1 ሮኦቶ ዼኤቢንቲ ዓልቃ ዋኣሢ ዴንቃኒ ኮዓሢጉዲ

ፆኦሲዮ! ታ ሼምፓሢያ ኔና ዴንቃኒ ዼኤቢንቲ ኮዓኔ።

2 ታ ሼምፓሢ ፆኦሲ፥ ናንጊና ባይቁዋ ፆኦዛሢ ዼኤቤኔ፤

ዓይዲ ታኣኒ ሄሊ ፆኦሲኮ ዓኣፖ ካሮ ዛጋንዳይ?

3 ዓሳ ቢያ፦ «ፆኦዛሢ ኔኤኮ ዎካዳዖ?» ጋዓ ዎዶና

ዓቢፃ ታኣኮ ሮኦሮንታ ዋንቶዋ ሙኡዚ ማዔኔ።

4 ታኣኒ ዓሶኮ ዓርና ማዒ

ሚርጌ ዓሶና ዎላ ፆኦሲ ማኣሪ ዴንዳኔ፤

ቦንቾ ኬሎ ቦንቻ ዓሳ ዓይኑሞና ዒላሺሢና

ናንጊና ናንጋ ጎዳ ጋላታኔ፤

ዬያ ታኣኒ ሚናኣ ናንጎ ማላዛ

ዒና ታኣኮ ዖዪሢና ዋኣፃኔ።

5 ታኣኒ ዓይጎሮ ዎዛ ቲቃንዳይ?

ዓይጌንዴሮ ታ ሜታዻንዳይ?

ታኣኒ ፆኦሲ ጉሙርቃኔ፤

ዒዚ ታና ማኣዳሢሮዋ ታ ጋላታኔ።

6 ታ ፆኦዛሢዮ! ታ ዎዛ ቲቄኔ፤

ሼምፔላ ታኣኮ ዖዬኔ፤

ዬያሮ ዮርዳኖሴንታ ዓርሞኒዔሜ ዓጮይዳ ዓኣ

ሚዛሬ ዹካ ዴዒ ታ ኔና ማላኔ።

7 ኔኤኮ ሶኦሪንታ ዋኣፆኮ ጉኡሚፃፓ ዔቄያና

ፔቴ ቁልባ ባጎ ቁልቦ ዔኤላኔ፤

ኔኤኮ ዋኣፆ ጉዳሢ ዢባራ ዱኡኪ ታና ባይዜኔ።

8 ናንጊና ናንጋ ጎዳ ፔ ማኣሪፆ ሮኦራ ዳካኔ፤

ዋንቶ ታ ዒዛም ዓይናዻ ዓይኑሞ ታኣኮ ዓኣኔ፤

ታ ናንጎኮ ፆኦዛሢያ ታ ሺኢቃኔ።

9 ታኣኒ ታ ፆኦዛሢ፥ ታኣኮ ላላሢም፦

«ኔኤኒ ታና ዓይጋ ዋሌይ?

ሞርካ ታና ዋኣዪሴም ዓይጋ ታ ዖዪ ሃንታዖ?» ጋዓንዳኔ።

10 ሞርካ ታኣኮ ቢያ ዎዴ፦ «ፆኦዛሢ ኔኤኮ ዎካ ዓኣዖ?» ጌዒ

ቶኦቻ ዎዶና ሜጌፃኣ ታኣኮ ዓቱዋዖ ቆፃኔ።

11 ታኣኮ ሼምፔሌ ዓይጋ ኔ ዖያይ?

ዓይጋ ኔኤኒ ሻሊንታይ?

ጉሙርቂፆ ዎዞ ኔኤኮ ፆኦዛሢዳ ማሄ፤

ታና ዓውሳያ ማዔ ታ ፆኦዛሢ ሃጋኣ ታኣኒ ጋላታንዳኔ።