1 ናንጊና ናንጋ ጎዳሢዮ! ኔ ታና ሙሪ ዛጊ ዔሬኔ።

2 ታኣኒ ዴዓኣና ማዖም ዔቃኣና ኔ ታና ዔራኔ፤

ታኣኮ ማሊፆ ሃኬ ዓኣዖ ኔኤኒ ዔዔራኔ።

3 ታ ሃንታ ቤዞንታ ዴይ ሃውሻ ቤዞ ኔ ዋሉዋሴ፤

ታ ማዺ ሃንታ ባኮ ቢያ ኔ ዔራኔ።

4 ናንጊና ናንጋ ጎዳሢዮ! ታኣኒ ሃጊ ኬኤዛንዳሢኮ ቤርታ

ታ ዎዚ ጋዓኒ ጋዓቴያ ኔ ዔራኔ።

5 ታ ኮይሎይዳ ቢያ ኔኤኒ ዓኣኔ፤

ኔ ኩጮና ጎኦቢ ፑርታፓ ኔ ታና ካፓኔ።

6 ኔኤኮ ዔራታ ኮሺ ጪሊል ጋዓያኬ፤

ታኣኒ ማሊ ጶቂሢ ዔራንዳሢኮ ዑሣኬ።

7 ዓንኮዋ ታ ዓኣዺ ኔኤፓ ቶላኒ ዳንዳዑዋሴ፤

ኔ ቤርታፓ ዓንኮዋ ታ ዴንዲ ፑናንዳ ቤሲ ባኣሴ።

8 ጫሪንጮ ታ ኬስኬቶ ኔኤኒ ዒኢካ ዓኣኔ፤

ሳዖ ዴሞ ዓሶ ኮይላ ታኣኒ ጌሌቴያ ኔ ዒኢካኬ።

9 ዓባ ኬስካ ባንፆ ታኣኒ ባራኒ ዴንዴቴያ

ባዞ ዼኤፖ ሶፒ ዴንዲ ታ ናንጌቴያ፥

10 ዒኢካ ኔ ዓኣያ ማዒ ኔ ኩቻ ኔ ታና ጎቺ ሃንቲሳኔ፤

ኔኤኮ ሚዛቆ ኩጮና ኔ ታና ዶዲሺ ዓርቃኔ።

11 ታኣኒ፦ «ዹማ ታና ዓኣቺ ዓይሳንዳኔ፤

ታ ኮይላ ዓኣ ፖዓ ዹሞንጎ» ጌዔቴያ፥

12 ዹማ ኔኤኮ ዓኣፖ ዴንቂ ላኣጉዋሴ፤

ዹማ ኔ ኮይላ ሮኦሪጉዲ ፖዓኔ፤

ኔ ኮይላ ዹሚንታ ሮኦሪንታ ዱማዹዋያኬ።

13 ታና ጉቤና ማዤሢ ኔናኬ፤

ታ ዒንዶ ጎጳ ታ ዑፆ ዎላ ካንሢ ማዤሢ ኔናኬ።

14 ዲቃሢ ሄርሺሳ ጎይሢና ታ ማዢንቴሢሮ ታ ኔና ጋላታኔ፤

ኔኤኮ ማዻ ቢያ ሄርሺሲ ዲቃሣያ ማዔሢ ጋፒ ታኣኒ ዔራኔ።

15 ጴዹዋያ ማዔ ዓኣሺንቴ ቤዛ ታ ማዢንቴያና

ሳዖ ዴሞ ማዔ ቤዞይዳኣ ታ ዑፃ ፔቴይዳ ዎላ ካንሢንቴያና

ታ ዑፃ ኔ ዓኣፓፓ ዓኣቺንቲ ማዢንቴያቱዋሴ።

16 ታ ዒንዶ ጎጳ ታኣኒ ሱጉሢ ዓኣንቴ ኔ ታና ዴንቄኔ፤

ታኣም ጎዖና ኬላ ሃጊ ፔቴ ጌይ ዓርቂንቱዋንቴ

ኔኤኮ ማዝጋቦይዳ ፃኣፒንቲ ዴዔኔ።

17 ፆኦሲዮ! ኔ ታኣም ማላ ማሊፃ ኮሺ ዼኤፒኬ፤

ፓይዳኣ ኮሺ ዺባያኬ።

18 ኔ ታኣም ማላ ማሊፃ ፓይዲንቴቴ

ባዚ ዓቺ ማኣሻላፓ ባሻያኬ፤

ታኣኒ ጊንዒ፥ ጊንሣ ጴጫኣናኣ

ሃይሾ ኔ ታ ኮይላ ዓኣ ጎይሣኬ።

19 ፆኦሲዮ! ፑርቶ ዓሶ ባይዜቴራ!

ዒንሢ ሃይ፥ ሱጉፆ ዼኤቤ ዓሳ ታ ኮይላፓ ባይቁዋቴ!

20 ዔያታ ኔኤም ፑርታ ጌኤሲ ጌስታኔ፤

ኔኤኮ ሞርኬ ማዒ ኔ ሱንፆ ፑርቲሲ ዔያታ ዾንካኔ።

21 ናንጊና ናንጋ ጎዳሢዮ! ኔና ዒፃ ዓሶ ዒናፓ ታ ዒፃዓዳ?

ኔኤም ጌኤታዻ ዓሶ ኮሺ ታኣኒ ሻኣኪንታዓዳ?

22 ጉቤ ዒናፓ ጋፒ ታ ዔያቶ ዒፃኔ፤

ታ ሞርኬ ማሂ ታ ዔያቶ ዛጋኔ።

23 ፆኦሲዮ! ታና ሙሪ ዛጊ፥ ታ ዒኖ ዴንቄ፤

ታ ዎዚምታቴያ ዛጊ፥ ታ ሜታዺ ማላ ማሊፆ ዔሬ።

24 ፑርታ ጎይሢ ማላ ዒኔ ታኣኮ ዓኣቴ ዛጊ ዴንቄ፤

ናንጊና ናንጋ ጎይፆ ታ ዓኣዻንዳጉዲ ታና ዻዌ።