1 N shɔ kasinɛ Tiyofolo: A laabeenɛ gbete n gaa beenɛyɛ, n bee vi ayuu vi gbete Yesɔ pɛliyɛ kpai a vi gbete mati shɔ piti yunɛ ɗagbete gau vishonɛyɛ 2 yɛnɛ lee gbete shɔ tuurɛ yɛnɛ kolapa. U ɓɛɛ tunɛ yɛnɛ kolapa, ãsiu jashonɛyi gbete lɔyiyɛ nya pɛli vishonɛ a Ɗa suru kaka . 3 A knti dii laa ziti au vɔyɛ tasiu yuutɔ a nyaba tottot aru u tasi shɔnɛ u doo a suruni. I zɛurɛ, a nwanyatɔ ayini aru Ɗa kpati roonɛ. 4 Naa i tolinyatɛ a ɗɔzɔɔ, a ãsi-nyamnɛ:<<Ɔ kɔɔ yaa Urushalima nɛ, ɔ ga vigbete n geliyɛ, vi gbete mayɛni mayɛ nɛn ãwɔyɛ. 5 Yɔhana pɛli shɔ batizima a mii, asitɛɗɔkɔ yɛ ɔ̃ ɓa dɔkɔkɔ ɓa shɔyɛ pɛlɔɔ batizima kɛ a Ɗa suru.>>

6 Naa Yesɔ jashonɛyi i tolinyatɛ a Yesɔ ɗɔbii, i hɨunɛ,<<Uɓeyelapa, a yɛ sɔɔri Israilayi kpati roonɛ kɛ dɔdɔrim kɔya?>>

7 Yesɔ kasiyinya nɛ,<< Mayɛ kɔshɛli u kaka aɗɔn u pɔ̃ ɗa vi pɛlinɛ a yumusinɛni, ɓa ɔ vishonɛ ɔ zɛ lee gbete yɛ pɛliyɛ ɓa. 8 Ama naa Ɗa suru kaanɛ awɔ bi, ɔ yɛ kpaa kaka tɔ, a Urushalima ɔ yɛ ɔ̃kɛ shɔ gbeteyi i shi ang yuuyɛ, a Yahudiya, a Samariya ni kpai, yɛnɛ ɗɔgbete koo sɔ̃ nyayɛ.>> 9 Akɨnti gbete yisi vim shanɛtɛ, i ɗɔgbete i biliuyɛ Ɗa tuu Yesɔ yɛnɛ kolapa, sabu kukiurɛ, i ji zeu tɔɓa. 10 I ɗɔɔ nɔɔ tàànɛ a lapa, u ɗɔɔ yɛnɛ shɔwɔyi ziti i shi au ɗɔbii a fãrã puruni 11 i shanɛ,<<Ɔ shɔ Galili miyi, ɔ shili piruuvi ɔ taa nɔɔ lapa viya? Yesɔn kɔ gbete Ɗa tuu awɔ ɗɔbii yɛnɛ kolapa, yɛ sɔɔ sɔ̃nji nankɔ nagbete ɔ zɛuyɛ u ɗɔɔ kolapa yɛnɛ.>>

12 Kɛɗɔn Yesɔ jashonɛyi shɛ a dɔkɔpɔ Zɛtun i sɔɔkɛ Urushalima, gbete yɛ tuu shɔ mili gbete yɛnɛ komoo pɛ̃nibauni. 13 I to komoo pɛ̃nibaurɛ i sɔɔkɛ yɛti jaa gbete i si a ɗɔnyɛː Shɔwiyi ikɔyi ɔ̃rɛ Bituru, Yɔhana, Yakubu, a Anduru, Filibu, Tomasi, Baitalami, Matiyu, Yakub Alifa ɓɛjaa, Siman shɔ gbete kasi ɓanɛn tipiu sɔɔ knti ɓa, a Yahuza Yakub ɓɛɛ jaa. 14 I tolinya a lee-lee ɗɔzɔɔ aru Ɗa gakinɛ, a soroyini nyazɔɔ a Mariyamu Yesɔ ɓini a ɓɛzɔ̃yini. 15 A ɗawuni shɔ pɛli miti shɔ sisɨn ãnɛ a Ɗa bi i si mɛnɛ laa mangbete kpai, a Bituru yulapa ai tete, 16 a shanɛ,<<Mazɔ̃yi, ɔ̃tɛ kaka jazɨng akɔrɔ shɔ yisi nya vigbete Ɗa nyaruubii shayɛtɔ gbete Ɗa suru sha a Dauda nyayɛ aru Yahuza nɛ, Yahuza ukɔ yɛ ɔ̃rɛ shɔ ɗekɨn tɛnɛ aɗɔ Yesɔ sãnɛni. 17 Yahuda u sijo au tete kɨnkɔ, shɔ lɔurɛ aru u shovi a ukɔni.>> 18 (Yahuda woo ɗɔ a saa gbete au kpaa a nyaba kɔ̃linɛyɛ, kɛdɔn nwesi ayuu a vɔrɛ; u buru sãrɛ, u jaaburu zɔɔti ãti a ɓili kpai. 19 Shɔ gbeteyi ɔ̃nɛ a Urushalima kpai i nta vimtɔ, i ɓa ɗɔu nii ai nyakoo nɛ Akidama. Ukɔ ɔ̃rɛ <<Tipi kpaa.>>)

20 Bitru sha sɔ̃nnɛ Shɔ bee a labeenɛ Zaburayɛ nɛ:

Mɛnɛ u wɛrɛ u ɔ̃kɔɔ naa zãã wɛrɛ;

mɛnɛ shɔ wɔɔ u ɔ̃kɔɓa ɗɔmɓa.

Shɔ bee sisɔ̃n tɛttɔ nɛ:

Mɛnɛ shɔwɔ u rau vishonɛ kɔɔtɔ.

21 Arumkɔ<<Ɔ̃tɛ kaka jazɨng akɔrɔ shɔ lɔɔ shɔ wɔɔtɔ, au tete a ɗa gbete yesɔ si au ukɔniyɛ, au zɛ Yesɔ tonɛ au shɛnnɛni yɛ tɛttɔ, 22 yuunɛ a ɗagbete Yɔhana nwari shɔ ruu batizimayɛ pɛlinɛyɛ, anɛ ɗagbete Ɗalapa tuu Yesɔ au ɗɔbii yɛnɛ kolapa.>>

23 Shɔ ɓaa shɔzɛ ziti nyarɛ: Yusufu, shɔ gbete si shɔ ɓaunɛ Barsaba (au shɔ zɛu nii a Jusitu), a Maatiya. 24 Kɛɗɔn i gaki Ɗa i shanɛ, <<Uɓeyelapa, mɔkaa zɛ shɔ sisɨn rɛ kpai, a tasiu nɛ atette shɔzɛ ziti gbete a lɔɔ ɓa miyini 25 u ɔ̃ a jashonɛ u tɛ ɗɔ,ɔ̃nɛ gbete Yahuza yaayɛ, aru u yɛ ɗɔ gbete tɔ̃rɛ u ɓɛɛyɛ.>> 26 Kɛɗɔn i nta laaparɛ aru i lɔɔ shɔzɛ gbete atette shɔzɛ zitiyi, shɔ gbete laapa lɔɔuyɛ sipɛ Maatiya, shɔ tosiu kɛkn atette jashonɛyi kopi tu gbeteni.