1 ଡ଼଼ଇ ରା଼ଚିତି ନେହିଁ ଜା଼ପ୍‌ନି ବ଼ଲୁ ବାରେ ସଲମନ କିତାୟି ଅ଼ଡ଼େ ଜୀହୁଦାତି ରାଜା ହିଜକିୟତି ଅଦିକାରା ଗାଟାରି ଏ଼ଦାଆଁ ରେ଼ପ୍‌ହା ମାଚେରି।

2 କାତାତି ଡ଼ୁକ୍‌ନାୟି ମାହାପୂରୁତି ଗା଼ୱୁରମି; ସାମା କାତାତି ପାରିନାୟି ରାଜାତି ଗା଼ୱୁରମି।

3 ପାଡ୍‌ଣି ତାକି ଲାକପୂରୁ ଅ଼ଡ଼େ କୂଡ଼୍‌ହାୟି ତାକି ଦାର୍‌ତି, ଅ଼ଡ଼େ ରାଜାୟାଁତି ହିୟାଁ ପୁଞ୍ଜାଲି ଆ଼ଡାଆୟି।

4 ୱେଣ୍ତିଟି ମା଼ଚି ଏଟ୍‌କା କି‌ଦୁ, ଆତିହିଁ କାମ୍ବାସା଼ଲି ତାକି ର଼ କାମା ଆ଼ନେ। 5 ରାଜା ନ଼କିଟି ଲାଗେଏ ଲ଼କୁଣି ହେକ କିଦୁ, ଆତିହିଁ, ତାନି ସିଂଗାସାଣି ଦାର୍ମୁ ତଲେ ତୀରି ଆ଼ନେ।

6 ରାଜା ନ଼କିତା ଜାହାରାଇଁ ମା଼ନି କିହା କଡାଆଦୁ, ଇଞ୍ଜାଁ କାଜା ଲ଼କୁତି ଟା଼ୟୁତା ନିଆଦୁ। 7 ଇଚିହିଁ ଏମିନି କାଜାପା଼ଣା ଲ଼କୁଇଁ ମୀ କାନୁ ମେସାମାନେ, ତାନି ନ଼କିତା ହୀଣି ଆ଼ନି କିହାଁ "ଇମ୍ବାଆଁ ୱା଼ମୁ" ଇଞ୍ଜିଁ ମିଙ୍ଗେ ଏଲେଇନାୟି ନେହେଁ।

8 ଗଡ଼୍‌ହା ଆ଼ତିସାରେ ଦେବୁଣିଏ ପାଙ୍ଗାତା ହାଲାଆଦୁ, ହାଚିସାରେ ତାନି ଡା଼ୟୁ ନୀ ପା଼ଡ଼ିତାସି ନିଙ୍ଗେ ଲାଜା କିୟାତି ଡା଼ୟୁ ନୀନୁ ଏ଼ନାଆଁ କିଦି ?

9 ନୀ ପା଼ଡ଼ିତି ଲ଼କୁ ତଲେ ମୀ ଗଡ଼୍‌ହାତି କାତା ଆ଼ହାଁ ସାପି କିଦୁ, ଇଞ୍ଜାଁ ଏଟ୍‌କା ଲ଼କୁତି ଡ଼ୁଗାମାନି କାତା ୱେ଼କ୍‌ଆନି। 10 ଆ଼ଆତିହିଁ ୱେନି ଲ଼କୁ ନିଙ୍ଗେ ଲାଜା କିୟାସାରେ, ଲ଼କୁ ନିଙ୍ଗେ ହୀଣି କିୟାନେରି।

11 ୱେଣ୍ତି ସାଡ଼୍‌ୱାତା ବାଂଗାରା ପୁଲେ ପା଼ଡ଼େୟି ବାନାୟାଁ ଏ଼ନିକିଁ, ସମାନା ବେ଼ଲାତା ଅଣ୍‌ପୁ ୱା଼ନି କାତା ଏଲେକିଁ।

12 ବାଂଗାରା ଗୁଣ୍‌ସୁ ଅ଼ଡ଼େ ନେହିଁ ବାଂଗାରାତି ଆ଼ସ୍ତି ଏ଼ନିକିଁ, ମ଼ନ ହୀନାଣି କିର୍ୟୁଁ ତାକି ବୁଦିଗାଟାଣି ଲା଼ଗିନାୟି ଏଲେକିଁ ।

13 ତା଼ସା ବେ଼ଲାତା ମାଚୁତି ହିତ୍‌ଡ଼ି ଏ଼ନିକିଁ, ପାଣ୍ତିତାରା ତାକି ନାମାକମୁ ଦୂତୁ ଏଲେକିଁ, ଇଚିହିଁ ଏ଼ୱାସି ତାନି ସା଼ୱୁକାରି ଜୀୱୁତା ହିତ୍‌ଡ଼ି ହୀନେସି।

14 ପିୟୁ ହିଲାଆ ହା଼ଗୁ ଅ଼ଡ଼େ ଗା଼ଲି ଏ଼ନିକିଁ, ତାନି ଦା଼ନାତି କାତା ମିଚି ତଲେ ବଡପଣ କିନାସି ଏଲେକିଁ।

15 ଅ଼ର୍‌ହିନାଣି ତଲେ ସା଼ଲୱି କିନାଣାଇଁ ମା଼ନୱି କିୱିଆ଼ନେ, ଇଞ୍ଜାଁ ସୁୱାଲା ହା଼ଡା ପେ଼ଡ଼୍‌ନୁ ଜିକେଏ ଡିକ୍‌ନେ।

16 ନୀନୁ କି କିର୍‌ୟାଁ ବେଟାଆ଼ହାମାଞ୍ଜି ? ନିଙ୍ଗେ ଏଚେକା ଲ଼ଡ଼ା, ଏଚେକା ତିନାମୁ; ହା଼ରେକା ତିଚିସାରେ ନୀନୁ ଏ଼ଦାଆଁ ହୂପ୍‌କିଦି। 17 ନୀ ପା଼ଡ଼ି ଇଜ ଅଲେ ଅଲେ ହାଲାଆନି, ଆ଼ଆତିଁ ନିଙ୍ଗେ କାର୍‌ବି ଆ଼ହାଁ ଏ଼ୱାସି ନିଙ୍ଗେ ଅ଼ପଅସି।

18 ପା଼ଡ଼ି ଲ଼କୁ କ଼ପାଟି ଆମ୍ବାଆସି ମିଚି ସା଼କି ହୀନେସି, ଏ଼ୱାସି ଜୁଜୁ ଟେଙ୍ଗା, କାଣ୍ତା ଅ଼ଡ଼େ ୱାସ୍ତି ଆମ୍ବୁ ସମାନାତାସି।

19 କସ୍ତ ବେ଼ଲାତା ନାମାକମୁ ହିଲାଆ ଲ଼କୁ ତା଼ଣା ବା଼ର୍ସୁ, ଡୀହାମାନି ପାଲୁ ଅ଼ଡ଼େ ଡୀହାମାନି କଡାତା ବା଼ର୍ସୁ କିନି ସମାନା।

20 ପେନି କା଼ଲମିତା ବାସ୍ତେରି ହୁକ୍‌ହା ଅ଼ନାୟି ଅ଼ଡ଼େ ଗା଼ହାଁ ଲାକ ପୁଲା ଏ଼ୟୁ ଆଟ୍‌ନି ଲ଼କୁ ଏଲେକିଁ, ଦୁକୁଗାଟି ଲ଼କୁ ନ଼କିତା ପା଼ଚୁ ପା଼ଚିନି ଲ଼କୁ ଏଲେକିଁ।

21 ନୀ ସାତ୍ରୁ ହାକି ଆ଼ତିସାରେ, ଏ଼ୱାଣାଇଁ ରା଼ନ୍ଦା ତୀହ୍‌ମୁ; ଇଞ୍ଜାଁ, ଏ଼ୱାସି ଏ଼ସ୍‌କି ଆ଼ତିସାରେ, ଏ଼ୱାଣାଇଁ ଏ଼ୟୁ ଊଟ୍‌ମୁ; 22 ଏଚେଟିଏ ନୀନୁ ଏ଼ୱାଣି ତା଼ର୍ୟୁଁତା ଡ଼ୀଞ୍ଜିମାନି ହିଚୁ ରୀଙ୍ଗାୟାଁ ଇଟିଦି, ଇଞ୍ଜାଁ, ପ୍ରବୁ ନିଙ୍ଗେ ଦା଼ନା ହିୟାନେସି।

23 ଏ଼ନିକିଁ ଟେ଼ବ୍ରି ୱାକିତି ଗା଼ଲି ପିୟୁ ହ଼ପ୍‌ହା ତାନେ, ଏଲେକିହିଁଏ ସାକ୍ରିଗାଟି ୱେନ୍ଦରି କାର୍‌ବି କିନାଣି ହ଼ପ୍‌ନେ।

24 ଗଡ଼୍‌ହାଗାଟି ଆୟାଟି ତଲେ ରଣ୍ତିଏ ଇଲୁତା ବାସା କିନି କିହାଁ ଇଲୁ ତେ଼ପରିତି ର଼ କନତା ବାସା କିନାୟି ନେହେଁ।

25 ଏ଼ସ୍‌କିଗାଟି ଜୀୱୁତି ହିତ୍‌ଡ଼ି ଏ଼ୟୁ ଏ଼ନିକିଁ, ହେକ ଦେ଼ସାତି ନେହିଁ କାବ୍ରୁ ଏଲେକିହିଁ ଆ଼ନେ।

26 ଗ଼ଣଗାଟି ସେର୍‌ୱୁ ଏ଼ୟୁ ଅ଼ଡ଼େ ମା଼ହିଁତି ଜାର୍‌ଣା ଏ଼ନିକିଁ, ଲାଗେଏ ଲ଼କୁ ନ଼କିତା ବିଲ୍‌କିଗାଟି ଦାର୍ମୁ ଲ଼କୁ ଏଲେକିଁ।

27 ହା଼ରେକା କିର୍‌ୟାଁ ତିନାୟି ଏ଼ନିକିହିଁ ନେହେଁ ଆ଼ଏ, ଏଲେକିହିଁ ମାଣ୍‌ସିୟାଁ ଜାହାରା ଗା଼ୱୁରମି ପାରିନାୟି ଗା଼ୱୁରମି ଆ଼ଏ।

28 ଆମ୍ବାଆସି ଜାହାରାଇଁ ଲକ୍‌ହାଲି ଆ଼ଡଅସି, ଏ଼ୱାସି କାତି ହିଲାଆ ଡୀହାମାନି ଗା଼ଡ଼ା ସମାନା।