1 ናንጊና ናንጋ ጎዳ ጋላቱዋቴ፤

ሱንፆ ዒዛኮ ዔኤሉዋቴ፤

ማዾዋ ዒዛሲ ዴሮ ባኣካ ፔጋሲ ዻውዋቴ።

2 ናንጊና ናንጋ ጎዳም ጋላታ ዓይኑሞ ዓይናዹዋቴ፤

ዒዛኮ ዲቃሢ ሄርሺሳ ማዾዋ ቢያ ኬኤዙዋቴ።

3 ዱማዼ ሱንፆ ዒዛኮ ሄርሹዋቴ!

ናንጊና ናንጋ ጎዳ ኮዓ ዓሳ ቢያ ዎዛዾንጎ።

4 ናንጊና ናንጋ ጎዳንታ ዶዱሞዋ ዒዛኮ ኮዑዋቴ፤

ቢያ ዎዴ ዓኣፖ ካሮ ዒዛሲ ኮዑዋቴ።

5,6 ፆኦሲ ዓይላሢ ዓብራሃሜ ናይዮቴ!

ዒንሢ ያይቆኦቤ ናኣታ!

ፆኦሲ ማዼ ዲቃሢ ሄርሺሳ ባኮንታ ዒዚ ዒንጌ ዎጎንታ

ዒ ማዼ ዲቃሢ ሄርሺሳ ባኮዋ ማሊ ጶቂሡዋቴ።

7 ዒዚ ናንጊና ናንጋ ጎዳ ማዔ ፆኦዛሢኬ፤

ዎጋ ዒዛሲ ዓጮ ቢያይዳኬ።

8 ዒ ጫኣቄ ጫኣቁሞ ዒዛሲ ናንጊና

ዒ ዓይሤ ቃኣሎዋ ሺያ ሾይንቲ ሄላንዳኣና

ማሌ ጎይሣኬ።

9 ዓብራሃሜና ዒዚ ጫኣቄ ጫኣቁሞ

ዪሳኣቄም ሳላዺ ዒ ዒንጌ ዎዞ ዋሉዋሴ። ✝105፡9 ማዢ. ማፃ 12፡7፤ 17፡8፤ 26፡3።

10 ያይቆኦቤም ዒ ዬያ ዳምቤ ማሂ

ዒስራዔኤሌማኣ ናንጊና ጫኣቄያ ማሂ ዶዲሼኔ።

11 ዒማና ዒዚ፦ «ኔ ዴኔ ማሂ

ካኣናኔ ታ ኔኤም ዒንጋንዳኔ» ጌዔኔ። ✝105፡11 ማዢ. ማፃ 28፡13።

12 ዬይ ያዼ ማዔሢ ዔያቶኮ ፓይዳ ሚርጊባኣንቴ

ዬኖ ዓጬሎም ዔያታ ሾኦቺ ማዒ ዓኣንቴኬ።

13 ዬያ ዴሮ ኮራፓ ሜሌ ዴሬ ባንሢ

ፔቴ ዓጮፓ ሜሌ ዓጪ ባንሢ

ቤቲ ቤቲ ዔያታ ሜታዼኔ።

14 ዖኦኒያ ጌኔ ማዾ ዔያቶ ዑፃ ማዻንዳጉዲ ዒ ሃሺባኣሴ፤

ዔያቶ ዛሎሮ፦

15 «ታ ዶኦሜዞንሢ ሄሊፖቴ፤

ታ ማሊፆ ኬኤዛዚንሢ ዑፃ ፑርታ ማዺፖቴ» ጌዒ ካኣቶ ጎሬኔ። ✝105፡15 ማዢ. ማፃ 20፡3-7።

16 ዓጮይዳ ዒ ናይዚ ዔኤሌኔ፤

ሃኣኮ ጎዖ ባኣዚያ ቢያ ባይዜኔ። ✝105፡16 ማዢ. ማፃ 41፡53-57።

17 ዓይሌ ማዒ ሻንቺንቴ ዓሢ

ዮሴፔ ዔያቶኮ ቤርታሲ ዳኬኔ። ✝105፡17 ማዢ. ማፃ 37፡28፤ 45፡5።

18 ዒማና ቶካ ዒዛኮ ዓንጊ ዱፄና

ዒዛኮ ዑፃኣ ዓንጊና ቱኡቴኔ።

19 ዒዛም ሎንሢንቴ ቃኣላ ኩማንዳያ ሄላንዳኣና

ናንጊና ናንጋ ጎዳኮ ቃኣላ ዮሴፔ ዎይታቴያ ጌዒ ዛጌኔ። ✝105፡19 ማዢ. ማፃ 39፡20—40፡23።

20 ዬካፓ ካኣቲ ዓሲ ዳኪ ዒዛ ቡሊሴኔ፤

ዓሶ ዎይሣሢያ ዒዛ ኬሴኔ። ✝105፡20 ማዢ. ማፃ 41፡14።

21 ማኣሮኮ ዓዳሢ

ፔኤኮ ዓኣ ባኮ ቢያ ዎይሣያ ዒዛ ማሄኔ። ✝105፡21 ማዢ. ማፃ 41፡39-41።

22 ዬይያ ሱኡጎ ዒ ፔ ዔራ ጎይፆ ማዺሻንዳጉዲ

ዼኤፖ ዓሶዋ ዔራቶ ዔርዛንዳጉዲኬ።

23 ዒስራዔኤሌ ጊብፄ ዓኣዼኔ፤

ያይቆኦቤያ ካኣሜ ዓጫ ሙኬ ዓሲ ማዒ ናንጌኔ። ✝105፡23 ማዢ. ማፃ 46፡6፤ 47፡11።

24 ናንጊና ናንጋ ጎዳ ዴሮ ፔኤሲ ኮሺ ሚርጊሼኔ፤

ዔያቶኮ ሞርኮይዳፓ ባሼ ዶዲ ማሄኔ።

25 ፔኤኮ ዴሮ ዬይ ዓሳ ዒፃንዳጉዲ

ዒዛ ዓሶ ዑፃ ፑርቱሞ ማላንዳጉዲ

ዒኖ ዔያቶኮ ዱማሴኔ። ✝105፡25 ኬሲ. ማፃ 1፡7-14።

26 ዒዛኮ ዓይላሢ ሙሴ

ዒዚ ዶኦሬ ዓኣሮኔያ ዳኬኔ። ✝105፡26 ኬሲ. ማፃ 3፡1—4፡17።

27 ዔያታ ፆኦሲ ፔ ዎልቆና ማዻ ማላቶ ዬያቶ ባኣካ

ዲቃሢ ሄርሺሳ ባኮዋ ካኣሜ ዓጮይዳ ማዼኔ።

28 ፆኦሲ ሳዖ ዹማንዳጉዲ ማሂ ዹሚሼኔ፤

ያዺ ማዔቴያ ጊብፄ ዓሳ ዓይሢፆ ዒዛሲ ኩንሢባኣሴ። ✝105፡28 ኬሲ. ማፃ 10፡21-23።

29 ዋኣፆ ዔያቶኮ ዒ ሱጉሢ ማሄኔ፤

ሞላሢያ ዎዼኔ። ✝105፡29 ኬሲ. ማፃ 7፡17-21።

30 ዔያቶኮ ዓጮንታ ካኣቲ ማኣራኣ ዓቱዋንቴ

ፓንቃ ኩሚ ካራ ባይዜኔ፤ ✝105፡30 ኬሲ. ማፃ 8፡1-6።

31 ፆኦሲ ዓይሣዛ፥ ዉፃሌ ሻኣሬጉዴያ ሙኬኔ፤

ጉኡኔያ ዓጮ ዔያቶኮ ባይዜኔ። ✝105፡31 ኬሲ. ማፃ 8፡16-17፤ 20፡24።

32 ዒሮ ዔያቶኮ ዒ ሻቺ ማሄኔ፤

ሳዖ ዔያቶሲ ቢያ ጉጉንሢ ዱኬኔ።

33 ዎይኖ ሚፆንታ ቤሌሶዋ ባይዜኔ፤

ዓጫ ዓኣ ሚፆ ሜንሢ ዒ ጋኣጬኔ። ✝105፡33 ኬሲ. ማፃ 9፡22-25።

34 ፆኦሲ ዓይሣዛ ዓቢሢ ሙኬኔ፤

ሃይማኬ ጌይንቱዋ ማካ ቤዞና ዬዔኔ።

35 ሳዖይዳ ባቃሌ ባኮ ቢያ ሙዔኔ፤

ዔያቶኮ ጎሽኮና ጎዦዋ ፒፂ ባይቄኔ። ✝105፡35 ኬሲ. ማፃ 10፡12-15።

36 ዔያቶኮ ዓጮይዳ ዓኣ ቆልሞኮ ቤርቶ ናኣቶንታ

ዓሶኮዋ ቶይዶ ናኣቶ ቢያ ዎዼኔ። ✝105፡36 ኬሲ. ማፃ 12፡29።

37 ዒማና ዒስራዔኤሌ ዓሳ ቢሮንታ ዎርቆንታ

ጫኣኒ ዔኪ ኬስካንዳጉዲ ዒ ማዼኔ፤

ዔያቶ ዜርፃፓ ፔቴታዖ ጊንሢም ዓቲባኣሴ።

38 ጊብፄ ዓሳ ዔያቶ ሚርጌና ዒጊጬሢሮ

ኬስኪ ዔያታ ዓኣዻኣና ዎዛዼኔ። ✝105፡38 ኬሲ. ማፃ 12፡33-36።

39 ሻኣሮ ዔያቶም ጎኦቦ ዓቢላጉዲ ጌሤኔ፤

ዋንቶ ታሚ ዔያቶም ዒ ፖዒሴኔ። ✝105፡39 ኬሲ. ማፃ 13፡21-22።

40 ዔያታ ዒዛ ዖኦጫዛ ፑሮ ዔያቶም ዒ ዳኬኔ፤

ጫሪንጮ ካሦዋ ሙኡዚ ሚሼኔ። ✝105፡40 ኬሲ. ማፃ 16፡2-15።

41 ላሎ ዒ ዳርዜም ዋኣሢ ጎዔኔ፤

ዓሲ ናንጉዋ ዳውሎይዳ ዎርዚጉዲ ዎቴኔ። ✝105፡41 ኬሲ. ማፃ 17፡1-7፤ ፓይ. ማፃ 20፡2-13።

42 ፔኤኮ ዓይላሢ ዓብራሃሜም ዒ ዒንጌ

ዱማዼ ዎዞ ቃኣሎ ማሌኔ።

43 ዴሮ ፔኤኮ ዎዛና

ዒ ዶኦሬዞንሢያ ዒላሺሲ ኬሴኔ።

44 ሜሌ ዴሮ ዓጮ ዔያቶም ዒንጌኔ፤

ዬያታ ላቤ ላቢፆ ሃኣታ ዔኬኔ። ✝105፡44 ዒያ. 11፡16-23።

45 ዬይያ ዳምቦ ዒዛኮ ዔያታ ካፓንዳጉዲ

ዎጎ ዒዛሲያ ማዺ ኩንሣንዳጉዲኬ።

ናንጊና ናንጋ ጎዳም ጋላታ!