1 ናንጊና ናንጋ ጎዳ ታኣኮ

ፖዓሢና ዼኤሻሢናታሢሮ ዖናኣ ታ ዒጊጩዋሴ፤

ናንጊና ናንጋ ጎዳ ታ ናንጎኮ

ሺባሢታሢሮ ዖኦኒያ ታና ዒጊቹዋሴ።

2 ፑርቶ ማዻ ዓሳ ባሺ ታና ዎዻኒ ማላኔ፤

ጋዓንቴ ፔኤሮ ዔያታ ዹቂንቲ ሎኦማኔ።

3 ሚርጌ ዖላ ዓሳ ታና ማንጌታቴያ ታኣኒ ዒጊጩዋሴ፤

ታኣኮ ሞርካ ታና ዖሌታቴያ

ታኣኒ ፆኦሲ ጉሙርቂፆ ሃሻዓኬ።

4 ናንጊና ናንጋ ጎዳ ታኣኒ ፔቴ ባኣዚ ሺኢቃኔ፤

ዬና ታ ሺኢቃዛ

ታ ናንጎ ዎዶ ቢያይዳ ፆኦሲ ማኣራ ናንጋኒ

ናንጊና ናንጋ ጎዳኮ ዲቃሢ ሄርሺሳያ ማዒፆዋ ዛጋኒ

ዒዛኮ ጌኤዦ ማኣሮይዳኣ ሺኢቃኒ ዳንዳዓንዳጉዲኬ።

5 ሜታሢ ኬሎና ዒዚ ታና ፔ ሺቦ ዴማ ዓኣቻኔ፤

ዬያ ዒዛ ማኣሮኮ ጋሮይዳ ታና ዒ ጌልዚ ጌሣኔ፤

ላሌ ሹቺዳኣ ዼጊዲ ታና ዔቂሳኔ።

6 ሃሢ ታ ኮሮይዳ ዓኣ ታ ሞርኮ ዑፃ

ታኣኒ ታና ዼግ ዼጊዴኔ፤

ዎዛና ታ ዒላሺ ዒላሺ

ዒዛኮ ጌኤዦ ማኣሮይዳ ዒንጎ ዒንጊሢ ታ ሺኢሻንዳኔ፤

ዓይናዺ ዓይናዺ ናንጊና ናንጋ ጎዳ ጋላታንዳኔ።

7 ናንጊና ናንጋ ጎዳሢዮ!

ዑኡዞ ታኣኒ ዼጊዲ ዒላታኣና ኔኤኒ ዋይዜ!

ማኣሪያ ታና ማኣሬ፤ ሺኢጲፆዋ ታኣኮ ዋይዜ!

8 ዒና ታና «ዒዛኮ ዓኣፖ ካሮ ኮዔ» ጌዔኔ፤

ናንጊና ናንጋ ጎዳሢዮ! ታኣኒ ኔኤኮ ዓኣፖ ካሮ ኮዓኔ።

9 ኔኤኮ ዓኣፖ ካሮ ታጊዳፓ ማሂፖ፤

ዻጋዺ ኔ ዓይላሢ፥ ታና ኔኤፓ ሃኪሲፖ፤

ዎይቴቴያ ኔኤኒ ታኣኮ ማኣዳሢኬ፤

ታና ዓውሳ ታ ፆኦዛሢዮ!

ታና ኬኤሪፖ፥ ሃሺያ ሃሺፖ።

10 ታ ዓዶና ታ ዒንዶና ታና ሃሼቴያ

ናንጊና ናንጋ ጎዳ ታ ቶኦኮ ዛጋንዳኔ።

11 ናንጊና ናንጋ ጎዳሢዮ! ጎይፆ ኔኤሲ ታና ዔርዜ፤

ታኣኮ ሚርጌ ሞርኬ ዓኣሢሮ ኮሺ ጎይሢና ታና ዔኪ ዓኣዼ።

12 ሉኡዙሞና ማርካዻ ዓሳ ፑርቱሞ ጌስቲ ጌስቲ ታ ዑፃ ዔቄሢሮ

ታ ሞርካ ኮዓ ጎይፆ ዓኣሢ ታና ኔ ዔያቶም ዒንጊፖ።

13 ሼምፓሢና ዓኣ ዓሳ ናንጋ ሳዔሎይዳ ታ ዓኣ ዎዶና

ናንጊና ናንጋ ጎዳኮ ኮሹሞ ታ ዛጋንዳሢ ጉሙርቃኔ።

14 ናንጊና ናንጋ ጎዳ ጉሙርቄ፤

ዶዴ፥ ዎዛ ቲቂፖ፤

ናንጊና ናንጋ ጎዳ ጉሙርቄ።