1 ናንጊና ናንጋ ጎዳ ጋላቱዋቴ!

ዒዚ ኮሺታሢሮና ናሹማኣ ናንጊና ናንጋያታሢሮ

ዒዛ ጋላቱዋቴ! ✝106፡1 1ፆኦሲ. ዓሃኬ 16፡34፤ 2ፆኦሲ. ዓሃኬ 5፡13፤ ዒዝ. 3፡11፤ ዓይኑ. 100፡5፤ 107፡1፤ 118፡1፤ 136፡1፤ ዔር. 33፡11።

2 ናንጊና ናንጋ ጎዳ ማዻ ዼኤፖ ማዾ ዛሎ

ዖኦኒ ኬኤዛኒ ዳንዳዓይ?

ዒዛም ማዓ ጋላቶዋ ቢያ ዖ ኬኤዚ ጋፒሳንዳይ?

3 ፒዜ ዎጌ ዎቡዋጉዲ ካፓዞንሢ

ቢያ ዎዴ ፂሎ ማዔዞንሢ

ዓንጂንቴያኬ።

4 ናንጊና ናንጋ ጎዳሢዮ!

ኔኤኮ ዴሮ ኔ ማኣዳ ዎዶና ማሊ ጶቂሤ፤

ዔያቶ ኔ ዓውሳ ዎዶና ታና ማሌ።

5 ዬይያ ኔኤኒ ዶኦሬዞንሢኮ ዖርጎቹሞ ታ ዛጋኒ

ኔ ዴሮ ዎዞና ታ ዎዛዻኒ

ኔ ዓሶና ዎላ ታ ኔና ሄርሻንዳጉዲኬ።

6 ኑኡኒ ኑ ዓዶንሢጉዲ ጎሜ ማዼኔ፤

ኑ ዻቢንቴኔ፥ ፑርታ ማዼኔ።

7 ኑኡኮ ዓዶንሢ ጊብፄ ዓጫ ዓኣዖ

ኔ ዎልቆና ማዺንታ ዓኮ ባኮ ማሊ ጶቂሢባኣሴ፤

ኔኤኮ ሚጪንቲፆ ሚርጉሞዋ ዔያታ ማሊባኣሴ፤

ዞቄ ባዞ ዓጫ ዋይዚ ኔኤም ዒፄኔ። ✝106፡7 ኬሲ. ማፃ 14፡10-12።

8 ዒዚ ጋዓንቴ ፔ ዎልቆኮ ዼኤፑሞ ቤኤዛኒ

ፔ ሱንፆሮ ዔያቶ ዒ ዓውሴኔ።

9 ዞቄ ባዞ ዒ ጎሬኔ፤

ባዛኣ ሚጬኔ፤

ዓሲ ናንጉዋ ዳውሌ ቦኦሊና ዓኣዾሢጉዲ

ዋኣፆ ዔቶኮ ባኣኪና ዔኪ ዔያቶ ዒ ዓኣዼኔ።

10 ዔያቶ ዒፃ ዓሶ ኩጫፓ ዒ ዓውሴኔ፤

ሞርኮ ኩጫፓኣ ዒ ሄሊ ዓይሴኔ።

11 ሞርኮ ዔያቶኮ ዋኣፃ ሙዔኔ፤

ዬያ ሞርኮይዳፓ ፔቴታዖ ቶሊ ዓቲባኣሴ።

12 ዬካፓ ዔያታ ዔያቶም ኬኤዞና ቃኣሎ ጉሙርቄኔ፤

ዓይኑሞናኣ ዒዛ ጋላቴኔ። ✝106፡12 ኬሲ. ማፃ 14፡31። ✝106፡12 ኬሲ. ማፃ 15፡1-21።

13 ጋዓንቴ ዔያታ ዒ ማዼ ባኮ ቤዞና ዋሌኔ፤

ዒዛኮ ዞሮና ዓኣዻኒ ጊቢ ዳንዳዒባኣሴ።

14 ዓሳ ናንጉዋ ዳውሎይዳ ሱኡካዺሢ ዔያታ ዓርቄኔ፤

ዒኢካ ፆኦሲ ዎይታቴያ ጌዒ ዒዛ ዛጌኔ።

15 ዒዚ ዔያታ ዒዛ ዖኦጬሢ ዔያቶም ዒንጌኔ፤

ጋዓንቴ ዔያቶ ዖኦፒሳ ዶርዓ ዳኪንቴኔ። ✝106፡15 ፓይ. ማፃ 11፡4-34።

16 ጉርዶይዳ ዔያታ ዓኣዖ

ሙሴንታ ፆኦሲም ዱማዼ ዓኣሮኔንታ

ማዻ ማዾ ዛጊ «ዬይ ዔያቶም ሌሊ ዓይጋ ማዔይ» ጌዒ ማሌኔ።

17 ሳዓ ዳርዒ ዳኣታኔ ጎዖሢ ዔኤዼኔ፤

ዓቤሮኔንታ ዒዛኮ ማኣሮ ዓሶዋ ጉኡፔኔ።

18 ዔያቶኮ ቡኪንቶ ባኣካ ታሚ ዔኤቴኔ፤

ሎስታሢ ፑርቶ ዓሶ ሚቺ ባይዜኔ። ✝106፡18 ፓይ. ማፃ 16፡1-35።

19 ዔያታ ኮሬቤ ጌይንታ ቤዛ ዓኣዖ ዎርቄና ናኣሪ ኮሼኔ፤

ዬያ ዓንጎ ሼኤሺ ማዦና ፆኦዞም ዚጌኔ።

20 ዔያቶኮ ቦንቾ ማዔ ፆኦዛሢ ዔያታ

ማኣቶ ሄንቃ ቆልሞ ማላ ባኮና ላኣሜኔ።

21 ጊብፄ ዓጮይዳ ዼኤፒ ባኣዚ ማዺ

ዔያቶ ዓውሴ ፆኦዛሢ ዔያታ ዋሌኔ።

22 ዒዚ ጋዓንቴ ካኣሜ ዓጮይዳ ዲቃሣ ማዾ

ዞቄ ባዞይዳኣ ዲቃሢ ሄርሺሳ ባኣዚ ማዼኔ።

23 ዬያሮ ዱማ ዱማ ዎዻ ባኮና

ዔያቶ ዒ ባይዙዋጉዲ ማዻኒ

ዒዚ ዶኦሬ ሙሴ ፆኦሲንታ ዔያቶንታ ባኣኮ ጌሊ

ዒዛኮ ቤርታ ዔቂባኣያታቴ

ዔያቶ ዒ ባይዛንዳሢ ኬኤዜያኬ። ✝106፡23 ኬሲ. ማፃ 32፡1-14።

24 ዬካፓ ዔያታ ኮዦ ዓጬሎ ቶኦቼኔ፤

ዒዚ ዔያቶም ዒንጌ ዎዞ ቃኣሎዋ ጉሙርቂባኣሴ።

25 ዔያታ ዓፒሎና ማዢንቴ ፔ ማኣራ ማኣራ ጉንዱሜኔ፤

ናንጊና ናንጋ ጎዳሢ ዑኡዞዋ ዋይዚባኣሴ።

26 ዓሳ ናንጉዋ ዳውሎ ቦኦላ ዔያቶ ኬኤራኒ

ኩጮ ፔኤሲ ዔቂሲ ዒ ጫኣቄኔ። ✝106፡26 ፓይ. ማፃ 14፡1-35።

27 ዜርፆ ዔያቶኮ ዒ ሜሌ ዴሮ ባኣካ ሃሻኒ

ዱማ ዱማ ዓጮ ዔያቶ ላኣላኒ ጫኣቄኔ። ✝106፡27 ሌዊ. ዓኬ 26፡33።

28 ዔያታ ፔና ቢዔልፔጎሬና ዎላ ፔቴ ማሄኔ፤

ሼምፓባኣ ፆኦዞም ሹኮና ዓሽኮዋ ሙዔኔ።

29 ዔያታ ፔ ማዾና ናንጊና ናንጋ ጎዳ ዻጋሴኔ፤

ዱማ ዱማ ባይዛ ባካ ዔያቶ ሄሌኔ።

30 ጋዓንቴ ፒንሃሴ ዔቂ

ዻቢንቶ ማዼ ዓሶ ዎዼ ዎዶና

ዱማ ዱማ ዎዻ ባካ ዎዺፆ ሃሼኔ።

31 ዬይያ ሾይንቲፓ ሾይንቲ ሄላንዳኣና

ናንጊና ዒዛም ፂሉሞ ማዒ ፓይዲንቴኔ።

32 ዬያጉዲ ሃሣ ሜሪባ ጌይንታ ዋኣፆ ዓጫ

ናንጊና ናንጋ ጎዳ ዔያታ ዻጋሴኔ፤

ሙሴያ ዬያ ዛሎና ሜቶይዳ ኬዴኔ።

33 ሙሴ ዔያታ ዻጋሴሢሮ

ዒዚ ኮይሱዋ ዑኡሲ ፔ ዻንጋፓ ኬሴኔ። ✝106፡33 ፓይ. ማፃ 20፡2-13።

34 ናንጊና ናንጋ ጎዳ ዔያቶ ዓይሤ

ሜሌ ዴሮ ባይዚፆ ዔያታ ሃሼኔ።

35 ዔያታ ሜሌ ዴሮና ዎላ ሲኢሪንቴኔ፤

ዬይ ዓሳ ማዺ ሃንታ ባኮ ዔያታኣ ዔሬኔ።

36 ዬያቶኮ ካኣሽኮ ፆኦዞዋ ዔያታ ካኣሽኬኔ፤

ዬይ ዔያቶም ፒሮ ማዔኔ። ✝106፡36 ሱኡጎ. ማፃ 2፡1-3፤ 3፡5-6።

37 ዔያቶኮ ዓቲንቆንታ ዉዱሮ ናኣቶንታ

ፑርቶ ዓያኖም ዔያታ ሹኬኔ። ✝106፡37 2ካኣቶ. ማ 17፡17።

38 ዔያቶኮ ዓቲንቆንታ ዉዱሮ ናኣቶንታኮ ጌኤዦ ሱጉፆ

ሜሌ ካኣናኔ ፆኦዞም ላኣሊፆና

ሳዔሎ ሱጉሢ ሳዓ ማሂ ዔያታ ዒኢሴኔ። ✝106፡38 ፓይ. ማፃ 35፡33።

39 ዔያታ ፔ ማዾና ዒኢቴኔ፤

ዞኦስካ ኮኦማ ላኣሊጉዲ ፔ ፆኦዛሢም ዔያታ ጉሙርቂንቲባኣሴ።

40 ዬያሮ ናንጊና ናንጋ ጎዳኮ ዻጋ

ዒዛ ዴሮ ዑፃ ዔኤቴኔ፤

ፔ ዓሶዋ ዒ ሻኣኪንቴኔ። ✝106፡40 ሱኡጎ. ማፃ 2፡14-18።

41 ዔያቶ ዒዚ ሜሌ ዴሮም ዓኣሢ ዒንጌኔ፤

ሞርካ ዔያቶኮ ዔያቶ ዎይሣያ ማዔኔ።

42 ሞርካ ሄርቂ ዔያቶ ዎሣያ ማዔኔ፤

ፔ ቢታንቶኮ ዴማ ማሄኔ።

43 ዒዚ ሚርጌ ዎዴና ዔያቶ ሄሊ ዓውሴኔ፤

ዔያታ ጋዓንቴ ዋይዚ ዒፂሢ «ኑ ሃሻዓኬ» ጌዔኔ፤

ፔ ጎሞና ዔያታ ዻውሲንቴኔ።

44 ጋዓንቴ ዒላቶ ዔያቶኮ ዒ ዋይዜ ዎዶና

ሜታሢ ዔያቶኮ ዛጌኔ።

45 ዔያቶሮ ጌይጋፓ ጫኣቄ ጫኣቁሞ ዒ ማሌኔ፤

ዒዛኮ ዓኣ ሚጪንቲፆ ሚርጉሞጉዴያ

ዻጋፓ ዒ ማዔኔ።

46 ዔያቶ ዲዒ ዔኬ ዓሳ ቢያ

ሚጪንታንዳጉዲ ዒ ማዼኔ።

47 ናንጊና ናንጋ ጎዳ ማዔ ኑ ፆኦዛሢዮ! ዓውሴ ኑና፤

ኔኤኮ ዱማዼ ሱንፆም ጋላታ ኑ ሺኢሻንዳጉዲ

ኔና ኑ ኬኤዚ ሄርሻንዳጉዲ

ዴሮ ባኣካፓ ቡኩሲ ኑና ኔ ዔኪ ዬዔኔ።

48 ናንጊና ናንጋ ጎዳ ማዔ ዒስራዔኤሌ ፆኦዛሢ

ናንጊፓ ናንጊ ሄላንዳኣና ዓንጂንቶንጎ!

ዴራ ቢያ ዓኣሜን ጎዖንጎ፤

ናንጊና ናንጋ ጎዳ ጋላቱዋቴ! ✝106፡48 1ፆኦሲ. ዓሃኬ 16፡35-36።