12 Ndizo ke musiletjedzele jinyo likalawula mibili yenyu inofa, limuta kuti muwhilile njemulo dzalo dzakayipa. 13 Musipe nhango dzemibili yenyu kujinyo kuti dzihingisiwe kusakalulama, koga muzwipile kuNdzimu, sayibabo bakadusiwa mukufa bakahhisiwa mubupenyu, mupe nhango dzemibili yenyu kuNdzimu sezwihingiswa zwendulamo. 14 Ngobe jinyo alingabe nesimba pehhugwi kwenyu, saku musipasi kwenlayo, koga mulipasi kwengoni.

15 Ngono ke? Titjinye zwedu ngentha yekuti atita pasi kwenlayo koga tipasi kwengoni? Aa, akuzojalo! 16 Amutoziba kuti hapa muzwita balanda banowhilila bewumwe nhu, mubalanda bayiwhoyo wamunowhilila. Mubalanda bejinyo, ilo linoyendesa nhu kulufu, kene mubalanda bewhilila, iko kunoyendesa kundulamo? 17 Koga toboka Ndzimu ngobe, nekene maka muli balanda bejinyo, makawhilila nemimoyo yenyu yose diyiwa kwamakawamutjila. 18 Matjisunungugwa mukutjinya mabe balanda bendulamo.