1 ଏ଼ନିକିଁ କାରା ବେ଼ଲାତା ମାଚୁ ଅ଼ଡ଼େ ତା଼ସା ବେ଼ଲାତା ପିୟୁ, ଏଲେକିଁ ବୁଦି ହିଲାଆ ଲ଼କୁକି ମା଼ନି ପା଼ଡ଼ା ଆ଼ଏ।

2 ଏ଼ନିକିଁ ଜେତା ପଟା ରେ଼ଜିମାନି ବେ଼ଲା ଅ଼ଡ଼େ ହୀଙ୍ଗାୟାଁ ଲେ଼ଡ଼ୁ ଊମ୍ବିମାନି ବେ଼ଲା କୁଗେଏ, ଏଲେକିଁ ଉଜେଉଜେଏ ହୀତି ବା଼କା ମୀ ତା଼ଣା ୱା଼ଏ।

3 ଗ଼ଡ଼ାୟାଁ ତାକି ସା଼ଟ୍‌ଣି; ଗା଼ଡ଼୍‌ଦେ ତାକି ବାକେରି, ଇଞ୍ଜାଁ ବୁଦି ହିଲାଆ ଲ଼କୁ ଜେ଼ନୁ ତାକି ବାଡ଼୍‌ଗା।

4 ବୁଦି ହିଲାଆ ଲ଼କୁଣି ତାନି ବୁଦି ହିଲାଆ ଲେହେଁ ୱେହ୍‌ଆଦୁ, ୱେସ୍ତି ସାରେ ମୀରୁ ଜିକେଏ ତାନି ସମାନା ଆ଼ଦେରି।

5 ବୁଦି ହିଲାଆ ଲ଼କୁଣି ତାନି ବୁଦି ହିଲାଆ ଲେହେଁ କାତା ଜ଼ଲାଦୁ, ଆ଼ଆତିହିଁ ଏ଼ୱାସି ଜାହାରା ନ଼କିତା ଜାହାରାଇଁ ବୁଦି ଗାଟାତେଏଁ ଇଞ୍ଜିଁ ଅଣ୍‌ପିନେସି।

6 ବୁଦି ହିଲାଆ ଲ଼କୁତି କେୟୁତା ଆମ୍ବାଆସି କାବ୍ରୁ ପାଣ୍ତିନେସି, ଏ଼ୱାସି ଜାହାରା ପାଃଆନା ଜାହାରାଏ ଦା଼ଚାହାଁ ଗା଼ହାଁ ଆ଼ହାଁ ବା଼ଦା ବେଟାଆ଼ନେସି।

7 ସଟାତି ପାଃଆନା ଏ଼ନିକିହିଁ ଦା଼ଙ୍ଗିନେ, ବୁଦି ହିଲାଆ ଲ଼କୁ ଗୂତିତା ଜା଼ପ୍‌ନି ବ଼ଲୁ ଏଲେକିଁ।

8 ୱିରିୱାଞ୍ଜାତା ୱାଲି ଦହ୍‌ନାୟି ଏ଼ନିକିଁ, ବୁଦି ହିଲାଆ ଲ଼କୁକି ମା଼ନି ଏଲେକିଁ।

9 ହ଼ଚିତି ଲ଼କୁ କେୟୁତା ଆସାମାନି ହା଼ପୁ ଏ଼ନିକିଁ, ବୁଦି ହିଲାଆ ଲ଼କୁତି ଗୂତିତା ସୁୱାଲା ବ଼ଲୁ ଏଲେକିହିଁ।

10 ବାଣ୍‌ମିୟାଁ ଏ଼ନିକିଁ ବାରେତି ରା଼ଣାରାକା କିନେସି, ଏଲେକିଁ ଏ଼ ଲ଼କୁ, ଆମ୍ବାଆସି ବୁଦି ହିଲାଆ ଲ଼କୁକି ଅ଼ଡ଼େ ଜିରୁତା ହାନି ଲ଼କୁକି କୂଲି ହୀନେସି।

11 ଜାହାରା ହୂପ୍‌କାମାନାଣି ତାକି ଏ଼ନିକିହିଁ ନେଃଉଡ଼ି ୱେଣ୍ତିନେ, ବୁଦି ହିଲାଆଗାଟାସି ୱେଣ୍ତେ ଜାହାରା କାମା କିନି ଲ଼କୁ ସମାନା।

12 ଆମ୍ବାଆସି ଜାହାରା ନ଼କିତା ବୁଦିଗାଟାସି, ଇଲେତି ଲ଼କୁଣି ମେସିମାଞ୍ଜି କି ? ତାନି କିହାଁ ବୁଦି ହିଲାଆ ଲ଼କୁ ତା଼ଣା ହା଼ରେକା ବା଼ର୍ସୁ ମାନେ।

13 ନିସ୍ତା ଗାଟାସି ଏଲେଇନେସି, ଜିରୁତା ସିହଁ କା଼ଃନି ମାନେ, ଜିରୁତା ସିହଁ କା଼ଃନି ମାନେ।

14 ଏ଼ନିକିହିଁ ବନ୍ଦ୍‌ଣି ତଲେ ଦା଼ରା ତୀର୍‌ୱିନେ, ଏଲେକିହିଁ ନିସ୍ତା ଗାଟାସି ଜାହାରା ପା଼ସ୍‌ପନିତା ମାଞ୍ଜାହାଁ ତୀର୍‌ୱିନେସି।

15 ନିସ୍ତା ଲ଼କୁ ସାଡ଼୍‌ୱାତା କେୟୁ ଦଚାହାଁ ଅ଼ର ଦେବା ତାନି ଗୂତିତା ଅ଼ହାଲି ୱା଼ହିନେସି।

16 ସା଼ତା ଜା଼ଣା ନେହିଁ କାତା ୱେହ୍‌ନି କିହାଁ ନିସ୍ତାଗାଟି ଲ଼କୁ ଜାହାରା ନ଼କିତା ବୁଦି ଗାଟାସି।

17 ଏମିନି ଲ଼କୁ ଜିରୁତା ହାଜି ହାଜିହିଁ ଜାହାରା ପୁନାଆତି ଲ଼କୁ ଗଡ଼୍‌ହାତା କାର୍‌ବି ଆ଼ନେସି, ଏ଼ୱାସି ନେଃଉଡ଼ି କିର୍ୟୁଁ ଆହ୍‌ନି ଲ଼କୁ ଲେହେଁତାସି।

18 ହିଚୁ ଡ଼ୀଞ୍ଜିତି ୱେଲୁ ଅ଼ଡ଼େ ହା଼କି ମେତ୍‌ନି ବାୟା ଏ଼ନିକିଁ; 19 ଆମ୍ବାଆସି ଜାହାରା ପା଼ଡ଼ିତି ଲ଼କୁଇଁ ନା଼ଡ଼ିକିହାଁ ୱେହ୍‌ନେସି ନା଼ନୁ କିଜୱି କିହିହିଲଅଁ, ଏ଼ୱାସି ଏଲେତାସି।

20 ୱେସ୍‌କା ରା଼ତିସାରେ ହିଚୁ ଡୁମ୍ବିନେ, ସାକ୍ରି ହିଲାଆସାରେ ଲା଼ଗ୍‌ୱି ଆ଼ନାୟି ରା଼ନେ।

21 ଏ଼ନିକିଁ ଡ଼ୀଞ୍ଜିମାନି ରୀଙ୍ଗାୟାଁ ତାକି ରୀଙ୍ଗାୟାଁ ଅ଼ଡ଼େ ହିଚୁତାକି ୱେସ୍‌କା, ଏଲେକିଁ ଗଡ଼୍‌ହା ପାଡି କିହାଲି ଗଡ଼୍‌ହା କିୱିକିନି ଲ଼କୁ।

22 ସାକ୍ରି କାତା ଜ଼ଲିନାରା ବ଼ଲୁ ହା଼ରେକା ହେତାୟି, ଏ଼ଦି ହିୟାଁ ବିତ୍ରା ହ଼ଡାହାନେ।

23 ଗୂତିତି ଡ଼ାକ୍‌ହି କାତା ଅ଼ଡ଼େ ହିୟାଁତି ଲାଗେଏ ଅଣ୍‌ପୁ ଏ଼ନିକିଁ, ଇର୍‌ଆ ସାଡ଼୍‌ୱାତା ୱେଣ୍ତି ୱା଼ରିକିତି ସମାନା।

24 ଅ଼ପାଆଗାଟାସି ଜାହାରା ଗୂତିତା କୁଟୁ କାତା ଜ଼ଲିନେସି, ସାମା ମ଼ନତା ନା଼ଡ଼ି କିନାଣି ଇଟିନେସି। 25 ଏ଼ୱାସି ହେନି ହା଼ଡା ତଲେ ୱେସ୍ତାସାରେ, ଏ଼ୱାଣାଇଁ ନାମାଆଦୁ, ଇଚିହିଁ ତାନି ହିୟାଁତା ସା଼ତାଗଟା ଅ଼ପାଆଗାଟି କାତା ମାନେ। 26 ତାନି ଅ଼ପାଆଗାଟି କୁଟୁ ତଲେ ଜାହାରାଇଁ ପ୍ଡିକ୍‌ହିଁ ଜିକେଏ ତାନି ଲାଗେଏତାୟି ବାରେତି ନ଼କିତା ୱେ଼ପ୍‌କି ଆ଼ନେ।

27 ଆମ୍ବାଆସି ଗା଼ଡ଼୍‌ୟୁ କା଼ର୍‌ନେସି, ଏ଼ୱାସି ତାନି ବିତ୍ରା ରିନେସି; ଇଞ୍ଜାଁ, ଆମ୍ବାଆସି ୱାଲି ଊସି କିନେସି, ଏ଼ଦି ୱେଣ୍ତିସାରେ ତାନି ଲାକଏ ରିନେ।

28 ମିଚିଗାଟି ୱେନ୍ଦରି ଆମ୍ବାଆରାଇଁ ନା଼ସା କିନେ, ଏ଼ୱାଣାଇଁ ଅ଼ପେଏ; ଇଞ୍ଜାଁ, ସାକ୍ରି ଜ଼ଲିନି ଗୂତି କୁଡ଼୍‌ପୁନା଼ସା କିନେ।