ዓይኑሞ ማፃኣፖ 115

ፆኦሲም ኮይሳ ጋላታ

1 ናንጊና ናንጋ ጎዳሢዮ!

ኑጋይቴቱዋንቴ ኔኤኮ ናንጊና ናንጋ ናሹሞና

ጉሙርቂንቲፆናሮ ሱንፆ ኔኤሲ ቦንቼ።

2 ሜሌ ዴራ፦

«ዔያቶ ፆኦዛሢ ዎካ ዓኣዖ?» ዓይጋ ጋዓንዳይ?

3 ኑ ፆኦዛሢ ጫሪንጫኬ፤

ዒዚ ፔና ዎዛሳ ባኣዚ ማማዻኔ።

4 ዔያቶኮ ካኣሽኮ ፆኦዛ ጋዓንቴ

ዓሲ ኩቻ ቢራና ዎርቄናፓ ኮሺንቴያኬ።

5 ዻንጋ ዔያቶኮ ዓኣኔ፥ ጌስቲ ጌስቱዋሴ፤

ዓኣፒያ ናንጊኬ፥ ጋዓንቴ ዛጉዋሴ፤

6 ዋይዚ ዓኣኔ፥ ዋይዛያቱዋሴ፤

ሲኢዺ ናንጊታዖ ዼሁዋያኬ፤

7 ኩቺያ ናንጊኬ፥ ጋዓንቴ ሄሊ ዓርቁዋሴ፤

ቶኪ ናንጊታዖ ሃንቲ ሃንቱዋሴ፤

ፔ ጎርዦና ዑኡሲያ ዔያታ ኬሳኒ ዳንዳዑዋሴ።

8 ዬያጉዴ ባኮ ኮሻ ዓሳ

ዬያቶ ጉሙርቃ ዓሳኣ ቢያ

ዔያቶጉዴያ ማዖንጎ። ✝115፡8 ዓይኑ. 135፡15-18፤ ዮሃ. ፆፔዻ 9፡20።

9 ዒስራዔኤሌ ዓሲዮቴ! ናንጊና ናንጋ ጎዳ ጉሙርቁዋቴ፤

ዒንሢ ማኣዳሢና ጊቲማሢያ ዒንሢኮ ዒዛኬ።

10 ዓኣሮኔ ዓሲዮቴ! ናንጊና ናንጋ ጎዳ ጉሙርቁዋቴ፤

ዒንሢ ማኣዳሢና ጊቲማሢያ ዒንሢኮ ዒዛኬ።

11 ዒንሢ ናንጊና ናንጋ ጎዳ ዒጊጫ ዓሳ ዒዛ ጉሙርቁዋቴ፤

ዒንሢ ማኣዳሢና ጊቲማሢያ ዒንሢኮ ዒዛኬ።

12 ናንጊና ናንጋ ጎዳ ኑም ማላኔ፤

ዓንጂያ ኑና ዓንጃንዳኔ፤

ዒዚ ዓኣሮኔንታ ዒስራዔኤሌንታ ማኣሮ ዓንጃንዳኔ።

13 ናንጊና ናንጋ ጎዳ ዒዛ ዒጊጫዞንሢ ቢያ

ዼኤፖንታ ዻኮንታ ዓንጃንዳኔ። ✝115፡13 ዮሃ. ፆፔዻ 11፡18፤ 19፡5።

14 ናንጊና ናንጋ ጎዳ ዒንሢንታ ዒንሢኮ ናኣቶንታ

ዓንጂ ዒዚ ዒንሢ ሚርጊሾንጎ!

15 ጫሪንጮንታ ሳዖንታ ማዤ፥ ናንጊና ናንጋ ጎዳ

ዒንሢ ዓንጆንጎ!

16 ጫሪንጮኮ ጫሪንጫ ናንጊና ናንጋ ጎዳሮኬ፤

ሳዖ ጋዓንቴ ዓሲም ዒዚ ዒንጌኔ።

17 ናንጊና ናንጋ ጎዳ ጋላታዞንሢ

ሃይቄ ዓሶቱዋሴ፤

ዚቲዮ ጌዔ፥ ዱኡፖ ጌሌ ዓሶዋቱዋሴ።

18 ሃናፓ ዓርቃዖ ዒዛ ዓንጃንዳዞንሢ ኑናኬ።

ናንጊና ናንጋ ጎዳም ጋላታ!