1 ናንጊና ናንጋ ጎዳ ታና ማኣዳንዳጉዲ ጊቢ ዳንዳዒ ታ ካፔኔ፤

ዒዚያ ታ ባንሢ ሺሪ፥ ሺኢጲፆ ታኣኮ ዋይዜኔ።

2 ዓጊፃ ጫሬና ቶኦጶ ማዔ

ሃሊፃ ዔታፓ ዒ ታና ኬሴኔ፤

ቶኮ ታኣኮ ላሎ ሹጮ ዑፃ ዔቂሲ

ዶዲ ታ ዔቃንዳ ቤሲ ዒ ታኣም ዒንጌኔ።

3 ታ ዻንጎይዳ ዓኪ ዓይኑሞ

ኑ ፆኦዛሢም ጋላታ ዓይኑሞ ታኣም ዒ ዒንጌኔ፤

ዬያ ሚርጌ ዓሳ ዒጊጪ ዛጊ

ናንጊና ናንጋ ጎዳ ጉሙርቃንዳኔ።

4 ናንጊና ናንጋ ጎዳ ሌሊ ጉሙርቃዞንሢ

ሜሌ ፆኦዞ ካኣሽኪሮ ሺሩዋዞንሢ

ዬያ ሜሌ ፆኦዞ ጊንፆ ሃንታ

ዋይዞ ዒፃ ዓሶና ዎላ ፔቴ ማዑዋዞንሢ ዓንጂንቴያኬ።

5 ናንጊና ናንጋ ጎዳ ማዔ ታ ፆኦዛሢዮ!

ኔኤኒ ሚርጌና ዲቃሢ ሄርሺሳ ባኣዚ ኑም ማዼኔ፤

ዖኦኒያ ኔኤና ቤቃይ ባኣሴ፤

ኔኤኒ ኑም ማሌ ኮዦ ባኮ

ዖኦኒያ ፓይዲ ዔራኒ ዳንዳዑዋሴ፤

ኬኤዛኒና ሃይሳዻኒ ታ ዓርቄታቴያ

ፓይዳ ታኣም ዔርቱዋያ ማዓንዳኔ።

6 ኔኤኒ ሚቺ ዒንጎ ዒንጊፆንታ ሜሌ ዒንጊፆዋ ኮዑዋሴ፤

ቆልማ ሚቺ ዒንጎ ቤዞይዳ ሚቺንታንዳጉዲ

ጊንሣ ሃሣ ጎሞ ጌኤሻኒ ዒንጊንታ ዒንጊፃኣ

ኔኤም ዒንጊንታንዳጉዲ ኔ ኮዑዋሴ፤

ዬያ ማዾንዶ ቤዞ ዓይሢፆ ኔኤኮ ዋይዚ

ኔኤም ታ ማዻንዳጉዲ ኔ ታና ማሄኔ። ✝40፡6 ዔብ. 10፡5-7።

7 ዬያሮ ታኣኒ፦ «ዎጎ ማፃኣፖይዳ ታ ዛሎ ፃኣፒንቴ ጎይፆና

ሃይሾ ታኣኒ ሙኬኔ።

8 ታ ፆኦዛሢዮ! ማሊፆ ኔኤሲ ማዺ ኩንሣኒ ታ ኮዓኔ፤

ዎጋኣ ኔኤኮ ታ ዒኖይዳኬ» ጌዔኔ።

9 ዼኤፖ ቡኪንቶ ቤዛ ፒዜ ባኣዚ ታ ኬኤዜኔ፤

ናንጊና ናንጋ ጎዳሢዮ! ኔኤኒ ዔራሢጉዲ

ታ ኬኤዛ ባኮ ኬኤዚፆ ሃሻዓኬ።

10 ኮሹሞ ኔኤሲ ታ ዒና ታ ዓኣቻዓኬ፤

ኔኤኒ ጉሙርቂንታያና ዓውሳያ ማዔሢ ታ ኬኤዜኔ፤

ዬያ ዼኤፖ ቡኪንቶ ቤዛ ኔኤኮ ናንጊና ናንጋ

ናሹሞንታ ጎኑሞንታ ታ ዓኣቺባኣሴ።

11 ናንጊና ናንጋ ጎዳሢዮ! ኔ ማኣሪፆ ታጊዳፓ ሃኪሲፖ፤

ኔኤኮ ናሹሞንታ ናንጊና ናንጋ ጉሙርቂንቲፃኣ ናንጊና ታና ካፖንጎ።

12 ሚርጌ ሜታ ታና ዋኣዪሳኔ!

ዻቢንታ ታኣኮ ሚርጌሢሮ ዛጋኒ ታ ዳንዳዑዋሴ፤

ዬይ ታኣኮ ቶኦኮ ጋፓናፓ ባሻያኬ፤

ዬያሮ ታ ዒና ታና ዒፂ ሃሼኔ።

13 ናንጊና ናንጋ ጎዳሢዮ! ሃዳራ ታና ዓውሴ፤

ፆኦዛሢዮ! ዑካዺ ታና ማኣዴ።

14 ታና ዎዻኒ ኮዓ ዓሳ ቢያ ቦርሲንቶንጎ፤

ዔርቶ ዒፂ ካራ ዔያቶም ባይቆንጎ፤

ታና ፑርታ ባኣዚ ሄላንዳጉዲ ማላዞንሢም ቢያ

ቦርሲንቲ ማዖንጎ።