ପିତାଡ଼ା ଏ଼ୟୁ କୁଣ୍ତି
17 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 18 "ନୀନୁ ନର୍ହା କଡାଲି ତାକି ପିତାଡ଼ାତି ଏ଼ୟୁ କୁଣ୍ତି ଅ଼ଡ଼େ ପିତାଡ଼ା ତଲେତି କୁଣ୍ତି କୁଗିନି ପିଣ୍ତା ତିୟାରା କିମୁ; ଇଞ୍ଜାଁ, ଆଣ୍ତ୍ୱିଆ଼ନି ତୂମୁ ଅ଼ଡ଼େ ପୂଜା ପିଣ୍ତା ମାଦି ଏ଼ଦାଣି ଇଟାହାଁ ଏ଼ ବିତ୍ରା ଏ଼ୟୁ ୱା଼କ୍ମୁ। 19 ହାରଣ ଅ଼ଡ଼େ ତାନି ମୀର୍କା ଏମ୍ବାଆଁ ଜାହା ଜାହାରା କେସ୍କା ଅ଼ଡ଼େ କଡାୟାଁ ନର୍ନେରି। 20 ଏ଼ୱାରି ଆଣ୍ତ୍ୱିଆ଼ନି ତୂମୁତା ହ଼ଡ଼୍ନି ବେ଼ଲାତା ଏ଼ନିକିଁ ହା଼ଅରି, ଏ଼ଦାଆଁତାକି ଏ଼ୟୁଣା ଜାହାରାଇଁ ନର୍ହା କଡିନେରି; ଆ଼ଆତିଁ ପ୍ରବୁତି ସେ଼ବା ତାକି, ଇଚିହିଁ, ହିଚୁତା ହୂଡିନି ଦା଼ନା ଦୁପ୍ଣି ଲେହେଁ ହୂଡାଲି ତାକି ପୂଜା ପିଣ୍ତା ଦାରି ୱା଼ନାଟି ଏ଼ନିକିଁ ହା଼ଅରି, 21 ଈଦାଆଁତାକି ଏ଼ୱାରି ଜାହା ଜାହାରା କେସ୍କା କଡାୟାଁ ନର୍ନେରି; ଈଦି ତାଙ୍ଗେ ଅ଼ଡ଼େ ତାନି କୂଡ଼ାତି ଆକୁ ଆ଼ବାୟାଁ ଲେକା ତଲେ ମା଼ନୱି ଆ଼ନି କା଼ଲେଏତି ମେ଼ରା ଆ଼ନେ।"