁ ଅ଼ଡ଼େ ଦସଗଟା ପ଼ତୁ ଗା଼ଡ଼୍‌ଦେୟାଁ ତିୟାରା କିତେସି। 16 ଏଚେଟିଏ ମାନ୍ଦା ବାରେ ଏଟ୍‌କା ଏଟ୍‌କା କିହାଁ ତାନି ହ଼ଲିୟାଙ୍ଗା କେୟୁତା ର଼ ମାନ୍ଦା ହେର୍‌ପାହାଁ ଏ଼ୱାରାଇଁ ହୁକୁମି ହୀତେସି, "ମୀରୁ ନା଼ ନ଼କି ନ଼କିତା ହାଜୁ, ଅ଼ଡ଼େ, ମାଦି ମାଦି ଟା଼ୟୁ ପିସିହିଁ ବାରେ ମାନ୍ଦାତି ଏଟ୍‌କା କିଦୁ।" 17 ଏ଼ୱାସି ନ଼କାମାନି ହ଼ଲେଏଣାଇଁ ଈ ହୁକୁମି ହୀତେସି, "ନା଼ ତାୟି ଏସୱୁଇଁ ବେଟାଆ଼ତିସାରେ, ଏ଼ୱାସି ନିଙ୍ଗେ ୱେଞ୍ଜାନେସି, ନୀନୁ ଆମ୍ବାଆରି ହ଼ଲେଏଣାତି ? ଆମ୍ବିୟା ହାଜିମାଞ୍ଜି ? ଅ଼ଡ଼େ, ନୀ ନ଼କିତି ଈ ବାରେ ମାନ୍ଦା ଆମ୍ବାଆରାୱାୟି ? 18 ଆତିହିଁ ନୀନୁ ୱେହ୍‌ଦି, ଈ ବାରେ ନୀ ହ଼ଲେଏସି ଜାକୁବୱାଇ, ଈ ବାରେ ଦା଼ନା ମା଼ ପ୍ରବୁ ଏସୱୁକି ପାଣ୍ତ୍‌ୱି ଆ଼ତାଇ; ମେହ୍‌ମୁ, ଏ଼ୱାସି ଜିକେଏ ଜେ଼ଚ ଜେ଼ଚ ୱା଼ହିମାନେସି।" 19 ଇଲେକିଁ ଏ଼ୱାସି ରୀ ଗଚି ତୀନି ଗଚି ମାନ୍ଦାତି ଡା଼ୟୁ ହାଜିମାନି ବାରେ ହ଼ଲିୟାଙ୍ଗାଣି ହୁକୁମି ହୀହାଁ ଏଲେଇଚେସି, "ଏସୱୁ ତଲେ ବେଟାଆ଼ତିସାରେ, ଇଲେକିଁ କାତା ୱେହ୍‌ଦେରି।" 20 ଅ଼ଡ଼େ ୱେହ୍‌ଦେରି, "ମେହ୍‌ମୁ, ନୀ ହ଼ଲେଏସି ଜାକୁବ ମା଼ ଡା଼ୟୁ ୱା଼ହିମାନେସି; ଇଚିହିଁ ଏ଼ୱାସି ଅଣ୍‌ପିତେସି, ନ଼କେଏ ଦା଼ନା ପାଣ୍ତାହାଁ ଏ଼ୱାଣାଇଁ ହିତ୍‌ଡ଼ି କିହାଁ ଡା଼ୟୁ ତାନି ତଲେ ଆଣ୍ତିଇଁ, ଏଚେ଼ଟିଏ ଏ଼ୱାସି ମାଙ୍ଗେ କାର୍ମା ମେସାଲି ଆ଼ଡାନେସି।" 21 ଇଲେକିଁ ତାନି ନ଼କେଏ ଦା଼ନା ପାଣ୍ତିତେସି; ସାମା ଏ଼ୱାସି ଏ଼ ଲା଼ଆଁୟାଁ ତାନି ଗଚିତା ଡ଼ୟିତେସି।

22 ଏଚେଟିଏ ଜାକୁବ ଏ଼ ଲା଼ଆଁୟାଁ ନିଙ୍ଗିତେସି, ରୀ ଡକ୍ରିସିକାଣି, ରୀ ହ଼ଲେଣିସିକାଣି, ଅ଼ଡ଼େ ତାନି ଏଗାର ଜା଼ଣା ମୀର୍‌କା ମା଼ସ୍‌କାଣି, ଜବକ୍‌ କାଡା ଗ୍ଣା଼ପ୍‌ହାଲି ତାନି ତଲେ ଅ଼ତେସି। 23 ଇଞ୍ଜାଁ, ଏ଼ୱାରାଇଁ କାଡା ଗ୍ଣା଼ପ୍‌ହାଁ ତାନି ବାରେ ଆ଼ସ୍ତିତି ଆତାଲାୱାକି ପାଣ୍ତିତେସି। 24 ଏଚିବେ଼ଲା ଜାକୁବ ଏମ୍ବାଆଁ ରଅସିଏ ଡ଼ୟିତେସି; ଏଚେ଼ଟିଏ ର଼ ମାଣ୍‌ସି ଲା଼ଇ ପାତେକା ତାନି ତଲେ ଜୁଜୁ କିତେସି।

25 ସାମା ଏ଼ ମାଣ୍‌ସି ଜୀଣା ଆ଼ହାଲି ଆ଼ଡାଆନା ମେହ୍‌ମୁ ଏ଼ୱାସି ଜାକୁବତି କୁଦ୍‌ଗୁତା ୱେତେସି; ଏ଼ୱାଣି ତଲେ ଇଲେତି ଜୁଜୁ କିହାଲିଏ ଜାକୁବତି କୁଦ୍‌ଗୁ ଡୁମୁ ଏ଼ର୍‌ଲିତେ। 26 ଏଚେଟିଏ ଏ଼ ମାଣ୍‌ସି ଏଲେଇଚେସି, "ନାଙ୍ଗେ ପିସ୍ତାମୁ; ଲା଼ଇ ୱେ଼ୟିତେ।" ଏଚେଟିଏ ଜାକୁବ ଏଲେଇଚେସି, "ନୀନୁ ନାଙ୍ଗେ ବ଼ର ହିୟାଆସାରେ, ନା଼ନୁ ନିଙ୍ଗେ ପିସ୍ତଅଁ।"

27 ଅ଼ଡ଼େ ୱେଣ୍ତେ ଏ଼ ମାଣ୍‌ସି ୱେଚେସି "ନୀ ଦ଼ରୁ ଏ଼ନାୟି ?" ଏ଼ୱାସି ଏଲେଇଚେସି "ଜାକୁବ।"

28 ଏ଼ୱାସି ଏଲେଇଚେସି, "ନୀନୁ ଜାକୁବ ଦ଼ରୁ ତଲେ ୱେ଼ଙ୍ଗଅତି, ସାମା ଇସ୍ରାୟେଲ* ଦ଼ରୁ ତଲେ ୱେ଼ଙ୍ଗିଦି; ଇଚିହିଁ, ନୀନୁ ମାହାପୂରୁ ଅ଼ଡ଼େ ମାଣ୍‌ସି ତଲେ ଜୁଜୁ କିହାଁ ଜୀଣା ଆ଼ହାମାଞ୍ଜି।"

29 ଏଚିବେ଼ଲା ଜାକୁବ ଏଲେଇଚେସି, "ନୀଏଁ ନୀ ଦ଼ରୁ ୱେସ୍ତାମୁ।" ସାମା ଏ଼ୱାସି ଏଲେଇଚେସି, "ନୀନୁ ଏ଼ନାଆଁତାକି ନା଼ ଦ଼ରୁ ୱେଞ୍ଜିମାଞ୍ଜାଦି ?" ଏଚେ଼ଟିଏ ଏ଼ୱାସି ଜାକୁବଇଁ ବ଼ର ହୀତେସି।

30 ଏଚିବେ଼ଲା ଏ଼ ଟା଼ୟୁତି ଦ଼ରୁ ପନୁୟେଲ* ଇଟିତେସି; ଇଞ୍ଜାଁ ଜାକୁବ ଏଲେଇଚେସି, "ନା଼ନୁ ମାହାପୂରୁଇଁ ମୂମ୍ବୁ ତଲେ ମେସ୍ତିହିଁ ଜିକେଏ ନା଼ ଜୀୱୁ ନୀଡିତେ।" 31 ଏଚେ଼ଟିଏ ଜାକୁବ ପନୁୟେଲ ଗା଼ଣ୍‌ଚାଲିଏ, ୱେ଼ଡ଼ା ହ଼ତେ; ସାମା ଏ଼ୱାସି କୂର୍‌ଣ୍ତୁ ଡୁମୁ ତାକି ସଟା ସଟା ଆ଼ହିଁ ତା଼କିତେସି। 32 ଏ଼ଦାଆଁତାକି ଇସ୍ରାୟେଲ ଲ଼କୁ ନୀଏଁ ପାତେକା ଏ଼ନି କୂର୍‌ଣ୍ତୁ ଊଙ୍ଗା ତିନଅରି, 33 ଇଚିହିଁ ଏ଼ୱାସି ଜାକୁବତି କୂର୍‌ଣ୍ତୁ ହାନ୍ଦି ଈଣା ଡୀଗାମାଚେସି।