1 ହା଼ରେକା ଦ଼ନ କିହାଁ ନେହେଁ ଦ଼ରୁ ୱେ଼ଙ୍ଗିନାୟି ପା଼ଡ଼ା ଆ଼ନେ, ଇଞ୍ଜାଁ ୱେଣ୍ତି ଅ଼ଡ଼େ ବାଂଗାରା କିହାଁ ଜୀୱୁ ନ଼ନି କାର୍ମା ମେହ୍‌ନାୟି ନେହେଁ।

2 ବାତ୍‌କିତାସି ଅ଼ଡ଼େ କା଼କୁଲିଗାଟାସି ରହେଁଏ ଆଣ୍ତ୍‌ୱି ଆ଼ନେରି; ପ୍ରବୁ ଏ଼ ବାରେତି ଗା଼ଡ଼ିକିତାସି।

3 ସୁତର ଲ଼କୁ ବା଼ଦା ମେସାହାଁ ଜାହାରାଇଁ ଡ଼ୁକ୍‌ନେସି; ସାମା ତେଲ୍‌ହାଆଗାଟି ଲ଼କୁ ନ଼କିତା ଆ଼ହାଁ ସା଼ସ୍ତି ବେଟାଆ଼ନେରି।

4 ସ଼ଜେତି ଅ଼ଡ଼େ ପ୍ରବୁତି ଆଜିନି କାତାତି ଦା଼ନା, ଦ଼ନ, ମା଼ନି, ଅ଼ଡ଼େ ଜୀୱୁ।

5 ଆଡେୟି ଜ଼ଲିନି ଲ଼କୁତି ଜିରୁତା ହା଼ପ୍‌କା ଅ଼ଡ଼େ ପା଼ନ୍ଦା ଡ଼ୟିନେ; ଆମ୍ବାଆସି ତାନି ଜୀୱୁ ଗେଲ୍‌ପିନେସି, ଏ଼ୱାସି ଏ଼ ବାରେ ତା଼ଣାଟି ହେକ ଡ଼ୟିନେସି।

6 କକାଣାଇଁ ତାନି ନେହିଁ ଜିରୁତା ଏ଼ୱାଣାଇଁ ଜା଼ପ୍‌ଦୁ; ଆ଼ତିହିଁ ଏ଼ୱାସି ବୁଡ଼୍‌ହା ଆ଼ତିଜିକେଏ ଏମ୍ବାଟି ଏଟ୍‌କା ଆ଼ଅସି।

7 ବାତ୍‌କିତାସି କା଼କୁଲିଗାଟାଣି ମୁହେଁ ସା଼ଲୱି କିନେସି, ଇଞ୍ଜାଁ ରୀଣା ଗାଟାସି ରୀଣା ହୀନାଣି ହ଼ଲେଏସି ଆ଼ନେସି।

8 ଆମ୍ବାଆସି ଦାର୍ମୁ ହିଲାଆ ବିଚା ମାଟିନେସି, ଏ଼ୱାସି ବା଼ଦାତି ଆର୍ନା ଦା଼ଃନେସି ଅ଼ଡ଼େ ତାନି କ଼ପାଗାଟି ବାଡ଼୍‌ଗା ଡୀହାହାନେ।

9 ଆମ୍ବାଆରି କାର୍ମା ମେହ୍‌ନାୟି ମାନେ, ଏ଼ୱାସି ବ଼ର ବେଟାଆ଼ନେସି; ଇଚିହିଁ ଏ଼ୱାସି ତାନି ରା଼ନ୍ଦା କାର୍ମା କା଼କୁଲି ଗାଟାରାକି ହା଼ସ୍‌ପିନେସି।

10 ନିନ୍ଦା କିନାଣାଇଁ ପେ଼ର୍‌ହା ତୁହ୍‌ଦୁ, ଏଚେଟିଏ ଗଡ଼୍‌ହା ହ଼ଚା ହାନେ; ଇଞ୍ଜାଁ, ବା଼ଦି ବା଼ଦା ଅ଼ଡ଼େ ଲାଜା ଡୂଙ୍ଗିନେ।

11 ଆମିନି ଲ଼କୁ ହିୟାଁତି ସୁଦୁତା ଜୀୱୁ ନ଼ନେସି, ଆମ୍ବାଆରି ଗୂତିତି ହା଼ଡା ସୁୱାଲା, ରାଜା ଏ଼ୱାଣି ତ଼ଣେ ଆ଼ନେସି।

12 ପ୍ରବୁତି କାନୁ ବୁଦି ବେଟାଆ଼ତି ଲ଼କୁଇଁ ଗେଲ୍‌ପିନେ; ସାମା ନା଼ଡ଼ିକିନି ଲ଼କୁତି କାତା ଏ଼ୱାସି ତିରିମ୍ଣିପ୍‌ନେସି।

13 ନିସ୍ତାଗାଟାସି ଏଲେଇନେସି, ପାଙ୍ଗାତା ସିହଁ କ୍ଡାଃନି ମାନେ; ନା଼ନୁ ଜିରୁତା ହା଼ଇଁ।

14 ଦା଼ରେଣି ତଲେ କୂଡ଼ିନାୟି କୂଡ଼୍‌ହି ଗା଼ଡ଼୍‌ୟୁ, ଆମ୍ବାଆରାଇଁ ପ୍ରବୁ ଅ଼ପଅସି ଏ଼ ଲ଼କୁ ଏମ୍ବାଆଁ ରିନେସି।

15 କକାଣି ମ଼ନତା ବୁଦି ଡ଼ୟେଏ, ଇଞ୍ଜାଁ ସା଼ସ୍ତିତି ବାଡ଼୍‌ଗା ଏ଼ଦାଆଁ ହ଼ପ୍‌ହାଁ ଏ଼ୱାଣି ତା଼ଣାଟି ହେକ କିନେ।

16 ଏମିନି ଲ଼କୁ ଜାହାରା ବାତ୍‌କୁ ଗାଡୁ କିହାଲି କା଼କୁଲି ଲ଼କୁଇଁ ଦୂହିନେସି; ଇଞ୍ଜାଁ, ଆମ୍ବାଆସି ବାତ୍‌କିତି ଲ଼କୁକି ଦା଼ନା ହୀନେସି, ଏ଼ୱାଣାକି ବାରେ ଊଣା ଆ଼ନେ।

17 ନୀନୁ ନୀ କିର୍ୟୁଁ ଅଡାହାଁ ବୁଦିଗାଟାରି କାତା ୱେନାମୁ; ଇଞ୍ଜାଁ, ନା଼ ଜା଼ପ୍‌ନି କାତାତା ନୀ ମ଼ନ ହୀମୁ। 18 ଇଚିହିଁ ନୀନୁ ଏ଼ଦାଆଁ ହିୟାଁତା ଇଟିସାରେ ଅ଼ଡ଼େ ନୀ ଗୂତି ତଲେ ଏ଼ୱାଆଁ ରହେଁଏ କୂଡ଼ି କିତିସାରେ, ରା଼ହାଁ ଆ଼ଦି। 19 ପ୍ରବୁ ତା଼ଣା ଏ଼ନିକିଁ ମୀ ବା଼ର୍ସୁ ଡ଼ୟିନେ, ଏ଼ଦାଆଁତାକି ନା଼ନୁ ନୀଞ୍ଜୁ ନିଙ୍ଗେ ଈ କାତା ୱେସ୍ତାତେଏଁ। 20 ନା଼ନୁ ନୀ ତାକି କଡ଼େ ଦସଗାଟା ବୁଦି କାତା ରା଼ଚିତେଏଁ, ଇମ୍ବାଆଁ ନେହେଁ ତେଲ୍‌ହିନାୟି ଅ଼ଡ଼େ ବୁଦି ନେଞ୍ଜାମାନେ। 21 ନୀନୁ ଏ଼ନିକିଁ ଏ଼ୱାରାଇଁ ସାତା ୱେସାଲି ଆ଼ଡିଦି, ଏ଼ଦାଆଁତାକି ନା଼ନୁ ଏ଼ନାଆଁ ନୀ ତାକି ତୀର୍‌ପୁ ତଲେ ଅ଼ଡ଼େ ଜା଼ପ୍‌ନି ତା଼ଣା କାଜା କାତା ରା଼ଚା ହିଲଅଁ ?

22 କା଼କୁଲିଗାଟାରାଇଁ କା଼କୁଲିଗାଟାରି ପୁଞ୍ଜାହାଁ ତାନି ଦିଣ୍‌ସୁ ଦୂହାଆନି, ଇଞ୍ଜାଁ ଗା଼ଡ଼ା ଦୁୱେରିତା ଦୁକୁ ଗାଟାରାଇଁ ଦୂହାଆନି। 23 ଇଚିହିଁ ପ୍ରବୁ ଏ଼ୱାରି ୱାକିଟି ଦାୱା କିନେସି, ଇଞ୍ଜାଁ ଏମିନି ଗାଟାରି ଏ଼ୱାରି ଦିଣ୍‌ସୁ ମୀଞ୍ଜିନେରି, ଏ଼ୱାସି ଏ଼ୱାରି ଜୀୱୁ ମୀଞ୍ଜିନେସି।

24 କାର୍‌ବିଗାଟି ଲ଼କୁ ତଲେ ତ଼ଣେ ଆ଼ଆଦୁ, ଇଞ୍ଜାଁ କାର୍‌ବି ଲ଼କୁ ତଲେ ତା଼କାଆଦୁ; 25 ଏଲେ କିତିସାରେ, ନୀନୁ ଜିକେଏ ତାନି ଜିରୁ ଜା଼ପାହାଁ ନୀ ଜୀୱୁ ତାକି ପା଼ନ୍ଦା ତିୟାରା କିଦି।

26 ଏ଼ୱାରି ବିତ୍ରା ନୀନୁ ରଅତି ଆ଼ଆନି, ଏମିନି ଗାଟାରି କେୟୁତା କେୟୁ ବା଼ଦୁ ୱେ଼ନେରି ଆ଼ଆତିଁ ରୀଣାଗାଟାଣି ଦା଼ୟି ଆ଼ନେରି। 27 ଏଚେ଼ତା ୱେଟ୍‌ହାଲି ନିଙ୍ଗେ ଏ଼ନାୟି ହିଲେଏ, ଆତିହିଁ ଏ଼ୱାସି ଏ଼ନାଆଁତାକି ନୀ ଡ଼଼ଇତି ନୀ ପା଼ସ୍‌ପନି ଅ଼ନେସି ?

28 ମୀ ଆକୁ ଆ଼ବାୟାଁ ଏମିନି ପ୍ଣାଃଇ ହାନ୍ଦି ଇଟା ମାନେରି, ଏ଼ଦାଆଁ ଗୁଚି କିଆଦୁ।

29 ନୀନୁ କି ଏ଼ନି ଲ଼କୁଇଁ ତାନି ବେ଼ବାରାତା ତାନ୍ଦ୍‌ରା ଆ଼ନାଣି ମେସିମାଞ୍ଜି ? ଏ଼ୱାସି ରାଜାୟାଁ ନ଼କିତା ନିନେସି। ଏ଼ୱାସି ହୀଣି ଲ଼କୁ ନ଼କିତା ନିଅସି।