1 ବୁଦି ତାନି ଇଲୁ ଦସା ମାନେ, ଏ଼ଦି ତାନି ସା଼ତାଗଟା ମୁଣ୍ତାୟାଁ ତିୟାରା କିହାମାନେ; 2 ଏ଼ଦି ତାନି ବାରେ ଜ଼ନ୍ତୟାଁ ପା଼ୟାମାନେ; ଏ଼ଦି ତାନି ଅଙ୍ଗୁରି ରାସା ଆଟ୍‌ହାମାନେ; ଏ଼ଦି ତାନି ବାଲାପା଼ଟା ତିୟାରା କିହାମାନେ। 3 ଏ଼ଦି ତାନି ହ଼ଲେଣିସିକାଣି ପାଣ୍ତାମାନେ, ଏ଼ଦି ଗା଼ଡ଼ାତି ପାଡାଆ଼ତି ଟା଼ୟୁଟି ହା଼ଟିହିଁ ଏଲେଇନେ, 4 "ଆମ୍ବାଆସି ତେଲ୍‌ହାଆ ଗାଟାସି, ଏ଼ୱାସି ଇମ୍ବାଆଁ ୱା଼ପେସି;" ଇଞ୍ଜାଁ ଆମ୍ବାଆସି ବୁଦି ହିଲାଆଗାଟାସି, ଏ଼ୱାଣାଇଁ ଏ଼ୱାସି ଏଲେଇନେସି, 5 "ୱା଼ମୁ ନା଼ କା଼ଦି ତିନାମୁ ଅ଼ଡ଼େ ନା଼ ଆଟ୍‌ହି ଅଙ୍ଗୁରି ରାସା ଗହ୍‌ମୁ। 6 ହେ଼ ତେଲ୍‌ହାଆ ଲ଼କୁତେରି, ତେଲ୍‌ହାଆ ଲ଼କୁଣି ତ଼ଣେ ପିସାହାଁ ଜୀୱୁତି ଗେଲ୍‌ପାଦୁ; ଇଞ୍ଜାଁ ନେହିଁ ଅଣ୍‌ପୁତି ଜିରୁତା ତା଼କାଦୁ।"

7 ଆମ୍ବାଆସି ନିନ୍ଦା ଗାଟାଣାଇଁ ଜା଼ପ୍‌ନେସି, ଏ଼ୱାସି ତା଼ନୁଏ ଲାଜା ବେଟା ଆ଼ନେସି; ଇଞ୍ଜାଁ ଆମ୍ବାଆସି ଲାଗେଏ ଲ଼କୁଇଁ ଲା଼ଗିନେସି, ଏ଼ୱାସି ତା଼ନୁଏ ଲାଜା ବେଟାଆ଼ନେସି। 8 ନିନ୍ଦା ଗାଟାଣାଇଁ ଲା଼ଗାଆଦୁ, ଲା଼ଗିତିହିଁ, ଏ଼ୱାସି ମିଙ୍ଗେ ଅ଼ପଅସି, ବୁଦିଗାଟାଣାଇଁ ଲା଼ଗାଦୁ, ଏଚେଟିଏ ଏ଼ୱାସି ମିଙ୍ଗେ ଜୀୱୁନୟାନେସି। 9 ବୁଦିଗାଟାଣାଇଁ ଜା଼ପ୍‌ଦୁ ଆତିହିଁ ଏ଼ୱାସି ଅ଼ଡ଼େ ବୁଦି ବେଟାଆ଼ନେସି, ଇଞ୍ଜାଁ ଦାର୍ମୁଗାଟାଣାଇଁ ସେତ୍‌ନା ହୀତିସାରେ, ତାନି ବୁଦି ହା଼ରେକା ପାଡାଆ଼ନେ।

10 ପ୍ରବୁ କାତାତି ଆଜିନାୟି ବୁଦିତି ମା଼ଟ୍‌ନାୟି, ଇଞ୍ଜାଁ ଦାର୍ମୁଗାଟାଣି ବୁଦିଏ ନେହିଁ ଅଣ୍‌ପୁ ଆ଼ନେ। 11 ଇଚିହିଁ ନା଼ ତା଼ଣାଟି ନୀ ବାର୍ସା ପାଡାଆ଼ନେ, ଇଞ୍ଜାଁ ନୀ ନୀଡିନି ବାର୍ସା ଗାଡି ଆ଼ନେ। 12 ନୀନୁ ବୁଦିଗାଟାତି ଆ଼ତିହିଁ, ନୀ ତାକି ବୁଦିଗାଟାତି ଆ଼ଦି; ନିନ୍ଦା କିତିହିଁ, ମୀରୁଏ ଡଣ୍ତ ବେଟାଆ଼ଦେରି।

13 ମୁର୍କୁଗାଟି ଆୟାଟି ଗଡ଼୍‌ହାଗାଟାୟି; ଏ଼ଦି ତେଲ୍‌ହାଆ ଗାଟାୟି ଅ଼ଡ଼େ ଏ଼ନାଆଁ ପୁନେଏ। 14 ଏ଼ଦି ତାନି ଇଲୁ ଦୁୱେରିତା ଅ଼ଡ଼େ ଗା଼ଡ଼ାତି ପାଡାଆ଼ତି ଟା଼ୟୁତା ଜ଼ମ୍ବା ପା଼ସାହାଁ କୁଗିନେ। 15 ଏ଼ଦି ଏ଼ ଲ଼କୁଣି ଆମ୍ବାଆରି ଜାହାରା ଜିରୁତା ସଲ୍‌କେ ହାନେରି, ଏ଼ୱାରାଇଁ ଏଲେଇଞ୍ଜିଁ ହା଼ଟିନେ, 16 "ଆମ୍ବାଆସି ତେଲ୍‌ହାଆ ଗାଟାସି, ଏ଼ୱାସି ଇମ୍ବାଆଁ ୱା଼ପେସି," ଏ଼ଦି ବୁଦି ହିଲାଆ ଲ଼କୁଇଁ ଈ କାତା ଏଲେଇନେ, 17 "ସ଼ରୁ କିତି ଏ଼ୟୁ ଡ଼ାକ୍‌ହାଇ ଅ଼ଡ଼େ ଡ଼ୁଗାହାଁ ତିନି କା଼ଦି ହେନେ।" 18 ସାମା ଏ଼ୱାସି ପୁନଅସି କି ହା଼ତି ଲ଼କୁ ଏ଼ ଟା଼ୟୁତା ଡ଼ୟିନେରି, ଇଞ୍ଜାଁ ତାନି ହା଼ଟ୍‌କି ଆ଼ହାମାନି ଲ଼କୁ ତା଼ଡ଼େପୂରୁ କୂଡ଼୍‌ହି ଟା଼ୟୁତା ମାନେରି।