1 ହେ଼ ନା଼ ମୀର୍‌ଏଣା, ନୀନୁ ନୀ ପା଼ଡ଼ିତି ଲ଼କୁ ତାକି ଦା଼ୟି ଆ଼ଦି, ଆ଼ଆତିଁ ଏଟ୍‌କା ଦେ଼ସାତି ଲ଼କୁ ତାକି ମା଼ନି କିହା ଦା଼ୟି ଆ଼ଦି, 2 ଆତିହିଁ ନୀନୁ ନୀ ଗୂତି ବ଼ଲୁତି ପା଼ନ୍ଦାତା ହେର୍‌ୱାମାଞ୍ଜି ଅ଼ଡ଼େ ଜାହାରା ଗୂତିତି ବ଼ଲୁ ତଲେ ଆସ୍‌ପି ଆ଼ହାମାଞ୍ଜି। 3 ହେ଼ ନା଼ ମୀର୍‌ଏଣା, ନୀନୁ ନୀଏଁ ଈ କାମା କିମୁ, ଜାହାରାଇଁ ଗେଲ୍‌ପାମୁ; ଇଚିହିଁ ନୀନୁ ନୀ ପା଼ଡ଼ିତା଼ଣା କେୟୁତା ହେର୍‌ୱାମାଞ୍ଜି; ହାଲାମୁ ଇଞ୍ଜାଁ ଜାହାରାଇଁ ଊଣା କିହାଁ ନୀ ପା଼ଡ଼ିତା଼ଣାଇଁ ଅଲେ ଅଲେ ବାତିମା଼ଲାମୁ। 4 ନୀନୁ ନୀ କାନୁତି ଇଦା କିହାଲି ହୀଆନି, କି ନୀ କାଣ୍‌କା ମାଟାୟାଁଇଁ କଟଣି ହ଼ଚାଲି ହୀଆନି। 5 ଅ଼ଡ଼େ ଜାହାରାଇଁ କୂର୍‌ହୁ ସମାନା ବାଣ୍‌ମିୟା କେୟୁଟି, ଅ଼ଡ଼େ ପଟା ସମାନା ପା଼ନ୍ଦା ଅଡିନାଣା କେୟୁଟି ଗେଲ୍‌ପା କଡାମୁ।

6 ହେ଼, ନିସ୍ତାଗାଟାତି, ନୀନୁ ସୀମା ତା଼ଣା ହାଲାମୁ, ଅ଼ଡ଼େ ତାନି କାମାତି ଅଣ୍‌ପାମୁ ଇଞ୍ଜାଁ ବୁଦିଗାଟାତି ଆ଼ମୁ। 7 ତାନି ବିଚାରା କିନାସି କି ସା଼ଲୱି କିନାସି କି ଆମ୍ବାଆସି ପ୍ରବୁ ହିଲାଆତି ଜିକେଏ ଏ଼ଦି କାରା ବେ଼ଲାତା ତାନି କା଼ଦି ତିୟାରା କିନେ, 8 ଇଞ୍ଜାଁ ଆର୍ନା ବେ଼ଲାତା କା଼ଦି କୂଡ଼ି କିନେ। 9 ହେ଼ ନିସ୍ତାଗାଟାତି, ନୀନୁ ଏଚେ଼ କା଼ଲା ପାତେକା ଡୂରାହାଁ ଡ଼ୟିଦି ? ନୀ ଇଦା ଏଚେଲା ହାନେ ? 10 ଅ଼ଡ଼େ ଗା଼ଡ଼େକା ଡୂରିତିହିଁ, ଅ଼ଡ଼େ ଗା଼ଡ଼େକା କଟଣି ହ଼ତିହିଁ, ଅ଼ଡ଼େ ଗା଼ଡ଼େକା ଇଦା କିହାଲି କେସ୍କା ମୁଡ଼ୁମା଼ଡ଼ା କିତିହିଁ, 11 ନୀ କା଼କୁଲିତି ଦିନା କାଂଗ୍ରେଏସି ସମାନା, ଇଞ୍ଜାଁ ହାକି, ସାଜୁ ଆ଼ହାମାନି ଲ଼କୁ ସମାନା ୱା଼ନେ।

12 ବେଲିଆଲ୍‌ ମୀର୍‌ଏସି, ଦ଼ହଗାଟି ମାଣ୍‌ସି; ଏ଼ୱାସି କା଼ଲେଏ କୁଟୁ କାତା ତଲେ ତା଼କିନେସି; 13 ଏ଼ୱାସି କାନୁ ଗିଟିନେସି, ଏ଼ୱାସି କଡା ତଲେ ତ଼ହ୍‌ନେସି, ଏ଼ୱାସି ୱାଞ୍ଜୁ ତଲେ ତ଼ହ୍‌ନେସି; 14 ଏ଼ୱାଣି ହିୟାଁତା କୁଟୁ କାତା ଡ଼ୟିନେ, ଏ଼ୱାସି କା଼ଲେଏ ଲାଗେଏ ଅଣ୍‌ପୁ ଅଣ୍‌ପିନେସି; ଏ଼ୱାସି ଗଡ଼୍‌ହାତି ବିଚା ମାଟିନେସି। 15 ଏ଼ଦାଆଁତାକି ଏ଼ୱାଣି ନା଼ସା ଆ଼ନାୟି ଦେବୁଣିଏ ୱା଼ନେ, ଇଞ୍ଜାଁ ଏ଼ୱାଣି ଗେଲ୍‌ପି ଆ଼ନାୟି ଏ଼ନି ଊପେୟି ଡ଼ୟେଏ।

16 ସ଼ ଗଟା କାତାତି ପ୍ରବୁ ଅ଼ପଅସି; ଅ଼ଡ଼େ ସା଼ତାଗଟା କାତା ଜିକେଏ ଏ଼ୱାଣି ଅ଼ପାଆଗାଟାୟି।

17 ଡା଼ହାରା ଆ଼ନାୟି,

ମିଚି ଜ଼ଲିନି ୱେନ୍ଦରି,

ଦ଼ହ ହିଲାଆଗାଟାରାଇଁ ପା଼ୟିନି କେୟୁ;

18 ଲାଗେଏ ଅଣ୍‌ପୁ ଅଣ୍‌ପିନି ହିୟାଁ,

ଲାଗେଏ କାମା କିହାଲି ଦାବ୍‌ଡ଼ି ହାନି ପା଼ୱୁଲି;

19 ମିଚି ସା଼କି ଆମ୍ବାଆସି ମିଚି ଜ଼ଲିନେସି

ଅ଼ଡ଼େ ଆମ୍ବାଆସି ତାୟିୟାଁ ବିତ୍ରା ଗଡ଼୍‌ହାତି ବିଚା ମାଟିନେସି।

20 ହେ଼ ନା଼ ମୀର୍‌ଏଣା, ନୀନୁ ନୀ ତାଞ୍ଜିତି ହୁକୁମି ମା଼ନୱି ଆ଼ମୁ, ଅ଼ଡ଼େ ନୀ ତାଲି ଜା଼ପ୍‌ନାଣି ପିହ୍‌ଆନି। 21 ଏ଼ଦାଆଁ କା଼ଲେଏ ନୀ ହିୟାଁତା ଦସା ଇଟାମୁ, ନୀ ହେର୍‌କିତା ଦହ୍‌ମୁ। 22 ନୀନୁ ତା଼କିନି ବେ଼ଲା ଏ଼ଦି ନିଙ୍ଗେ ଜିରୁ ତ଼ସ୍ତାନେ, ଅ଼ଡ଼େ ହୁଞ୍ଜିନି ବେ଼ଲା ଏ଼ଦି ନିଙ୍ଗେ କା଼ତାନେ; ନୀନୁ ତେଃଏଲିନି ବେ଼ଲାତା ଏ଼ଦି ନୀ ତଲେ କାତା ଆୟାନେ। 23 ଇଚିହିଁ ଏ଼ ହୁକୁମି ଦୀୱଁ ଅ଼ଡ଼େ ଜା଼ପ୍‌ନାୟି ଉଜେଡ଼ି; ଅ଼ଡ଼େ ଜା଼ପାଲି ତାକି ଲା଼ଗିନାୟି ଜୀୱୁତି ଜିରୁ; 24 ଏ଼ଦି ନିଙ୍ଗେ ଲାଗେଏତି ଇୟାନି ତା଼ଣାଟି ଅ଼ଡ଼େ ଦା଼ରେଣିନି ଡ଼ାକ୍‌ହି ସାକ୍ରି ହା଼ଡାଟି ଗେଲ୍‌ପାନେ। 25 ନୀ ହିୟାଁତା ତାନି ଅ଼ଜୁତି ଜୂପ୍‌କା ଆ଼ଆନି; କି ତାନି କାନୁ ଗୁରିତା ଏ଼ଦାନି ନିଙ୍ଗେ ଆସାଲି ହୀଆନି। 26 ଏ଼ନିଇଚିହିଁ ଦା଼ରି କାମା ତାକି କା଼ଦିତି କା଼କୁଲି ଆ଼ନେ, ଅ଼ଡ଼େ ଦା଼ରେଣି ଆୟା ମାଣ୍‌ସିତି ହା଼ରେକା ଦାରାତି ଜୀୱୁ ଆସାଲି ବେ଼ଟା କିନେ।

27 ଆମ୍ବାଆସି ତାନି ବକତା ହିଚୁ ଇଟିନେସି, ଏ଼ନାଆଁ ତାନି ବାସ୍ତେରି ୱେଏ ? 28 ଅ଼ଡ଼େ ଆମ୍ବାଆସି ଡ଼ୀଞ୍ଜିମାନି ରୀଙ୍ଗାୟାଁ ଲାକ ତା଼କିନେସି, ଏ଼ନାଆଁ ତାନି ପା଼ୱୁଲିତା ପକାୟାଁ ଆ଼ଉ ? 29 ତାମି ପା଼ଡ଼ିତି ଆୟାନି ତା଼ଣା ଆମିନି ମାଣ୍‌ସି ହାନେସି, ଏ଼ୱାସି ଏଲେତାସି; ଆମ୍ବାଆସି ଏ଼ଦାଣି ଡୀଗିନେସି ଏ଼ୱାସି ଡଣ୍ତ ବେଟାଆ଼ନେସି। 30 ସ଼ରୁ ହାକି ଆ଼ହାଁ ଜୀୱୁ ନୀଟ୍‌ହାଲି ତାକି ସ଼ରୁ କିନେସି, ଆତିହିଁ ଲ଼କୁ ଏ଼ୱାଣାଇଁ ହୀଣି କିଅରି। 31 ସାମା ଏ଼ୱାସି ଆସ୍‌ପି ଆ଼ନେସି, ଆତିହିଁ ଏ଼ୱାସି ସା଼ତା ଗୂଣୁ ୱେଣ୍ତେ ୱେଟ୍‌ହାଲି ଆ଼ନେ; ତାନି ଇଲୁତି ବାରେ ବିତି ଏ଼ୱାଣାକି ହୀହାଲି ଆ଼ନେ। 32 ର଼ ଦା଼ରେଲା ଆ଼ବା ଏ଼ୱାସି ବୁଦି ହିଲାଆଗାଟାସି; ଆମ୍ବାଆସି ତାନି ଜୀୱୁତି ନା଼ସା କିନେସି, ଏ଼ୱାସିଦେଁ ଏ଼ଦାଆଁ କିନେସି। 33 ଏ଼ୱାସି ମା଼ଡା ଅ଼ଡ଼େ ଲାଜା ବେଟାଆ଼ନେସି; ଇଞ୍ଜାଁ ଏ଼ୱାଣି ଦ଼ହ ଏଚେଲା ମେଣ୍‌ଙ୍ଗେଏ। 34 ଇଚିହିଁ ଆୟାନି ତାକି ଡା଼ହାରା ମାଣ୍‌ସିତି ହା଼ରେକା କାର୍‌ବିତି କାତା; ବାଦୁଲି ଅ଼ନି ବେ଼ଲା ଏ଼ୱାସି ଇଚାଣି ଜିକେଏ କାର୍ମା ମେହ୍‌ଅସି। 35 ଏ଼ୱାସି ତାନି ବାଦୁଲି ଏ଼ନାଆଁ ଆବଅସି; କି ନୀନୁ ହା଼ରେକା ଲା଼ଞ୍ଚା ହୀତି ଜିକେଏ ଏ଼ୱାସି ମା଼ନୱି ଆ଼ଅସି।