1 फिर जब इंसान हुन जमीन पा बहुत जादा बड़न लग गया, अऊर उनकी पोरी हुन पैदा भई, 2 फिर परमेस्वर ख पोरिया हुन न इंसान की पोरी हुन ख देख्यो, कि वी खुबसुरत है, अर विन्ना जो-जो ख पसंद करयो उनसे बिहाव कर लियो। 3 फिर यहोवा न कयो, "मोरी आत्मा इंसान हुन से अब हमेसा लड़ई-झगड़ा करते नी रहे, काहेकि इंसान भी सरीर ही आय; ओकी ऊमर एक सव बीस साल की होयगी।" 4 वी दिन म जमीन प नपीली लोग* रहत रहा; अऊर ऐकोबाद जब परमेस्वर को बेटा इंसान हुन की पोरी हुन को जोने गया फिर उनको दुवारा जो पोरिया पैदा भया वी सुर वीर होत रहा, जिनको बारे म पुरानो जमाना से चलते आयो है। 5 जब यहोवा परमेस्वर न देखियो कि संसार म हर एक इंसान को पाप बढ़ गयो है, अर उनको मन म जो कुछ भी विचार आवा है हमेसा बुरा ही आवा है।✝ 6 अर यहोवा पृथ्वी पर इंसान ख बनानो से पछतायो, अऊर ऊ मन म बहुत नराज भयो। 7 तब यहोवा न बोल्यो, मी इंसान का जेका मीना बनायो है दुनिया से मिटा देहु; का इंसान, का जानवर, का रेंगन वाला जीव-जन्तु, का बददल म ऊड़न वाली चिड़िया, सबरा ख मिटा देहु, काहेकि मी उनका बना ख पछतऊँ है 8 पर यहोवा को किरपा अऊर ध्यान नूह पर बनयो हतो।

9 नूह को कुटुम्ब असो हतो। नूह धरमी को काम करन वालो अर ऊ बखत ख अदमी हुन से खरो हतो; अऊर नूह परमेस्वर ही को संग-संग चलत रहा। 10 अऊर नूह से सेम, हाम अऊर येपेत नाम का तीन बेटा पैदा भया। 11 वा बखत संसार परमेस्वर कि नजर म बिगड़ गयो रा, अऊर बुराई से भर गयो रहा 12 अऊर परमेस्वर न संसार पर जो ध्यान से देखियो ते का देखियो कि वा तो बिगड़ गई है; काहेकि सब इंसानहुन न अपनो अपनो चाल-चलन बिगड़ लियो है। 13 तब परमेस्वर न नूह से कयो, "मीना सबरा इंसानहुन ख खतम करन को ठान लियो है।" उनको वजे से पृथ्वी प बुराई से भर गयो है। मी पृथ्वी सहित उनका खतम कर देहु। 14 एकोलाने तू गोपेर झाड़ की लकड़ी को एक जहाज बना ला, ओमन खन हुन बनाजे, अर ओको भीतर-बाहर राल भी पोत देजो। 15 असो ढंग से तू ओका बनाजो: जहाज की लंबई तीन सव हात, चोउड़ई पचास हात, अऊर ऊँचाई तीस हात की होनू चाहिए। 16 जहाज म एक खिड़की बनाजे, अऊर ओको एक हात* ऊपर से जहाज कि छत बनाजे अऊर जहाज कि एक तरफ एक दरवाजा रखजे; अऊर जहाज म पहिलो दुसरो अऊर तीसरो छत बनाजे। 17 अऊर सुन, मी खुद जमीन पा पानी बरसाय ख सबरा इंसान हुन ख, जिनमा जीवन की साँस है, बददल को नीचू से नास करन पा है; अऊर सब पृथ्वी का रहन वाला मर जायगो। 18 पर तोरो संग मी वादा करूँ है; ऐकोलाने तू अपना पोरिया, ओरत, अऊर बहूँ समेत जहाज म भीतर जाजो। 19 अऊर सब जिन्दा जानवर म से तू एक-एक जात की दो-दो एकोमतलब एक नर अऊर एक नारी जहाज म ले जा ख, अपनो संग जिन्दो रखजो। 20 कई तरीका जात कि चिड़िया, एक-एक जात ख जानवर, अऊर एक-एक जात ख जमीन पा रेंगन वाला से न वाला, सब म से दो-दो तोरो जोने आहे, कि तू उनका जिन्दो रखे। 21 अऊर हर एक परकार को खान को खाना जो खायो जावा है, उनका तू लेका अपनो जोने जोड़ ख रखजे; जो तोरो अर उनको पेट भरन को लाने होहे 22 परमेस्वर कि या आग्या को हिसाब से नूह न करयो।