1 Akɨnti vim, n nta viwɔ kaa nya naa moo waanɛyi yeenya a kolapa, i ɗɔ kaanɛ a gãgã i shanɛ nɛ, <<Bɛli Ɗalapa nɛ! Raanɛ, bassinɛ, a kakani pɛu Ɗalapa ɓɛɛkɔ! 2 U ruuyeenɛ pɛ tɔ̃vɨn, sɔ̃n pɛ nizɛǃ Yeeruutɛ nyo su kpantang pɛ̃niɓa au mɛɛ kotipim ruutɛ aka kpantang gbete pɛliyɛ, Ɗalapa tasiu raatɛ aru gbete nyoki u jashonɛyi vɔrɔyɛ.>> 3 I ɓaanya sɔ̃n a gãgãni nɛ, <<Bɛli Ɗalapa nɛ! Zɨnri yaa au shaa koomo pɛ̃nibau u ɗɔ lapa gẽnɛ dangdang.>> 4 Kɛɗɔn shɔpɛ̃ni bmati atu nɛ̃ɛ̃ti a vishɛshinɛ suru nɛ̃ɛ̃tiwi i nwesirɛ a tipi, i bassi Ɗalapa shɔgbeteu a ɗɔ-ɔ̃nɛ a lakpati. i shanɛ, <<Nankɔ! Bɛli Ɗalapa nɛ!>>

5 Kɛɗɔn shɔ nta yeenya wɔ a lakpati kɛ shanɛ nɛ,<<Bɛli u Ɗalapa nɛ, u jashonɛyi a shɔzɛ piti, jabɛ̃rɛ̃tiyi a shɔpɛ̃niyini piti, shɔ gbeteyi ntau setiyɛ!>> 6 Kɛɗɔn n nta viwɔ kɛ kaanɛ naa moo waanɛ i yeenya, naa mii gulirɛ aɗɔ yuunɛ, naa jalɛ nyakaanɛ, n ntayirɛ i shanɛ, <<Bɛli Ɗalapa nɛ, aru Uɓeyelapa, u Ɗalapa shɔgbete vi tɛu kaka ɓayɛ, u kpati! 7 U nta sisɨn purunɛ u nta binyatɔ̃nɛ; U basiunɛǃ Aru lee jamɛ̃rɛ̃ tɛnɛ pɛlitɛ, u su sɔɔ mabii tɛttɔ a ruuni. 8 Shɔ ãu fãrã lili tɔ̃vɨntɛ, ɓolong-ɓolɔng nɛu hãtɔ.>> (Fãrã lilim ukɔ ɔ̃rɛ shɔ Ɗalapa i vipɛlinɛ.)

9 Kɛɗɔn Ɗajashonɛlapa gelin nɛ, <<Bee vimnɛ: Ɗa u tasiyi susãri abiini shɔ gbete shɔ geliyi nya yumusinɛ jamɛ̃rɛ̃ tɛnɛyɛ.>>Ɗajashonɛlapa pɔ̃u ɓɛɛ sɔ̃n ɗɔnnɛ, <<Shomkɔ ɔ̃rɛ ruu Ɗalapa tɔ̃vɨn.>>

10 N nwesi au ɗɛkɨn ń basiurɛ, ama gelin nɛ, <<Mɔkaa pɛlinɛ ɗɔkɔ, Nkɔng ma n jo jashonɛkɔ a ɔkɔɔni a shɔ sisɨn ãnɛ gãsiyini piti, shɔgbeteyi sã Yɛsɔ vimatinɛ kpai. A bassi Ɗalapa!>>

Aruviya ruu tɔ̃vɨn gbete Yɛsɔ tasiyɛ ukɔ ã janyagadiyi kaka vishonɛ pɛlinɛrɛ.

11 Kɛɗɔn n zɛ kolapa ɓelinɛ, ang zɛ gbɛ̃ntɛ̃n puru, u shɔ gẽnɛ shɔ ɓau niinɛ shɔ sisɨn ãnɛ a shɔ tɔ̃vɨn pɛlinɛ; yeeruuyi pɛ nyaba tɔ̃vɨn, tasɨnyi a nyaba tɔ̃vɨnyi. 12 U janɔɔ naa ɗɛɛti yaa, a tosi salabu kpati au yuuni waanɛ, u nii wɔ ɗɔn gbete shɔ bee aɗɔn, nii gbete shɔwɔ ji zɛ ɓa see ji ukɔ sheeli. 13 Fãrã gbete hãyɛ shɔ kuki a kpaa. U nii nɛ, <<Ɗanyaruubii.>> 14 Soja kolapa i gɨurɛ, i gẽ ayuu gbɛ̃ntɛ̃n puruyi, i hã fãrã lili puru ɓolong-ɓolong. 15 A shɔ gbɛ̃ntɛ̃n gẽnɛ̃u nya, zali au nya piipipi shɛrɛ ɗɔn, Ɗa yɛ shaariu jo a uku a shɔ yuuni. Yɛ tasiyi raatɔ au kpati roonɛni, A Ɗalapa shɔ gbete vi tɛu kaka ɓa u sisɨn lɛsinɛ pɛ̃niba yɛ nali inabi adɔɔ a ɗɔgbete shɔ ka mii inabi yɛ. 16 Au fãrã au dɔbɔ̃si shɔ bee nii mi,<<Kpatiyi i Kpati wɔsɔ̃n nɛ uɓeyelapayi Ɓeye.>>

17 Kɛɗɔn n zɛ Ɗajashonɛlapa u ɗɔshinɛ a ɗaa, a ɓaa janɔɔ gbete i ɗɔ dunɛ a konyasi nya a gãgãni nɛː <<Ɔ anɛ ɔ tolinya ɗɔgbete aru Ɗalapa yumusinɛ pɛ̃niɓamǃ 18 Ɔ anɛ ɔ shaa kpatiyi yɔpɔ, yupɛ̃ni sojayi ɓɛɛ, sojayi ɓɛɛ, gbɛ̃ntɛ̃n ɓɛɛ a shɔ gbɛ̃ntɛ̃n genɛyi ɓɛɛni, shɔzɛ piti i yɔpɔ, foo a jalajaa ɓɛɛni, shɔpɛ̃niba a jabɛ̃rɛ̃ti ɓɛɛniǃ>>

19 Kɛɗɔn n zɛ viɓili wɔ a kpati kotipiyini ai sojayini i tolinyarɛ, aru i tasɨn a shɔu ayuu Gbɛ̃ntɛ̃n au sojayini. 20 Ama shɔ sã viɓiliurɛ, shɔ lokiu a jahm a janyagadi nyayeenɛni gbete pɛli vibiizaanɛ a viɓilu ɗekɨn yɛni.(ji a nyaba vibiizaanɛukɔ ɗaki shɔgbeteyi nomba jasuru viɓiliu ɗɔnrɛ, a shɔgbeteyi bassi jasuru viɓiliuyɛni. Shɔ sã viɓiliurɛ a janyagadi nyayeenɛuni shɔ lokiyirɛ a suruni a yaa kanɛ a kolo yaa. 21 I sojayi shɔ nyoyirɛ a zali gbete shɛ a shɔu ayuu gbɛ̃ntɛ̃n nyayɛ; kɛɗɔn janɔɔyi piti i shaayi yɔpɔ nɔgbete tesiyiyɛ.