1 ହେ଼ ନା଼ ମୀର୍‌ଏଣା, ନୀନୁ ଜଦି ନା଼ କାତା ଆହ୍‌ଦି ଅ଼ଡ଼େ ନା଼ ହୁକୁମି ବାରେ ମ଼ନତା ଇଟିଦି; 2 ଜଦି ବୁଦି ୱାକି ନୀ କିର୍ୟୁଁ ଅଡିଦି ଅ଼ଡ଼େ ତେଲ୍‌ହିନି ତା଼ଣା ନୀ ମ଼ନ ହୀଦି; 3 ହାଅ, ନୀନୁ ନେହେଁ ଅଣ୍‌ପୁତି ହା଼ଟିଦି ଅ଼ଡ଼େ ବୁଦି ତାକି କାଜା ଗିୟାଁ କିଦି; 4 ଅ଼ଡ଼େ ୱେଣ୍ତି ସମାନା ନୀନୁ ଏ଼ଦାଆଁ ପାରିଦି ଅ଼ଡ଼େ ଡ଼ୁଗାମାନି ଦ଼ନ ସମାନା ଏ଼ଦାଣି ନୀନୁ ପାରିଦି, 5 ଆତିହିଁ ନୀନୁ ପ୍ରବୁ କାତାତି ଆଜି ତେଲ୍‌ହିଦି ଅ଼ଡ଼େ ମାହାପୂରୁ କାତାତି ବୁଦି ବେଟାଆ଼ଦି। 6 ଇଚିହିଁ ପ୍ରବୁ ବୁଦି ହିୟାନେସି, ତାନି ଗୂତିଟି ତେଲ୍‌ହିନାୟି ଅ଼ଡ଼େ ବୁଦି ହ଼ନେ। 7 ଏ଼ୱାସି ସାତା ଲ଼କୁ ତାକି ବୁଦି କୂଡ଼ି କିନେସି, ଏ଼ୱାସି ସ଼ଜେ ଲ଼କୁତି ଆଡୁ ସମାନା ଆ଼ନେସି। 8 ଏ଼ନିକିହିଁ ଏ଼ୱାସି ନୀହାଁୟିତି ଜିରୁ ଗେଲ୍‌ପାଲି ଆ଼ଡିନେସି ଅ଼ଡ଼େ ତାନି ନାମୁଗାଟି ଲ଼କୁତି ଜିରୁ ଜାତ୍‌ନୁ କିନେସି।

9 ଏଚେଟିଏ ନୀନୁ ଦାର୍ମୁ, ନେହିଁ ବିଚାରା, ନୀହାଁୟି ଅ଼ଡ଼େ ନେହେଁତି ବାରେ ଜିରୁ ପୁଞ୍ଜି। 10 ଇଚିହିଁ ବୁଦି ନୀ ହିୟାଁତା ହ଼ଡ଼୍‌ନେ, ଇଞ୍ଜାଁ, ଜା଼ପ୍‌ନାୟି ନୀ ଜୀୱୁତି ରା଼ହାଁଗାଟାୟି ଆ଼ନେ; 11 ବୁଦିତି କାମାତି ପିୟାସା ନୀ ବୁଦି ଅ଼ଡ଼େ ତେଲ୍‌ହିନାୟି ନିଙ୍ଗେ ଗେଲ୍‌ପାନେ। 12 ଏ଼ଦି ଲାଗେଏ ଲ଼କୁ ଜିରୁଟି ଅ଼ଡ଼େ ଉଜେଏତି କାତା ଜ଼ଲିନି ଲ଼କୁ ତା଼ଣାଟି ଗେଲ୍‌ପାନେ, 13 ଆମିନିଗାଟାରି ଆନ୍ଦେରିଗାଟି ଜିରୁତା ତା଼କାଲି ତାକି ସଲ୍‌କେ ଜିରୁ ପିହ୍‌ନେରି, 14 ଆମିନିଗାଟାରି ଲାଗେଏତି କାମା କିହାଲି ରା଼ହାଁ ଆ଼ନେରି ଅ଼ଡ଼େ ଲାଗେଏତାରି ମା଼ନୱି ଆ଼ଆ ତା଼ଣା ମା଼ତୱି ଆ଼ନେରି; 15 ଆମିନିଗାଟାରି ତାମି ଜିରୁତା କୁଟୁ ଗାଟାରି ଅ଼ଡ଼େ ତାମି ଜିରୁତା ଏଟ୍‌କା ଜିରୁ ତା଼କିନେରି, ଇଲେତି ଲାଗେଏତି କାମା କିନାରି ଜିରୁଟି ନୀନୁ ଗେଲ୍‌ପି ଆ଼ଦି।

16 ଅ଼ଡ଼େ, ଏମିନି ଏଟ୍‌କା ଆୟାଟି* ସୁୱାଲା ହା଼ଡାଗାଟାୟି, ଆମ୍ବାଆୟି ତାନି ଡ଼ାଆ ବେ଼ଲାତି ତ଼ଡ଼ୁଇଁ* ପିସାହାଁ ତାନି ମାହାପୂରୁ ମେ଼ରା ବା଼ଣାଆ଼ନେ, 17 ଆମ୍ବାଆରି ଇଲୁ ହା଼କି ୱାକି 18 ଅ଼ଡ଼େ ଆମ୍ବାଆରି ଜିରୁ ହା଼କି ୱାକି ହାନେ, ଏମିନି ତା଼ଣା ହାଚିସାରେ ଆମ୍ବାଆସି ୱେଣ୍ତା ୱା଼ଅସି ଅ଼ଡ଼େ ଜୀୱୁତି ଜିରୁ ଆହ୍‌ଅସି, 19 ଇଲେତି ଏଟ୍‌କା ଆୟାଟି ତା଼ଣାଟି ନୀନୁ ଗେଲ୍‌ପି ଆ଼ଦି। 20 ଏ଼ଦାଆଁତାକି ନୀନୁ ସାତା ଲ଼କୁତି ଜିରୁତା ତା଼କାମୁ ଅ଼ଡ଼େ ଦାର୍ମୁ ଲ଼କୁତି ଜିରୁ ଆହ୍‌ମୁ, 21 ଇଚିହିଁ ସ଼ଜେତି ଲ଼କୁ ଦେ଼ସାତା ବାସା କିନେରି, ଇଞ୍ଜାଁ, ନିନ୍ଦା ହିଲାଆଗାଟାରି ଏମ୍ବାଆଁ ତୀରି ଡ଼ୟିନେରି। 22 ସାମା ଲାଗେଏତାରି ଦେ଼ସାଟି ନା଼ସା ଆ଼ନେରି ଅ଼ଡ଼େ ନା଼ଡ଼ିକିନାରି ଏମ୍ବାଟି ମେଣ୍‌ଙ୍ଗା ହାନେରି।