1 ନୀନୁ ୱିଏତି କାତାତା ବଡପଣ ଆ଼ହିଁ ଜ଼ଲାଆନି; ଇଚିହିଁ ର଼ ଦିନା ଏ଼ନାଆଁ ଆ଼ନେ, ଏ଼ଦାଆଁ ନୀନୁ ପୁଞ୍ଜା ହିଲଅତି।

2 ଏଟ୍‌କାତି ଲ଼କୁ ନୀ ଗା଼ୱୁରମି କିପେସି, ସାମା ନୀ ଜାହାରା ଗୂତି ଏ଼ଦାଆଁ କିଆପେ; ଏଟ୍‌କାତି ଲ଼କୁ କିପେସି, ସାମା ନୀ ଜାହାରା ଗୂତି ଏ଼ଦାଆଁ କିଆପେ।

3 ୱାଲି ଅ଼ଡ଼େ ବାଃଲି ବ଼ଜୁ; ସାମା ବୁଦି ହିଲାଆ ଲ଼କୁତି କାର୍‌ବି, ଏ଼ୱାସି ରିଣ୍ତାଆଁ କିହାଁ ବ଼ଜୁଗାଟାସି।

4 କ଼ପା କାର୍ମା ମେହ୍‌ଆ ଗାଟାୟି ଅ଼ଡ଼େ କାର୍‌ବି ବାରେ ନା଼ସା କିନାୟି; ସାମା ଈର୍ସା ନ଼କିତା ଆମ୍ବାଆସି ନିଚାଲି ଆ଼ଡିନେସି ?

5 ଡ଼ୁକ୍‌ହାଁ ଜୀୱୁ ନ଼ନି କିହାଁ ପାଙ୍ଗା ୱେ଼ଙ୍ଗେ ଲା଼ଗିନାୟି ନେହେଁ।

6 ଜୀୱୁ ନ଼ନାସି ଗା଼ହାଁ କିୟାତି ଜିକେଏ ବା଼ର୍ସୁ ମାନେ; ସାମା ସାତ୍ରୁତି ନଣ୍ତିନାୟି କୁଟୁଗାଟାୟି।

7 ପାଞ୍ଜିତି ଲ଼କୁ କିର୍‌ୟାଁ ତିଞ୍ଜାଲି ଅ଼ପଅସି; ସାମା ହାକି ଗାଟାଣାକି କାମ୍ବେଲି ଦିଣ୍‌ସୁ ବାରେ ହେନେ।

8 ଏମିନି ଲ଼କୁ ଜାହାରା ଟା଼ୟୁ ପିସାହାଁ ରେ଼ନେସି, ଏ଼ୱାସି ବ଼ଣଟି ଊମ୍ବିହିଁ ରେ଼ନି ପଟା ଲେହେଁତାସି।

9 ନିୟୁଁ ଅ଼ଡ଼େ ନେହିଁ ଗାନ୍ଦା ଦୁପ୍‌ଣି ମ଼ନତି ରା଼ହାଁ କିନେ, ଏଲେକିହିଁ ତ଼ଣେତି ମ଼ନତା ହ଼ଚିମାନି ସୁୱାଲା ହା଼ଡା ନେହେଁ।

10 ଜାହାରା ତ଼ଣେଇଁ ଅ଼ଡ଼େ ତାଞ୍ଜିତି ତ଼ଣେଇଁ ପିହ୍‌ଆନି; ଇଞ୍ଜାଁ, ମୀ କସ୍ତ ଦିନାତା ଜାହାରା ତାୟି ଇଜ ହାଲାଆନି; ହେକ ମାନି ତାୟି କିହାଁ ଡାଗେ ମାନି ପା଼ଡ଼ିତି ଲ଼କୁ ନେହେଁ।

11 ହେ଼ ନା଼ ମୀର୍‌ଏଣା, ବୁଦି ଗାଟାତି ଆ଼ମୁ ଅ଼ଡ଼େ ନା଼ ମ଼ନତି ରା଼ହାଁ କିୟାମୁ; ଏଚେଟିଏ ନା଼ନୁ ନାଙ୍ଗେ ନିନ୍ଦା କିୟାନାଣାଇଁ ୱେସାଲି ଆ଼ଡିଇଁ।

12 ସୁତର ଲ଼କୁ କସ୍ତ ମେସାହାଁ ଜାହାରାଇଁ ଡ଼ୁଗିନେସି; ସାମା ଜାଗ୍ରାତା ଆ଼ଆଗାଟି ଲ଼କୁ ନ଼କିତା ହାଜାହାଁ ସା଼ସ୍ତି ବେଟାଆ଼ନେସି।

13 ପୁନାଆତି ଲ଼କୁ ତାକି ଆମ୍ବାଆସି ଦା଼ୟି ଆ଼ନେସି, ତାନି ବାସ୍ତେରି ଅ଼ଦୁ; ଇଞ୍ଜାଁ, ଆମ୍ବାଆସି ଏଟ୍‌କା ଆୟାନି ତାକି ଜାମ୍‌ଲି ଆ଼ନେସି, ଏ଼ୱାଣାଇଁ ବାନ୍ଦେ ଇଟାଦୁ।

14 ଏମିନି ଲ଼କୁ ଲା଼ଇ ଲା଼ଇସିଏ ନିଙ୍ଗାହାଁ ଜାହାରା ତ଼ଣେଇଁ କାଜା ଗିୟାଁ ତଲେ ଜହରା କିନେସି, ଏ଼ୱାଣି ଏ଼ କାମା ଏ଼ୱାଣାକି ବା଼କା ସମାନା ଆ଼ନେ।

15 ହା଼ରେକା ପିୟୁ ଦିନାତା ଡୂଙ୍ଗାଆ ରେ଼ଟୁ ବନ୍ଦା ରିନାୟି ଅ଼ଡ଼େ ଗଡ଼୍‌ହାଗାଟି ଆୟା, ଏ଼ ରିଣ୍ତି ରଣ୍ତିଏ ସମାନା। 16 ଆମ୍ବାଆସି ଏ଼ଦାନି ଆ଼ଙ୍ଗିନେସି, ଏ଼ୱାସି ଗା଼ଲିତି ଆ଼ଙ୍ଗିନେସି ଅ଼ଡ଼େ ତାନି ନିୟୁଁଗାଟି କେୟୁ ତଲେ ଆହ୍‌ନି ସମାନା ଆ଼ନେସି।

17 ଏ଼ନିକିଁ ଲ଼ହ ଲ଼ହତି ୱାସ୍‌ପି କିନେ, ଏଲେକିହିଁ ମାଣ୍‌ସି ଜାହାରା ତ଼ଣେତି ମୂମ୍ବୁ ପାର୍‌ସାଡ଼ା କିନେସି।

18 ଆମ୍ବାଆସି ତ଼ୟା ମା଼ର୍‌ନୁ ସେ଼ବା କିନେସି, ଏ଼ୱାସି ଏମ୍ବାତି ପା଼ଡ଼େୟି ତିନେସି; ଇଞ୍ଜାଁ, ଆମ୍ବାଆସି ଜାହାରା ସା଼ୱୁକାରି କାତା ମା଼ନୱି ଆ଼ନେସି, ଏ଼ୱାସି ମା଼ନି ବେଟାଆ଼ନେସି।

19 ଏ଼ନିକିଁ ଏ଼ୟୁ ମୂମ୍ବୁତି ୱା଼ଣା ତ଼ହ୍‌ନେ, ଏଲେକିଁ ମାଣ୍‌ସିତି ହିୟାଁ ମାଣ୍‌ସିଇଁ ତ଼ହ୍‌ନେ।

20 ଏ଼ନିକିହିଁ ତା଼ଡ଼େପୂରୁ ଅ଼ଡ଼େ ନା଼ସାଆ଼ନି ଟା଼ୟୁ ଏଚେଲା ଜିକେଏ ପାଞ୍ଜେଏ, ଏଲେକିଁ ମାଣ୍‌ସିତି ବାରେ କାନୁ ଏଚେଲା ଜିକେଏ ପାଞ୍ଜେଏ।

21 ହିଚୁ ଗ଼ରାତା ବାଂଗାରା ଅ଼ଡ଼େ କୟିତା*27:21 କୟି/ପୀଣା ସମାନା ଏମିନି ତା଼ଣା ୱେଣ୍ତି ରୂୟିକିନି ଗିନା ୱେଣ୍ତି ପୁଣ୍‌କି କିନେ; ମାଣ୍‌ସି ତାନି ଗା଼ୱୁରମି ତଲେ ତାୟିପାରି କିୱିଆ଼ନେସି।

22 ମୀରୁ ଗ଼ହଁ ତଲେ ବୁଦି ହିଲାଆ ଲ଼କୁଣି ହେଃଏନିତା ଊସ୍ତିସାରେ ଜିକେଏ ତାନି ବୁଦି ହିଲାଆଗାଟାୟି ପିହ୍‌ଏ।

23 ମୀରୁ ଜାହାରା ମେ଼ଣ୍ତାୟାଁଣି ପୁଞ୍ଜାଲି ତାକି ଜାତ୍‌ନୁ ଆ଼ଦୁ, ଇଞ୍ଜାଁ ଜାହାରା ଜ଼ନ୍ତୟାଁ ମାନ୍ଦାତି କାତା ନେହିକିଁ ମ଼ନ ହୀମୁ। 24 ଇଚିହିଁ ବାତ୍‌କୁ କା଼ଲେଏତାୟି ଆ଼ଏ ଅ଼ଡ଼େ ଏ଼ନାଆଁ ଟ଼ପେରି ପା଼ଟୁ ପା଼ଟୁ ତାକି ଡ଼ୟିନେ ? 25 ଗାର୍କି ଦା଼ପି ଆ଼ତିହିଁ କ଼ଡ଼୍‌ଗି ଗାର୍କି ତ଼ଞ୍ଜାଆ଼ନେ. ଅ଼ଡ଼େ ହ଼ର୍‌କାଣା ଗାର୍କି କୂଡ଼ି କିୱିଆ଼ନେ। 26 ମେ଼ଣ୍ତା ଡା଼ଲ୍‌କା ମିଙ୍ଗେ ବାସ୍ତେରି ହିୟାନୁ; ଇଞ୍ଜାଁ, ଗରି ମୀ ବୂମିତି ଦାରା ଲେହେଁ ଆ଼ନେ। 27 ଇଞ୍ଜାଁ, ଗରି ପା଼ଲୁ ମୀ ଇଲୁ କୁଟମିତି କା଼ଦି ତାକି ହା଼ରେପୂରେ ଆ଼ନେ; ଅ଼ଡ଼େ, ମୀ ହ଼ଲେଣିସିକା ନୀଡାଲି ତାକି ଆ଼ନେ।