ዓይኑሞ ማፃኣፖ 58

«ባይዚፖ» ጌይንታ ዓይኑሞና ዓይኑሞ ሱኡጋሢ ዓይሣ ጎይፆ ካላሊንቴ ዳውቴ ካላሎ

ፆኦሲ ፑርቶ ዓሶ ዎጋንዳጉዲ ሺኢቂንቴ ሺኢጲሢ

1 ዒንሢ ዎይሣ ዓሳ!

ፒዜ ዒንሢ ጌስታ?

ዓሶም ጎኑሞና ሄኮ ዒንሢ ዎጋ?

2 ዬያ ዒንሢ ሃሺ ዒኖና ዒንሢ ፑርታ ባኣዚ ማሊ ቱካኔ፤

ሳዖይዳ ዒንሢ ማዻ ባካ ቢያ ፑርታ ሌሊኬ።

3 ፑርቶ ዓሳ ዒንዶ ጎጳ ዓኣዖ ዣኣሌያኬ፤

ሾይንቴማፓ ዓርቃዖ ዻባኔ፥ ሉኡዙሞዋ ዔያታ ጌስታኔ።

4 ዔያታ ሾኦሺጉዲ ዳኣኒናኬ፤

ዋይዚ ባይቄ ጎፖ ሾኦሺ ጉዴያኬ።

5 ጎፖ ሾኦዣ ዋዮ ፔኤሲ ቱጫሢ

ሾኦዦ ማርሻ ዓሶንታ ሳጎ ዓሶንታኮ ዑኡዞ ዋይዞ ዒፂኬ።

6 ፆኦሲዮ! ዬያቶ ዞቦጉዴ ፑርቶ ዓሶንሢኮ ዓጮ ሜንሤ፤

ባንጋሎዋ ዔያቶሲ ሾኦሌ።

7 ላኣሊንታዖ ጋፓ ዋኣሢጉዲ ዔያታ ባይቆንጎ!

ሂኢዦ ዔያታ ዱካዛ ዻዻቦንጎ!

8 ሃንታዖ ማኣሽኪ ጋፓ ዻኣዼጉዲ

ጊንሣ ሃሣ ፖዒ ዛጉዋ፥ ቡሊሢጉዲ

ዔያታ ማዖንጎ!

9 ዔያታ ዔርቲባኣንቴ ዓንጊሢጉዲ

ቱጊንቲ ኬኤሪንታንዳኔ፤

ፆኦሲ ፔኤኮ ዼኤፖ ዻጎና

ሼምፔና ዓኣንቴ ዜርቂ ዔያቶ ባይዛንዳኔ።

10 ጎሞ ዓሶኮ ኮማ ኮፂንታኣና ዛጋዖ

ፂሎ ዓሳ ዎዛዻኔ፤

ዔያታ ቶኮ ፔኤሲ ፑርቶ ዓሶ ሱጉፆና ማስታኔ።

11 ዬኖ ዎዶና ዓሳ፦ «ፂሎ ዓሳ

ፔኤኮ ኮዦ ማዾ ዛሎ ዒንጎ ባኮ ዔኬኔ፤

ሳዖይዳ ዎጋ ፆኦሲ ጎኔና ዓኣኔ» ጋዓንዳኔ።