1 ଗଡ଼୍‌ହାଗାଟି ବ଼ଜିତା ନେଞ୍ଜାମାନି ଇଲୁ କିହାଁ ହିତ୍‌ଡ଼ି ତଲେ ଇଚାୟି ୱା଼ୟିତି ରୂଟି ନେହେଁ।

2 ଏମିନି ହ଼ଲେଏସି ବୁଦି ତଲେ କାମା କିନେସି, ଏ଼ୱାସି ଲାଜା ହୀନି ମୀର୍‌ଏଣା ମୁହେଁ ସା଼ଲୱି କିନେସି, ଇଞ୍ଜାଁ ତାୟିୟାଁ ତଲେ ଅଦିକାରାତି ବା଼ଗା ବେଟାଆ଼ନେସି।

3 ୱେଣ୍ତି ଅ଼ଡ଼େ ବାଂଗାରା ହିଚୁତା ତାୟିପାରି କିୱିଆ଼ନେ; ସାମା ମାଣ୍‌ସିତି ହିୟାଁ ପ୍ରବୁ ତାୟିପାରି କିନେସି।

4 ଲାଗେଏ କାମା କିନି ଲ଼କୁ ଲାଗେଏ ଗୂତିତି କାତା ୱେନେସି, ଇଞ୍ଜାଁ ମିଚି ଜ଼ଲିନି ଲ଼କୁ ଲାଗେଏ କାତାତା କିର୍ୟୁଁ ଅଡିନେସି।

5 ଏମିନି ଲ଼କୁ କା଼କୁଲି ଗାଟାରାଇଁ କିଜୱି କିନେସି, ଏ଼ୱାସି ତାନି ଗା଼ଡ଼ି କିତାଣାଇଁ ନିନ୍ଦା କିନେସି; ଇଞ୍ଜାଁ, ଆମ୍ବାଆସି କସ୍ତ ବେ଼ଲାତା ରା଼ହାଁ କିନେସି, ଏ଼ୱାସି ଡଣ୍ତ ବେଟାଆ଼ନେସି।

6 ମୀର୍‌କାତି ମୀର୍‌କା ବୁଡ଼୍‌ହା ବୁଡ଼୍‌ହି ଲ଼କୁତି ଟ଼ପେରି; ଇଞ୍ଜାଁ, ମୀର୍‌କାତି ଗା଼ୱୁରମି ତାମି ତାଲି ତାଞ୍ଜି।

7 ନେହିଁ ବ଼ଲୁ ବୁଦି ହିଲାଆଗାଟାଣି ଗୂତିତା ପା଼ଡ଼ାଆ଼ଏ, ଅ଼ଡ଼େ ଈଦାଣି କିହାଁ ହା଼ରେକା ସା଼ଲୱି କିନାରି ଗୂତିଟି ମିଚି କାତା ଜ଼ଲିନାୟି ପା଼ଡ଼ାଆ଼ଏ। ମା଼ନିଗାଟି ଲ଼କୁ ମିଚି ଜ଼ଲଅ଼ରି, ସା଼ଲୱି କିନାରି ହା଼ରେକା ମିଚି ଜ଼ଲିନେରି।

8 ଲା଼ଞ୍ଚା ହୀହିମାନି ମାଣ୍‌ସି ର଼ ଜୂପ୍‌କା ସମାନା ତ଼ଞ୍ଜାଆ଼ନେସି ଏ଼ୱାରି ଅଣ୍‌ପିନେରି ବାରେ କାତା ପୂରା ଆ଼ନେ।

9 ଆମ୍ବାଆସି ଏଟ୍‌କା ଲ଼କୁତି ଦ଼ହ କେମା କିନେସି, ଏ଼ୱାସି ଜୀୱୁ ନ଼ନାଣି ପାରିନେସି; ସାମା ଆମ୍ବାଆସି ରଣ୍ତି କାତା ଅଲେ ଅଲେ ହ଼ପ୍‌ନେସି, ଏ଼ୱାସି ହା଼ରେକା ତ଼ଣେସିଙ୍ଗାଣି ଏଟ୍‌କା କିନେସି।

10 ବୁଦି ହିଲାଆ ଗାଟାଣାକି ପା଼ସାକ଼ଡ଼ି ଦେବା ମା଼ଡା ୱେ଼ନି କିହାଁ ବୁଦି ଗାଟାଣାକି ଇଚାୟି ଦାକା ହୀନାୟି ହା଼ରେକା ନ଼ନେ।

11 ଲାଗେଏତାସି ୱାର୍‌ଇ ଗଡ଼୍‌ହା ପାରିନେସି, ଏ଼ଦାଆଁତାକି ଏ଼ୱାଣି କ଼ପାଟି କାର୍ମା ମେହ୍‌ଆ ଦୂତୁ ପାଣ୍ତ୍‌ୱି ଆ଼ନେ।

12 ଡା଼ଲ୍‌କା ପିସ୍ତି ଅଃଅଡ଼ି ମାଣ୍‌ସିଇଁ ବେଟାଆ଼ପେ, ସାମା ଜାହାରା ବୁଦି ହିଲାଆ ତା଼ଣା ମୁଞ୍ଜାହାଁ ଡ଼ୟିନି ବୁଦି ହିଲାଆଗାଟାସି ବେଟାଆ଼ଆପେସି।

13 ଏମିନି ଲ଼କୁ ନେହେଁତି ବାଦୁଲି ଲାଗେଏ କିନେସି, ତାନି ଇଜ ଏଚେଲା ଲାଗେଏତାୟି ପିହ୍‌ଏ।

14 ଗଡ଼୍‌ହା ମା଼ଟ୍‌ନାୟି ଆମ୍ବାଆରି ବାନ୍ଦାତି ଏ଼ୟୁ ଦେନି ଲେହେଁତାୟି; ଏ଼ଦାଆଁତାକି ଗଡ଼୍‌ହା ଗାଡି ଆ଼ନି ନ଼କେଏ ପିହ୍‌ଦୁ।

15 ଆମ୍ବାଆସି ଲାଗେଏ ଲ଼କୁଇଁ ଦ଼ହ କିଅସି ଅ଼ଡ଼େ ଆମ୍ବାଆସି ଦାର୍ମୁ ଗାଟାଣାଇଁ ଦ଼ହ କିନେସି, ଏ଼ ରିଆରି ପ୍ରବୁ ତା଼ଣା ସମାନା ଅ଼ପାଆଗାଟାରି ଆ଼ନେରି।

16 ବୁଦି କଡାଲି ତାକି ବୁଦି ହିଲାଆ ଲ଼କୁ ତା଼ଣା ଏ଼ନାଆଁତାକି ବାତ୍‌କୁ ଡ଼ୟିନେ ? ଏ଼ୱାଣାକି ବୁଦି ହିଲେଏ।

17 ତ଼ଣେ କା଼ଲେଏ ଜୀୱୁ ନ଼ନେସି, ଇଞ୍ଜାଁ ତାୟି କସ୍ତତି ଦିନା ତାକି ନିନେସି।

18 ବୁଦି ହିଲାଆଗାଟି ଲ଼କୁ କେୟୁ ଦା଼ସାହାଁ ପା଼ଡ଼ିତି ଲ଼କୁ ନ଼କିତା ଦା଼ୟି ଆ଼ନେସି।

19 ଆମ୍ବାଆସି ଗଡ଼୍‌ହା ଜୀୱୁ ନ଼ନେସି, ଏ଼ୱାସି ଦ଼ହ ଜିକେଏ ଜୀୱୁ ନ଼ନେସି; ଇଞ୍ଜାଁ, ଆମ୍ବାଆସି ତାନି ଦୁୱେରି ପାଡି କିନେସି, ଏ଼ୱାସି ନା଼ସା ପାରିନେସି।

20 କୁଟୁ ହିୟାଁଗାଟି ଲ଼କୁ ଏଚେଲା ନେହାଣି ବେଟାଆ଼ଅସି ଅ଼ଡ଼େ ଆମ୍ବାଆସି ଆଡେୟି ଜ଼ଲିନେସି, ଏ଼ୱାସି ଡଣ୍ତ ବେଟାଆ଼ନେସି।

21 ଆମ୍ବାଆସି ବୁଦି ହିଲାଆ ମୀର୍‌କା ମା଼ସ୍‌କା ଜାର୍ନି କିନେସି ଏ଼ୱାସି ଦୁକୁ ବେଟାଆ଼ନେସି; ଅ଼ଡ଼େ ବୁଦି ହିଲାଆ ମୀର୍‌କା ମା଼ସ୍‌କାତି ତାଲି ତାଞ୍ଜି ରା଼ହାଁ ବେଟାଆ଼ଅରି।

22 ରା଼ହାଁଗାଟି ହିୟାଁ ନେହେଁ ଅସ; ସାମା କା଼ଡିମାନି ଜୀୱୁ ପେ଼ଣ୍‌କା-ଡୁମ୍‌କା ବାରେ ୱା଼ୟିକିନେ।

23 ଲାଗେଏତି ଲ଼କୁ ବିଚାରାତି ଜିରୁ ୱା଼କ୍‌ହାଲି ଜା଼ଡ଼ିୟାଟି ଲା଼ଞ୍ଚା ଅ଼ନେସି।

24 ତେଲ୍‌ହିନି ଲ଼କୁ ନ଼କିତା ବୁଦି ଡ଼ୟିନେ, ସାମା ବୁଦି ହିଲାଆଗାଟାଣି କାନୁ ଦାର୍‌ତିତି ହେକ ରା଼ଜିତା ଡ଼ୟିନେ।

25 ବୁଦି ହିଲାଆ ମୀର୍‌ଏସି ଜାହାରା ତାଞ୍ଜିତି ଦୁକୁ ଅ଼ଡ଼େ ଜାହାରା ତାଲିନି ଦୁକୁଗାଟାସି ଆ଼ନେସି।

26 ଦାର୍ମୁ ଗାଟାଣାଇଁ ସା଼ସ୍ତି ହୀନାୟି କି ମା଼ନିଗାଟି ଲ଼କୁଇଁ ତାମି ସ଼ଜେ ତାକି ମା଼ଡା ୱେ଼ନାୟି ନେହେଁ ଆ଼ଏ।

27 ଆମ୍ବାଆସି ଇଚାଣି ଜ଼ଲିନେସି, ଏ଼ୱାଣାକି ବୁଦି ମାନେ; ଇଞ୍ଜାଁ, ଆମ୍ବାଆରିୱାୟି ହିତ୍‌ଡ଼ି ଜୀୱୁ, ଏ଼ୱାସି ତେଲ୍‌ହିନାସି। 28 ବୁଦି ହିଲାଆ ଲ଼କୁ ଜିକେଏ ସାପି ଆ଼ତିହିଁ, ବୁଦିଗାଟାସି ଲେକା କିୱିଆ଼ନେସି; ଇଞ୍ଜାଁ, ଏ଼ୱାସି ତାନି ଗୂତି ସାପି କିତିହିଁ, ତେଲ୍‌ହିନାସି ଲେକା କିୱିଆ଼ନେସି।