ፆኦሲና ዒዛኮ ዴሮና

1 ታ ዴሬዮቴ! ታ ዔርዛ ባኮ ዋይዙዋቴ፤

ታ ቃኣሎዋ ዒና ዔኩዋቴ።

2 ሃይሶ ታኣኮ ታኣኒ ኮኦኪንሢና ዓርቃንዳኔ፤

ሚናፓ ዓኣቺ ዓማሎ ዓማሊና ታ ኬኤዛንዳኔ። ✝78፡2 ማቲ. 13፡35።

3 ዬይ ኑኡኒ ዔሬሢና ዋይዜሢኬ፤

ኑ ዓዶንሢያ ኑኡም ኬኤዜሢኬ።

4 ዬንሢ ባኮ ኑ ናኣቶም ኑ ዓኣቻዓኬ፤

ናንጊና ናንጋ ጎዳኮ ዎልቆ ዛሎ

ዒዚ ማዼ ዼኤፖ ማዾና

ዒ ፔ ዎልቆና ማዼ ዲቃሢ ሄርሺሳ ባኮ

ሙካ ሾይንቶም ኑ ኬኤዛንዳኔ።

5 ዒዚ ያይቆኦቤም ዳምቤ ኬሴኔ፤

ዒስራዔኤሌይዳኣ ዎጌ ዒ ጌሤኔ፤

ናኣቶ ፔኤኮ ዔያታ ዔርዛንዳንጉዲ

ኑ ዓዶንሢም ዓይሤኔ።

6 ዬያ ሙካ ሾይንታ ዔራንዳጉዲ

ዔያታ ፔ ዎዶና ዔያቶኮ ናኣቶም

ሃጊ ሾይንታዞንሢማኣ ኬኤዛንዳጉዲኬ።

7 ዬያይዶናሢሮ ዔያታ ፆኦሲ ጉሙርቃንዳኔ፤

ዒዛኮ ማዾዋ ዔያታ ዋላዓኬ፤

ዓይሢፆዋ ዔያታ ካፓንዳኔ።

8 ጋዓንቴ ዔያታ ፔ ዓዶንሢጉዲ ዋይዚፆና

ዓይሢንቲፆዋ ዒፃ፥ ዒኖዋ ፔኤኮ ፒዚሲባኣ

ዓያናኣ ፆኦሲ ጉሙርቁዋ ሾይንቲ ማዓዓኬ።

9 ሂኢዦና ዖላ ዔፕሬኤሜ ናኣታ

ሂኢዦ ዓርቄያ ማዔያታቴያ

ዖሎ ኬሎና ጊንሢም ዔያታ ማዔኔ።

10 ፆኦሲ ጫኣቄ ጫኣቁሞ ዔያታ ካፒባኣሴ፤

ዒዛኮ ዎጎ ጎይፆ ዓኣዺፆዋ ዒፄኔ።

11 ዒዚ ማዼ ማዾ

ዔያቶ ዒ ዻዌ ዲቃሣ ዓኮ ባኮዋ ዔያታ ዋሌኔ።

12 ዓዶንሢ ዔያቶኮ ፔ ዓኣፖና ዛጋንቴ

ጊብፄ ዓጫ ፆዓኔ ጌይንታ ቤዛ

ዒ ፔ ዎልቆና ማዺንታ ዓኪ ባኣዚ ማዼኔ። ✝78፡12 ኬሲ. ማፃ 7፡8—12፡32።

13 ባዞ ፓቂ ዔያቶ ዒ ፒንሤኔ፤

ዋኣፆዋ ናቲጉዲ ዔቂሴኔ። ✝78፡13 ኬሲ. ማፃ 14፡21-22።

14 ሮኦሮ ሻኣሬና ዔኪ ዔያቶ ዓኣዼኔ፤

ዋንቶዋ ቢያ ታሚ ፆምፔ ዔያቶም ፖዔኔ። ✝78፡14 ኬሲ. ማፃ 13፡21-22።

15 ዓሳ ናንጉዋ ዳውሎይዳ ላሎ ዹኡሴኔ፤

ዬካፓ ባዚ ዋኣሢጉዴ ሚርጌ ዋኣሢ ዒ ዔያቶ ዑሼኔ። ✝78፡15 ኬሲ. ማፃ 17፡1-7፤ ፓይ. ማፃ 20፡2-13።

16 ሹጮ ዼኤፓፓ ዓልቃ ዋኣሢ ዑሬኔ፤

ዋኣፆ ዎርዚጉዲ ዎይሴኔ።

17 ዔያታ ጋዓንቴ ዓሲ ናንጉዋ ዳውሎይዳ

ዼኤፖ ፆኦዛሢም ዋይዞ ዒፂፆና ጎሜ ማዺሢዳፓ ማዒባኣሴ።

18 ኮሺ ዔያቶ ዓፃሴ ሙኡዚ ዖኦጪሢና

ዔያታ ዒኖና ዔሬያታዖ «ፆኦሲ ዎይታቴያ» ጌዒ ዛጌኔ። ✝78፡18 ኬሲ. ማፃ 16፡2-15፤ ፓይ. ማፃ 11፡4-23፤31-35።

19 ፆኦሲ ዑፃ ጉንዱሚ ጌስቴሢ

«ፆኦሲ ዓሲ ናንጉዋ ዳውሎይዳ ሙኡዚ ጊኢጊሺ ዒንጋኒ ዳንዳዓ?

20 ዒዚ ላሎ ዹኡሲሢና ዋኣፆ ዲጲጉዲ ዎይሴሢ ጎኔኬ፤

ሂዴቴያ ሙኡዚ ኑም ዒንጋኒና ዓሽኪ ጊኢጊሻኒ ዳንዳዓኔ ጌይሢዳ?» ጌዔኔ።

21 ናንጊና ናንጋ ጎዳ ዬያ ዋይዛዖ ሚርጌና ዻጋዼኔ፤

ያይቆኦቤ ዑፆይዳ ታሚ ዔኤቴኔ፤

ዻጋ ዒዛኮ ዒስራዔኤሌይዳ ዔቄኔ።

22 ዔያታ ዒዛ ጉሙርቂባኣሴ፤

ዒዛኮ ዓውሲፆናኣ ጌኤቂንቲባኣሴ።

23 ዒዚ ጋዓንቴ ሎፓ ሻኣሮ ዓይሤኔ፤

ጫሪንጮኮዋ ካሮ ቡሌኔ።

24 ዔያታ ሙዓንዳጉዲ ማና ዒ ዲኢኒሼኔ፤

ጫሪንቺዳ ዓኣ ሙኡዚ ዔያቶም ዒንጌኔ። ✝78፡24 ዮሃ. 6፡31።

25 ዓሲ ኪኢታንቾ ካሦ ሙዔኔ፤

ሚሽኪ ዶምባ ዓይሳንዳያ ሄላንዳኣና

ሙዖ ዔያቶም ዒንጌኔ።

26 ጫሪንጫፓ ዓባ ኬስካ ባንፆ ዢባሮ ዒ ዔቂሴኔ፤

ዾኦሎ ባንፆ ዢባሮዋ ዔኪ ሙኬኔ።

27 ዓሽኪ ዔያቶም ዓጪጉዲ

ባራና ካፖዋ ባዞ ዓጮ ማኣሻሎጉዲ ዒ ኬይሴኔ።

28 ዔያቶኮ ጉርዶ ባኣኮይዳ

ዓፒሎና ማዢንቴ ማኣሮ ኮራኣ ኬይሴኔ።

29 ዔያታ ሚሽካንዳያ ሄላንዳኣና ሙዔኔ፤

ዔያታ ሚርጌና ዓፃዼ ባኮ ዔያቶም ዒ ዒንጌኔ።

30 ጋዓንቴ ሃጊ ሱኡካ ዔያቶኮ ማዑዋንቴ

ሙዓ ዔያቶኮ ዻንጋ ዓኣ ጎይሣ ዓኣንቴ

31 ፆኦሲኮ ጎሪንታ ዔያቶ ዑፃ ሙኬኔ፤

ዔያቶ ባኣካፓ «ኑ ዶዲኬ» ጋዓ ዓሶ ዎዼኔ፤

ሃጋ ቡኖ ማዔ ዼጌሢያ ማንፄኔ።

32 ዬይ ቢያ ማዔንቴያ ዔያታ ፔኤኮ ዻቢንቶና ዶዴኔ፤

ዒዚ ማዻ ዲቃሣ ባኮዋ ዔያታ ጉሙርቂባኣሴ።

33 ዬያሮ ዎዶ ዔያታ ፔኤሲ ጉሪ

ናንጎዋ ዲቃቲሢና ጋፒሴኔ።

34 ዒዚ ዔያቶ ዎዼ ዎዶና ዔያታ ዒዛ ኮዔኔ፤

ዒናፓ ኮዒሢና ዒዛ ባንሢ ማዔኔ።

35 ፆኦሲ ዔያቶኮ ላላሢ ማዔሢ ዔያታ ጶቂሤኔ፤

ዼኤፖ ፆኦዛሢ ዔያቶ ዓውሳሢ ማዔሢያ ማሌኔ።

36 ጋዓንቴ ዔያታ ፔ ዻንጎና ዒዛ ጌሼኔ፤

ዬያ ዻንጎና ዒዛም ዔያታ ሉኡቄኔ።

37 ዒና ዔያቶኮ ዒዛና ዶዲባኣያኬ፤

ዒዛኮ ጫኣቁሞማኣ ጉሙርቂንቲባኣሴ።

38 ዒዚ ጋዓንቴ ማኣራያ ማዔ ጎይፆና

ዻቢንቶ ዔያቶሲ ዓቶም ጌዔኔ፤

ዔያቶ ዒዚ ባይዚባኣሴ፤

ዻጎዋ ሚርጌ ዎዴ ቲኢሬኔ፤

ዱማ ዱማ ዎዻ ባኮዋ ዔያቶይዳ ዒ ኬይሲባኣሴ።

39 ኬስካዖ ማዑዋ ዢባሬጉዲ

ዔያታ ዓሲ ማዔሢያ ዒ ማሌኔ።

40 ዓሲ ናንጉዋ ዳውሎይዳ ዎማይዲ ዔያታ ዋይዞ ዒፄይ!

ዬያ ዳውሎይዳ ዎማዼ ዒዛ ዖዪሴይ!

41 ፆኦሲ ዎይታቴያ ጌዒ ላሚ ላሚ ዔያታ ዛጌኔ፤

ዒስራዔኤሌኮ ዱማዼሢያ ዔያታ ዻጋሴኔ።

42 ዔያቶ ዬኖ ዎዶና ሞርካፓ ዒ ዓውሴሢ

ዬያ ዎልቆ ዒዛኮ ዔያታ ማሊ ጶቂሢባኣሴ።

43 ጊብፄ ዓጫ ዒ ፔ ዎልቆና ማዻ ዓኮ ባኮ ማላቶ

ፆዓኔ ጌይንታ ዓሳ ናንጉዋ ዳውላ

ዒዚ ዻዌ ዲቃሢ ሄርሺሳ ማዾ ዔያታ ማሊባኣሴ።

44 ዎሮ ዋኣፆ ዔያቶኮ ዒ ሱጉሢ ማሄኔ፤

ዛሮ ዋኣፆ ዑሽካኒ ዔያታ ዳንዳዒባኣሴ። ✝78፡44 ኬሲ. ማፃ 7፡17-21።

45 ሻኣሬጉዴ ሶኦፆምቦ ዉፃሌ ዔያቶም ዒ ዳኬኔ፤

ዬይ ሶኦፆምባሢያ ዔያቶ ዻዔኔ፤

ፓንቆዋ ዔያቶም ዳኬኔ፤

ዬይያ ዓሶኮ ካራ ባይዜኔ። ✝78፡45 ኬሲ. ማፃ 8፡1-6፤ 20፡24።

46 ባቃሎ ዔያቶኮ ማኮም

ሃኣኮዋ ዔያቶኮ ዒ ዓቢሢም ዒንጌኔ። ✝78፡46 ኬሲ. ማፃ 10፡12-15።

47 ቱኮና ዎይኖ ዔያቶኮ ሻቺና

ቤሌሶ ሚፆዋ ቃኣዮና ዒ ዎዺሺ ባይዜኔ።

48 ባኣቶ ዔያቶኮ ሻቺና

ሃንጎ ቆልሞዋ ጉጉንሢና ዎዼኔ። ✝78፡48 ኬሲ. ማፃ 9፡22-25።

49 ፔኤኮ ዒ ዶዶ ዻጎ ዔያቶ ዑፃ ዳኬኔ፤

ዱማ ዱማ ዎዻ ባኮንታ ዒ ሌሊ ካኣሽኪንታኒ ኮዓ ዻጎዋ ኬይሴኔ፤

ዖሊ ባይዛ ኪኢታንቾዋ ዔያቶይዳ ዳኬኔ።

50 ጎሪንቲም ጎይሢ ዒዚ ጲሼኔ፤

ዔያቶኮ ሼምፓሢ ሃይቢዳፓ ዓውሲባኣሴ፤

ሼምፓሢ ዔያቶኮ ዱማ ዱማ ዎዻ ባኮም ዓኣሢ ዒንጌኔ።

51 ዔያቶ ዼጋቶ ዎልቆኮ ቤርቶ ማዔዞንሢ

ካኣሜኮ ዓፒሎና ኮሾና ማኣራ

ቶይዶ ናኣቶዋ ዔያቶኮ ቢያ ጊብፄ ዓጫ ዒ ጋፒሲ ዎዼኔ። ✝78፡51 ኬሲ. ማፃ 12፡29።

52 ዴሮ ፔኤኮ ዓዳ ማራይጉዲ ሄንቃኒ ኬሴኔ፤

ዓሲ ናንጉዋ ዳውሎይዳ ማራይ ጎይሢ ሄንቄኔ። ✝78፡52 ኬሲ. ማፃ 13፡17-22።

53 ኮሺና ዔያቶ ዒ ዔኪ ዓኣዼሢሮ ዔያታ ዒጊጪባኣሴ፤

ሞርኮ ዔያቶኮ ጋዓንቴ ባዛ ሙዔኔ። ✝78፡53 ኬሲ. ማፃ 14፡26-28።

54 ዒዛኮ ሚዛቆ ኩጮና ዒ ዓርቄ ዹኮ ባንሢ

ዒዛም ዱማዼ ዓጬሎዋ ዔያቶ ዒ ጌልዜኔ። ✝78፡54 ኬሲ. ማፃ 15፡17፤ ዒያ. 3፡14-17።

55 ሜሌ ዴሮ ዔያቶ ቤርታፓ ዳውሴኔ፤

ዬያ ዓሶኮ ዓጮ ዔያቶ ዴኔ ማሂ ዒዚ ጊሽኬኔ፤

ዒስራዔኤሌ ዓሶ ፃጶ ዔያቶ ሞርኮ ማኣራ ናንጊሼኔ። ✝78፡55 ዒያ. 11፡16-23።

56 ዔያታ ጋዓንቴ ዼኤፖ ፆኦዛሢ ዎይታቴያ ጌይ ዛጌኔ፤

ዋይዚያ ዒዛም ዔያታ ዒፄኔ፤

ዳምቦዋ ዒዛሲ ካፒባኣሴ። ✝78፡56 ሱኡጎ. ማፃ 2፡11-15።

57 ዔያቶኮ ዓዶንሢጉዲ ዒዛም ዋይዙዋያ ማዔኔ፤

ጉሙርሱዋ ዎቦ ሂኢሺጉዲ ዔያታ ማዔኔ።

58 ጌሜሮይዳ ሜሌ ፆኦዞ ካኣሽኮ ቤዞ ኮሺሢና

ዔያታ ዒዛ ዻጋሴኔ፤

ዓርሲ ኮሾና ሜሌ ፆኦዞ ካኣሽኪፆና

ዻጎ ዒዛኮ ዔያታ ዔቂሴኔ።

59 ፆኦሲ ዬያ ዋይዜ ዎዶና ሚርጌና ዻጋዼኔ፤

ዒስራዔኤሌ ዓሶዋ ጋፒ ዒዚ ሃሼኔ።

60 ዓሶ ባኣካ ዒዚ ዾቄ ዓፒላፓ ኮሾና ማኣሮ

ሴኤሎይዳ ፔኤኮ ዎርቆ ቤዞ ዒ ሃሼኔ። ✝78፡60 ዒያ. 18፡1፤ ዔር. 7፡12-14፤ 26፡6።

61 ዒዛኮ ዎልቆ ማላታ ማዔ ጫኣቁሞ ታኣቦቶ ዲዒሴኔ፤

ዒዛኮ ቦንቾዋ ሞርኮም ዓኣሢ ዒንጌኔ። ✝78፡61 1ሳሙ. 4፡4-22።

62 ዴሮ ፔኤሲ ዒዚ ጬንቾ ዓፓሮም ማሄኔ።

ፔ ዴሮይዳ ሚርጌና ዒ ዻጋዼኔ።

63 ዼጌሢ ዔያቶኮ ታሚ ሙዔኔ፤

ዉዱሮ ናኣቶማኣ ዔፒ ጋኣዴ ጋኣዲንቲባኣሴ።

64 ቄኤሳ ዔያቶኮ ጬንቻ ዓፓሮና ዎዺንቴኔ፤

ዔያቶ ላኣላ ዬኤካኒ ዔያቶ ዳንዳዒባኣሴ።

65 ናንጊና ናንጋ ጎዳ ጊንዓፓ ጴጫ ዓሲጉዲ

ዳጋሢ ማሤ ዓሲ ማሢንታዖ ጫርቃሢጉዲ

ጫርሺ ዓሲ ማዒ ዔቄኔ።

66 ሞርካ ዒዛኮ ባሺንቲ ጊንሢም ጳሽካንዳጉዲና

ናንጊና ጋፑዋ ቦርሲንቲ ቦርሲንታንዳጉዲ ማሄኔ።

67 ዮሴፔኮ ዓፒሎና ማዢንቴ ማኣሮ ዒዚ ሃሼኔ፤

ዔፕሬኤሜ ፃጶዋ ዒዚ ዶኦሪባኣሴ።

68 ጋዓንቴ ዪሁዳ ፃጶ

ዒዚ ሚርጌና ናሽኬ ፂዮኔ ዹኮ ዶኦሬኔ።

69 ፔኤኮ ጌኤዦ ማኣሮ ኮሺ ዼጋያ

ናንጊና ናንጋያ ማሂ ሳዖ ዒ ዶዲሺ ማዤ ጎይፆ ማዤኔ።

70 ፔኤኮ ዓይላሢ ዳውቴ ዒ ዶኦሬኔ፤

ማራቶ ሄንቆ ቤዛፓ ዒ ዔኬኔ። ✝78፡70 1ሳሙ. 16፡11-12፤ 2ሳሙ. 7፡8፤ 1ፆኦሲ. ዓሃኬ 17፡7።

71 ፔ ዴሮ ያይቆኦቤ

ዒዛ ዴኖ ማዔ ዒስራዔኤሌ ሄንቃንዳንጉዲ

ማራቶ ሄንቂፃፓ ዔኪ ሙኬኔ።

72 ዬካፓ ዒዚ ፒዜ ዒናና ዔያቶ ሄንቄኔ፤

ዔራቶናኣ ዔኪ ዔያቶ ዓኣዼኔ።