1 Nomulilila Mndewa Imulungu kwa sauti,

nompula Mndewa Imulungu kwa sauti yangu yanyonele bazi.

2 Nogida kuiyalala kwangu kuulongozi wake,

kuulongozi wake nolonga magazo gangu.

3 Nahalonda kukanha tamanilo,

gweye kotanga nzila zangu!

Mwiinzila inibita wanhu wanitegela mitego.

4 Lola mwambu wangu wa ukudila,

kuduhu hata munhu yonitanga,

nabule hanhu ha kukimbilila,

kuduhu munhu yonigesa.

5 Go Mndewa Imulungu, nokulilila,

nolonga, "Gweye ayo kimbililo jangu,

gweye ayo fungu jangu hano mwiisi ya wagima."

6 Uhulike kililo changu,

kwavija niye namdodo,

nikombole na awo onikweleleza,

kwavija wana nguvu kubanza niye.

7 Undave mkifungo changu,

ili niditogole twaga jako.

Wanhu wene haki wanizunguluke,

kwavija kunhendela mengi ganogile.