1 ଏମିନି କା଼କୁଲିଗାଟି ଲ଼କୁ ସ଼ଜେ ତଲେ ଡ଼ୟିନେସି, ଏ଼ୱାସି କୁଟୁ ଗୂତି ଅ଼ଡ଼େ ବୁଦି ହିଲାଆ ଲ଼କୁ କିହାଁ ନେହେଁ।

2 ମାଣ୍‌ସି ବୁଦି ହିଲାଆଗାଟାସି ଆ଼ହାଁ ଡ଼ୟିନାୟି ନେହେଁ ଆ଼ଏ; ଇଞ୍ଜାଁ ଆମ୍ବାଆସି ପା଼ୱୁଲି ଦାଗାକିହିଁ ମେତ୍‌ନେସି, ଏ଼ୱାସି ପା଼ପୁ କିନେସି।

3 ମାଣ୍‌ସିତି ବୁଦି ହିଲାଆଗାଟାୟି ତାନି ଜିରୁ ତିରିମ୍ଣପ୍‌ନେ, ଇଞ୍ଜାଁ ତାନି ମ଼ନ ପ୍ରବୁ କ଼ପା ତଲେ କାର୍‌ବି ଆ଼ନେ।

4 ବାତ୍‌କୁ ହା଼ରେକା ତ଼ଣେସିଙ୍ଗା ଲା଼ବା କିନେ; ସାମା କା଼କୁଲିଗାଟାସି ତାନି ତ଼ଣେ ଲ଼କୁ ତା଼ଣାଟି ଏଟ୍‌କା ଆ଼ନେସି।

5 ମିଚି ସା଼କି ଡଣ୍ତ ବେଟାଆ଼ନେସି; ଇଞ୍ଜାଁ, ମିଚି ଜ଼ଲିନାସି ଗେଲ୍‌ପି ଆ଼ଅସି।

6 ହା଼ରେକା ଲ଼କୁ ର଼ ସା଼ୟେମି କିନାଣି ତା଼ଣାଟି କାର୍ମା ବେଟାଆ଼ହାଲି ଆ଼ସା କିନେରି, ଇଞ୍ଜାଁ ବାରେ ଜା଼ଣା ଦା଼ନାହୀନି ଲ଼କୁତି ତ଼ଣେ ଆ଼ନେରି।

7 କା଼କୁଲି ଗାଟାଣି ବାରେ ତାୟିୟାଁ ଏ଼ୱାଣାଇଁ ଅ଼ପଅରି; ତାନି ତ଼ଣେସିଙ୍ଗା ତାନି ତା଼ଣାଟି ଏଚେକା ହା଼ରେକା ହେକ ହାଲଅରି! ଏ଼ୱାସି କାତା ଆ଼ହାଲି ଅଣ୍‌ପିନେସି, ସାମା ଏ଼ୱାରି ହିଲଅରି।

8 ଏମିନି ଲ଼କୁ ବୁଦି ଲା଼ବା କିନେସି, ଏ଼ୱାସି ତାନି ଜୀୱୁତି ଜୀୱୁ ନ଼ନେସି; ଆମ୍ବାଆସି ତେଲ୍‌ହିନାଣି ଗେଲ୍‌ପିନେସି, ଏ଼ୱାଣି ନେହେଁ ଆ଼ନେ।

9 ମିଚି ସା଼କି ଡଣ୍ତ ବେଟାଆ଼ନେସି; ଇଞ୍ଜାଁ, ମିଚି ଜ଼ଲିନାସି ଗେଲ୍‌ପି ଆ଼ଅସି।

10 ବୁଦି ହିଲାଆ ଗାଟାଣାକି ସୁକୁ ପା଼ଡ଼ା ଆ଼ଏ; ସା଼ଲୱି କିନାରି ମୁହେଁ ହ଼ଲେଏସି ରା଼ଜି କିନାୟି ଗାଡିତାକି ପା଼ଡ଼ା ଆ଼ଏ।

11 ମାଣ୍‌ସିତି ନେହିଁ ବୁଦି ଏ଼ୱାଣାଇଁ କାର୍‌ବି ଆ଼ନି ତା଼ଣାଟି ଊଣା କିନେ; ଇଞ୍ଜାଁ, ଦ଼ହତି ପିହ୍‌ନାୟି ତାନି ଗା଼ୱୁରମି।

12 ରାଜାତି କ଼ପା ସିହଁତି ଗାର୍ଜିନି ସମାନା; ସାମା ତାନି କାର୍ମା ମେହ୍‌ନାୟି ଗାର୍କି ଲାକ ମାନି ମାଚୁ ସମାନା।

13 ବୁଦି ହିଲାଆ ମୀର୍‌ଏସି ତାଞ୍ଜିତି ଦୁକୁଗାଟାସି; ଇଞ୍ଜାଁ, ଗଡ଼୍‌ହାଗାଟି ଡକ୍ରି କା଼ଲେଏ ତେ଼ପରିଟି ରୀନି ଏ଼ୟୁ ବନ୍ଦା ଲେହେଁ।

14 ଇଲୁ ଅ଼ଡ଼େ ବାତ୍‌କୁ ତାଲି ତାଞ୍ଜି ତା଼ଣାଟି ବେଟାଆ଼ନି ଅଦିକାରା; ସାମା ବୁଦିଗାଟି ଡକ୍ରି ପ୍ରବୁ ତା଼ଣାଟି ବେଟାଆ଼ନାୟି।

15 ନିସ୍ତା ହା଼ରେକା ଇଦା କିୱିକିନେ; ଇଞ୍ଜାଁ, ନିସ୍ତା ତଲେ କାମା କିନାସି ହାକି ଆ଼ନେସି।

16 ମାହାପୂରୁତି ହୁକୁମି ମା଼ନୱି ଆ଼ନାସି ତାନି ଜୀୱୁ ଗେଲ୍‌ପିନେସି; ସାମା ଆମ୍ବାଆସି ତାନି ଜିରୁତା ଜାଗ୍ରାତା ଆ଼ଅସି, ଏ଼ୱାସି ହା଼ନେସି।

17 ଆମ୍ବାଆସି କା଼କୁଲିଗାଟାରାଇଁ କାର୍ମା ମେହ୍‌ନେସି, ଏ଼ୱାସି ପ୍ରବୁକି ୱାଡି ହୀନେସି; ଇଞ୍ଜାଁ, ଏ଼ୱାସି ତାନି ନେହେଁ କାମାତି ୱେଟ୍‌ନେସି।

18 ଜାହାରା ମୀର୍‌ଏଣାଇଁ ସା଼ଲୱି କିଦୁ, ଇଚିହିଁ ବା଼ର୍ସୁ ମାନେ; ସାମା ମୀ ମ଼ନ ତାନି ନା଼ସା କିନାଣି ମ଼ନ କିଆପେ।

19 ହା଼ରେକା କାର୍‌ବି ଲ଼କୁ ସା଼ସ୍ତି ବେଟାଆ଼ନେସି, ଇଚିହିଁ ନୀନୁ ଏ଼ୱାଣାଇଁ ର଼ ଦେବା ଗେଲ୍‌ପିସାରେ, ଏ଼ଦାଆଁ ନିଙ୍ଗେ ୱେଣ୍ତେ କିହାଲି ଆ଼ନେ।

20 ଡା଼ୟୁ ନୀନୁ ଏ଼ନିକିଁ ବୁଦିଗାଟାତି ଆ଼ଦି, ଏ଼ଦାଆଁତାକି କାତା ୱେନାମୁ ଅ଼ଡ଼େ ଜା଼ପ୍‌ନାଣି ଆବାକଡାମୁ।

21 ମାଣ୍‌ସିତି ମ଼ନତା ହା଼ରେକା ଅଣ୍‌ପୁ ମାନେ, ସାମା ପ୍ରବୁତି ଅଣ୍‌ପୁ ତୀରି ଆ଼ନେ।

22 ମାଣ୍‌ସିତି ଇଚା ତାନି କାର୍ମା ମେହ୍‌ନି ଗୂଣୁ ଅ଼ଡ଼େ ମିଚି ଲ଼କୁ କିହାଁ କା଼କୁଲିଗାଟି ଲ଼କୁ କାଜାସି।

23 ପ୍ରବୁତି କାତା ଆଜିନାୟି ଜୀୱୁ ବେଟାଆ଼ନାୟି, ଏ଼ଦି ଏମିନି ଲ଼କୁ ତା଼ଣା ମାନେ, ଏ଼ୱାସି ରା଼ହାଁଟି ବାସା କିନେସି; ଏ଼ନି ବା଼ଦା ତାନି ଦାରିଟି ହାଲେଏ।

24 ନିସ୍ତା ଗାଟାସି ଜାହାରା ମାଣ୍ତିତା କେୟୁ ଦତିସାରେ, ଅ଼ଡ଼େ ୱେଣ୍ତେ ଏ଼ଦାଆଁ ତାନି ଗୂତିତା ଅୟାଲି ଜିକେଏ ମ଼ନ କିଅସି।

25 ନିନ୍ଦାଗାଟାଣାଇଁ ୱେ଼ତିସାରେ, ବୁଦି ହିଲାଆ ଲ଼କୁ ଜାଗ୍ରାତା ଆ଼ନାଣି ଜା଼ପିନେସି; ସାମା, ତେଲ୍‌ହିନି ଲ଼କୁଇଁ ଦାକା ହୀତିସାରେ, ଏ଼ୱାସି ବୁଦି ବେଟାଆ଼ନେସି।

26 ଆମିନି ମୀର୍‌ଏସି ଜାହାରା ତାଞ୍ଜିତି ଦ଼ନ ନା଼ସା କିନେସି, ଇଞ୍ଜାଁ ଜାହାରା ତାଲିନି ଇଲୁଟି ପେର୍‌ହା ପାଣ୍ତିନେସି, ଏ଼ୱାସି ହୀଣି ଅ଼ଡ଼େ ଲାଜା ଗାଟାସି।

27 ହେ଼ ନା଼ ମୀର୍‌ଏଣା, ଏମିନି ୱେହ୍‌ନାୟି ବୁଦିତି କାତାଟି ନିଙ୍ଗେ ନା଼ଡ଼ି କିୟାନେ, ଏ଼ଦାଆଁ ୱେନାଆନି।

28 ଲାଗେଏତି ସା଼କି ସମାନା ବିଚାରାତି ନିନ୍ଦା କିନେସି ଲାଗେଏ ଲ଼କୁତି ଗୂତି ଦାର୍ମୁ ହିଲାଆ କାତା ଜ଼ଲିନେ।

29 ନିନ୍ଦାଗାଟାରି ତାକି ଡଣ୍ତ ଅ଼ଡ଼େ ବୁଦି ହିଲାଆଗାଟାରି ଜେ଼ନୁ ତାକି ମା଼ଡା ତିୟାରା ଆ଼ହାମାନେ।