Juan 20

Ya pagpakitaꞌ ni Jisus adti kanan manga umagakan

19 Na, sa pagkamagsiklep da na allaw na Linggo, kenneꞌ na manga umagakan ni Jisus adti seled na pigbantukan nilan. Kay nyallek silan sa manga magdadumala͡ay sa manga Judiyu, aw pyambalagsangan nilan ya manga tatakep. Aw walaꞌ nilan pag-imanmana nyaka-indeg si Jisus dun ni tengaꞌ nilan, aw miglong sakanan, "Ya kalinaw gayed magad kamayu!" 20 Pagkatigkas da nan maglong, pigpakitaꞌ nan kanilan ya manga paliꞌ dun ni kanan manga tulluꞌ aw dun ni kilid nan. Aw to-o migleya ya manga umagakan nan asuntu na kyinitaꞌ nilan ya kanilan Matas na Pangulu. 21 Aw miglong pa uman si Jisus adti kanilan, "Ya kalinaw gayed magad kamayu! Aw kasiling na pigpadala aku na Ama adti manga utaw asini lupaꞌ, kamu uman un ku padala adti manga utaw." 22 Aw pagkatigkas ni Jisus maglong seiy, pig-eyepan nan na kanan ginawa ya kadég nilan, aw miglong sakanan, "Dawata mayu ya Ispiritu Santo. 23 Aw adun, kun maglong kamu adti pangkay singalan na nyalanas da ya manga salaꞌ nilan, piglanas da saba na Tyumanem. Manang kun diliꞌ kamu maglong na nyalanas da ya manga salaꞌ nilan, na, kenneꞌ pa na manga salaꞌ nilan."