1 Jezu zâ kumu ye gâ lafɔ lə Anda Ndjapä ə wû alayïrishi ə̂në əndje sə̂ kə ko ngendja gâ lə sandugu lə Anda Ndjapä nə kɔ. 2 Tshə wû ndje ə̈bə̈ yashe koya tə əyïəyo ə̂në tshə kô ə̂lê mea bishi gâ lə sandugu nə kɔ. 3 Tshə pâ: «Djatra əpʉ, mə pa kə e: yashe koya səye ə̂në tshə sə tə əyïəyo kɔ, tshə kô ngendja ə rô ə̂dû azü nə nɔ̂ gâ ye. 4 Mbrə ə̂në ə̂dû azü səye nɔ̂, əndje kô kʉtə̂ tshepa ngendja nə̂ əndje ə̂në ərə kə mbrə də nə guta gu ne kɔ â ko gâ lə sandugu nə kɔ. Bale, ənə̂ ye, tshə kô ngendja nə̂ ye nɔ̂ ə̂në tshə sə̂ də nə ndə kə yɔ də rəgo kɔ.»

5 Alabə̈ azü sə̂ kə tra Anda Ndjapä ə̂në əndje mbrə̂ də aə̂rɔ̂ aəkpʉ də aə̂rɔ̂ aərə ə̂në azü kô kə Ndjapä ə̂në əndje gâmba də Anda nə kɔ. Jezu pâ kə əndje ə pa: 6 «Ə̈bə̈ alɔ sə kə sə je ə̂në aərə sə̂ nɔ̂ ə̂në e sə kə wu nə kɔ, ə̈bə̈ əkpʉ bale sə sə kə sə pə gâ pâ ə̈bə̈ ngâ nə ne ə sə kə ngɔ nə nɔ̂ gâ tʉ.»

7 Əndje yû ətshə ə pa: «Awoyisə̂ ərə, ərə səkɔ sə kə wutu nə gorɔ? Azü sə kə wusə̂ nə tə̂ ərə yekɔ ə pa ərə nə ndô trö gâ ye?» 8 Jezu kîrə əpʉ ə pa: «Ala e në ka ə̈bə̈ əzü bale frɔ e frɔ ne, mbrə ə̂në ə̂kpû azü sə kə na də əɨrɨ əmə â əzü bale bale sə kə pa nə ə pa: "Əmə də̂ Kristə nə!" Wala kwatəndje: "Alɔ nə lî gâ ye!" E zä äwä əndje zä ne! 9 Alɔ ə̂në e sə kə dji ndə əpʉ akowɔ də əpʉ awlra lə takpa tə̂ azü, awa mbrə̈ e mbrə̈ ne. Mbrə ə̂në aərə səkɔ lï ndə kə wutu nə angbʉlînə, bale, tshepashɔ sə sə kə nglɔ nɔ̂ kʉ pə kôto ne.» 10 Bale, Jezu kwâtə̂ye ə pâ: «Ə̈bə̈ marä sə kə afɔ ndə kə tɔ kowɔ də ə̈bə̈ marä, ə̈bə̈ əgɔngerə sə kə afɔ ndə kə tɔ kowɔ də ə̈bə̈ əgɔngerə. 11 Ashɔ sə kə meme tə̂ ye tə bandanə tə̂ aətshe na na ye. Bale, aəmbrʉ arəka sə kə ka azü â əgo sə kə mi azü tə bandanə lə aətshe na na ye. Alabə̈ aərə sə kə wutu nə mâ lafɔ ə za awa gâ lə azü.»

12 «Bale, angbʉlînə ndə kə pa aərə sə nɔ̂ wutu, mbrə əmə, azü sə kə tegbɔ e ə gi əyo tə̂ e, əndje sə kə na də e gâ lə aanda aangbɔ ndə kə wa ngbanga gâ lə kumu e, əndje sə kə wli e gâ lə anda kânga, əndje sə kə na də e gâ ətshi alayïngerə də əgbro azü əgɔ. 13 Aərə səkɔ sə kə za äwä kə e ndə kə pa e pa əpʉ nə̂ əmə kə azü. 14 E lï tshelə lï angbʉlînə ə pa e pa atâ ndə kə da əpʉ tə̂ e ne. 15 Mbrə ə̂në, əmə də ə̂tə̂ əmə, mə sə kə za əpʉ gâ lə ama e ndə kə pa e pa nə də kə wusə̂ ərə ə̂në ə̈bə̈ əyïəpʉ nə̂ e bale lï lï ndə kə ro e də əpʉ wala ə shera əpʉ ama e ne. 16 Alabä e də alayï e də alaye e də alayɔ e gâ ndə agbɔbəngâ e sə kə ka e kə azü, əndje sə kə wo alabə̈ azü ngbatshe lə takpa tə̂ e. 17 Tshelə azü nɔ̂ sə kə wəra tə̂ əndje tə̂ e mbrə əmə. 18 Bale, ə̈bə̈ sukumu e kpiabale sə sə kə te gâ tʉ ne. 19 Kədə e gbɔgbɔ tə̂ e lə aərə əyo səkɔ nɔ̂, e sə kə she lə kuzu.»

20 «Kədə e wu atrugu â əndje za gala Jeruzalamə tshakpa, e wusə̂ nə ə pa alɔ kə ndɨ gala nə lï gâ ye. 21 Bale, azü ə̂në əndje sə kə sə lə ashɔ əgɔ Jude, əndje kpë gâ pâ akaga. Azü ə̂në əndje sə kə sə lə Jeruzalamə, əndje wütu lə nə. Azü ə̂në əndje sə kə sə lə akəndɨ, əndje dö tə̂ əndje dö ə gü gâ lə gala nə ne. 22 Mbrə ə̂në aəlo nə səkɔ sə kə sə tə alɔ əkɔ nə̂ Ndjapä ndə kə pa əpʉ aərə nɔ̂ ə̂në əndje tâ gâ lə Fraka nə̂ Ndjapä kɔ, ndəma nə wutu. 23 Əyo gâ pâ ayashe ə̂në əndje sə kə sə də əndu gâ ndə ayashe ə̂në aneshe sə kə ɔ angɔ əndje tə̂ tshekɨ nə səkɔ. Mbrə ə̂në azü əgɔ səkɔ sə kə wu əyo tə bandanə, əkɔ nə̂ Ndjapä sə kə te gâ pâ əndje. 24 Əndje sə kə tshu kuzu ə̈ngrʉ̈ kamba, amarä sə kə ko əndje ə gu na ye də əndje tə akanga gâ lə aəgɔ nə̂ əndje, amarä ə̂në əndje wusə̂ Ndjapä wu ne kɔ, əndje sə kə dɔ tshelə gala Jeruzalamə nə ʉrrr kane â alɔ nə̂ əndje ndə kə sə gâ pâ azü Jeruzalamə nə sə kə nglɔ nə.»

25 «Azü sə kə wu alabə̈ aəmbrʉ aərə lə ala alɔ də ala yipʉ də ala aambrepe. Lə aəgɔ tshepashɔ, âgbɔ̂ awa sə kə i azü gâ tə̂ nə mbrə əkɨ ə̂ngû əngbrʉ də kplaka ə̂ngû. 26 Azü sə kə tshu nə də awa aərə əyo ə̂në ə sə kə te gâ pâ azü pâ ashɔ kɔ, Ndjapä sə kə meme aawlra tshelafɔ. 27 Bale, azü sə kə wu Əgblə nə̂ Əzü ə̂në tshə sə kə gu nə lə andra də awlra nə̂ ye nɔ̂ də ə̂yî ye nɔ̂ kɔ. 28 Alɔ ə̂në aərə səkɔ vɔtə̂ kə wutu nə, e gämba tə̂ e ndji ə zä kumu e gâ lafɔ mbrə ə̂në alɔ ndə kə pa Ndjapä wutu də e lə aərə əyo ndô trö gâ ye.»

29 Mandânə, Jezu pâ əpʉ kəwû səye kə əndje ə pa: «E wü ayɔ figə də ə̂dû aayɔ nɔ̂. 30 Alɔ ə̂në e wu atafa akako nə vɔtə̂ kə tɔ tə̂ ayɔ nə, e wusə̂ nə də ə̂tə̂ e ə pa tshekɨ ngû yavrɨ ndô trö gâ ye. 31 Äwä bale ndje, e-e, alɔ ə̂në e wu aərə səkɔ â wutu, e wüsə̂ nə ə pa Əgɔngerə nə̂ Ndjapä ndô trö gâ ye. 32 Djatra əpʉ, mə pa kə e: azü tshe kpəsəye sə sə kə tshu nə nɔ̂ ne â aərə səkɔ nɔ̂ sə kə wutu nə. 33 Tshelafɔ də ashɔ sə kə ro nə, bale, aəpʉ ama əmə sə sə kə ro nə bale ne.»

34 «E gbɔ̈ ndə akwa e! E zä lɔsu e zä nɔ̂ kʉ gâ tə̂ kə zɨ ərə də kə ndju ərə ro pâ nə ne. E lï tshelə e lï gâ pâ kə sə e pâ ashɔ səye ne. Kədə e gbɔ ndə akwa e gbɔ ne, əlo nə sə kə te gâ pâ e, e sə sə kə wusə̂ nə ne. 35 Mbrə ə̂në ə sə kə te mata gbânda gâ pâ azü nɔ̂ pâ ashɔ nɔ̂. 36 E sə̈ də ə̈kü ala e ə yü Ndjapä alɔnɔ̂ ndə kə pa Ndjapä za awlra kə e ndə kə kpe aərə ə̂në ə sə kə wutu nə kɔ, ka e ka gâ lafɔ gâ ətshi Əgblə nə̂ Əzü.»

37 Də alɔ, Jezu yîsə̂ əpʉ kə azü lə Anda Ndjapä. Də tsheləbu, tshə wûtu lə gala nə ə sə̂ mâ pâ kaga ə̂në əndje dji əɨrɨ nə ə pa kaga aayɔ ɔlivə kɔ. 38 Pə-ê də əzɨ, azü nə nɔ̂ nâ gâ tə̂ ye mâ lə Anda Ndjapä nə ndə kə pa əndje dji əpʉ nə̂ ye.