Provérbios 2

ବୁଦିତି ଦା଼ନା

1 ହେ଼ ନା଼ ମୀର୍‌ଏଣା, ନୀନୁ ଜଦି ନା଼ କାତା ଆହ୍‌ଦି ଅ଼ଡ଼େ ନା଼ ହୁକୁମି ବାରେ ମ଼ନତା ଇଟିଦି; 2 ଜଦି ବୁଦି ୱାକି ନୀ କିର୍ୟୁଁ ଅଡିଦି ଅ଼ଡ଼େ ତେଲ୍‌ହିନି ତା଼ଣା ନୀ ମ଼ନ ହୀଦି; 3 ହାଅ, ନୀନୁ ନେହେଁ ଅଣ୍‌ପୁତି ହା଼ଟିଦି ଅ଼ଡ଼େ ବୁଦି ତାକି କାଜା ଗିୟାଁ କିଦି; 4 ଅ଼ଡ଼େ ୱେଣ୍ତି ସମାନା ନୀନୁ ଏ଼ଦାଆଁ ପାରିଦି ଅ଼ଡ଼େ ଡ଼ୁଗାମାନି ଦ଼ନ ସମାନା ଏ଼ଦାଣି ନୀନୁ ପାରିଦି, 5 ଆତିହିଁ ନୀନୁ ପ୍ରବୁ କାତାତି ଆଜି ତେଲ୍‌ହିଦି ଅ଼ଡ଼େ ମାହାପୂରୁ କାତାତି ବୁଦି ବେଟାଆ଼ଦି। 6 ଇଚିହିଁ ପ୍ରବୁ ବୁଦି ହିୟାନେସି, ତାନି ଗୂତିଟି ତେଲ୍‌ହିନାୟି ଅ଼ଡ଼େ ବୁଦି ହ଼ନେ।