1 ታኣኮ ዒላቶንታ ሺኢጲፆዋ ዋይዜሢሮ

ናንጊና ናንጋ ጎዳ ታ ናሽካኔ።

2 ዋዮ ፔኤሲ ዒ ታ ባንሢ ማሄሢሮ

ታ ናንጎ ዎዶ ቢያይዳ ታ ዒዛ ባንሢ ዒላታንዳኔ።

3 ሃይቢ ፒራ ታና ዓርቄኔ፤

ዱኡፖኮ ዒጊቺፃ ታና ሜታሴኔ፤

ዖዪሢንታ ሜቶንታ ታና ባሼኔ።

4 ታኣኒ ናንጊና ናንጋ ጎዳ ሱንፆ ዔኤላዖ፦

«ናንጊና ናንጋ ጎዳሢዮ! ታኣኮ ሼምፓሢ

ኔ ዓውሳንዳጉዲ ታ ሺኢቃኔ» ጌዔኔ።

5 ናንጊና ናንጋ ጎዳ ኮሺ፥ ሃሣ ፂሎኬ፤

ኑ ፆኦዛሢ ሚጪንታያኬ።

6 ናንጊና ናንጋ ጎዳ ዒና ሼሌዔዞንሢ ካፓኔ፤

ታኣኒ ሚርጌና ሜታዺ ዓኣንቴ ዒ ታና ዓውሴኔ።

7 ናንጊና ናንጋ ጎዳ ኮሺ ባኣዚ ኔኤም ማዼሢሮ

ታ ሼምፔሌ! ኔኤኮ ሃውሾሢ ባንሢ ማዔ።

8 ዒዚ ሼምፓሢ ታኣኮ ሃይቢፓ

ዓኣፖዋ ታኣኮ ዓቢሢዳፓ

ቶኮ ታኣኮ ዹቆይዳፓ ዓይሴኔ።

9 ዬያሮ ሼምፔና ዓኣ ዓሳ ናንጋ ቤዛ

ናንጊና ናንጋ ጎዳ ኮራ ታ ናንጋንዳኔ።

10 «ኮሺ ታ ሜታዼኔ» ጌዔ ዎዶናታዖ

ኔና ጉሙርቂፆ ታ ሃሺባኣሴ። ✝

11 ካራ ታኣም ባይቄ ዎዶና

«ዓሲ ቢያ ሉኡዚኬ» ታ ጌዔኔ።

12 ዒዚ ታኣም ማዼ ኮዦ ባኮሮ ቢያ

ናንጊና ናንጋ ጎዳም ታ ዓይጎ ጪጋንዳይ?

13 ናንጊና ናንጋ ጎዳ ታና ዓውሴሢሮ ጋላታንዳኔ፤

ዎይኖ ዑዦ ዒንጊሢ ማሂ ታ ዒዛም ሺኢሻንዳኔ።

14 ቡኬ ዴሮ ቢያሢ ቤርታ ኬስኪ

ታ ናኣቤ ናኣቦ ኩንሣንዳኔ።

15 ፆኦሲም ዱማዼ ዓሶኮ ሃይባ

ናንጊና ናንጋ ጎዳ ቤርታ ቦንቺንቴያኬ።

16 ናንጊና ናንጋ ጎዳሢዮ! ታኣኒ ኔኤኮ ዓይላሢኬ፤

ታ ኔ ዓይሌሎ ናኣዚ፥ ኔኤም ማዻሢኬ፤

ታኣኮ ቱኡዛፓ ኔ ታና ቡሌኔ።

17 ታ ኔኤም ዒንጎ ባኣዚ ማሂ ጋላታ ሺኢሻኔ፤

ሱንፆዋ ኔኤኮ ታ ዔኤላኔ።

18 ቡኬ ዴሮ ቢያሢ ቤርታ

ናንጊና ናንጋ ጎዳም ታ ናኣቤ ናኣቦ ኩንሣንዳኔ።

19 ዬሩሳላሜ! ታኣኒ ኔ ጋራ

ናንጊና ናንጋ ጎዳ ማኣሮኮ ዓሳ ቡካ ጶኦካ

ዬያ ማዻንዳኔ።

ናንጊና ናንጋ ጎዳም ጋላታ!