ዓይኑሞ ማፃኣፖ 61

ዓይኑሞ ሱኡጋሢ ዓይሣ ጎይፆ ጎኦላና ዓይናዺንታ ዳውቴ ዓይኑሞ

ሜቶፓ ቶሊ ኬስካኒ ሺኢቂንቴ ሺኢጲሢ

1 ፆኦሲዮ! ዒላቶ ታኣኮ ዒናፓ ዋይዜ፤

ሺኢጲፆዋ ታኣኮ ዔኬ።

2 ዒና ታኣኮ ዶጬ ዎዶና

ሳዖኮ ጋፓ ዓኣዖ ታኣኒ ኔና ዔኤላኔ፤

ታ ጊዳፓ ባሼ ዼግ ጌዔ ላላሢ ባንሢ

ዔኪ ታና ዓኣዼ።

3 ኔኤኒ ታኣኮ ፑኖ ካያሢኬ፤

ታ ሞርካፓ ታ ዓኣሺንታ ዶዲ ኬኤሌ ኔ ታኣኮ ማዔኔ።

4 ኔ ማኣሮይዳ ናንጊና ታ ናንጎም፤

ኔ ጋኣዞ ሺቦ ዴማ ታኣኒ ዔቆም።

5 ፆኦሲዮ ናኣቦ ኔ ታኣሲ ዋይዜኔ፤

ኔኤኮ ሱንፆ ዒጊጫ ዓሶም ኔ ጊኢጊሼ ዓንጆ

ታኣማኣ ኔ ዒንጌኔ።

6 ካኣቲ ናንጎይዳ ሚርጌ ሌዔ ቃሴ፤

ሚርጌ ዎዴ ዒዛ ናንጊሼ!

7 ኔ ቤርታ ናንጊና ዒ ካኣታዾንጎ፤

ዒዛ ካፓንዳጉዲ ኔኤኮ ማኣሪፆንታ ጉሙርቂንቲፆዋ

ዒዛም ጊኢጊሼ።

8 ኬላ ኬላ ኔኤም ታ ናኣቤ ናኣቦ ሺኢሺሢና

ቢያ ዎዴ ጋላታ ዓይኑሞ ታ ኔኤም ዓይናዻንዳኔ።