1 ନା଼ଡ଼ିକିନି ବୀସା ବାଡ଼୍‌ଗା ପ୍ରବୁତି ନ଼କିତା ଅ଼ପାଆଗାଟାୟି, ସାମା ସମାନାତି ଗୁଣ୍ତୁୟାଁ ଏ଼ୱାସି ରା଼ହାଁ ଆ଼ନେସି।

2 ଆଙ୍କାରା ୱା଼ତିହିଁ ଲାଜା ୱା଼ନେ; ସାମା ହିତ୍‌ଡ଼ି ଲ଼କୁ ତା଼ଣା ବୁଦି ଡ଼ୟିନେ।

3 ସ଼ଜେ ଲ଼କୁତି ସ଼ଜେତି ମାଣ୍‌କି ଏ଼ୱାରାଇଁ ଜିରୁ ତ଼ହ୍‌ନେ, ସାମା ନା଼ଡିକିନାରି ତାମି କୁଟୁ ମାଣ୍‌କି ଏ଼ୱାରାଇଁ ନା଼ସା କିନେ।

4 କାର୍‌ବିତି ଦିନାତା ଦ଼ନ ଏ଼ନି କାମା ହୀଏ, ସାମା ଦାର୍ମୁ ହା଼କିଟି ଗେଲ୍‌ପାନେ।

5 ସ଼ଜେ ଲ଼କୁତି ଦାର୍ମୁ ତାନି ଜିରୁ ସଲ୍‌କେ କିନେ, ସାମା ଲାଗେଏତି ଲ଼କୁ ତାନି ଲାଗେଏ କାମା ତଲେ ନା଼ସା ଆ଼ନେସି।

6 ସଲ୍‌କେ ଲ଼କୁତି ଦାର୍ମୁ ଏ଼ୱାରାଇଁ ଗେଲ୍‌ପିନେ, ସାମା ନା଼ଡ଼ିକିନାରି ତାମି ଲାଗେଏତି ଜୂପ୍‌କା ତଲେ ଆସ୍‌ପି ଆ଼ନେରି।

7 ଲାଗେଏତି ଲ଼କୁ ହା଼ତିହିଁ, ତାନି ବା଼ର୍ସୁ ବାରେ ନସ୍ତ ଆ଼ନେ ଅ଼ଡ଼େ ଦାର୍ମୁ ହିଲାଆଗାଟାରି ଆ଼ସା ନା଼ସା ଆ଼ନେ।

8 ଦାର୍ମୁଗାଟାସି ଦୁକୁଟି ଗେଲ୍‌ପି ଆ଼ନେସି, ଇଞ୍ଜାଁ ଲାଗେଏତାସି ଏ଼ କସ୍ତତା ହେର୍‌ୱିନେସି।

9 ମା଼ନି ହିଲାଆ ଲ଼କୁ ତାନି ଗୂତିଟି ପା଼ଡ଼ିତି ଲ଼କୁଣି ନା଼ସା କିନେସି, ସାମା ଦାର୍ମୁଗାଟାସି ବୁଦି ତଲେ ଗେଲ୍‌ପି ଆ଼ନେସି।

10 ଦାର୍ମୁଗାଟାସି ନେହିଁ ଆ଼ତିହିଁ, ଗା଼ଡ଼ାତି ଲ଼କୁ ରା଼ହାଁ କିନେରି; ଇଞ୍ଜାଁ, ଲାଗେଏତାସି ନା଼ସା ଆ଼ତିହିଁ, ରା଼ହାଁଟି କା଼ଲୱି ଆ଼ନେରି।

11 ସଲ୍‌କେ ଲ଼କୁତି ବ଼ର ତଲେ ଗା଼ଡ଼ା ନେହିଁ ଆ଼ନେ, ସାମା ଲାଗେଏ ଲ଼କୁ ତଲେ ଏ଼ଦି ନା଼ସା ଆ଼ନେ।

12 ଆମ୍ବାଆସି ପା଼ଡ଼ିତି ଲ଼କୁଇଁ ହୀଣି କିନେସି, ଏ଼ୱାସି ବୁଦି ହିଲାଆଗାଟାସି; ସାମା ବୁଦିଗାଟାସି ପାଲେଏ ଡ଼ୟିନେସି।

13 ଆମ୍ବାଆସି ସାକ୍ରି କାତା ଜ଼ଲିହିଁ ରେ଼ନେସି, ଏ଼ୱାସି ଡ଼ୁଗାମାନି କାତା ପାଙ୍ଗାତା ୱେ଼କ୍‌ନେସି, ସାମା ନାମାକମୁ ମାଣ୍‌ସି ଏ଼ କାତା ଡ଼ୁକ୍‌ହା ଇଟିନେସି।

14 ନେହିଁ ବୁଦି ୱେହ୍‌ନାରି ହିଲାଆସାରେ ଲ଼କୁ ନା଼ସା ଆ଼ନେରି, ଇଞ୍ଜାଁ ହା଼ରେକା ମନ୍ତ୍ରିୟାଁ ତଲେ ଜୀଣା ଆ଼ନେରି।

15 ପୁନାଆତି ଲ଼କୁ ତାକି ଆମ୍ବାଆସି ଦା଼ୟି ଆ଼ନେସି, ଏ଼ୱାସି ସା଼ସ୍ତି ବେଟାଆ଼ନେସି; ସାମା ଦା଼ୟି ଆ଼ହାଲି ଆମ୍ବାଆସି କୂନେସି, ଏ଼ୱାସି ଆଜାଆନା ଡ଼ୟିନେସି।

16 କାର୍ମାମେହ୍‌ନି ଆୟାଟି ମା଼ନି ଆସା ଡ଼ୟିନେ, ଇଞ୍ଜାଁ କାର୍ମା ମେହ୍‌ଆ ଲ଼କୁ ଦ଼ନ ଆସା ଡ଼ୟିନେସି।

17 କାର୍ମା ମେହ୍‌ନାସି ତାନି ଜୀୱୁତି ନେହିଁ କିନେସି; ସାମା କାର୍ମା ମେହ୍‌ଆଗାଟାସି, ଏ଼ୱାସି ତାନି ଆଙ୍ଗାତି ଦୁକୁ ହୀନେସି।

18 ଲାଗେଏତି ଲ଼କୁ ମିଚି କାତା ଅର୍ଜି କିନେସି, ସାମା ଆମ୍ବାଆସି ଦାର୍ମୁତି ବିଚା ମାଟିନେସି, ସାତେଏ ଏ଼ୱାଣି ଦା଼ନା ମାନେ।

19 ଆମିନି ମାଣ୍‌ସି ଦାର୍ମୁତା ଆ଼ଟ୍‌ୱା ଡ଼ୟିନେସି, ଏ଼ୱାସି ଜୀୱୁ ବେଟାଆ଼ନେସି; ଇଞ୍ଜାଁ ଆମ୍ବାଆସି ଲାଗେଏ କାମାତି ଜେ଼ଚ ହଣ୍‌ନେସି, ଏ଼ୱାସି ହା଼ନେସି।

20 କୁଟୁ ମ଼ନଗାଟାସି ମାହାପୂରୁ ନ଼କିତା ଅ଼ପାଆଗାଟାସି ଆ଼ନେସି, ସାମା ସ଼ଜେତି ଲ଼କୁ ଏ଼ୱାଣି ନ଼କିତା ରା଼ହାଁଗାଟାରି ଆ଼ନେରି।

21 ଲାଗେଏତି ଲ଼କୁ କେସ୍କା ଆସ୍‌ପି ଆ଼ତି ଜିକେଏ ଡଣ୍ତ ବେଟାଆ଼ନେରି, ସାମା ଦାର୍ମୁଗାଟି ଲ଼କୁ ଗେଲ୍‌ପି ଆ଼ନେରି।

22 ଏ଼ନିକିଁ ପାଜି ମୂତିତା ବାଂଗାରା ମୁର୍‌ମୁ, ଏଲେକିହିଁଏ ନେହିଁ ଅଣ୍‌ପୁ ପିହ୍‌ନି ଅ଼ଜୁଗାଟି ଆୟାଟି।

23 ଦାର୍ମୁ ଲ଼କୁ ଆ଼ସାତି ପା଼ଡ଼େୟି ୱାର୍‌ଇ ନେହାୟି ଆ଼ନେ, ସାମା ଲାଗେଏ ଲ଼କୁତି ବା଼ର୍ସୁତି ପା଼ଡ଼େୟି କାର୍‌ବି।

24 ଆମ୍ବା ଆମ୍ବାଆରି ଦା଼ନା ହୀହିଁ ଗାଡି ପାଡା ଆ଼ନେରି, ଇଞ୍ଜାଁ ଆମ୍ବା ଆମ୍ବାଆରି ହୀନାଣି କିହାଁ ଊଣା ହୀନେରି ଆ଼ତି ଜିକେଏ ଏ଼ୱାରାକି ଲ଼ଡ଼ା ଆ଼ନେ।

25 ଦା଼ନା ହୀନି ମାଣ୍‌ସି ପାଡା ଆ଼ନେସି, ଅ଼ଡ଼େ ଏ଼ୟୁ ଡ଼ାଞ୍ଜିନେସି, ଏ଼ୱାସି ଜିକେଏ ଡ଼ାସ୍‌କି ଆ଼ନେସି।

26 ଆମ୍ବାଆସି ଆର୍ନା କୂଡ଼ି କିହାଁ ଇଟାହାଁ ଡ଼ୟିନେସି, ଲ଼କୁ ଏ଼ୱାଣାଇଁ ବା଼କା ହୀନେରି, ସାମା ଆମିନି ମାଣ୍‌ସି ଏ଼ଦାଆଁ ପା଼ର୍‌ନେସି, ଏ଼ୱାଣାକି ବ଼ର ହୀପ୍‌କିଆ଼ନେ।

27 ଆମିନି ମାଣ୍‌ସି ଜାତ୍‌ନୁ ତଲେ ରଅଣି ନେହିଁ କିନେସି, ଏ଼ୱାସି କାର୍ମା ବେଟାଆ଼ନେସି, ଇଞ୍ଜାଁ ଆମ୍ବାଆସି ଏଟ୍‌କାତାଣାଇଁ ଲାଗେଏ କିହାଲି ପାରିନେସି, ଏ଼ୱାଣାକି ଏ଼ଦିଏ ଆ଼ନେ।

28 ଆମ୍ବାଆସି ଜାହାରା ବାତ୍‌କୁତା ବା଼ର୍ସୁ କିନେସି, ଏ଼ୱାସି ୱା଼ୟିତି ଆ଼କୁ ସମାନା ରିହା ହାନେସି; ସାମା ଦାର୍ମୁଗାଟାସି ହିଃଲି ଆ଼କୁ ସମାନା ହିତ୍‌ଡ଼ି ଆ଼ନେସି।

29 ଆମ୍ବାଆସି ଜାହାରା ଇଲୁ କୁଟମିତି ଦୁକୁ ହୀନେସି, ଏ଼ୱାସି ଗା଼ଲି ସମାନା ଅଦିକାରା ବେଟାଆ଼ନେସି; ଇଞ୍ଜାଁ ବୁଦି ହିଲାଆଗାଟାସି ବୁଦିଗାଟାଣି ହ଼ଲେଏସି ଆ଼ନେସି।

30 ଦାର୍ମୁଗାଟାଣି ପା଼ଡ଼େୟି ଜୀୱୁହୀନି ମା଼ର୍‌ନୁ ଆ଼ନେ, ଇଞ୍ଜାଁ ଆମ୍ବାଆସି ବୁଦିଗାଟାସି, ଏ଼ୱାସି ଏଟ୍‌କା ଲ଼କୁତି ମ଼ନ ଜୀଣା ଆ଼ନେସି।

31 ମେହ୍‌ଦୁ, ଦାର୍‌ତିତା ୱାର୍‌ଇ ଦାର୍ମୁଗାଟାରି ତାମି କାମାତି ପା଼ଡ଼େୟି ବେଟାଆ଼ନେରି, ଆତିହିଁ ଲାଗେଏତାରି ଅ଼ଡ଼େ ପା଼ପୁଗାଟାରି ଏ଼ନାଆଁ ଏ଼ଦାଆଁ କିହାଁ ଆଗାଡ଼ା ବେଟାଆ଼ଅରି ?