ፆኦሲዳፓ ማኣዶ ዴንቃኒ ሺኢቂንቴ ሺኢጲሢ

1 ፆኦሲዮ! ዒና ታኣኮ ኔና ጉሙርቂ ሂርጉዋሴ፤

ታኣኒ ዓይናዻንዳኔ፤

ጎኔ ዒናፓኣ ታ ዓይናዻንዳኔ።

2 ሚርጌ ሻዦ ዴንሢ ዋርቆ ጎኦሎንታ

ሜሌ ዓይኑሞ ዓንጋማኣ ዔቁዋቴ፤

ታኣኒያ ሚኢሪ ዔቃንዳኔ።

3 ናንጊና ናንጋ ጎዳሢዮ! ዴሮ ባኣካ ታ ኔና ጋላታኔ፤

ዓሶ ባኣካኣ ታ ኔኤም ዓይናዻኔ።

4 ሚጪንቲፃ ኔኤኮ ጫሪንጫፓ ዑሣ ዼኤፒኬ፤

ጉሙርቂንቲፃኣ ሌካ ሻኣሮ ሄላኔ።

5 ፆኦሲዮ! ኔኤኒ ጫሪንጫፓ ዑሣ ሌካ ዼግ ዼጊ ጌዔ፤

ቦንቻ ኔኤሲ ሳዖ ዑፃ ቢያ ማዖንጎ።

6 ኔ ናሽካ ዴራ ዻቃንዳጉዲ

ኔኤኮ ሚዛቆ ኩጮና ታና ዓውሴ፤

ታኣም ዋይዜ።

7 ፆኦሲ ፔኤኮ ዱማዼ ማኣራፓ ሂዚ ጌዔኔ፦

«ታኣኒ ባሺ ሴኬሜ ዶኦጮ ፓቃንዳኔ፤

ሱኩቴ ዶኦጮዋ ታ ዴሮም ታ ጊሽካንዳኔ።

8 ጌሌዓዴንታ ሚናሴንታ ታኣሮኬ፤

ዔፕሬኤሜ ታኣኮ ዖሎሮ ቶኦካ ዓጎ ዓንጎ ቆኦባሢኬ፤

ዪሁዳ ታኣኮ ካኣቱሞ ኮኦሎኬ።

9 ሞዓኣቤ ታኣኮ ዋኣፆ ማስቶ ጎንጎኬ፤

ዔዶኦሜይዳ ታ ዱርዞ ታኣኒ ኬሲ ጌሣንዳኔ፤

ፒሊስፄኤሜ ዓሶ ባሺ ታኣኒ ሜርታንዳኔ።»

10 ኬልቂ ዲርቆና ካታሜሎ ባንሢ ዖ ታና ዔኪ ዓኣዻንዳይ?

ዔዶኦሜያ ዖ ታና ሄሊሳንዳይ?

11 ፆኦሲዮ! ኬኤሪ ታና ሃሼሢ ኔናቱዋዓዳ?

ኑኡኮ ዖላ ዓሶና ዎላ ኬዞ ኔ ዒፄኔ።

12 ሃሢያ ዓሲ ዓሲ ዓውሳኔ ጎዖሢ ጉሪኬ፤

ኑ ሞርኮ ኑ ባሻንዳጉዲ ኔ ኑና ማኣዴ።

13 ፆኦሲ ኑና ማኣዳዛ ዶዲ ኑ ማዓንዳኔ፤

ኑ ሞርኮ ኑ ቶኮ ዴማ ሄርቂሳንዳሢ ዒዛኬ።