1 Nahaphap lelo Le non Mosis en, kē nēnēnē haphap mey nēwē aso nivan me. Kē et tiy haphap te, kē qeleso nototgal ēwē. Veg bege gōh, nolol a kēy olol vaga vel ēte en, nolol nan tit ak yon̄ qēt vēhte ige mey a so van sisqet Ḡod.

2 Nolol nan so tahaytēyēh tō en, togtō kēy tukēg veteg nolol, veg kēy mal wenwen nowmat, wa tō kēy tit mamayge vēhte bubug. Ba tateh. 3 Tō nolol gōh niak dēmsas kēy bubug nonoy vel ēte. 4 Veg naday ne bōlōk tam̄an wa nani tit lepyak vēhte nubug.

5 Veg bege gōh, mahē Kraēs mavan me lemyam gōh en, kē mavap van hiy Ḡod so,

Nolol wa nalen̄a en, nēk et buste,

ba nēk mētēymat ēwē nataqn̄ik.

6 Tō nēk et malaklak te veg bolol tegtegha se.*

7 Tō no mavap so, "!Ḡod, no agōh,

qele mayap gatay tō no Layapyap Yon̄!

Nok so aktig namyōs nōnōm."✝

8 Kē mavap am̄ag so, "Nolol, nalen̄a, wa nolol tegtegha se, nēk et buste, tō nēk et malaklak te aē." (Ba Nele mavayēg so kēy tagaleg.) 9 Tō me atgiy en, kē mavap so, "Ḡod, no agōh, nok so aktig namyōs nōnōm." Kē melepyak nēdēmdēm tam̄ag tō so niaktig nēdēmdēm vōyō negi. Namanig nan, Ḡod nemyōs so namgumgu non Kraēs teleh goy nolol ne Le. 10 Veg Ḡod nemyōs so gēn so yon̄. Tō Tigsas Kraēs mal ak yon̄ gēn mahē kē molol mi nataqn̄ēn vag tiwag woy veg ige del.

11 Vel qōn̄ del en, ige pris tam̄ag tig lēm̄ tēvēlgapye so ak tasga namgumgu namuy a kēy olol bubug, ba nolol nan tit lepyak vēhte nubug non ige et. 12 Ba Kraēs en, ikē nipris liwo a netegha. Kē matamgoy nubug vag tiwag woy mi nolol vitwag mey a namaymay lap. Tō me atgiy en, kē mahaghiy how lemtō non Ḡod. 13 Tō kē ninyē gaydēn̄ a Ḡod nim̄ōk tēqēl ige tavale nonon antan, tō kē tavayvay vēh how apwoy. 14 Veg bolol vitwag nen, Tigsas mak yon̄ lap qēt ige a Ḡod nemyōs so kēy yon̄.

15 Tō Nuvu Yon̄ nivasemlō galsi me hiy gēn. Am̄ag kē mavap so,

16 Welan mavap so, "Igōhkē nakavanan a nok so lep van hiy ige Juw.

Mahē vanvan tō en,

a no tōm̄ōk Nele mino lelo taqay,

wa no tayap vasem van lēdēmdēm nonoy."✝

17 Tō me atgiy en, mavap so,

"Tō no tit dēmsas lok vēhte nubug wa nehelhel le nonoy."✝

18 Mahē Ḡod nidēmveteg nubug qelegōh en, tateh olol ne bug se.

19 Sōwlē, yathithik wa yatētētek, itōk so gēn van me lengon Ḡod ba nitog mētēgteg. Veg naday non Tigsas mak tō gēn tahayveg vēh van Mahē Yon̄. 20 Veg Tigsas mukēg van nataqn̄ēn so niwak namtehal gayaq heylō namalmal a nadam goy Mahē Yon̄ nan. Wa veg kē nēh, tō namtehal nongēn nataywah. 21 Kē nitiy pris liwo nongēn a kē nam̄agoy ige sil lēm̄ non Ḡod.

22 Sōwlē, itōk so gēn van sisqet me hiy Ḡod, mi nitiy dēmdēm vitwag wa nēdēmtig mey a namaymay. Ukēg Kraēs so niak wenwen gēn alon wa aslil. Kraēs mal tetn̄eg naday nonon lelo taqangēn so lepyak namayge ne bug nongēn. Wa kē mal oh nataqn̄ēngēn mi nēbē mey nemyeyen. 23 Tig maymay lēdēmdēm a gēn vavasemlō bēdēmdēyē, wa nitog dēmdēm vōvōyō, veg Ḡod mavatvat, tō kē taktig.

24 Itōk so gēn dēmsas tow so gēn tavasusup gēn qeleave batamtam wa bemgumgu mey nēwē. 25 Gēn nitog ukukēg veteg nahayhay tiwag, qele nēmētwun yatkel et, ba hole vey biyin̄ gēn, tō vaqlēh mi nohohole vasusup vaga, veg gēn et van so nōqōn̄ non Kraēs ninognog geh me.

26 So gēn wo nēglal galsi nēhēyhēywē, ba gēn gengenyeg tasga tatag van lemyōs nongēn en, tō tateh olol bubug se. 27 Ba gēn so dēm mētēgteg goy ēwē nēvēvēg. Nēvēvēg nan ikē nep a nesew vevey tegen qelen̄ ige tavale non Ḡod.

28 Dēm tow van. So net wo mehelhel Nele non Mosis en, kēy tēvēvēg kē aē so kē tamat. Net vōyō si vētēl wo metgeh kē en, tō tateh magaysēn geh. 29 ?Ba kimi dēmdēm qeleave veg ige a kēy vayvay apwon Ēntēn Ḡod, wa mak hethet naday ne kavanan mey a mak yon̄ tō kēy, wa mohole visipteg Nuvu mey a nasgōp aē mi kē? Kēy tavan lēvēvēg mey a tiy het yeh. 30 Veg gēn nēglal so Ḡod mavap so,

No tayam lok, tō ino mahgēk tavalehyam goy.✝

Wa tō,

Welan Ḡod tēvēvēg ige sil nonon.✝

31 !Nitiy Ḡod a nēh en, mahē kē nitēy maymay net so nivēvēg kē en, ikē nage mētēgteg!

32 Dēmsas tow me am̄ag, mahē a namyeyen mavan totogyeg tō me hiy kimi en. Kimi mitig maymay tō boyon̄yon̄ninhet goy nememeh liwo. 33 Yatkel mahē ige sil ak mamayge kimi wa ak tōqtōqyeg kimi, wa yatkel mahē kimi tig tiwag lapgetō so biyin̄ ige mey a kēy akak qelenen hiy kēy. 34 Wa kimi memgaysēn tō ige a notog lēm̄ yētyēt. Tō kimi memlaklak mahē a kēy mak qēqēsyeg namlami, veg kimi nēglal vatag so namlami aē hag lōtōk mey a nitiy wē yeh a totog lap vaga.

35 Sōwlē, nitog so suwyeg yak nēdēmtig nonmi veg nayseyse liwo aē. 36 Atmi tig netnet ba ak namyōs non Ḡod, tō so kimi telep vēh nayseyse aē, qele kē mavatvat tō aē. 37 Veg Nayapyap Yon̄ wo,

Mahē mal nognog a mal nognog me

tō net a nivanvan me en, kē tavan me.

Ba tateh hap nitigoy kē.✝

38 Ba net tenenen mino tēh heylō nēdēmtig maymay.

Ba nēdēmdēm nonon wo mem̄geygey en,

tō nalo teqek tit malaklak vēhte veg kē.✝

39 Ba gēn et ige m̄egeygey te mey a tavan lep, ba igēn ige dēmtig mey a tētēy nēh lap.