1 Aɗagbete Apolo u si a Koranti yɛ, Bulus raki a tipiu yɛnɛ tipi Afisa, a kpaa jadɔɔyi gãsi a ɗɔwakɔ. 2 Kɛɗɔn Bulus shanɛ,<<A ɗagbete ɔ ã sisɨn yɛ ɔ tɛ Ɗa suru kati ya?>>

<<I kasiu nyanɛ, u ji nta ɓa shãani nɛ Ɗa suru ɗɔni ɓa.>> 3 A hɨyinɛ, ɔ tɛ sipɛ zɔ Batizima shɔpi ya?

I kasinya nɛ,<<Batizima gbete Yɔhana pɛli.>>

4 Bulus shanɛ, <<Yɔhana pɛli shɔ Batizima aru nɛ shɔu yaa ruuviniyitɔ; a geli shɔ nɛ shɔu ã sisɨn a shɔ gbete kaanɛ au knti bi, kɛ Yesɔ.>> 5 I ɓɛɛ ntanɛ vim, kɛɗɔn shɔ pɛliyi Batizima rɛ a Uɓeyelapa Yesɔ nii. 6 Bulus pɔ̃siyinaa rɛ yuu, Ɗa suru arɛ ai bi; ai gaa yeenya sɔɔ nwanɛrɛ, i nwari shɔkɛ Ɗa nyarubii. 7 i kpai i si mɛnɛ vɔshɔ kopi atu ziti.

8 Bulus torɛ a Yahudawayi ɗɔ-ɔ̃nɛ, a nwari shɔ Ɗa nyarubii a kakani ji nta seeti ɓa, pɛli shɛlɛ taati a ɗɔwakɔ, masinya ayini u ɗɔgbete pɛli nyaba gbete gɔ̃yi bii aru Ɗa lakpati ɔ̃nɛ. 9 Ama gãsiyi i sisɨn lakitɔ i ji ã-sisɨn ɓa a Bulus nyani ɓa, a mɔɔyi ɗekɨn i nwanya kɔ̃linɛtɔ aru Uɓeyelapa nyabani. Kɛɗɔn Bulus yai ɗɔbiirɛ a tuu jadɔɔyirɛ yɛnɛ u ɗɔbii, ko-pi leepiya masi nyatɔ ayini u ɗɔgbete matiyi vi a jàá a Tiranu. 10 Bulus pɛliji ɗɔkɔ saa ziti, aru shɔ gbete i a ɔ̃nɛni a tipi Asiya i nta Uɓeyelapa nyarubiirɛ, Yahudawayi a shɔ gbeteyi i ɓa Yahudawayi ɓa ni kpai.

11 A ɗauni Ɗalapa pɛli vishonɛ vibii-zaanɛ gbete shɔ ji pɛli ɓa shãɓa shovi shonɛ a Bulus. 12 Ko shɔ tuu u hankashi ko fãrã gbete pɛli vishonɛtɛ awuni ni shɔu n ti shɔvɔrɔ, i vɔrɔ gatitɔ, suru kɔ̃linɛ shɛtɔ ai biini. 13 Yahudawa gãsiyi gbete i raki a yukoo-yukoo aru i shɛshi suru kɔ̃linɛyi i tɔnɛyi sho vishonɛ a Uɓeyelapa Yesɔ nii, i geli suru kɔ̃linɛyi nɛ, n ãsɔɔnyatɛ a Yesɔ nii, gbete Bulus nwari shɔ yɛ. 14 Ai tete jaayi i si mazii javɔshɔyi, pɛ yupɛ̃ni shɔ lansi ɓɛɛ jaayi u nii nɛ Sikeba, i piti i pɛli ji ɗɔkɔ.

15 Ama suru kɔ̃linɛ geliyi nɛ, << N zɛ Yesɔ tɛ, n zɛ Bulus tɛjo; ɔ ɓɛɛkɛ piya?>>

16 Jagbete u suru kɔ̃linɛ biini, kɔbiirɛ a shishiyi a bi tɛyi kakarɛ kpai, i yurɛ i yaa wɛrɛurɛ bi waati nɔ̃rɔ̃kɔ sheeli. 17 Shɔ gbeteyi i ɔ̃nɛni a Apisa kpai, Yahudawa a shɔ gbeteyi i ɓa Yahudawyi i nta rum nankɔ kɛɗɔn seeti pɛliyi fɛ̃ɛm, i bassi Uɓeyelapa Yesɔ nii rɛ. 18 Shɔzɛ waanɛ gbeteyi i ã-sisɨn a Yesɔ bi yɛ, i shɛshiyi i yuutɔ i ɗɔgbete i shayi i ruuvini a shɔ ɗekɨn. 19 Shɔzɛ waanɛ gbeteyi i nta laapaayɛ i n-tiyi laabeenerɛ kpai, i too a yaa a shɔ ɗekɨn. I ɓasi saa laabeeneyi, si piti kpai si azurfa laa laa ziti atu kopi ɓa laa ziti atu kopi. 20 A nyabankɔ Uɓeyelapa nyaruubii yɛ ɗekɨn u ɗɔgbete raaɗɔyɛ a kakani.

21 A knti vimkɔ Bulus pɔ̃ au sisɨn nɛnkɛ zaa tipi Makidoniya gbete a Akaya nɛ, nɛn yɛkɛ Urushalima. A shanɛ, <<A knti gbete nkɛ yɛ ɗɔwanɛ, ɔ̃rintɛ kaka jazɨng akɔrɔ n zɛ Roomatɔ.>> 22 A kɨnti gbete shoshiyi u shɔ naapɔ̃nɛtɛ ziti, kɛ Timoti a Eratu yɛnɛ Makidoniya, u biba shi ɓɛɛ pɛjo a tipi Asiya kɔ.

23 A ɗawukɔ nyayuu aru Uɓeyelapa nyarubii waanɛ Apisa. 24 Shɔ gbaa waanɛ wɔɔ u nii nɛ, Demitiriu nya yunɛm gayuu au bikɔ gbete shovi shonɛ a a zurfa u tɔ̃ri Artimi jasuru jaaɗaa, au lumomkɔ u shɔ vishonɛyi i kpaa saa tɔ waanɛ. 25 Kɛɗɔn tolinyayirɛ kpai a shɔ gbeteyi i vishonɛ nazɔɔ gbete ayi ɓɛɛni a geliyi nɛ,<<Mooyi ɔ zɛ tɛttɔ u kpaa saa tɔ̃vɨn ji a nyaba vishonɛnkɔ, 26 Ɔ ji ɔ yuu ɔ ɗɔɔ zɛnɛ ɔ ɗɔɔ ntanɛ vigbete jaa a shɔ ɓau niinɛ Bulus pɛliyɛ ɔ zɛ tɛttɔ ɗaki shɔ fɛ̃ɛm. Bulus shanɛ, ɗa gbete shɔ tɔ̃ri a naa yɛ ɓa ɗa tɔ̃vɨn ɓa, Ɗa shaariu tɛttɔ a shɔzɛ waanɛ i ɗɛkɨn a tipim Apisa, a shɔ gãsiyi gbete i a tipi Asiya ni kpai. 27 Yukɔnɛ aɗɔn, u vishonɛm nii yɛ vɔtɔ. Ɓa shɔnkɔ sheeli ɓa, jaaɗa Aritima pɛ̃niba gbete kopiya ɓɛliyɛ a tipi Asiya a kootipi kpai shɔyɛ risikɛ pɛtɛlɛǃ>>

28 Naa mooyi i nta vimtɛ ɗɔkɔ i sisɨn lɛsi fɛ̃ɛm, i shatinya i piti i shanɛ,<<Bassinɛ a Aritima Apisa bi!>> 29 Kɛɗɔn shɔ koowi piti i sisɨn lɛsirɛ i gaa nyashaatinɛrɛ. I sã Gayu rɛ a Aritaku ni shɔ tipi Makidoniya, gbeteyi i radɔɔ a Bulus turɛ yɛnɛ ɗɔgbete mooyi tolinya aɗɔnyɛ. 30 Bulus tɔnɛn to mooyi i ɗɔbii tɔ ama shɔ gbete i ã sisɨn a Ɗa bi i zariutɔ. 31 Gãsi yupɛ̃ni tipi Asiya gbete i ɓɛsaa a wuniyɛ, ikɔma i shoshiu jaatɔ, i gakiu nɛ vɔrɔ u nwetiu ɓa u to mooyi i ɗɔbiirɛ ɓa. 32 Shɔzɛ gbeteyi tolinya kpai ikɔma i ji zɛyi i yuu ɓa, i ji zɛ vi gbete i tolinya au yuuni ɓa, wɔɔyi shatinya i sha vim, wɔɔyi i sha sɔ̃nji viwaa. 33 Gãsi Yahudawayi dɔ̃naa Alezada a ɗekɨn, a ɗe naa nɛ shou ɔ̃ a nyani shok nɛn nwanyapɛ, 34 Naa i zɛtɛ nɛu pɛ Yahudawa, i kpai i shatinya a nyazɔɔ i sha vi gbete nɛ, <<Bassi a Aritima Apisa biǃ >>I pɛli nankɔ yɛnɛ dɔɔɗa ziti.

35 A kɨntiuni kpai shɔ vibeenɛ koomo pɔ̃rɛ i vẽnyarɛ, a shanɛ, <<Ɔ shɔ Apisayi! Kopiya zɛ tɛttɔ koomo Apisa ukɔ ɔ̃rɛ gbete zɛ jaaɗa pɛ̃niba Aritima jo a tari wɔsɔ-wɔsɔ gbete shishi a lapa yɛjo. 36 Shɔwɔɔ yɛ masinya ɓa a rumni ɓa, pɛ vitɔ̃vɨng ɔ wali ruu pɛ a sisɨn, ɔkɔɔ gɨnnɛ yuvãli 37 Shɔ gbete ɔ n-tiyi aɗɔm, i ji ɓɔɔ vi ɓa jaaɗa Aritima ni ɓa, i ji nwanya kɔ̃linɛ wɔɔ ɓa au ɗa yuuni ɓa. 38 Ama Demitiriu a ɓɛsaayi shɔ vishonɛ i ruu wɔɔ kɛ ɔ̃nɛ aɗɔn, jaa ruu yeenɛ yɛm a shɔ ruunwanɛyi i a ɗɔn; i n ti ruu ji a ɗɔwakɔ. 39 Asitɛɗɔkɔ viwɔɔ kɛ ɔ̃nɛ ɗɔn gbete ɔ kasiyɛ, ɔ yɛ yisikɛ ɗɔ-ɔ̃nɛ tɔ̃vɨn gbete jaa tipiyi i pɛliyɛ. 40 U a tete yukɔnɛ ukɛ tɔnɛ u tɛ ruu gbete nyayumi nɛm, aru iviya u ji zɛ vi gbete pɔ̃rɛ shɔ yusinyarɛ ɓa.>> 41 A knti gbete sha vim yɛ kɛɗɔn a ã kopiya naarɛ nɛyi yɛnɛ.