ዓይኑሞ ማፃኣፖ 53

ዓይኑሞ ሱኡጋሢ ዓይሣ ጎይፆና ዔራቶና ካላሊንቴ ዳውቴ ዓይኑሞ

ዓሲኮ ፑርቱሞ

1 ዔኤያ ዓሲ ፔ ዒናና «ፆኦሲ ባኣሴ» ጋዓኔ፤

ዬያታ ፑርታ ዓሲኬ፤

ማዻ ዔያቶኮ ሻኣካያኬ፤

ዔያቶ ባኣካ ፔቴታዖ ኮሺ ማዻይ ባኣሴ።

2 ማሊ ጶቂሣ ዓሲና ፆኦሲ ኮዓ ዓሲያ ዓኣቴ ዛጋኒ

ዒዚ ጫሪንጫፓ ዓሶ ዛጌኔ።

3 ጋዓንቴ ቢያሢ ዣኣሌኔ፤

ዔያታ ፔቴ ማዒያ ፑርቴኔ፤

ዔያቶይዳ ፔቴታዖ ኮሺ ባኣዚ ማዻይ ባኣሴ። ✝53፡3 ሮሜ 3፡10-12።

4 ዓሲ ካሣ ሙዓሢጉዲ ዴሮ ታኣኮ ሙዓ ዓሳ

ታና ዔኤሊ ዔሩዋ ዓሳ

ዬያታ ፑርቶ ማዻ ዓሳ

ፔቴታዖ ዔኤቢ ዛጊ ዔሩዋዓዳ?

5 ፆኦሲ ፔ ዴሮ ሞርኮ ሜንሤሢሮ

ዎኖ ዎዳፓኣ ባሼ ዒጊቹሞ ዔያታ ዓርቄኔ፤

ዒዚ ዔያቶ ዒፄሢሮ ጋፒ ዔያታ ቦርሲንታንዳኔ።

6 ፂዮኔይዳፓ ዒስራዔኤሌም ዻቂንታ ዬዓያታቴ ዓይጎ!

ፆኦሲ ፔ ዴሮኮ ዲዒንቴ ባኮ ማሃ ዎዶና

ያይቆኦቤ ናኣታ ዎዛዻንዳኔ፤

ዒስራዔኤሌ ዴራኣ ኮሺ ዎዛዻንዳኔ።