1 Ndə ə̈bə̈ alɔ, Jezu kâ gâ tə̂ ama dala ə̂ngû əgɔ Jenezaratə. Ə̂kpû azü gbûgbru tə̂ əndje trö də ətshə ndə kə dji Əpʉ nə̂ Ndjapä. 2 Tshə wû əgbro aâgbâ bishi tə̂ ama ə̂ngû nə. Aawopra agiangû nə jêrə lə əgbro aâgbâ nə gâ ye ə sə̂ kə yutu agbânda nə̂ əndje. 3 Ə̈bə̈ əgerə âgbâ nə bale sə̂ tə ənə̂ Shemɔ. Jezu ô gâ lə nə ə pâ kə Shemɔ nə ə pa tshə gi əgerə âgbâ nə gâ la ə̂ngû nə. Mandânə, tshə sə̂ gâ tʉ gâ lə nə ə vɔ̂tə̂ kə yisə̂ əpʉ kə ə̂kpû azü nə. 4 Alɔ ə̂në tshə yîsə̂ əpʉ nə ə kâ gâ ye kɔ, tshə pâ kə Shemɔ nə ə pa: «Gï əgerə âgbâ nə gâ ə̂sə̂ dəli ə̂ngû nə ə wlï gbânda nə ə prä agiangû.» 5 Shemɔ nə pâ kə ətshə ə pa: «Âgbɔ̂ əzü, ä wû əyo də tsheləbu səye ora, ä zâ ə̈bə̈ ərə zâ bale ne. Mbrə əpʉ nə̂ zə nə, mə sə kə wli gbânda nə.» 6 Əndje wlî gbânda nə ə kô agiangû ə rô pâ nə â tshelə gbânda nə yîndə kə sɔ nə. 7 Əndje mâ kəna əndje kə agbɔbəngâ əndje ə̂në əndje sə̂ lə ə̈bə̈ əgerə âgbâ nə kɔ ndə kə pa əndje na ə to kəna əndje tə̂ ərə nə kə alane. Əndje nâ, əndje vɔ̂ agiangû nə əndje sû əgbro aâgbâ nə bishi nɔ̂ â əgbro aâgbâ nə bishi nə yîndə kə li ə̂ngû. 8 Alɔ ə̂në Shemɔ Piarə nə wû ərə sə̂ rəkɔ, tshə gbə̂te gâ tshekudu Jezu ə pâ kə ətshə ə pa: «Âgbɔ̂ Əyïngerə, gï tə̂ zə ngrʉ̂ tə̂ əmə, mbrə ə̂në mə sə tə əyïnyaka.» 9 Awa mbrə̂ Shemɔ nə də azü nə nɔ̂ ə̂në əndje sə̂ ngotə̂ ye kɔ mbrə agiangû nə ə̂në əndje kô əndje rô pâ nə gâ ye kɔ. 10 Awa mbrə̂ ndje Zake də Zââ, aləvu Zebede ə̂në əndje sə̂ tə agbɔbəngâ Shemɔ nə kɔ. Bale, Jezu pâ kə Shemɔ nə ə pa: «Kätə̂ awa gâ ye, mandânə səye, bə sə kə sə tə awopra azü.» 11 Bale, əndje gû də əgbro aâgbâ nə gâ tə̂ ama ə̂ngû nə ə tshî aərə nə̂ əndje nɔ̂ tʉ ə zâ äwä Jezu nə.

12 Ndə ə̈bə̈ alɔ, Jezu sə̂ lə ə̈bə̈ gala tshelə əgɔ nə. Ə̈bə̈ koshe ə̂në broma zâ tshekotə̂ ye nɔ̂ kɔ sə̂ ndje lə əgɔ nə. Tshə wû Jezu ə tê gâ tshekudu ye ə zâ kumu ye su ashɔ ə kɨ̂ ə̂sə̂ əyo tə̂ ye kə ətshə ə pâ: «Âgbɔ̂ Əyïngerə, kədə bə yində nə, bə lï ndə kə mbrə ndə kə pa akwa əmə sə mvo.» 13 Jezu yî kəna ye ə gôro ətshə ə pâ kə ətshə ə pa: «Mə yîndə nə gâ ye, akwa zə nə sə̈ mvo.» Kʉ pə kôto səkɔ, broma nə kâtə̂ ye. 14 Mandânə, Jezu zâ ama kə ətshə ə pa: «Pä ndə nə pä kə ə̈bə̈ əzü bale ne. Nä ə mä tə̂ zə kə awotokrɔ ndə kə pa tshə wu əbə, ə tö əkrɔ mata ə̂në âgbɔ̂ əpʉ nə̂ Mayïzə yû tshuku nə kɔ ndə kə pa azü nɔ̂ wusə̂ nə ə pa broma nə̂ zə nə kâ gâ ye.» 15 Əɨrɨ Jezu zâ ətshe kwatəndje lə ama azü nɔ̂ ro na ye. Azü kpû ə kpû gâ ngotə̂ ye ndə kə dji əpʉ nə̂ ye ndje ndə kə pa tshə grɔ arəka tə̂ əndje. 16 Alɔnɔ̂, Jezu gbə̂tɔ tə̂ ye lə takpa tə̂ azü nə ə nâ mâ lə ngbûndû ndə kə yu Ndjapä.

17 Ndə ə̈bə̈ alɔ, Jezu sə̂ kə yisə̂ Əpʉ Ndjapä kə azü. Afariza də aawoyisə̂ âgbɔ̂ əpʉ sə̂ lə takpa tə̂ azü nə. Əndje âfɔ lə aəgɔ nɔ̂ lə Galile də Jude, mâ Jeruzalamə ndje. Awlra nə̂ Əyïlingû sə̂ gâ pâ Jezu â tshə grɔ̂ arəka tə̂ azü. 18 Alabə̈ azü zâ ə̈bə̈ koshe ə̂në tshə sə̂ tə wurtʉ kɔ gâ pâ klekpa ə nâ də ətshə. Əndje prâ äwä ndə kə li də ətshə gâ lə anda ndə kə za ətshə gâ ətshi Jezu. 19 Bale, əndje sɔ̂tə̂ äwä sɔ̂ ne mbrə ə̂në azü rô pâ nə gâ ye. Əndje ô də ətshə gâ pâ anda nə ə sɔ̂ mbage kumu anda nə ə jêrə də ətshə də klekpa nə gâ lə takpa tə̂ azü nə, gâ ətshi Jezu nə. 20 Ə̂në Jezu wû lɔsu əndje kɔ, tshə pâ kə koshe nə ə pa: «Koshe! Tshelə anyaka nə̂ zə gbâ gâ ye.» 21 Aawoyisə̂ âgbɔ̂ əpʉ nə̂ Mayïzə nə də Afariza nə vɔ̂tə̂ kə li tshelə əndje ə pâ: «Tshə sə tə əde â gu Ndjapä kɔ? Əde kə lï ndə kə gba tshelə anyaka a? Kʉtə̂ Ndjapä tshi!» 22 Bale, Jezu wûsə̂ əpʉ ə̂në ə sə̂ tə̂ lɔsu əndje kɔ ə kîrə əpʉ kə əndje ə pa: «Mbrə yekɔ də̂ e sə də âkâ əpʉ rə tə̂ lɔsu e kɔ? 23 Ndə kə pa kə əzü ə pa: "Tshelə anyaka nə̂ zə gbâ gâ ye", wala: "Äfɔ ə nä ana", ənə̂ta kə gbɔ gbɔ ne? 24 Mə yində kə yisə̂ nə kə e ə pa Əgblə nə̂ Əzü sə də awlra ndə kə gba tshelə anyaka pâ ashɔ səye.» Bale, Jezu pâ kə wurtʉ nə ə pa: «Mə za ama kə əbə: Äfɔ ə zä klekpa nə̂ zə ə gü na ye gâ ndə zə.» 25 Trale, koshe nə âfɔ lə ala azü nə nɔ̂ ə zâ klekpa nə ə̂në tshə shô gâ pâ nə kɔ ə zâ äwä anda nə̂ ye də kə mbe Ndjapä lə ama ye. 26 Kumu azü nə nɔ̂ kpê pâ əndu əndje. Əndje mbê Ndjapä, â awa mbrə̂ əndje â əndje pâ: «Kpəsəye, a wû aərə ə̂në ə rô pâ kumu əzə̂ gâ ye.»

27 Mandânə, Jezu wûtu gashu ə wû ə̈bə̈ aworɔ ngendja lapɔ ə̂në tshə sə̂ gâ tʉ gâ ə̂sə̂ kosəra nə̂ ye kɔ, əɨrɨ ye kə də̂ Levi. Jezu pâ kə ətshə ə pa: «Zä äwä əmə!» 28 Levi nə âfɔ ə tshî aərə nə̂ ye nɔ̂ tʉ də kə za äwä Jezu nə. 29 Mandânə, Levi nə mâ ə̈bə̈ sandaga mâ lə anda nə̂ ye mbrə Jezu nə. Ə̂kpû aaworɔ ngendja lapɔ də alabə̈ azü sə̂ kə zɨ rəgo də aəndje. 30 Afariza də aawoyisə̂ âgbɔ̂ əpʉ nə̂ əndje vɔ̂tə̂ kə pa tə̂ atrawaya nə̂ Jezu nə ə pâ kə əndje ə pa: «Mbrə yekɔ də̂ e zɨ ərə ə ndju ərə də aaworɔ ngendja lapɔ də alayïnyaka bale kɔ?» 31 Jezu kîrə əpʉ kə əndje ə pa: «Azü ə̂në tshelə akwa əndje sə yera ambanə kɔ, əndje yi yində kə na gâ ndə awombrə ayɔ rəka ne. Bale, kʉtə̂ alayïrəka kə yində kə na gâ ndə ye. 32 Mə nâ nâ ndə kə e aə̂rɔ̂ azü ne, bale mə nâ ndə kə e alayïnyaka ndə kə pa əndje tshi äwä angbrɔ kə mbrə aərə nə̂ əndje tʉ.»

33 Əndje pâ kə Jezu ə pa: «Atrawaya nə̂ Zââ Batistə də aəndje nə̂ Afariza sə kə ru tshelə əndje tə̂ rəgo tə mandʉnə ə sə kə yu Ndjapä. Atrawaya nə̂ zə, ənə̂ əndje, sə kə zɨ ərə ə sə kə ndju ərə.» 34 Jezu kîrə əpʉ kə əndje ə pa: «E lï ndə kə pa e ru tshelə azü ə̂në əndje ê əndje ndə sandaga kə ko tə̂ koshe də yashe ə̂në koshe nə daka pə lə takpa tə̂ əndje kɔ a? Bale ne! 35 Ə̈bə̈ alɔ sə je ə̂në əndje sə kə za äkɔ̈ yashe nə ndə kə ro də ətshə tə̂ azü nə. Tə̂ alɔ nə səkɔ də̂ azü nə lï ndə kə ru tshelə əndje tə̂ rəgo nə.»

36 Jezu pâ əpʉ kwatəndje kə əndje lə kəwû ə pa: «Ə̈bə̈ əzü wa ama tafa ləba wa ndə kə su gâ tə̂ əku angbrɔ ləba ne. Kədə əzü nə kə ma ərə rəkɔ, tshə ndɨ̂ tafa ləba nə gâ ye, ama nə ə̂në tshə wâ kɔ ə sə sə kə sə äwä bale də angbrɔ ləba nə ne. 37 Ə̈bə̈ əzü sɨ ndje tafa duva sɨ gâ lə angbrɔ anga akwa ne. Kədə əzü kə ma marä tə̂ ərə rə, tshelə anga akwa nə sə kə sɔ nə, duva nə sə kə tu gâ tə̂ ashɔ â anga nə sə kə ndɨ nə ngâ. 38 Əndje sɨ tafa duva gâ lə tafa anga akwa. 39 Kədə əzü kə ndju angbrɔ duva, tshə sə sə kə yində kə ndju tafa duva nə ne, mbrə ə̂në tshə pa ənə̂ ye ə pa angbrɔ nə tshɔ ənə̂ ye wââ.»