1 ଆମ୍ବାଆସି ଜାହାରାଇଁ ଅ଼ର ଲ଼କୁ ତା଼ଣାଟି ଏଟ୍‌କା କିନେସି, ଏ଼ୱାସି ଜାହାରା ନେହେଁ ତାକି କିନେସି ଅ଼ଡ଼େ ବାରେ ନେହିଁ ବୁଦିତା ଗଡ଼୍‌ହା କିନେସି।

2 ବୁଦି ହିଲାଆ ଲ଼କୁ ବୁଦିତା ରା଼ହାଁ ଆ଼ଅସି, ୱାର୍‌ଇ ଜାହାରା ମ଼ନତି କାତା ୱେ଼କ୍‌ହାଲି ରା଼ହାଁ ଆ଼ନେସି।

3 ଆମ୍ବିୟା ଲାଗେଏତାୟି ମାନେ ଏମ୍ବାଆଁ ଲାଜା ୱା଼ନେ, ଇଞ୍ଜାଁ ହୀଣି ତଲେ ନିନ୍ଦା ୱା଼ନେ।

4 ମାଣ୍‌ସି ଗୂତିତି ବ଼ଲୁ କୂଡ଼୍‌ହି ଏ଼ୟୁ ସମାନା, ଇଞ୍ଜାଁ ବୁଦି ହ଼ନି ଟା଼ୟୁ ଏ଼ୟୁ ଜାର୍‌ଣା ସମାନା।

5 ଲାଗେଏ ଲ଼କୁ ୱାକି ଆ଼ନାୟି ଅ଼ଡ଼େ ବିଚାରାତା ଦାର୍ମୁ ଗାଟାରି ତାକି ଲାଗେଏ କିନାୟି ନେହେଁ ଆ଼ଏ।

6 ବୁଦି ହିଲାଆ ଗୂତି ଗଡ଼୍‌ହା କିନେ, ଇଞ୍ଜାଁ ତାନି ଗୂତି ମା଼ଡା ତିଞ୍ଜାଲି ହା଼ଟିନେ।

7 ବୁଦି ହିଲାଆ ଲ଼କୁତି କାତା ତାନି ନା଼ସା କିନାୟି ଆ଼ନେ, ଇଞ୍ଜାଁ ତାନି ଗୂତି ଜାହାରା ଜୀୱୁତି ପା଼ନ୍ଦା ସମାନା।

8 ଅଲେ ଅଲେ ୱେହ୍‌ନି ଲ଼କୁତି ହା଼ଡା ଡ଼ାକ୍‌ହି କା଼ଦି ସମାନା, ଏ଼ଦି ହିୟାଁ ବିତ୍ରା ହାନେ।

9 ଜାହାରା କାମାତା ଆମ୍ବାଆସି ନିସ୍ତା ଗାଟାସି, ଏ଼ୱାସି ନା଼ସା କିନାଣି ତାୟି।

10 ପ୍ରବୁତି ଦ଼ରୁ ଆ଼ଟ୍‌ୱା କ଼ଟା; ଦାର୍ମୁ ଲ଼କୁ ଏମ୍ବାଆଁ ହାଜାହାଁ ଗେଲ୍‌ପି ଆ଼ନେସି।

11 ବାତ୍‌କୁଗାଟାଣି ବାତ୍‌କୁ ତାନି ଆ଼ଟ୍‌ୱା ଗା଼ଡ଼ା, ଇଞ୍ଜାଁ ତାନି ଅଣ୍‌ପୁତା ପାଡା ଆ଼ତି କାତି ସମାନା।

12 ନା଼ସା ଆ଼ନି ନ଼କିତା ମାଣ୍‌ସିତି ମ଼ନ ବଡପଣ ଆ଼ନେ, ଇଞ୍ଜାଁ, ମା଼ନି ବେଟାଆ଼ନି ନ଼କେଏ କ଼ପା ହିଲାଆଗାଟାୟି ୱା଼ନେ।

13 ଆମ୍ବାଆସି ୱେନି ନ଼କେଏ ଜ଼ଲିନେସି, ଏ଼ଦି ଏ଼ୱାଣି ତାକି ବୁଦି ହିଲାଆଗାଟାୟି ଅ଼ଡ଼େ ଲାଜାତି କାତା।

14 ମାଣ୍‌ସିତି ଜୀୱୁ ତାନି ବୀସା ଅ଼ର୍‌ହାଲି ଆ଼ଡିନେ; ସାମା କା଼ଡିମାନି ହିୟାଁତି ଆମ୍ବାଆସି ଅ଼ର୍‌ହାଲି ଆ଼ଡିନେସି ?

15 ତେଲ୍‌ହାଲି ଆ଼ଡିନାଣା ମ଼ନ ବୁଦି କୂଡ଼ି କିନେ; ଇଞ୍ଜାଁ, ବୁଦି ଗାଟାଣା କିର୍ୟୁଁ ବୁଦି ପାରିନେ।

16 ମାଣ୍‌ସିତି ଦା଼ନା ଏ଼ୱାଣି ତାକି ଜିରୁ ତିୟାରା କିନେ, ଇଞ୍ଜାଁ କାଜା ଲ଼କୁତି ନ଼କିତା ଏ଼ୱାଣାଇଁ ତାନେ।

17 ଏମିନି ମାଣ୍‌ସି ନ଼କେଏ ତାନି ଦାୱା ୱେହ୍‌ନେସି, ଏ଼ୱାସି ଦାର୍ମୁଗାଟାସି ତ଼ଞ୍ଜାଆ଼ନେସି, ସାମା ତାନି ପା଼ଡ଼ିତାସି ୱା଼ହାଁ ଏ଼ୱାଣାଇଁ ତାୟିପାରି କିନେସି ।

18 ପାଦି କିନାୟି ଗଡ଼୍‌ହା ସାପି କିନେ ଅ଼ଡ଼େ ବା଼ଡ଼୍‌ୟୁ ଗାଟାରାଇଁ ଏଟ୍‌କା କିନେ।

19 ନୀନୁ ପା଼ଡ଼ିତି ଲ଼କୁଣି ସା଼ୟେମି କିମୁ ଏ଼ୱାରି ନିଙ୍ଗେ ର଼ ଗା଼ଡ଼ାତି କାତି ସମାନା ଗେଲ୍‌ପାନେରି ସାମା ନୀନୁ ଏ଼ୱାରି ତଲେ ଗଡ଼୍‌ହା କିତିସାରେ ଏ଼ୱାରି ନୀ ତାକି ଦା଼ରା ଅର୍ଗଡ଼ି ସୁଣ୍ତିନେରି।

20 ମାଣ୍‌ସିତି ବାଣ୍ତି ଗୂତି ବ଼ଲୁତି ପା଼ଡ଼େୟି ତଲେ ନେଞ୍ଜିନେ, ଇଞ୍ଜାଁ ଏ଼ୱାସି ତାନି ଗୂତିତି ଲା଼ବା ତଲେ ପାଞ୍ଜିନେସି।

21 ହା଼କି ଅ଼ଡ଼େ ଜୀୱୁ ୱେନ୍ଦରି ତା଼ଲେ ମାନେ; ଆମ୍ବାଆରି ଏ଼ଦାଣି ନେହିକିଁ ପୁନେରି, ଏ଼ୱାରି ତାନି ପା଼ଡ଼େୟି ବେଟାଆ଼ନେରି।

22 ଆମ୍ବାଆସି ଡକ୍ରି ବେଟାଆ଼ନେସି, ଏ଼ୱାସି ନେହେଁ ଦିଣ୍‌ସୁ ବେଟାଆ଼ନେସି ଅ଼ଡ଼େ ପ୍ରବୁ ତା଼ଣାଟି କାର୍ମା ବେଟାଆ଼ନେସି।

23 କାର୍ମାଗାଟି ଲ଼କୁ ବାତିମା଼ଲିନେସି; ସାମା ବାତ୍‌କୁଗାଟାସି ଆ଼ଟ୍‌ୱା ତଲେ ଜ଼ଲିନେସି।

24 ଆମ୍ବାଆସି ହା଼ରେକା ତ଼ଣେ କିନେସି, ଏ଼ୱାସି ଜାହାରା ନା଼ସା ତାକି ଏ଼ଦାଆଁ କିନେସି; ସାମା ରଅସି ଜୀୱୁ ନ଼ନାସି ମାନେସି, ଆମ୍ବାଆସି ତାୟି କିହାଁ ହା଼ରେକା ଟଟତା ଡ଼ୟିନେସି।