1 ହିୟାଁତି ଅଣ୍‌ପୁ ମାଣ୍‌ସି ୱାୟି; ସାମା ୱେନ୍ଦରିତି ଜ଼ଲିନାୟି ପ୍ରବୁ ତା଼ଣାଟି ଆ଼ନେ। 2 ମାଣ୍‌ସିତି ବାରେ ଜିରୁ ଜାହାରା ନ଼କିତା ଅ଼ଜିତାୟି; ସାମା ପ୍ରବୁ ଜୀୱୁୟାଇଁ ତୂକ୍‌ନେସି।

3 ପ୍ରବୁଇଁ ମୀ କାମା ହେର୍‌ପାଦୁ, ଏଚେଟିଏ ମୀ ଅଣ୍‌ପୁ ତୀରି ଆ଼ନେ।

4 ପ୍ରବୁ ବାରେ କାତାତି ଏମ୍ବାତି ଜାହାରା ତାକି ଆ଼ୱିକିହାଲି କିହାମାନେସି; ଲାଗେଏ ଲ଼କୁଇଁ ଜିକେଏ ବା଼ଦାତି ଦିନା ତାକି।

5 ମ଼ନତା ବଡପଣଗାଟି ବାରେ ଲ଼କୁ ପ୍ରବୁ ତା଼ଣା ଅ଼ପାଆଗାଟାରି, କେୟୁ ଆସ୍‌ପି ଆ଼ତିହିଁ ଜିକେଏ ଏ଼ୱାସି ଡଣ୍ତ ହୀଆନା ପିହ୍‌ଅସି।

6 କାର୍ମା ମେହ୍‌ନାୟି ଅ଼ଡ଼େ ମା଼ନି ମାଣ୍‌କି ତଲେ ପା଼ପୁ କେମା ଆ଼ନେ, ଇଞ୍ଜାଁ ପ୍ରବୁଇଁ ଆଜିନି ତା଼ଣାଟି ଲ଼କୁ ଲାଗେଏତି କାମା ପିହ୍‌ନେରି।

7 ମାଣ୍‌ସିତି ଜିରୁ ପ୍ରବୁତି ରା଼ହାଁ ଆ଼ତିସାରେ, ଏ଼ୱାସି ତାନି ସାତ୍ରୁୟାଁଣି ଜିକେଏ ତାନି ତଲେ ହିତ୍‌ଡ଼ି ତଲେ ବାସା କିୱିକିନେସି।

8 ଲାଗେଏ ତଲେ ହା଼ରେକା ବେଟାଆ଼ନି କିହାଁ ଦାର୍ମୁ ତଲେ ଇଚାୟି ନେହେଁ।

9 ମାଣ୍‌ସିତି ମ଼ନ ତାନି ଜିରୁତି କାତା ଅଣ୍‌ପିନେ; ସାମା ପ୍ରବୁ ତାନି ଜିରୁ ତୀରି କିନେସି।

10 ରାଜା ଗୂତିଟି ବୁଦିତି ବ଼ଲୁ ଡ଼ୟିନେ, ତାନି ଗୂତି ବିଚାରାତା ସାତାତି ଊରେଏ।

11 ସମାନାତି ବୀସା ବାଡ଼୍‌ଗା ମାହାପୂରୁୱାୟି ଅ଼ଡ଼େ ମା଼ଣ୍ତାତା ମାନି ବାରେ ଗୁଣ୍ତୁୟାଁ ତାନି କିହାମାନି କାମା।

12 ଲାଗେଏ କାମା କିନାଣି ରାଜାୟାଁ ଅ଼ପଅରି; ଇଚିହିଁ ଦାର୍ମୁ ତଲେ ସିଂଗାସାଣି ତୀରି ଆ଼ନେ।

13 ଦାର୍ମୁ କାତା ଜ଼ଲିନାରାଇଁ ରାଜା ରା଼ହାଁ ଆ଼ନେସି ଅ଼ଡ଼େ ସାତା ୱେହ୍‌ନାରାଇଁ ରା଼ହାଁ ଆ଼ନେସି।

14 ରାଜାତି କାର୍‌ବି ହା଼କିତି ଦୂତୁ ସମାନା; ସାମା ବୁଦିଗାଟି ଲ଼କୁ ଏ଼ଦାଣି ହିତ୍‌ଡ଼ି କିନେସି।

15 ପାର୍‌ସାଡ଼ା ରାଜା ମୂମ୍ବୁତା ଜୀୱୁ ଡ଼ୟିନେ, ଇଞ୍ଜାଁ ତାନି କାର୍ମା ମେହ୍‌ନାୟି ବାର୍ସାତି ରା଼ନି ପିୟୁ ବେ଼ଲାତି ଦୂନ୍ଦ୍ରା ସମାନା।

16 ବୁଦି ବେଟାଆ଼ନାୟି ଅଟ୍‌ହି ବାଂଗାରା କିହାଁ ନେହେଁ ଅ଼ଡ଼େ ନେହିଁ ଅଣ୍‌ପୁ ବେଟାଆ଼ନାୟି ୱେଣ୍ତି କିହାଁ ନେହେଁ।

17 ଲାଗେଏତି ପିହ୍‌ନାୟି ସ଼ଜେ ଲ଼କୁତି କାଜା ପା଼ହେରି, ଏମିନି ଲ଼କୁ ଜାହାରା ଜିରୁ କା଼ଚାହାଁ ତା଼କିନେସି, ଏ଼ୱାସି ତାନି ଜୀୱୁ ଗେଲ୍‌ପିନେସି।

18 ଡା଼ହାରା କୁଡ଼୍‌ପୁନା଼ସା ଟଟତା ଡ଼ୟିନେ, ଇଞ୍ଜାଁ ବଡପଣଗାଟି ମ଼ନ ନା଼ସାଆ଼ନି ଟଟତା ଡ଼ୟିନେ।

19 ଆଙ୍କାରାଗାଟାରି ତଲେ ଦୂହିତି ଦିଣ୍‌ସୁ ବା଼ଗା କିନି କିହାଁ କା଼କୁଲି ମ଼ନ ତଲେ ଊଣା ଆ଼ନାୟି ନେହେଁ।

20 ଏମିନି ଲ଼କୁ ମାହାପୂରୁ ବ଼ଲୁତା ମ଼ନ ହୀନେସି, ଏ଼ୱାସି ନେହାଣି ବେଟାଆ଼ନେସି, ଇଞ୍ଜାଁ ଆମ୍ବାଆସି ପ୍ରବୁ ତା଼ଣା ବା଼ର୍ସୁ କିନେସି, ଏ଼ୱାସି ନେହେଁ।

21 ଆମ୍ବାଆରି ମ଼ନତା ବୁଦି ମାନେ ଏ଼ୱାସି ତେଲ୍‌ହିନାସି ଇଞ୍ଜିଁ ୱେ଼ଙ୍ଗିନେସି, ଅ଼ଡ଼େ ସୁୱାଲା ହା଼ଡା ତଲେ ବୁଦି ପାଡାଆ଼ନେ।

22 ସାତା ବୁଦି, ଏ଼ଦାଆଁ ବେଟାଆ଼ହାମାନି ଲ଼କୁ ତାକି ଜୀୱୁତି ଜାର୍‌ଣା ଲେହେଁ; ସାମା ବୁଦି ହିଲାଆଗାଟାୟି ବୁଦି ହିଲାଆଗାଟାରି ସା଼ସ୍ତି।

23 ବୁଦିଗାଟାଣି ହିୟାଁ ତାନି ଗୂତିତି ଜା଼ପ୍‌ନେସି; ଇଞ୍ଜାଁ ତାନି ବ଼ଲୁ ବୁଦି ପାଡିକିନେ।

24 ସୁୱାଲା ହା଼ଡା କିର୍‌ୟାଁ ଲେହେଁ, ଏ଼ଦି ମ଼ନ ତାକି ହେନେ, ପ୍ଡ଼େନୁ ତାକି ନେହେଁ।

25 ମାଣ୍‌ସି ନ଼କିତା ଏ଼ନି ଏ଼ନି ଜିରୁ ସଲ୍‌କେ ତ଼ଞ୍ଜାଆ଼ନେ, ସାମା ଏ଼ଦାଣି ଡା଼ୟୁ ହା଼କିତି ଜିରୁ ଡ଼ୟିନେ।

26 କାମା କିନାଣି ହାକି ଏ଼ୱାଣାକି କାମା କିୱିକିନେ, ଇଚିହିଁ ତାନି ଗୂତି ଏ଼ଦାଣି ତାକି ବାଲାମାତମି କିନେ।

27 ଦାର୍ମୁ ହିଲାଆ ଲ଼କୁ ଲାଗେଏତି ଅଣ୍‌ପୁ ଅଣ୍‌ପିନେସି, ଇଞ୍ଜାଁ ତାନି ଗୂତିତା ଡ଼ୀଞ୍ଜିମାନି ହିଚୁ ଲେହେଁ ଡ଼ୟିନେ।

28 କୁଟୁଗାଟି ମାଣ୍‌ସି ଗଡ଼୍‌ହା ନିକ୍‌ନେସି, ଇଞ୍ଜାଁ ସାକ୍ରି କାତା ହା଼ରେକା ତ଼ଣେସିଙ୍ଗାଣି ଏଟ୍‌କା କିନେ।

29 ଡା଼ହାରାଗାଟାସି ଜାହାରା ପା଼ଡ଼ିତି ଲ଼କୁଣି ନା଼ଡ଼ି କିନେସି, ଇଞ୍ଜାଁ ଏ଼ୱାଣାଇଁ ଲାଗେଏ ଜିରୁତା ଅ଼ନେସି।

30 ଏମିନି ଲ଼କୁ ତାନି କାନୁ ଗୁରି କିନେସି, ଏ଼ୱାସି କୁଟୁ କାତା ଅଣ୍‌ପାଲି ଏ଼ଦାଆଁ କିନେସି; ଆମ୍ବାଆସି ତାନି ଗୂତି ମୁଚିନେସି, ଏ଼ୱାସି ଲାଗେଏ କାମା କିନେସି।

31 କାମ୍ବିତି ତା଼ର୍ୟୁଁ ଗା଼ୱୁରମିତି ଟ଼ପେରି, ଏ଼ଦି ଦାର୍ମୁତି ଜିରୁତା ତା଼କିତିହିଁ ମେ଼ଡ଼ାଆ଼ନେ।

32 ଆମ୍ବାଆସି ତବେ କାର୍‌ବି ଆ଼ଅସି, ଏ଼ୱାସି ବା଼ଡ଼୍‌ୟୁ ଗାଟାଣି କିହାଁ କାଜାସି; ଇଞ୍ଜାଁ, ଆମ୍ବାଆସି ଜାହାରା ଜୀୱୁତି ଲକ୍‌ନେସି, ଏ଼ୱାସି ଗା଼ଡ଼ା ଜୀଣା ଆ଼ତାଣି କିହାଁ ନେହାସି।

33 ଲ଼କୁ ପାଦି କିନେରି, ସାମା ଏମ୍ବାତି ତୀରି ଆ଼ନାୟି ପ୍ରବୁ ତା଼ଣାଟି ଆ଼ନେ।