ዓይኑሞ ሱኡጋሢ ዓይሣ ጎይፆ ሳሊ ሻሺና ዴንሦ ጎኦላና ዓይናዺንታ ዳውቴ ዓይኑሞ
ማኣዶ ዴንቃኒ ሺኢቂንቴ ሺኢጲሢ
1 ናንጊና ናንጋ ጎዳሢዮ! ማኣዴ፤
ዓሶ ባኣካ ፔቴታዖ ጉሙርቂንታ ዓሲ ጴዹዋሴ።
2 ዎሊም ዔያታ ሉሉኡቃኔ፤
ላምዖ ዒኔና ማዒ ዎሊ ጌሺ ዔያታ ጌስታኔ።
3 ጌሺሢ ጌሻ ዻንጋንታ ሃይሴ ሚርጊሻ ዒንዲርሲያ
ናንጊና ናንጋ ጎዳ ባይዞንጎ!
4 ዔያታ፦ «ኑኡኒ ጌስቲፆና ኮዔ ባኣዚ ዴንቃንዳኔ፤
ሼኔ ጌዔ ጎይሢያኣ ኑኡኒ ጌስታንዳኔ፤
ላኣጋኒ ኑና ዳንዳዓሢ ዖናዳይ?» ጋዓኔ።
5 ናንጊና ናንጋ ጎዳ ጋዓንቴ
«ሜታዼ ዓሳ ካራ ባይዜኔ፤
ዳውሲንቴ ዓሳኣ ሜታሢ ዺቡሞፓ ዔቄያና ዚኢሊንታኔ፤
ዬያሮ ዔያቶ ሄላ ባካፓ ጎኦቢ ቃዛኒ ታ ዔቃንዳኔ» ጋዓኔ።
6 ናንጊና ናንጋ ጎዳኮ ሃጊ ማዓንዳ ዎዞ ቃኣላ ጉሙርቂንታያኬ፤
ናኣቦ ታሚዳ ላንካይ ማይንቲ ሼኤሾና ቢራ ዓንጊጉዲ ጌኤሺኬ።
7 ናንጊና ናንጋ ጎዳሢዮ!
ኔኤኒ ቢያ ዎዴ ኑና ካፔ፤
ፑርታ ማዔ ሃያ ዎዶ ዓሶይዳፓ ኔ ኑና ዓውሴ።
8 ፑርታ ማዺሢ ዓሲ ጋላቲሳ ዎዴይዳ
ፑርቶ ማዻ ዓሳ ዖቶርቂ ታኣካኔ።