(Lwila na Zabuli ya Asafu. Kwa kilanja, yatumie modeli wa, "Sikuubanange.")

1 Gweye Imulungu, tokushukulu,

tokushukulu gweye kwavija twaga jako da behi,

wanhu osimulila mbuli zako za unzonza.

2 Imulungu kolonga, "Nosagula kipindi kinogile,

niye notagusa kwa haki.

3 Kipindi isi yose na iwanhu okala mumo yahatigisika,

niye ayo nigogeleza mhanda zake sikuzilagale.

4 Kwa iwanhu oitapa nolonga, ‘Sikumuitape kabili,’

kwa iwanhu wehile nolonga, ‘Sikumwinule mhembe zenu.

5 Sikumwinule mhembe zenu mbuli ya ulanga,

sikumulonge kwa kibuli.’ "

6 Haduhu yoyose yolawa umwambu wa kudilawila zuwa,

hebu umwambu wa kudihongela zuwa,

hebu umwambu wa kuluwala yodaha kumkweza munhu.

7 Lakini Imulungu ayo yotagusa,

komuhumulusa imoja na komkweza iyagwe.

8 Mumkono wa Mndewa Imulungu kuna kikasi kimemile divai kali,

yolava holovu na ihanganyigwa na usongo,

kowagidila iwanhu wehile weli mwiisi,

ong’wa mbaka dwendwe da mwisho.

9 Lakini niye nolonga gayasang’hane milele,

nomwimbila nhogolwa Imulungu wa Yakobo.

10 Nguvu za iwanhu wehile nozibena,

lakini nguvu za wene haki zokwinuligwa.